| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
11. අරණසුත්‌තවණ්‌ණනා
11. Araṇasuttavaṇṇanā
81. රණන්‌ති කන්‌දන්‌ති එතෙහීති රණා, රාගාදයො. තෙහි අභිභූතතාය හි සත්‌තා නානප්‌පකාරං කන්‌දන්‌ති පරිදෙවන්‌ති. තෙ පන සබ්‌බසො නත්‌ථි එතෙසං රණාති අරණා. නික්‌කිලෙසා ඛීණාසවා. වුසිතවාසොති වුසිතබ්‍රහ්‌මචරියවාසො. භොජිස්‌සියන්‌ති භුජිස්‌සභාවො. තෙනාහ ‘‘අදාසභාවො’’ති. සමණාති සමිතපාපසමණාති ආහ ‘‘ඛීණාසවසමණා’’ති. පුථුජ්‌ජනකල්‍යාණකාලෙ ලොකියපරිඤ්‌ඤාය, සෙක්‌ඛා පුබ්‌බභාගෙ ලොකියපරිඤ්‌ඤාය, පච්‌චවෙක්‌ඛණෙ ලොකියලොකුත්‌තරාය පරිඤ්‌ඤාය පරිඤ්‌ඤෙය්‍යං තෙභූමකං ඛන්‌ධපඤ්‌චකං පරිජානන්‌ති පරිච්‌ඡිජ්‌ජන්‌ති. ඛීණාසවා පන පරිඤ්‌ඤාතපරිඤ්‌ඤෙය්‍යා හොන්‌ති. තථා හි තෙ සාමී හුත්‌වා පරිභුඤ්‌ජන්‌ති. වන්‌දන්‌ති නං පතිට්‌ඨිතන්‌ති වුත්‌තං, වන්‌දනීයභාවො ච සීලසම්‌පන්‌නතායාති ආහ ‘‘පතිට්‌ඨිතන්‌ති සීලෙ පතිට්‌ඨිත’’න්‌ති. ඉධාති ඉමස්‌මිං ලොකෙ. ඛත්‌තියාති ලක්‌ඛණවචනන්‌ති ආහ ‘‘න කෙවලං ඛත්‌තියාවා’’තිආදි.
81. Raṇanti kandanti etehīti raṇā, rāgādayo. Tehi abhibhūtatāya hi sattā nānappakāraṃ kandanti paridevanti. Te pana sabbaso natthi etesaṃ raṇāti araṇā. Nikkilesā khīṇāsavā. Vusitavāsoti vusitabrahmacariyavāso. Bhojissiyanti bhujissabhāvo. Tenāha ‘‘adāsabhāvo’’ti. Samaṇāti samitapāpasamaṇāti āha ‘‘khīṇāsavasamaṇā’’ti. Puthujjanakalyāṇakāle lokiyapariññāya, sekkhā pubbabhāge lokiyapariññāya, paccavekkhaṇe lokiyalokuttarāya pariññāya pariññeyyaṃ tebhūmakaṃ khandhapañcakaṃ parijānanti paricchijjanti. Khīṇāsavā pana pariññātapariññeyyā honti. Tathā hi te sāmī hutvā paribhuñjanti. Vandanti naṃ patiṭṭhitanti vuttaṃ, vandanīyabhāvo ca sīlasampannatāyāti āha ‘‘patiṭṭhitanti sīle patiṭṭhita’’nti. Idhāti imasmiṃ loke. Khattiyāti lakkhaṇavacananti āha ‘‘na kevalaṃ khattiyāvā’’tiādi.
අරණසුත්‌තවණ්‌ණනා නිට්‌ඨිතා.
Araṇasuttavaṇṇanā niṭṭhitā.
ඡෙත්‌වාවග්‌ගවණ්‌ණනා නිට්‌ඨිතා.
Chetvāvaggavaṇṇanā niṭṭhitā.
සාරත්‌ථප්‌පකාසිනියා සංයුත්‌තනිකාය-අට්‌ඨකථාය
Sāratthappakāsiniyā saṃyuttanikāya-aṭṭhakathāya
දෙවතාසංයුත්‌තවණ්‌ණනාය ලීනත්‌ථප්‌පකාසනා සමත්‌තා.
Devatāsaṃyuttavaṇṇanāya līnatthappakāsanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 11. අරණසුත්‌තං • 11. Araṇasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 11. අරණසුත්‌තවණ්‌ණනා • 11. Araṇasuttavaṇṇanā
