| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
9. அரணவிப⁴ங்க³ஸுத்தவண்ணனா
9. Araṇavibhaṅgasuttavaṇṇanā
323. கே³ஹஸ்ஸிதவஸேனாதி கிலேஸனிஸ்ஸிதவஸேன அனுரோத⁴வஸேன. நேவ உக்கி²பெய்யாதி ந அனுக்³க³ண்ஹெய்ய. ந அவக்கி²பெய்யாதி கே³ஹஸ்ஸிதவஸேன விரோத⁴வஸேன ந நிக்³க³ண்ஹெய்ய. அனுரோதே⁴ன வினா ஸம்பஹங்ஸனவஸேன யதா²பூ⁴தகு³ணகத²னங் நேவுஸ்ஸாத³னா வஜ்ஜாபா⁴வதோ; ததா² விரோதே⁴ன வினா விவேசனவஸேன யதா²பூ⁴ததோ³ஸகத²னங் ந அபஸாத³னங். ஸபா⁴வமேவாதி யதா²பூ⁴தஸபா⁴வமேவ கஸ்ஸசி புக்³க³லஸ்ஸ அனாதே³ஸகரணவஸேன கதெ²ய்ய, ஸெய்யதா²பி ஆயஸ்மா ஸுபூ⁴தித்தே²ரோ. வினிச்சி²தஸுக²ந்தி, ‘‘அஜ்ஜ²த்தங் அனவஜ்ஜ’’ந்திஆதி³னா விஸேஸதோ வினிச்சி²தஸுகா²ய ஹோதி. பரம்முகா² அவண்ணந்தி ஸ்வாயங் ரஹோவாதோ³ பேஸுஞ்ஞூபஸங்ஹாரவஸேன பவத்தோ இதா⁴தி⁴ப்பேதோதி ஆஹ ‘‘பிஸுணவாசந்தி அத்தோ²’’தி. கீ²ணாதீதி கீ²ணோ, யோ பா⁴ஸதி, யஞ்ச உத்³தி³ஸ்ஸ பா⁴ஸதி, த்³வேபி ஹிங்ஸதி விபா³த⁴தீதி அத்தோ², தங் கீ²ணவாத³ங். ஸ்வாயங் யஸ்மா கிலேஸேஹி ஆகிண்ணோ ஸங்கிலிட்டோ² ஏவ ச ஹோதி, தஸ்மா வுத்தங் – ‘‘ஆகிண்ணங் ஸங்கிலிட்ட²ங் வாச’’ந்தி. தேன அவஸிட்ட²ங் திவித⁴ம்பி வசீது³ச்சரிதமாஹ. அதி⁴ட்ட²ஹித்வாதி, ‘‘இத³மேவ ஸச்ச’’ந்தி அஜ்ஜோ²ஸாய. ஆதா³யாதி பக்³க³ய்ஹ. வோஹரெய்யாதி ஸமுதா³சரெய்ய. லோகஸமஞ்ஞந்தி லோகஸங்கேதங்.
323.Gehassitavasenāti kilesanissitavasena anurodhavasena. Neva ukkhipeyyāti na anuggaṇheyya. Na avakkhipeyyāti gehassitavasena virodhavasena na niggaṇheyya. Anurodhena vinā sampahaṃsanavasena yathābhūtaguṇakathanaṃ nevussādanā vajjābhāvato; tathā virodhena vinā vivecanavasena yathābhūtadosakathanaṃ na apasādanaṃ. Sabhāvamevāti yathābhūtasabhāvameva kassaci puggalassa anādesakaraṇavasena katheyya, seyyathāpi āyasmā subhūtitthero. Vinicchitasukhanti, ‘‘ajjhattaṃ anavajja’’ntiādinā visesato vinicchitasukhāya hoti. Parammukhā avaṇṇanti svāyaṃ rahovādo pesuññūpasaṃhāravasena pavatto idhādhippetoti āha ‘‘pisuṇavācanti attho’’ti. Khīṇātīti khīṇo, yo bhāsati, yañca uddissa bhāsati, dvepi hiṃsati vibādhatīti attho, taṃ khīṇavādaṃ. Svāyaṃ yasmā kilesehi ākiṇṇo saṃkiliṭṭho eva ca hoti, tasmā vuttaṃ – ‘‘ākiṇṇaṃsaṃkiliṭṭhaṃ vāca’’nti. Tena avasiṭṭhaṃ tividhampi vacīduccaritamāha. Adhiṭṭhahitvāti, ‘‘idameva sacca’’nti ajjhosāya. Ādāyāti paggayha. Vohareyyāti samudācareyya. Lokasamaññanti lokasaṅketaṃ.
324. ஆரம்மணதோ ஸம்பயோக³தோ காமேஹி படிஸங்ஹிதத்தா காமபடிஸந்தி⁴, காமஸுக²ங். தேனாஹ ‘‘காமூபஸங்ஹிதேன ஸுகே²னா’’தி. ஸது³க்கோ²தி விபாகது³க்கே²ன ஸங்கிலேஸது³க்கே²ன ஸது³க்கோ². ததா² ஸபரிளாஹோதி விபாகபரிளாஹேன சேவ கிலேஸபரிளாஹேன ச ஸபரிளாஹோ.
324. Ārammaṇato sampayogato kāmehi paṭisaṃhitattā kāmapaṭisandhi, kāmasukhaṃ. Tenāha ‘‘kāmūpasaṃhitena sukhenā’’ti. Sadukkhoti vipākadukkhena saṃkilesadukkhena sadukkho. Tathā sapariḷāhoti vipākapariḷāhena ceva kilesapariḷāhena ca sapariḷāho.
326. வட்டதோ நிஸ்ஸரிதுங் அத³த்வா தத்தே²வ ஸீதா³பனதோ மிச்சா²படிபதா³பா⁴வேன ஸத்தே ஸங்யோஜேதீதி ஸங்யோஜனங், விஸேஸதோ ப⁴வஸங்யோஜனங் தண்ஹாதி ஆஹ ‘‘தண்ஹாயேதங் நாம’’ந்தி. ந தண்ஹாயேவ மானாத³யோபி ஸங்யோஜனத்தங் ஸாதெ⁴ந்தி நாம ஸப்³ப³ஸோ ஸங்யோஜனதோ ஸுட்டு² ப³ந்த⁴னதோ. தேன வுத்தங் – ‘‘அவிஜ்ஜானீவரணானங், பி⁴க்க²வே, ஸத்தானங் தண்ஹாஸங்யோஜனான’’ந்தி (ஸங்॰ நி॰ 2.125-126).
326. Vaṭṭato nissarituṃ adatvā tattheva sīdāpanato micchāpaṭipadābhāvena satte saṃyojetīti saṃyojanaṃ, visesato bhavasaṃyojanaṃ taṇhāti āha ‘‘taṇhāyetaṃ nāma’’nti. Na taṇhāyeva mānādayopi saṃyojanattaṃ sādhenti nāma sabbaso saṃyojanato suṭṭhu bandhanato. Tena vuttaṃ – ‘‘avijjānīvaraṇānaṃ, bhikkhave, sattānaṃ taṇhāsaṃyojanāna’’nti (saṃ. ni. 2.125-126).
இமங் சதுக்கந்தி, ‘‘யே காமபடிஸந்தி⁴ஸுகி²னோ ஸோமனஸ்ஸானுயோக³ங் அனுயுத்தா, யே அத்தகிலமதா²னுயோக³ங் அனுயுத்தா’’தி ஏவமாக³தங் இமங் சதுக்கங் நிஸ்ஸாய. ‘‘ஏதத³க்³கே³ ட²பிதோ’’தி, வத்வா தங் நிஸ்ஸாய ட²பிதபா⁴வங் வித்தா²ரதோ த³ஸ்ஸேதுங், ‘‘ப⁴க³வதோ ஹீ’’திஆதி³ வுத்தங். உஸ்ஸாத³னாஅபஸாத³னா பஞ்ஞாயந்தி ததா²க³தேன வினேதப்³ப³புக்³க³லவஸேன த⁴ம்மதே³ஸனாய பவத்தேதப்³ப³தோ. அயங் புக்³க³லோ…பே॰… ஆசாரஸம்பன்னோதி வா நத்தி² பரேஸங் அனுத்³தே³ஸகவஸேன த⁴ம்மதே³ஸனாய பவத்தனதோ.
Imaṃ catukkanti, ‘‘ye kāmapaṭisandhisukhino somanassānuyogaṃ anuyuttā, ye attakilamathānuyogaṃ anuyuttā’’ti evamāgataṃ imaṃ catukkaṃ nissāya. ‘‘Etadagge ṭhapito’’ti, vatvā taṃ nissāya ṭhapitabhāvaṃ vitthārato dassetuṃ, ‘‘bhagavato hī’’tiādi vuttaṃ. Ussādanāapasādanāpaññāyanti tathāgatena vinetabbapuggalavasena dhammadesanāya pavattetabbato. Ayaṃ puggalo…pe… ācārasampannoti vā natthi paresaṃ anuddesakavasena dhammadesanāya pavattanato.
329. பரம்முகா² அவண்ணந்தி நிந்தி³யஸ்ஸ தோ³ஸஸ்ஸ நிந்த³னங். ந ஹி கதா³சி நிந்தி³யோ பஸங்ஸியோ ஹோதி, தங் பன காலங் ஞத்வாவ கதே²தப்³ப³ந்தி ஆஹ, ‘‘யுத்தபத்தகாலங் ஞத்வாவா’’தி. கீ²ணவாதே³பி ஏஸேவ நயோ தஸ்ஸ ரஹோவாதே³ன ஸமானயோக³க்க²மத்தா.
329.Parammukhā avaṇṇanti nindiyassa dosassa nindanaṃ. Na hi kadāci nindiyo pasaṃsiyo hoti, taṃ pana kālaṃ ñatvāva kathetabbanti āha, ‘‘yuttapattakālaṃ ñatvāvā’’ti. Khīṇavādepi eseva nayo tassa rahovādena samānayogakkhamattā.
330. கா⁴தீயதீதி வதீ⁴யதி. ஸத்³தோ³பி பி⁴ஜ்ஜதி நஸ்ஸதி, பே⁴தோ³ ஹோதீதி அத்தோ². கே³லஞ்ஞப்பத்தோதி கே²த³ங் பரிஸ்ஸமங் பத்தோ. அபலிபு³த்³த⁴ந்தி தோ³ஸேஹி அனநுபதிதங்.
330.Ghātīyatīti vadhīyati. Saddopi bhijjati nassati, bhedo hotīti attho. Gelaññappattoti khedaṃ parissamaṃ patto. Apalibuddhanti dosehi ananupatitaṃ.
331. அபி⁴னிவிஸ்ஸ வோஹரதீதி ஏவமேதங், ந இதோ அஞ்ஞதா²தி தங் ஜனபத³னிருத்திங் அபி⁴னிவிஸித்வா ஸமுதா³சரதி. அதிதா⁴வனந்தி ஸமஞ்ஞங் நாமேதங் லோகஸங்கேதஸித்³தா⁴ பஞ்ஞத்தீதி பஞ்ஞத்திமத்தே அட்ட²த்வா பரமத்த²தோ தா²மஸா பராமஸ்ஸ வோஹரணங்.
331.Abhinivissavoharatīti evametaṃ, na ito aññathāti taṃ janapadaniruttiṃ abhinivisitvā samudācarati. Atidhāvananti samaññaṃ nāmetaṃ lokasaṅketasiddhā paññattīti paññattimatte aṭṭhatvā paramatthato thāmasā parāmassa voharaṇaṃ.
332. அபராமஸந்தோதி அனபி⁴னிவிஸந்தோ ஸமஞ்ஞாமத்ததோவ வோஹரதி.
332.Aparāmasantoti anabhinivisanto samaññāmattatova voharati.
333. மரியாத³பா⁴ஜனீயந்தி யதா²வுத்தஸம்மாபடிபதா³ய மிச்சா²படிபதா³ய ச அஞ்ஞமஞ்ஞங் ஸங்கரபா⁴வவிபா⁴ஜனங். ரணந்தி ஸத்தா ஏதேஹி கந்த³ந்தி அகந்த³ந்தாபி கந்த³னகாரணபா⁴வதோதி ரணா; ராக³தோ³ஸமோஹா, த³ஸபி வா கிலேஸா, ஸப்³பே³பி வா ஏகந்தாகுஸலா, தேஹி நானப்பகாரது³க்க²னிப்³ப³த்தகேஹி அபி⁴பூ⁴தா ஸத்தா கந்த³ந்தி; ஸஹ ரணேஹீதி ஸரணோ. ரணஸத்³தோ³ வா ராகா³தி³ரேணூஸு நிருள்ஹோ. தேனாஹ ‘‘ஸரஜோ ஸகிலேஸோ’’தி. பாளியங் பன ‘‘ஸது³க்கோ² ஏஸோ த⁴ம்மோ’’திஆதி³னா ஆக³தத்தா காமஸுகா²னுயோகா³த³யோபி ‘‘ஸரணோ’’தி வுத்தாதி து³க்கா²தீ³னங் ரணபா⁴வோ தன்னிப்³ப³த்தகஸபா⁴வானங் அகுஸலானங் ஸரணதா ச வேதி³தப்³பா³. அரணோதிஆதீ³னங் பதா³னங் வுத்தவிபரியாயேன அத்தோ² வேதி³தப்³போ³.
333.Mariyādabhājanīyanti yathāvuttasammāpaṭipadāya micchāpaṭipadāya ca aññamaññaṃ saṅkarabhāvavibhājanaṃ. Raṇanti sattā etehi kandanti akandantāpi kandanakāraṇabhāvatoti raṇā; rāgadosamohā, dasapi vā kilesā, sabbepi vā ekantākusalā, tehi nānappakāradukkhanibbattakehi abhibhūtā sattā kandanti; saha raṇehīti saraṇo. Raṇasaddo vā rāgādireṇūsu niruḷho. Tenāha ‘‘sarajo sakileso’’ti. Pāḷiyaṃ pana ‘‘sadukkho eso dhammo’’tiādinā āgatattā kāmasukhānuyogādayopi ‘‘saraṇo’’ti vuttāti dukkhādīnaṃ raṇabhāvo tannibbattakasabhāvānaṃ akusalānaṃ saraṇatā ca veditabbā. Araṇotiādīnaṃ padānaṃ vuttavipariyāyena attho veditabbo.
வத்து²ங் ஸோதே⁴தீதி நிரோத⁴ஸமாபஜ்ஜனேன மஹப்ப²லபா⁴வகரணேன த³க்கி²ணெய்யவத்து²பூ⁴தங் அத்தானங் விஸோதே⁴தி; நிரோத⁴ஸமாபத்தியா வத்து²விஸோத⁴னங் நிரோத⁴ங் ஸமாபஜ்ஜித்வா வுட்டி²தானங் பச்சேகபு³த்³தா⁴னங் மஹாகஸ்ஸபத்தே²ராதீ³னங் தி³ன்னத³க்கி²ணாவிஸுத்³தி⁴யா தீ³பேதப்³ப³ங். தேனாஹ ‘‘ததா² ஹீ’’திஆதி³. ததே²வாதி இமினா ‘‘பிண்டா³ய சரந்தோ’’திஆதி³ங் உபஸங்ஹரதி. மெத்தாபா⁴வனாய முது³பூ⁴தசித்தப³ஹுமானபுப்³ப³கங் தெ³ந்தீதி , ‘‘ஸுபூ⁴தித்தே²ரோ த³க்கி²ணங் விஸோதே⁴தீ’’தி வுத்தங். தேன தா³யகதோபி த³க்கி²ணாவிஸுத்³தி⁴ங் த³ஸ்ஸேதி. வத்து²ஸோத⁴னங் பன படிபா⁴க³தோ. ஏவங் பன காதுங் ஸக்காதி ஸாவகானம்பி கிமேவங் லஹுவுட்டா²னாதி⁴ட்டா²னங் ஸாவகேஸு சிண்ணவஸீபா⁴வோ ஸம்ப⁴வதீதி புச்ச²தி. இதரோ அக்³க³ஸாவகமஹாஸாவகேஸு கிங் வத்தப்³ப³ங், பகதிஸாவகேஸுபி வஸிப்பத்தேஸு லப்³ப⁴தீதி தே த³ஸ்ஸெந்தோ, ‘‘ஆம ஸக்கா’’திஆதி³மாஹ. ஸேஸங் ஸுவிஞ்ஞெய்யமேவ.
Vatthuṃ sodhetīti nirodhasamāpajjanena mahapphalabhāvakaraṇena dakkhiṇeyyavatthubhūtaṃ attānaṃ visodheti; nirodhasamāpattiyā vatthuvisodhanaṃ nirodhaṃ samāpajjitvā vuṭṭhitānaṃ paccekabuddhānaṃ mahākassapattherādīnaṃ dinnadakkhiṇāvisuddhiyā dīpetabbaṃ. Tenāha ‘‘tathā hī’’tiādi. Tathevāti iminā ‘‘piṇḍāya caranto’’tiādiṃ upasaṃharati. Mettābhāvanāya mudubhūtacittabahumānapubbakaṃ dentīti , ‘‘subhūtitthero dakkhiṇaṃ visodhetī’’ti vuttaṃ. Tena dāyakatopi dakkhiṇāvisuddhiṃ dasseti. Vatthusodhanaṃ pana paṭibhāgato. Evaṃ pana kātuṃ sakkāti sāvakānampi kimevaṃ lahuvuṭṭhānādhiṭṭhānaṃ sāvakesu ciṇṇavasībhāvo sambhavatīti pucchati. Itaro aggasāvakamahāsāvakesu kiṃ vattabbaṃ, pakatisāvakesupi vasippattesu labbhatīti te dassento, ‘‘āma sakkā’’tiādimāha. Sesaṃ suviññeyyameva.
அரணவிப⁴ங்க³ஸுத்தவண்ணனாய லீனத்த²ப்பகாஸனா ஸமத்தா.
Araṇavibhaṅgasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 9. அரணவிப⁴ங்க³ஸுத்தங் • 9. Araṇavibhaṅgasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 9. அரணவிப⁴ங்க³ஸுத்தவண்ணனா • 9. Araṇavibhaṅgasuttavaṇṇanā
