| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৩৩. অরণৰিহারঞাণনিদ্দেসো
33. Araṇavihārañāṇaniddeso
৮২. কথং দস্সনাধিপতেয্যং সন্তো চ ৰিহারাধিগমো পণীতাধিমুত্ততা পঞ্ঞা অরণৰিহারে ঞাণং? দস্সনাধিপতেয্যন্তি অনিচ্চানুপস্সনা দস্সনাধিপতেয্যং, দুক্খানুপস্সনা দস্সনাধিপতেয্যং, অনত্তানুপস্সনা দস্সনাধিপতেয্যং, রূপে অনিচ্চানুপস্সনা দস্সনাধিপতেয্যং, রূপে দুক্খানুপস্সনা দস্সনাধিপতেয্যং, রূপে অনত্তানুপস্সনা দস্সনাধিপতেয্যং; ৰেদনায…পে॰… সঞ্ঞায… সঙ্খারেসু… ৰিঞ্ঞাণে… চক্খুস্মিং…পে॰… জরামরণে অনিচ্চানুপস্সনা দস্সনাধিপতেয্যং, জরামরণে দুক্খানুপস্সনা দস্সনাধিপতেয্যং, জরামরণে অনত্তানুপস্সনা দস্সনাধিপতেয্যং।
82. Kathaṃ dassanādhipateyyaṃ santo ca vihārādhigamo paṇītādhimuttatā paññā araṇavihāre ñāṇaṃ? Dassanādhipateyyanti aniccānupassanā dassanādhipateyyaṃ, dukkhānupassanā dassanādhipateyyaṃ, anattānupassanā dassanādhipateyyaṃ, rūpe aniccānupassanā dassanādhipateyyaṃ, rūpe dukkhānupassanā dassanādhipateyyaṃ, rūpe anattānupassanā dassanādhipateyyaṃ; vedanāya…pe… saññāya… saṅkhāresu… viññāṇe… cakkhusmiṃ…pe… jarāmaraṇe aniccānupassanā dassanādhipateyyaṃ, jarāmaraṇe dukkhānupassanā dassanādhipateyyaṃ, jarāmaraṇe anattānupassanā dassanādhipateyyaṃ.
সন্তো চ ৰিহারাধিগমোতি সুঞ্ঞতো ৰিহারো সন্তো ৰিহারাধিগমো। অনিমিত্তো ৰিহারো সন্তো ৰিহারাধিগমো। অপ্পণিহিতো ৰিহারো সন্তো ৰিহারাধিগমো।
Santoca vihārādhigamoti suññato vihāro santo vihārādhigamo. Animitto vihāro santo vihārādhigamo. Appaṇihito vihāro santo vihārādhigamo.
পণীতাধিমুত্ততাতি সুঞ্ঞতে অধিমুত্ততা পণীতাধিমুত্ততা। অনিমিত্তে অধিমুত্ততা পণীতাধিমুত্ততা। অপ্পণিহিতে অধিমুত্ততা পণীতাধিমুত্ততা।
Paṇītādhimuttatāti suññate adhimuttatā paṇītādhimuttatā. Animitte adhimuttatā paṇītādhimuttatā. Appaṇihite adhimuttatā paṇītādhimuttatā.
অরণৰিহারোতি পঠমং ঝানং অরণৰিহারো। দুতিযং ঝানং অরণৰিহারো। ততিযং ঝানং অরণৰিহারো। চতুত্থং ঝানং অরণৰিহারো। আকাসানঞ্চাযতনসমাপত্তি অরণৰিহারো…পে॰… নেৰসঞ্ঞানাসঞ্ঞাযতনসমাপত্তি অরণৰিহারো।
Araṇavihāroti paṭhamaṃ jhānaṃ araṇavihāro. Dutiyaṃ jhānaṃ araṇavihāro. Tatiyaṃ jhānaṃ araṇavihāro. Catutthaṃ jhānaṃ araṇavihāro. Ākāsānañcāyatanasamāpatti araṇavihāro…pe… nevasaññānāsaññāyatanasamāpatti araṇavihāro.
অরণৰিহারোতি কেনট্ঠেন অরণৰিহারো? পঠমেন ঝানেন নীৰরণে হরতীতি – অরণৰিহারো। দুতিযেন ঝানেন ৰিতক্কৰিচারে হরতীতি – অরণৰিহারো। ততিযেন ঝানেন পীতিং হরতীতি – অরণৰিহারো। চতুত্থেন ঝানেন সুখদুক্খে হরতীতি – অরণৰিহারো। আকাসানঞ্চাযতনসমাপত্তিযা রূপসঞ্ঞং পটিঘসঞ্ঞং নানত্তসঞ্ঞং হরতীতি – অরণৰিহারো। ৰিঞ্ঞাণঞ্চাযতনসমাপত্তিযা আকাসানঞ্চাযতনসঞ্ঞং হরতীতি – অরণৰিহারো। আকিঞ্চঞ্ঞাযতনসমাপত্তিযা ৰিঞ্ঞাণঞ্চাযতনসঞ্ঞং হরতীতি – অরণৰিহারো। নেৰসঞ্ঞানাসঞ্ঞাযতনসমাপত্তিযা আকিঞ্চঞ্ঞাযতনসঞ্ঞং হরতীতি – অরণৰিহারো। অযং অরণৰিহারো। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘দস্সনাধিপতেয্যং সন্তো চ ৰিহারাধিগমো পণীতাধিমুত্ততা পঞ্ঞা অরণৰিহারে ঞাণং’’।
Araṇavihāroti kenaṭṭhena araṇavihāro? Paṭhamena jhānena nīvaraṇe haratīti – araṇavihāro. Dutiyena jhānena vitakkavicāre haratīti – araṇavihāro. Tatiyena jhānena pītiṃ haratīti – araṇavihāro. Catutthena jhānena sukhadukkhe haratīti – araṇavihāro. Ākāsānañcāyatanasamāpattiyā rūpasaññaṃ paṭighasaññaṃ nānattasaññaṃ haratīti – araṇavihāro. Viññāṇañcāyatanasamāpattiyā ākāsānañcāyatanasaññaṃ haratīti – araṇavihāro. Ākiñcaññāyatanasamāpattiyā viññāṇañcāyatanasaññaṃ haratīti – araṇavihāro. Nevasaññānāsaññāyatanasamāpattiyā ākiñcaññāyatanasaññaṃ haratīti – araṇavihāro. Ayaṃ araṇavihāro. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘dassanādhipateyyaṃ santo ca vihārādhigamo paṇītādhimuttatā paññā araṇavihāre ñāṇaṃ’’.
অরণৰিহারঞাণনিদ্দেসো তেত্তিংসতিমো।
Araṇavihārañāṇaniddeso tettiṃsatimo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৩৩. অরণৰিহারঞাণনিদ্দেসৰণ্ণনা • 33. Araṇavihārañāṇaniddesavaṇṇanā
