| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. அரஞ்ஞஸுத்தவண்ணனா
10. Araññasuttavaṇṇanā
10. த³ஸமே ஸந்தானந்தி ஸந்தகிலேஸானங், பண்டி³தானங் வா. ‘‘ஸந்தோ ஹவே ஸப்³பி⁴ பவேத³யந்தி (ஜா॰ 2.21.413), தூ³ரே ஸந்தோ பகாஸந்தீ’’திஆதீ³ஸு (த⁴॰ ப॰ 304) ஹி பண்டி³தாபி ஸந்தோதி வுத்தா. ப்³ரஹ்மசாரினந்தி ஸெட்ட²சாரீனங் மக்³க³ப்³ரஹ்மசரியவாஸங் வஸந்தானங். கேன வண்ணோ பஸீத³தீதி கேன காரணேன ச²விவண்ணோ பஸீத³தீதி புச்ச²தி. கஸ்மா பனேஸா ஏவங் புச்ச²தி? ஏஸா கிர வனஸண்ட³வாஸிகா பு⁴ம்மதே³வதா ஆரஞ்ஞகே பி⁴க்கூ² பச்சா²ப⁴த்தங் பிண்ட³பாதபடிக்கந்தே அரஞ்ஞங் பவிஸித்வா ரத்திட்டா²னதி³வாட்டா²னேஸு மூலகம்மட்டா²னங் க³ஹெத்வா நிஸின்னே பஸ்ஸதி. தேஸஞ்ச ஏவங் நிஸின்னானங் ப³லவசித்தேகக்³க³தா உப்பஜ்ஜதி. ததோ விஸபா⁴க³ஸந்ததி வூபஸம்மதி, ஸபா⁴க³ஸந்ததி ஓக்கமதி, சித்தங் பஸீத³தி. சித்தே பஸன்னே லோஹிதங் பஸீத³தி, சித்தஸமுட்டா²னானி உபாதா³ரூபானி பரிஸுத்³தா⁴னி ஹொந்தி, வண்டா பமுத்ததாலப²லஸ்ஸ விய முக²ஸ்ஸ வண்ணோ ஹோதி. தங் தி³ஸ்வா தே³வதா சிந்தேஸி – ‘‘ஸரீரவண்ணோ நாமாயங் பணீதானி ரஸஸம்பன்னானி போ⁴ஜனானி ஸுக²ஸம்ப²ஸ்ஸானி நிவாஸனபாபுரணஸயனானி உதுஸுகே² தேபூ⁴மிகாதி³பே⁴தே³ ச பாஸாதே³ மாலாக³ந்த⁴விலேபனாதீ³னி ச லப⁴ந்தானங் பஸீத³தி, இமே பன பி⁴க்கூ² பிண்டா³ய சரித்வா மிஸ்ஸகப⁴த்தங் பு⁴ஞ்ஜந்தி, விரளமஞ்சகே வா ப²லகே வா ஸிலாய வா ஸயனானி கப்பெந்தி, ருக்க²மூலாதீ³ஸு வா அப்³போ⁴காஸே வா வஸந்தி, கேன நு கோ² காரணேன ஏதேஸங் வண்ணோ பஸீத³தீ’’தி. தஸ்மா புச்சி².
10. Dasame santānanti santakilesānaṃ, paṇḍitānaṃ vā. ‘‘Santo have sabbhi pavedayanti (jā. 2.21.413), dūre santo pakāsantī’’tiādīsu (dha. pa. 304) hi paṇḍitāpi santoti vuttā. Brahmacārinanti seṭṭhacārīnaṃ maggabrahmacariyavāsaṃ vasantānaṃ. Kena vaṇṇo pasīdatīti kena kāraṇena chavivaṇṇo pasīdatīti pucchati. Kasmā panesā evaṃ pucchati? Esā kira vanasaṇḍavāsikā bhummadevatā āraññake bhikkhū pacchābhattaṃ piṇḍapātapaṭikkante araññaṃ pavisitvā rattiṭṭhānadivāṭṭhānesu mūlakammaṭṭhānaṃ gahetvā nisinne passati. Tesañca evaṃ nisinnānaṃ balavacittekaggatā uppajjati. Tato visabhāgasantati vūpasammati, sabhāgasantati okkamati, cittaṃ pasīdati. Citte pasanne lohitaṃ pasīdati, cittasamuṭṭhānāni upādārūpāni parisuddhāni honti, vaṇṭā pamuttatālaphalassa viya mukhassa vaṇṇo hoti. Taṃ disvā devatā cintesi – ‘‘sarīravaṇṇo nāmāyaṃ paṇītāni rasasampannāni bhojanāni sukhasamphassāni nivāsanapāpuraṇasayanāni utusukhe tebhūmikādibhede ca pāsāde mālāgandhavilepanādīni ca labhantānaṃ pasīdati, ime pana bhikkhū piṇḍāya caritvā missakabhattaṃ bhuñjanti, viraḷamañcake vā phalake vā silāya vā sayanāni kappenti, rukkhamūlādīsu vā abbhokāse vā vasanti, kena nu kho kāraṇena etesaṃ vaṇṇo pasīdatī’’ti. Tasmā pucchi.
அத²ஸ்ஸா ப⁴க³வா காரணங் கதெ²ந்தோ து³தியங் கா³த²ங் ஆஹ. தத்த² அதீதந்தி அதீதே அஸுகோ நாம ராஜா த⁴ம்மிகோ அஹோஸி, ஸோ அம்ஹாகங் பணீதே பச்சயே அதா³ஸி. ஆசரியுபஜ்ஜா²யா லாபி⁴னோ அஹேஸுங். அத² மயங் ஏவரூபானி போ⁴ஜனானி பு⁴ஞ்ஜிம்ஹா, சீவரானி பாருபிம்ஹாதி ஏவங் ஏகச்சே பச்சயபா³ஹுல்லிகா விய இமே பி⁴க்கூ² அதீதங் நானுஸோசந்தி. நப்பஜப்பந்தி நாக³தந்தி அனாக³தே த⁴ம்மிகோ ராஜா ப⁴விஸ்ஸதி, பீ²தா ஜனபதா³ ப⁴விஸ்ஸந்தி, ப³ஹூனி ஸப்பினவனீதாதீ³னி உப்பஜ்ஜிஸ்ஸந்தி, ‘‘கா²த³த² பு⁴ஞ்ஜதா²’’தி தத்த² தத்த² வத்தாரோ ப⁴விஸ்ஸந்தி, ததா³ மயங் ஏவரூபானி போ⁴ஜனானி பு⁴ஞ்ஜிஸ்ஸாம, சீவரானி பாருபிஸ்ஸாமாதி ஏவங் அனாக³தங் ந பத்தெ²ந்தி. பச்சுப்பன்னேனாதி யேன கேனசி தங்க²ணே லத்³தே⁴ன யாபெந்தி. தேனாதி தேன திவிதே⁴னாபி காரணேன.
Athassā bhagavā kāraṇaṃ kathento dutiyaṃ gāthaṃ āha. Tattha atītanti atīte asuko nāma rājā dhammiko ahosi, so amhākaṃ paṇīte paccaye adāsi. Ācariyupajjhāyā lābhino ahesuṃ. Atha mayaṃ evarūpāni bhojanāni bhuñjimhā, cīvarāni pārupimhāti evaṃ ekacce paccayabāhullikā viya ime bhikkhū atītaṃ nānusocanti. Nappajappanti nāgatanti anāgate dhammiko rājā bhavissati, phītā janapadā bhavissanti, bahūni sappinavanītādīni uppajjissanti, ‘‘khādatha bhuñjathā’’ti tattha tattha vattāro bhavissanti, tadā mayaṃ evarūpāni bhojanāni bhuñjissāma, cīvarāni pārupissāmāti evaṃ anāgataṃ na patthenti. Paccuppannenāti yena kenaci taṅkhaṇe laddhena yāpenti. Tenāti tena tividhenāpi kāraṇena.
ஏவங் வண்ணஸம்பத்திங் த³ஸ்ஸெத்வா இதா³னி தஸ்ஸேவ வண்ணஸ்ஸ வினாஸங் த³ஸ்ஸெந்தோ அனந்தரங் கா³த²மாஹ. தத்த² அனாக³தப்பஜப்பாயாதி அனாக³தஸ்ஸ பத்த²னாய. ஏதேனாதி ஏதேன காரணத்³வயேன. நளோவ ஹரிதோ லுதோதி யதா² ஹரிதோ நளோ லாயித்வா உண்ஹபாஸாணே பக்கி²த்தோ ஸுஸ்ஸதி, ஏவங் ஸுஸ்ஸந்தீதி.
Evaṃ vaṇṇasampattiṃ dassetvā idāni tasseva vaṇṇassa vināsaṃ dassento anantaraṃ gāthamāha. Tattha anāgatappajappāyāti anāgatassa patthanāya. Etenāti etena kāraṇadvayena. Naḷova harito lutoti yathā harito naḷo lāyitvā uṇhapāsāṇe pakkhitto sussati, evaṃ sussantīti.
அரஞ்ஞஸுத்தவண்ணனா நிட்டி²தா. நளவக்³கோ³ பட²மோ.
Araññasuttavaṇṇanā niṭṭhitā. Naḷavaggo paṭhamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. அரஞ்ஞஸுத்தங் • 10. Araññasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. அரஞ்ஞஸுத்தவண்ணனா • 10. Araññasuttavaṇṇanā
