| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
9. අරඤ්‌ඤසුත්‌තං
9. Araññasuttaṃ
262. ‘‘චතූහි , භික්‌ඛවෙ, ධම්‌මෙහි සමන්‌නාගතො භික්‌ඛු නාලං අරඤ්‌ඤවනප්‌පත්‌ථානි පන්‌තානි සෙනාසනානි පටිසෙවිතුං. කතමෙහි චතූහි? කාමවිතක්‌කෙන, බ්‍යාපාදවිතක්‌කෙන, විහිංසාවිතක්‌කෙන, දුප්‌පඤ්‌ඤො හොති ජළො එලමූගො – ඉමෙහි ඛො, භික්‌ඛවෙ, චතූහි ධම්‌මෙහි සමන්‌නාගතො භික්‌ඛු නාලං අරඤ්‌ඤවනප්‌පත්‌ථානි පන්‌තානි සෙනාසනානි පටිසෙවිතුං.
262. ‘‘Catūhi , bhikkhave, dhammehi samannāgato bhikkhu nālaṃ araññavanappatthāni pantāni senāsanāni paṭisevituṃ. Katamehi catūhi? Kāmavitakkena, byāpādavitakkena, vihiṃsāvitakkena, duppañño hoti jaḷo elamūgo – imehi kho, bhikkhave, catūhi dhammehi samannāgato bhikkhu nālaṃ araññavanappatthāni pantāni senāsanāni paṭisevituṃ.
‘‘චතූහි, භික්‌ඛවෙ, ධම්‌මෙහි සමන්‌නාගතො භික්‌ඛු අලං අරඤ්‌ඤවනප්‌පත්‌ථානි පන්‌තානි සෙනාසනානි පටිසෙවිතුං. කතමෙහි චතූහි? නෙක්‌ඛම්‌මවිතක්‌කෙන, අබ්‍යාපාදවිතක්‌කෙන, අවිහිංසාවිතක්‌කෙන , පඤ්‌ඤවා හොති අජළො අනෙලමූගො – ඉමෙහි ඛො, භික්‌ඛවෙ, චතූහි ධම්‌මෙහි සමන්‌නාගතො භික්‌ඛු අලං අරඤ්‌ඤවනප්‌පත්‌ථානි පන්‌තානි සෙනාසනානි පටිසෙවිතු’’න්‌ති. නවමං.
‘‘Catūhi, bhikkhave, dhammehi samannāgato bhikkhu alaṃ araññavanappatthāni pantāni senāsanāni paṭisevituṃ. Katamehi catūhi? Nekkhammavitakkena, abyāpādavitakkena, avihiṃsāvitakkena , paññavā hoti ajaḷo anelamūgo – imehi kho, bhikkhave, catūhi dhammehi samannāgato bhikkhu alaṃ araññavanappatthāni pantāni senāsanāni paṭisevitu’’nti. Navamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5-10. කුලසුත්‌තාදිවණ්‌ණනා • 5-10. Kulasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4-10. මාලුක්‍යපුත්‌තසුත්‌තාදිවණ්‌ණනා • 4-10. Mālukyaputtasuttādivaṇṇanā
