| Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya |
৯. অরণৰিভঙ্গসুত্তং
9. Araṇavibhaṅgasuttaṃ
৩২৩. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তত্র খো ভগৰা ভিক্খূ আমন্তেসি ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ – ‘‘অরণৰিভঙ্গং ৰো, ভিক্খৰে, দেসেস্সামি। তং সুণাথ, সাধুকং মনসি করোথ; ভাসিস্সামী’’তি। ‘‘এৰং, ভন্তে’’তি খো তে ভিক্খূ ভগৰতো পচ্চস্সোসুং। ভগৰা এতদৰোচ –
323. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca – ‘‘araṇavibhaṅgaṃ vo, bhikkhave, desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –
‘‘ন কামসুখমনুযুঞ্জেয্য হীনং গম্মং পোথুজ্জনিকং অনরিযং অনত্থসংহিতং, ন চ অত্তকিলমথানুযোগমনুযুঞ্জেয্য দুক্খং অনরিযং অনত্থসংহিতং। এতে খো, ভিক্খৰে 1, উভো অন্তে অনুপগম্ম মজ্ঝিমা পটিপদা তথাগতেন অভিসম্বুদ্ধা, চক্খুকরণী ঞাণকরণী উপসমায অভিঞ্ঞায সম্বোধায নিব্বানায সংৰত্ততি। উস্সাদনঞ্চ জঞ্ঞা, অপসাদনঞ্চ জঞ্ঞা; উস্সাদনঞ্চ ঞত্ৰা অপসাদনঞ্চ ঞত্ৰা নেৰুস্সাদেয্য, ন অপসাদেয্য 2, ধম্মমেৰ দেসেয্য। সুখৰিনিচ্ছযং জঞ্ঞা; সুখৰিনিচ্ছযং ঞত্ৰা অজ্ঝত্তং সুখমনুযুঞ্জেয্য। রহোৰাদং ন ভাসেয্য, সম্মুখা ন খীণং 3 ভণে। অতরমানোৰ ভাসেয্য, নো তরমানো। জনপদনিরুত্তিং নাভিনিৰেসেয্য, সমঞ্ঞং নাতিধাৰেয্যাতি – অযমুদ্দেসো অরণৰিভঙ্গস্স।
‘‘Na kāmasukhamanuyuñjeyya hīnaṃ gammaṃ pothujjanikaṃ anariyaṃ anatthasaṃhitaṃ, na ca attakilamathānuyogamanuyuñjeyya dukkhaṃ anariyaṃ anatthasaṃhitaṃ. Ete kho, bhikkhave 4, ubho ante anupagamma majjhimā paṭipadā tathāgatena abhisambuddhā, cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati. Ussādanañca jaññā, apasādanañca jaññā; ussādanañca ñatvā apasādanañca ñatvā nevussādeyya, na apasādeyya 5, dhammameva deseyya. Sukhavinicchayaṃ jaññā; sukhavinicchayaṃ ñatvā ajjhattaṃ sukhamanuyuñjeyya. Rahovādaṃ na bhāseyya, sammukhā na khīṇaṃ 6 bhaṇe. Ataramānova bhāseyya, no taramāno. Janapadaniruttiṃ nābhiniveseyya, samaññaṃ nātidhāveyyāti – ayamuddeso araṇavibhaṅgassa.
৩২৪. ‘‘‘ন কামসুখমনুযুঞ্জেয্য হীনং গম্মং পোথুজ্জনিকং অনরিযং অনত্থসংহিতং, ন চ অত্তকিলমথানুযোগমনুযুঞ্জেয্য দুক্খং অনরিযং অনত্থসংহিত’ন্তি – ইতি খো পনেতং ৰুত্তং; কিঞ্চেতং পটিচ্চ ৰুত্তং? যো কামপটিসন্ধিসুখিনো সোমনস্সানুযোগো হীনো গম্মো পোথুজ্জনিকো অনরিযো অনত্থসংহিতো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। যো কামপটিসন্ধিসুখিনো সোমনস্সানুযোগং অননুযোগো হীনং গম্মং পোথুজ্জনিকং অনরিযং অনত্থসংহিতং, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। যো অত্তকিলমথানুযোগো দুক্খো অনরিযো অনত্থসংহিতো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। যো অত্তকিলমথানুযোগং অননুযোগো দুক্খং অনরিযং অনত্থসংহিতং, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। ‘ন কামসুখমনুযুঞ্জেয্য হীনং গম্মং পোথুজ্জনিকং অনরিযং অনত্থসংহিতং, ন চ অত্তকিলমথানুযোগং অনুযুঞ্জেয্য দুক্খং অনরিযং অনত্থসংহিত’ন্তি – ইতি যং তং ৰুত্তং ইদমেতং পটিচ্চ ৰুত্তং।
324. ‘‘‘Na kāmasukhamanuyuñjeyya hīnaṃ gammaṃ pothujjanikaṃ anariyaṃ anatthasaṃhitaṃ, na ca attakilamathānuyogamanuyuñjeyya dukkhaṃ anariyaṃ anatthasaṃhita’nti – iti kho panetaṃ vuttaṃ; kiñcetaṃ paṭicca vuttaṃ? Yo kāmapaṭisandhisukhino somanassānuyogo hīno gammo pothujjaniko anariyo anatthasaṃhito, sadukkho eso dhammo saupaghāto saupāyāso sapariḷāho; micchāpaṭipadā. Yo kāmapaṭisandhisukhino somanassānuyogaṃ ananuyogo hīnaṃ gammaṃ pothujjanikaṃ anariyaṃ anatthasaṃhitaṃ, adukkho eso dhammo anupaghāto anupāyāso apariḷāho; sammāpaṭipadā. Yo attakilamathānuyogo dukkho anariyo anatthasaṃhito, sadukkho eso dhammo saupaghāto saupāyāso sapariḷāho; micchāpaṭipadā. Yo attakilamathānuyogaṃ ananuyogo dukkhaṃ anariyaṃ anatthasaṃhitaṃ, adukkho eso dhammo anupaghāto anupāyāso apariḷāho; sammāpaṭipadā. ‘Na kāmasukhamanuyuñjeyya hīnaṃ gammaṃ pothujjanikaṃ anariyaṃ anatthasaṃhitaṃ, na ca attakilamathānuyogaṃ anuyuñjeyya dukkhaṃ anariyaṃ anatthasaṃhita’nti – iti yaṃ taṃ vuttaṃ idametaṃ paṭicca vuttaṃ.
৩২৫. ‘‘‘এতে খো উভো অন্তে অনুপগম্ম মজ্ঝিমা পটিপদা তথাগতেন অভিসম্বুদ্ধা, চক্খুকরণী ঞাণকরণী উপসমায অভিঞ্ঞায সম্বোধায নিব্বানায সংৰত্ততী’তি – ইতি খো পনেতং ৰুত্তং। কিঞ্চেতং পটিচ্চ ৰুত্তং? অযমেৰ অরিযো অট্ঠঙ্গিকো মগ্গো, সেয্যথিদং – সম্মাদিট্ঠি , সম্মাসঙ্কপ্পো, সম্মাৰাচা, সম্মাকম্মন্তো, সম্মাআজীৰো, সম্মাৰাযামো, সম্মাসতি, সম্মাসমাধি। ‘এতে খো উভো অন্তে অনুপগম্ম মজ্ঝিমা পটিপদা তথাগতেন অভিসম্বুদ্ধা, চক্খুকরণী ঞাণকরণী উপসমায অভিঞ্ঞায সম্বোধায নিব্বানায সংৰত্ততী’তি – ইতি যং তং ৰুত্তং, ইদমেতং পটিচ্চ ৰুত্তং।
325. ‘‘‘Ete kho ubho ante anupagamma majjhimā paṭipadā tathāgatena abhisambuddhā, cakkhukaraṇī ñāṇakaraṇī upasamāya abhiññāya sambodhāya nibbānāya saṃvattatī’ti – iti kho panetaṃ vuttaṃ. Kiñcetaṃ paṭicca vuttaṃ? Ayameva ariyo aṭṭhaṅgiko maggo, seyyathidaṃ – sammādiṭṭhi , sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi. ‘Ete kho ubho ante anupagamma majjhimā paṭipadā tathāgatena abhisambuddhā, cakkhukaraṇī ñāṇakaraṇī upasamāya abhiññāya sambodhāya nibbānāya saṃvattatī’ti – iti yaṃ taṃ vuttaṃ, idametaṃ paṭicca vuttaṃ.
৩২৬. ‘‘‘উস্সাদনঞ্চ জঞ্ঞা, অপসাদনঞ্চ জঞ্ঞা; উস্সাদনঞ্চ ঞত্ৰা অপসাদনঞ্চ ঞত্ৰা নেৰুস্সাদেয্য, ন অপসাদেয্য, ধম্মমেৰ দেসেয্যা’তি – ইতি খো পনেতং ৰুত্তং। কিঞ্চেতং পটিচ্চ ৰুত্তং? কথঞ্চ, ভিক্খৰে, উস্সাদনা চ হোতি অপসাদনা চ, নো চ ধম্মদেসনা? ‘যে কামপটিসন্ধিসুখিনো সোমনস্সানুযোগং অনুযুত্তা হীনং গম্মং পোথুজ্জনিকং অনরিযং অনত্থসংহিতং, সব্বে তে সদুক্খা সউপঘাতা সউপাযাসা সপরিল়াহা মিচ্ছাপটিপন্না’তি – ইতি ৰদং 7 ইত্থেকে অপসাদেতি।
326. ‘‘‘Ussādanañca jaññā, apasādanañca jaññā; ussādanañca ñatvā apasādanañca ñatvā nevussādeyya, na apasādeyya, dhammameva deseyyā’ti – iti kho panetaṃ vuttaṃ. Kiñcetaṃ paṭicca vuttaṃ? Kathañca, bhikkhave, ussādanā ca hoti apasādanā ca, no ca dhammadesanā? ‘Ye kāmapaṭisandhisukhino somanassānuyogaṃ anuyuttā hīnaṃ gammaṃ pothujjanikaṃ anariyaṃ anatthasaṃhitaṃ, sabbe te sadukkhā saupaghātā saupāyāsā sapariḷāhā micchāpaṭipannā’ti – iti vadaṃ 8 ittheke apasādeti.
‘‘‘যে কামপটিসন্ধিসুখিনো সোমনস্সানুযোগং অননুযুত্তা হীনং গম্মং পোথুজ্জনিকং অনরিযং অনত্থসংহিতং, সব্বে তে অদুক্খা অনুপঘাতা অনুপাযাসা অপরিল়াহা সম্মাপটিপন্না’তি – ইতি ৰদং ইত্থেকে উস্সাদেতি।
‘‘‘Ye kāmapaṭisandhisukhino somanassānuyogaṃ ananuyuttā hīnaṃ gammaṃ pothujjanikaṃ anariyaṃ anatthasaṃhitaṃ, sabbe te adukkhā anupaghātā anupāyāsā apariḷāhā sammāpaṭipannā’ti – iti vadaṃ ittheke ussādeti.
‘‘‘যে অত্তকিলমথানুযোগং অনুযুত্তা দুক্খং অনরিযং অনত্থসংহিতং, সব্বে তে সদুক্খা সউপঘাতা সউপাযাসা সপরিল়াহা মিচ্ছাপটিপন্না’তি – ইতি ৰদং ইত্থেকে অপসাদেতি।
‘‘‘Ye attakilamathānuyogaṃ anuyuttā dukkhaṃ anariyaṃ anatthasaṃhitaṃ, sabbe te sadukkhā saupaghātā saupāyāsā sapariḷāhā micchāpaṭipannā’ti – iti vadaṃ ittheke apasādeti.
‘‘‘যে অত্তকিলমথানুযোগং অননুযুত্তা দুক্খং অনরিযং অনত্থসংহিতং, সব্বে তে অদুক্খা অনুপঘাতা অনুপাযাসা অপরিল়াহা সম্মাপটিপন্না’তি – ইতি ৰদং ইত্থেকে উস্সাদেতি।
‘‘‘Ye attakilamathānuyogaṃ ananuyuttā dukkhaṃ anariyaṃ anatthasaṃhitaṃ, sabbe te adukkhā anupaghātā anupāyāsā apariḷāhā sammāpaṭipannā’ti – iti vadaṃ ittheke ussādeti.
‘‘‘যেসং কেসঞ্চি ভৰসংযোজনং অপ্পহীনং, সব্বে তে সদুক্খা সউপঘাতা সউপাযাসা সপরিল়াহা মিচ্ছাপটিপন্না’তি – ইতি ৰদং ইত্থেকে অপসাদেতি।
‘‘‘Yesaṃ kesañci bhavasaṃyojanaṃ appahīnaṃ, sabbe te sadukkhā saupaghātā saupāyāsā sapariḷāhā micchāpaṭipannā’ti – iti vadaṃ ittheke apasādeti.
‘‘‘যেসং কেসঞ্চি ভৰসংযোজনং পহীনং, সব্বে তে অদুক্খা অনুপঘাতা অনুপাযাসা অপরিল়াহা সম্মাপটিপন্না’তি – ইতি ৰদং ইত্থেকে উস্সাদেতি। এৰং খো, ভিক্খৰে, উস্সাদনা চ হোতি অপসাদনা চ, নো চ ধম্মদেসনা।
‘‘‘Yesaṃ kesañci bhavasaṃyojanaṃ pahīnaṃ, sabbe te adukkhā anupaghātā anupāyāsā apariḷāhā sammāpaṭipannā’ti – iti vadaṃ ittheke ussādeti. Evaṃ kho, bhikkhave, ussādanā ca hoti apasādanā ca, no ca dhammadesanā.
৩২৭. ‘‘কথঞ্চ, ভিক্খৰে, নেৰুস্সাদনা হোতি ন অপসাদনা, ধম্মদেসনা চ 9? ‘যে কামপটিসন্ধিসুখিনো সোমনস্সানুযোগং অনুযুত্তা হীনং গম্মং পোথুজ্জনিকং অনরিযং অনত্থসংহিতং, সব্বে তে সদুক্খা সউপঘাতা সউপাযাসা সপরিল়াহা মিচ্ছাপটিপন্না’তি – ন এৰমাহ। ‘অনুযোগো চ খো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা’তি – ইতি ৰদং ধম্মমেৰ দেসেতি।
327. ‘‘Kathañca, bhikkhave, nevussādanā hoti na apasādanā, dhammadesanā ca 10? ‘Ye kāmapaṭisandhisukhino somanassānuyogaṃ anuyuttā hīnaṃ gammaṃ pothujjanikaṃ anariyaṃ anatthasaṃhitaṃ, sabbe te sadukkhā saupaghātā saupāyāsā sapariḷāhā micchāpaṭipannā’ti – na evamāha. ‘Anuyogo ca kho, sadukkho eso dhammo saupaghāto saupāyāso sapariḷāho; micchāpaṭipadā’ti – iti vadaṃ dhammameva deseti.
‘‘‘যে কামপটিসন্ধিসুখিনো সোমনস্সানুযোগং অননুযুত্তা হীনং গম্মং পোথুজ্জনিকং অনরিযং অনত্থসংহিতং, সব্বে তে অদুক্খা অনুপঘাতা অনুপাযাসা অপরিল়াহা সম্মাপটিপন্না’তি – ন এৰমাহ। ‘অননুযোগো চ খো, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা’তি – ইতি ৰদং ধম্মমেৰ দেসেতি।
‘‘‘Ye kāmapaṭisandhisukhino somanassānuyogaṃ ananuyuttā hīnaṃ gammaṃ pothujjanikaṃ anariyaṃ anatthasaṃhitaṃ, sabbe te adukkhā anupaghātā anupāyāsā apariḷāhā sammāpaṭipannā’ti – na evamāha. ‘Ananuyogo ca kho, adukkho eso dhammo anupaghāto anupāyāso apariḷāho; sammāpaṭipadā’ti – iti vadaṃ dhammameva deseti.
‘‘‘যে অত্তকিলমথানুযোগং অনুযুত্তা দুক্খং অনরিযং অনত্থসংহিতং, সব্বে তে সদুক্খা সউপঘাতা সউপাযাসা সপরিল়াহা মিচ্ছাপটিপন্না’তি – ন এৰমাহ। ‘অনুযোগো চ খো , সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা’তি – ইতি ৰদং ধম্মমেৰ দেসেতি।
‘‘‘Ye attakilamathānuyogaṃ anuyuttā dukkhaṃ anariyaṃ anatthasaṃhitaṃ, sabbe te sadukkhā saupaghātā saupāyāsā sapariḷāhā micchāpaṭipannā’ti – na evamāha. ‘Anuyogo ca kho , sadukkho eso dhammo saupaghāto saupāyāso sapariḷāho; micchāpaṭipadā’ti – iti vadaṃ dhammameva deseti.
‘‘‘যে অত্তকিলমথানুযোগং অননুযুত্তা দুক্খং অনরিযং অনত্থসংহিতং, সব্বে তে অদুক্খা অনুপঘাতা অনুপাযাসা অপরিল়াহা সম্মাপটিপন্না’তি – ন এৰমাহ। ‘অননুযোগো চ খো, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা’তি – ইতি ৰদং ধম্মমেৰ দেসেতি।
‘‘‘Ye attakilamathānuyogaṃ ananuyuttā dukkhaṃ anariyaṃ anatthasaṃhitaṃ, sabbe te adukkhā anupaghātā anupāyāsā apariḷāhā sammāpaṭipannā’ti – na evamāha. ‘Ananuyogo ca kho, adukkho eso dhammo anupaghāto anupāyāso apariḷāho; sammāpaṭipadā’ti – iti vadaṃ dhammameva deseti.
‘‘‘যেসং কেসঞ্চি ভৰসংযোজনং অপ্পহীনং, সব্বে তে সদুক্খা সউপঘাতা সউপাযাসা সপরিল়াহা মিচ্ছাপটিপন্না’তি – ন এৰমাহ । ‘ভৰসংযোজনে চ খো অপ্পহীনে ভৰোপি অপ্পহীনো হোতী’তি – ইতি ৰদং ধম্মমেৰ দেসেতি।
‘‘‘Yesaṃ kesañci bhavasaṃyojanaṃ appahīnaṃ, sabbe te sadukkhā saupaghātā saupāyāsā sapariḷāhā micchāpaṭipannā’ti – na evamāha . ‘Bhavasaṃyojane ca kho appahīne bhavopi appahīno hotī’ti – iti vadaṃ dhammameva deseti.
‘‘‘যেসং কেসঞ্চি ভৰসংযোজনং পহীনং, সব্বে তে অদুক্খা অনুপঘাতা অনুপাযাসা অপরিল়াহা সম্মাপটিপন্না’তি – ন এৰমাহ। ‘ভৰসংযোজনে চ খো পহীনে ভৰোপি পহীনো হোতী’তি – ইতি ৰদং ধম্মমেৰ দেসেতি। এৰং খো, ভিক্খৰে, নেৰুস্সাদনা হোতি ন অপসাদনা, ধম্মদেসনা চ। ‘উস্সাদনঞ্চ জঞ্ঞা, অপসাদনঞ্চ জঞ্ঞা; উস্সাদনঞ্চ ঞত্ৰা অপসাদনঞ্চ ঞত্ৰা নেৰুস্সাদেয্য, ন অপসাদেয্য, ধম্মমেৰ দেসেয্যা’তি – ইতি যং তং ৰুত্তং ইদমেতং পটিচ্চ ৰুত্তং।
‘‘‘Yesaṃ kesañci bhavasaṃyojanaṃ pahīnaṃ, sabbe te adukkhā anupaghātā anupāyāsā apariḷāhā sammāpaṭipannā’ti – na evamāha. ‘Bhavasaṃyojane ca kho pahīne bhavopi pahīno hotī’ti – iti vadaṃ dhammameva deseti. Evaṃ kho, bhikkhave, nevussādanā hoti na apasādanā, dhammadesanā ca. ‘Ussādanañca jaññā, apasādanañca jaññā; ussādanañca ñatvā apasādanañca ñatvā nevussādeyya, na apasādeyya, dhammameva deseyyā’ti – iti yaṃ taṃ vuttaṃ idametaṃ paṭicca vuttaṃ.
৩২৮. ‘‘‘সুখৰিনিচ্ছযং জঞ্ঞা; সুখৰিনিচ্ছযং ঞত্ৰা অজ্ঝত্তং সুখমনুযুঞ্জেয্যা’তি – ইতি খো পনেতং ৰুত্তং। কিঞ্চেতং পটিচ্চ ৰুত্তং? পঞ্চিমে, ভিক্খৰে, কামগুণা। কতমে পঞ্চ? চক্খুৰিঞ্ঞেয্যা রূপা ইট্ঠা কন্তা মনাপা পিযরূপা কামূপসংহিতা রজনীযা, সোতৰিঞ্ঞেয্যা সদ্দা… ঘানৰিঞ্ঞেয্যা গন্ধা… জিৰ্হাৰিঞ্ঞেয্যা রসা… কাযৰিঞ্ঞেয্যা ফোট্ঠব্বা ইট্ঠা কন্তা মনাপা পিযরূপা কামূপসংহিতা রজনীযা – ইমে খো, ভিক্খৰে, পঞ্চ কামগুণা। যং খো, ভিক্খৰে, ইমে পঞ্চ কামগুণে পটিচ্চ উপ্পজ্জতি সুখং সোমনস্সং ইদং ৰুচ্চতি কামসুখং মীল়্হসুখং পুথুজ্জনসুখং অনরিযসুখং। ‘ন আসেৰিতব্বং, ন ভাৰেতব্বং, ন বহুলীকাতব্বং, ভাযিতব্বং এতস্স সুখস্সা’তি – ৰদামি। ইধ , ভিক্খৰে, ভিক্খু ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি। ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি। পীতিযা চ ৰিরাগা উপেক্খকো চ ৰিহরতি…পে॰… ততিযং ঝানং… চতুত্থং ঝানং উপসম্পজ্জ ৰিহরতি। ইদং ৰুচ্চতি নেক্খম্মসুখং পৰিৰেকসুখং উপসমসুখং সম্বোধিসুখং। ‘আসেৰিতব্বং, ভাৰেতব্বং, বহুলীকাতব্বং, ন ভাযিতব্বং এতস্স সুখস্সা’তি – ৰদামি । ‘সুখৰিনিচ্ছযং জঞ্ঞা ; সুখৰিনিচ্ছযং ঞত্ৰা অজ্ঝত্তং সুখমনুযুঞ্জেয্যা’তি – ইতি যং তং ৰুত্তং ইদমেতং পটিচ্চ ৰুত্তং।
328. ‘‘‘Sukhavinicchayaṃ jaññā; sukhavinicchayaṃ ñatvā ajjhattaṃ sukhamanuyuñjeyyā’ti – iti kho panetaṃ vuttaṃ. Kiñcetaṃ paṭicca vuttaṃ? Pañcime, bhikkhave, kāmaguṇā. Katame pañca? Cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā – ime kho, bhikkhave, pañca kāmaguṇā. Yaṃ kho, bhikkhave, ime pañca kāmaguṇe paṭicca uppajjati sukhaṃ somanassaṃ idaṃ vuccati kāmasukhaṃ mīḷhasukhaṃ puthujjanasukhaṃ anariyasukhaṃ. ‘Na āsevitabbaṃ, na bhāvetabbaṃ, na bahulīkātabbaṃ, bhāyitabbaṃ etassa sukhassā’ti – vadāmi. Idha , bhikkhave, bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati. Vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharati. Pītiyā ca virāgā upekkhako ca viharati…pe… tatiyaṃ jhānaṃ… catutthaṃ jhānaṃ upasampajja viharati. Idaṃ vuccati nekkhammasukhaṃ pavivekasukhaṃ upasamasukhaṃ sambodhisukhaṃ. ‘Āsevitabbaṃ, bhāvetabbaṃ, bahulīkātabbaṃ, na bhāyitabbaṃ etassa sukhassā’ti – vadāmi . ‘Sukhavinicchayaṃ jaññā ; sukhavinicchayaṃ ñatvā ajjhattaṃ sukhamanuyuñjeyyā’ti – iti yaṃ taṃ vuttaṃ idametaṃ paṭicca vuttaṃ.
৩২৯. ‘‘‘রহোৰাদং ন ভাসেয্য, সম্মুখা ন খীণং ভণে’তি – ইতি খো পনেতং ৰুত্তং। কিঞ্চেতং পটিচ্চ ৰুত্তং? তত্র, ভিক্খৰে, যং জঞ্ঞা রহোৰাদং অভূতং অতচ্ছং অনত্থসংহিতং সসক্কং 11 তং রহোৰাদং ন ভাসেয্য। যম্পি জঞ্ঞা রহোৰাদং ভূতং তচ্ছং অনত্থসংহিতং তস্সপি সিক্খেয্য অৰচনায। যঞ্চ খো জঞ্ঞা রহোৰাদং ভূতং তচ্ছং অত্থসংহিতং তত্র কালঞ্ঞূ অস্স তস্স রহোৰাদস্স ৰচনায। তত্র, ভিক্খৰে, যং জঞ্ঞা সম্মুখা খীণৰাদং অভূতং অতচ্ছং অনত্থসংহিতং সসক্কং তং সম্মুখা খীণৰাদং ন ভাসেয্য। যম্পি জঞ্ঞা সম্মুখা খীণৰাদং ভূতং তচ্ছং অনত্থসংহিতং তস্সপি সিক্খেয্য অৰচনায। যঞ্চ খো জঞ্ঞা সম্মুখা খীণৰাদং ভূতং তচ্ছং অত্থসংহিতং তত্র কালঞ্ঞূ অস্স তস্স সম্মুখা খীণৰাদস্স ৰচনায। ‘রহোৰাদং ন ভাসেয্য, সম্মুখা ন খীণং ভণে’তি – ইতি যং তং ৰুত্তং, ইদমেতং পটিচ্চ ৰুত্তং।
329. ‘‘‘Rahovādaṃ na bhāseyya, sammukhā na khīṇaṃ bhaṇe’ti – iti kho panetaṃ vuttaṃ. Kiñcetaṃ paṭicca vuttaṃ? Tatra, bhikkhave, yaṃ jaññā rahovādaṃ abhūtaṃ atacchaṃ anatthasaṃhitaṃ sasakkaṃ 12 taṃ rahovādaṃ na bhāseyya. Yampi jaññā rahovādaṃ bhūtaṃ tacchaṃ anatthasaṃhitaṃ tassapi sikkheyya avacanāya. Yañca kho jaññā rahovādaṃ bhūtaṃ tacchaṃ atthasaṃhitaṃ tatra kālaññū assa tassa rahovādassa vacanāya. Tatra, bhikkhave, yaṃ jaññā sammukhā khīṇavādaṃ abhūtaṃ atacchaṃ anatthasaṃhitaṃ sasakkaṃ taṃ sammukhā khīṇavādaṃ na bhāseyya. Yampi jaññā sammukhā khīṇavādaṃ bhūtaṃ tacchaṃ anatthasaṃhitaṃ tassapi sikkheyya avacanāya. Yañca kho jaññā sammukhā khīṇavādaṃ bhūtaṃ tacchaṃ atthasaṃhitaṃ tatra kālaññū assa tassa sammukhā khīṇavādassa vacanāya. ‘Rahovādaṃ na bhāseyya, sammukhā na khīṇaṃ bhaṇe’ti – iti yaṃ taṃ vuttaṃ, idametaṃ paṭicca vuttaṃ.
৩৩০. ‘‘‘অতরমানোৰ ভাসেয্য নো তরমানো’তি – ইতি খো পনেতং ৰুত্তং। কিঞ্চেতং পটিচ্চ ৰুত্তং? তত্র, ভিক্খৰে, তরমানস্স ভাসতো কাযোপি কিলমতি, চিত্তম্পি উপহঞ্ঞতি 13, সরোপি উপহঞ্ঞতি 14, কণ্ঠোপি আতুরীযতি, অৰিসট্ঠম্পি হোতি অৰিঞ্ঞেয্যং তরমানস্স ভাসিতং। তত্র, ভিক্খৰে, অতরমানস্স ভাসতো কাযোপি ন কিলমতি, চিত্তম্পি ন উপহঞ্ঞতি, সরোপি ন উপহঞ্ঞতি, কণ্ঠোপি ন আতুরীযতি, ৰিসট্ঠম্পি হোতি ৰিঞ্ঞেয্যং অতরমানস্স ভাসিতং। ‘অতরমানোৰ ভাসেয্য, নো তরমানো’তি – ইতি যং তং ৰুত্তং, ইদমেতং পটিচ্চ ৰুত্তং।
330. ‘‘‘Ataramānova bhāseyya no taramāno’ti – iti kho panetaṃ vuttaṃ. Kiñcetaṃ paṭicca vuttaṃ? Tatra, bhikkhave, taramānassa bhāsato kāyopi kilamati, cittampi upahaññati 15, saropi upahaññati 16, kaṇṭhopi āturīyati, avisaṭṭhampi hoti aviññeyyaṃ taramānassa bhāsitaṃ. Tatra, bhikkhave, ataramānassa bhāsato kāyopi na kilamati, cittampi na upahaññati, saropi na upahaññati, kaṇṭhopi na āturīyati, visaṭṭhampi hoti viññeyyaṃ ataramānassa bhāsitaṃ. ‘Ataramānova bhāseyya, no taramāno’ti – iti yaṃ taṃ vuttaṃ, idametaṃ paṭicca vuttaṃ.
৩৩১. ‘‘‘জনপদনিরুত্তিং নাভিনিৰেসেয্য, সমঞ্ঞং নাতিধাৰেয্যা’তি – ইতি খো পনেতং ৰুত্তং। কিঞ্চেতং পটিচ্চ ৰুত্তং? কথঞ্চ, ভিক্খৰে, জনপদনিরুত্তিযা চ অভিনিৰেসো হোতি সমঞ্ঞায চ অতিসারো? ইধ, ভিক্খৰে, তদেৰেকচ্চেসু জনপদেসু ‘পাতী’তি সঞ্জানন্তি, ‘পত্ত’ন্তি সঞ্জানন্তি , ‘ৰিত্ত’ন্তি 17 সঞ্জানন্তি, ‘সরাৰ’ন্তি সঞ্জানন্তি ‘ধারোপ’ন্তি 18 সঞ্জানন্তি, ‘পোণ’ন্তি সঞ্জানন্তি, ‘পিসীলৰ’ন্তি 19 সঞ্জানন্তি। ইতি যথা যথা নং তেসু তেসু জনপদেসু সঞ্জানন্তি তথা তথা থামসা পরামাসা 20 অভিনিৰিস্স ৰোহরতি – ‘ইদমেৰ সচ্চং , মোঘমঞ্ঞ’ন্তি। এৰং খো, ভিক্খৰে, জনপদনিরুত্তিযা চ অভিনিৰেসো হোতি সমঞ্ঞায চ অতিসারো।
331. ‘‘‘Janapadaniruttiṃ nābhiniveseyya, samaññaṃ nātidhāveyyā’ti – iti kho panetaṃ vuttaṃ. Kiñcetaṃ paṭicca vuttaṃ? Kathañca, bhikkhave, janapadaniruttiyā ca abhiniveso hoti samaññāya ca atisāro? Idha, bhikkhave, tadevekaccesu janapadesu ‘pātī’ti sañjānanti, ‘patta’nti sañjānanti , ‘vitta’nti 21 sañjānanti, ‘sarāva’nti sañjānanti ‘dhāropa’nti 22 sañjānanti, ‘poṇa’nti sañjānanti, ‘pisīlava’nti 23 sañjānanti. Iti yathā yathā naṃ tesu tesu janapadesu sañjānanti tathā tathā thāmasā parāmāsā 24 abhinivissa voharati – ‘idameva saccaṃ , moghamañña’nti. Evaṃ kho, bhikkhave, janapadaniruttiyā ca abhiniveso hoti samaññāya ca atisāro.
৩৩২. ‘‘কথঞ্চ, ভিক্খৰে, জনপদনিরুত্তিযা চ অনভিনিৰেসো হোতি সমঞ্ঞায চ অনতিসারো? ইধ, ভিক্খৰে, তদেৰেকচ্চেসু জনপদেসু ‘পাতী’তি সঞ্জানন্তি, ‘পত্ত’ন্তি সঞ্জানন্তি, ‘ৰিত্ত’ন্তি সঞ্জানন্তি, ‘সরাৰ’ন্তি সঞ্জানন্তি, ‘ধারোপ’ন্তি সঞ্জানন্তি, ‘পোণ’ন্তি সঞ্জানন্তি, ‘পিসীলৰ’ন্তি সঞ্জানন্তি। ইতি যথা যথা নং তেসু তেসু জনপদেসু সঞ্জানন্তি ‘ইদং কির মে 25 আযস্মন্তো সন্ধায ৰোহরন্তী’তি তথা তথা ৰোহরতি অপরামসং। এৰং খো, ভিক্খৰে, জনপদনিরুত্তিযা চ অনভিনিৰেসো হোতি, সমঞ্ঞায চ অনতিসারো। ‘জনপদনিরুত্তিং নাভিনিৰেসেয্য সমঞ্ঞং নাতিধাৰেয্যা’তি – ইতি যং তং ৰুত্তং, ইদমেতং পটিচ্চ ৰুত্তং।
332. ‘‘Kathañca, bhikkhave, janapadaniruttiyā ca anabhiniveso hoti samaññāya ca anatisāro? Idha, bhikkhave, tadevekaccesu janapadesu ‘pātī’ti sañjānanti, ‘patta’nti sañjānanti, ‘vitta’nti sañjānanti, ‘sarāva’nti sañjānanti, ‘dhāropa’nti sañjānanti, ‘poṇa’nti sañjānanti, ‘pisīlava’nti sañjānanti. Iti yathā yathā naṃ tesu tesu janapadesu sañjānanti ‘idaṃ kira me 26 āyasmanto sandhāya voharantī’ti tathā tathā voharati aparāmasaṃ. Evaṃ kho, bhikkhave, janapadaniruttiyā ca anabhiniveso hoti, samaññāya ca anatisāro. ‘Janapadaniruttiṃ nābhiniveseyya samaññaṃ nātidhāveyyā’ti – iti yaṃ taṃ vuttaṃ, idametaṃ paṭicca vuttaṃ.
৩৩৩. ‘‘তত্র, ভিক্খৰে, যো কামপটিসন্ধিসুখিনো সোমনস্সানুযোগো হীনো গম্মো পোথুজ্জনিকো অনরিযো অনত্থসংহিতো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র, ভিক্খৰে, যো কামপটিসন্ধিসুখিনো সোমনস্সানুযোগং অননুযোগো হীনং গম্মং পোথুজ্জনিকং অনরিযং অনত্থসংহিতং, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। তস্মা এসো ধম্মো অরণো।
333. ‘‘Tatra, bhikkhave, yo kāmapaṭisandhisukhino somanassānuyogo hīno gammo pothujjaniko anariyo anatthasaṃhito, sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra, bhikkhave, yo kāmapaṭisandhisukhino somanassānuyogaṃ ananuyogo hīnaṃ gammaṃ pothujjanikaṃ anariyaṃ anatthasaṃhitaṃ, adukkho eso dhammo anupaghāto anupāyāso apariḷāho; sammāpaṭipadā. Tasmā eso dhammo araṇo.
৩৩৪. ‘‘তত্র, ভিক্খৰে, যো অত্তকিলমথানুযোগো দুক্খো অনরিযো অনত্থসংহিতো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র, ভিক্খৰে, যো অত্তকিলমথানুযোগং অননুযোগো দুক্খং অনরিযং অনত্থসংহিতং, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। তস্মা এসো ধম্মো অরণো।
334. ‘‘Tatra, bhikkhave, yo attakilamathānuyogo dukkho anariyo anatthasaṃhito, sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra, bhikkhave, yo attakilamathānuyogaṃ ananuyogo dukkhaṃ anariyaṃ anatthasaṃhitaṃ, adukkho eso dhammo anupaghāto anupāyāso apariḷāho; sammāpaṭipadā. Tasmā eso dhammo araṇo.
৩৩৫. ‘‘তত্র, ভিক্খৰে, যাযং মজ্ঝিমা পটিপদা তথাগতেন অভিসম্বুদ্ধা, চক্খুকরণী ঞাণকরণী উপসমায অভিঞ্ঞায সম্বোধায নিব্বানায সংৰত্ততি, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা । তস্মা এসো ধম্মো অরণো।
335. ‘‘Tatra, bhikkhave, yāyaṃ majjhimā paṭipadā tathāgatena abhisambuddhā, cakkhukaraṇī ñāṇakaraṇī upasamāya abhiññāya sambodhāya nibbānāya saṃvattati, adukkho eso dhammo anupaghāto anupāyāso apariḷāho; sammāpaṭipadā . Tasmā eso dhammo araṇo.
৩৩৬. ‘‘তত্র , ভিক্খৰে, যাযং উস্সাদনা চ অপসাদনা চ নো চ ধম্মদেসনা, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র, ভিক্খৰে, যাযং নেৰুস্সাদনা চ ন অপসাদনা চ ধম্মদেসনা চ, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। তস্মা এসো ধম্মো অরণো।
336. ‘‘Tatra , bhikkhave, yāyaṃ ussādanā ca apasādanā ca no ca dhammadesanā, sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra, bhikkhave, yāyaṃ nevussādanā ca na apasādanā ca dhammadesanā ca, adukkho eso dhammo anupaghāto anupāyāso apariḷāho; sammāpaṭipadā. Tasmā eso dhammo araṇo.
৩৩৭. ‘‘তত্র, ভিক্খৰে, যমিদং কামসুখং মীল়্হসুখং পোথুজ্জনসুখং অনরিযসুখং , সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র, ভিক্খৰে, যমিদং নেক্খম্মসুখং পৰিৰেকসুখং উপসমসুখং সম্বোধিসুখং, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। তস্মা এসো ধম্মো অরণো।
337. ‘‘Tatra, bhikkhave, yamidaṃ kāmasukhaṃ mīḷhasukhaṃ pothujjanasukhaṃ anariyasukhaṃ , sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra, bhikkhave, yamidaṃ nekkhammasukhaṃ pavivekasukhaṃ upasamasukhaṃ sambodhisukhaṃ, adukkho eso dhammo anupaghāto anupāyāso apariḷāho; sammāpaṭipadā. Tasmā eso dhammo araṇo.
৩৩৮. ‘‘তত্র, ভিক্খৰে, য্ৰাযং রহোৰাদো অভূতো অতচ্ছো অনত্থসংহিতো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র, ভিক্খৰে, য্ৰাযং রহোৰাদো ভূতো তচ্ছো অনত্থসংহিতো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র, ভিক্খৰে, য্ৰাযং রহোৰাদো ভূতো তচ্ছো অত্থসংহিতো, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। তস্মা এসো ধম্মো অরণো।
338. ‘‘Tatra, bhikkhave, yvāyaṃ rahovādo abhūto ataccho anatthasaṃhito, sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra, bhikkhave, yvāyaṃ rahovādo bhūto taccho anatthasaṃhito, sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra, bhikkhave, yvāyaṃ rahovādo bhūto taccho atthasaṃhito, adukkho eso dhammo anupaghāto anupāyāso apariḷāho; sammāpaṭipadā. Tasmā eso dhammo araṇo.
৩৩৯. ‘‘তত্র , ভিক্খৰে, য্ৰাযং সম্মুখা খীণৰাদো অভূতো অতচ্ছো অনত্থসংহিতো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র, ভিক্খৰে, য্ৰাযং সম্মুখা খীণৰাদো ভূতো তচ্ছো অনত্থসংহিতো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র, ভিক্খৰে, য্ৰাযং সম্মুখা খীণৰাদো ভূতো তচ্ছো অত্থসংহিতো, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। তস্মা এসো ধম্মো অরণো।
339. ‘‘Tatra , bhikkhave, yvāyaṃ sammukhā khīṇavādo abhūto ataccho anatthasaṃhito, sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra, bhikkhave, yvāyaṃ sammukhā khīṇavādo bhūto taccho anatthasaṃhito, sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra, bhikkhave, yvāyaṃ sammukhā khīṇavādo bhūto taccho atthasaṃhito, adukkho eso dhammo anupaghāto anupāyāso apariḷāho; sammāpaṭipadā. Tasmā eso dhammo araṇo.
৩৪০. ‘‘তত্র, ভিক্খৰে, যমিদং তরমানস্স ভাসিতং, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র, ভিক্খৰে , যমিদং অতরমানস্স ভাসিতং, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। তস্মা এসো ধম্মো অরণো।
340. ‘‘Tatra, bhikkhave, yamidaṃ taramānassa bhāsitaṃ, sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra, bhikkhave , yamidaṃ ataramānassa bhāsitaṃ, adukkho eso dhammo anupaghāto anupāyāso apariḷāho; sammāpaṭipadā. Tasmā eso dhammo araṇo.
৩৪১. ‘‘তত্র, ভিক্খৰে, য্ৰাযং জনপদনিরুত্তিযা চ অভিনিৰেসো সমঞ্ঞায চ অতিসারো, সদুক্খো এসো ধম্মো সউপঘাতো সউপাযাসো সপরিল়াহো; মিচ্ছাপটিপদা। তস্মা এসো ধম্মো সরণো। তত্র ভিক্খৰে, য্ৰাযং জনপদনিরুত্তিযা চ অনভিনিৰেসো সমঞ্ঞায চ অনতিসারো, অদুক্খো এসো ধম্মো অনুপঘাতো অনুপাযাসো অপরিল়াহো; সম্মাপটিপদা। তস্মা এসো ধম্মো অরণো।
341. ‘‘Tatra, bhikkhave, yvāyaṃ janapadaniruttiyā ca abhiniveso samaññāya ca atisāro, sadukkho eso dhammo saupaghāto saupāyāso sapariḷāho; micchāpaṭipadā. Tasmā eso dhammo saraṇo. Tatra bhikkhave, yvāyaṃ janapadaniruttiyā ca anabhiniveso samaññāya ca anatisāro, adukkho eso dhammo anupaghāto anupāyāso apariḷāho; sammāpaṭipadā. Tasmā eso dhammo araṇo.
‘‘তস্মাতিহ, ভিক্খৰে, ‘সরণঞ্চ ধম্মং জানিস্সাম, অরণঞ্চ ধম্মং জানিস্সাম; সরণঞ্চ ধম্মং ঞত্ৰা অরণঞ্চ ধম্মং ঞত্ৰা অরণপটিপদং পটিপজ্জিস্সামা’তি এৰঞ্হি ৰো, ভিক্খৰে, সিক্খিতব্বং। সুভূতি চ পন, ভিক্খৰে, কুলপুত্তো অরণপটিপদং পটিপন্নো’’তি।
‘‘Tasmātiha, bhikkhave, ‘saraṇañca dhammaṃ jānissāma, araṇañca dhammaṃ jānissāma; saraṇañca dhammaṃ ñatvā araṇañca dhammaṃ ñatvā araṇapaṭipadaṃ paṭipajjissāmā’ti evañhi vo, bhikkhave, sikkhitabbaṃ. Subhūti ca pana, bhikkhave, kulaputto araṇapaṭipadaṃ paṭipanno’’ti.
ইদমৰোচ ভগৰা। অত্তমনা তে ভিক্খূ ভগৰতো ভাসিতং অভিনন্দুন্তি।
Idamavoca bhagavā. Attamanā te bhikkhū bhagavato bhāsitaṃ abhinandunti.
অরণৰিভঙ্গসুত্তং নিট্ঠিতং নৰমং।
Araṇavibhaṅgasuttaṃ niṭṭhitaṃ navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৯. অরণৰিভঙ্গসুত্তৰণ্ণনা • 9. Araṇavibhaṅgasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৯. অরণৰিভঙ্গসুত্তৰণ্ণনা • 9. Araṇavibhaṅgasuttavaṇṇanā
