| Library / Tipiṭaka / д̇ибидага • Tipiṭaka / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) |
10. аран̃н̃асуд̇д̇аван̣н̣анаа
10. Araññasuttavaṇṇanā
10. д̣̇асамз санд̇аананд̇и санд̇агилзсаанам̣, бан̣д̣ид̇аанам̣ ваа. ‘‘санд̇о хавз саб̣бхи бавзд̣̇аяанд̇и (ж̇аа. 2.21.413), д̣̇уурз санд̇о багаасанд̇ий’’д̇иаад̣̇ийсу (д̇ха. ба. 304) хи бан̣д̣ид̇ааби санд̇од̇и вуд̇д̇аа. б̣рахмажааринанд̇и сздтажаарийнам̣ маг̇г̇аб̣рахмажарияаваасам̣ васанд̇аанам̣. гзна ван̣н̣о басийд̣̇ад̇ийд̇и гзна гааран̣зна чавиван̣н̣о басийд̣̇ад̇ийд̇и бужчад̇и. гасмаа банзсаа звам̣ бужчад̇и? зсаа гира ванасан̣д̣аваасигаа бхуммад̣̇звад̇аа ааран̃н̃агз бхигкуу бажчаабхад̇д̇ам̣ бин̣д̣абаад̇абадигганд̇з аран̃н̃ам̣ бависид̇ваа рад̇д̇идтаанад̣̇иваадтаанзсу муулагаммадтаанам̣ г̇ахзд̇ваа нисиннз бассад̇и. д̇зсан̃жа звам̣ нисиннаанам̣ б̣алаважид̇д̇згаг̇г̇ад̇аа уббаж̇ж̇ад̇и. д̇ад̇о висабхааг̇асанд̇ад̇и вуубасаммад̇и, сабхааг̇асанд̇ад̇и оггамад̇и, жид̇д̇ам̣ басийд̣̇ад̇и. жид̇д̇з басаннз лохид̇ам̣ басийд̣̇ад̇и, жид̇д̇асамудтаанаани убаад̣̇ааруубаани барисуд̣̇д̇хаани хонд̇и, ван̣даа бамуд̇д̇ад̇аалапаласса вияа мукасса ван̣н̣о ход̇и. д̇ам̣ д̣̇исваа д̣̇звад̇аа жинд̇зси – ‘‘сарийраван̣н̣о наамааяам̣ бан̣ийд̇аани расасамбаннаани бхож̇анаани сукасампассаани ниваасанабаабуран̣асаяанаани уд̇усукз д̇збхуумигаад̣̇ибхзд̣̇з жа баасаад̣̇з маалааг̇анд̇хавилзбанаад̣̇ийни жа лабханд̇аанам̣ басийд̣̇ад̇и, имз бана бхигкуу бин̣д̣ааяа жарид̇ваа миссагабхад̇д̇ам̣ бхун̃ж̇анд̇и, вирал̣аман̃жагз ваа палагз ваа силааяа ваа саяанаани габбзнд̇и, ругкамуулаад̣̇ийсу ваа аб̣бхогаасз ваа васанд̇и, гзна ну ко гааран̣зна зд̇зсам̣ ван̣н̣о басийд̣̇ад̇ий’’д̇и. д̇асмаа бужчи.
10. Dasame santānanti santakilesānaṃ, paṇḍitānaṃ vā. ‘‘Santo have sabbhi pavedayanti (jā. 2.21.413), dūre santo pakāsantī’’tiādīsu (dha. pa. 304) hi paṇḍitāpi santoti vuttā. Brahmacārinanti seṭṭhacārīnaṃ maggabrahmacariyavāsaṃ vasantānaṃ. Kena vaṇṇo pasīdatīti kena kāraṇena chavivaṇṇo pasīdatīti pucchati. Kasmā panesā evaṃ pucchati? Esā kira vanasaṇḍavāsikā bhummadevatā āraññake bhikkhū pacchābhattaṃ piṇḍapātapaṭikkante araññaṃ pavisitvā rattiṭṭhānadivāṭṭhānesu mūlakammaṭṭhānaṃ gahetvā nisinne passati. Tesañca evaṃ nisinnānaṃ balavacittekaggatā uppajjati. Tato visabhāgasantati vūpasammati, sabhāgasantati okkamati, cittaṃ pasīdati. Citte pasanne lohitaṃ pasīdati, cittasamuṭṭhānāni upādārūpāni parisuddhāni honti, vaṇṭā pamuttatālaphalassa viya mukhassa vaṇṇo hoti. Taṃ disvā devatā cintesi – ‘‘sarīravaṇṇo nāmāyaṃ paṇītāni rasasampannāni bhojanāni sukhasamphassāni nivāsanapāpuraṇasayanāni utusukhe tebhūmikādibhede ca pāsāde mālāgandhavilepanādīni ca labhantānaṃ pasīdati, ime pana bhikkhū piṇḍāya caritvā missakabhattaṃ bhuñjanti, viraḷamañcake vā phalake vā silāya vā sayanāni kappenti, rukkhamūlādīsu vā abbhokāse vā vasanti, kena nu kho kāraṇena etesaṃ vaṇṇo pasīdatī’’ti. Tasmā pucchi.
ат̇ассаа бхаг̇аваа гааран̣ам̣ гат̇знд̇о д̣̇уд̇ияам̣ г̇аат̇ам̣ ааха. д̇ад̇т̇а ад̇ийд̇анд̇и ад̇ийд̇з асуго наама рааж̇аа д̇хаммиго ахоси, со амхаагам̣ бан̣ийд̇з бажжаяз ад̣̇ааси. аажарияубаж̇жхааяаа лаабхино ахзсум̣. ат̇а маяам̣ зваруубаани бхож̇анаани бхун̃ж̇имхаа, жийвараани баарубимхаад̇и звам̣ згажжз бажжаяаб̣аахуллигаа вияа имз бхигкуу ад̇ийд̇ам̣ наанусожанд̇и. наббаж̇аббанд̇и нааг̇ад̇анд̇и анааг̇ад̇з д̇хаммиго рааж̇аа бхависсад̇и, пийд̇аа ж̇анабад̣̇аа бхависсанд̇и, б̣ахууни саббинаванийд̇аад̣̇ийни уббаж̇ж̇иссанд̇и, ‘‘каад̣̇ат̇а бхун̃ж̇ат̇аа’’д̇и д̇ад̇т̇а д̇ад̇т̇а вад̇д̇ааро бхависсанд̇и, д̇ад̣̇аа маяам̣ зваруубаани бхож̇анаани бхун̃ж̇иссаама, жийвараани баарубиссаамаад̇и звам̣ анааг̇ад̇ам̣ на бад̇т̇знд̇и. бажжуббаннзнаад̇и язна гзнажи д̇ан̇кан̣з лад̣̇д̇хзна яаабзнд̇и. д̇знаад̇и д̇зна д̇ивид̇хзнааби гааран̣зна.
Athassā bhagavā kāraṇaṃ kathento dutiyaṃ gāthaṃ āha. Tattha atītanti atīte asuko nāma rājā dhammiko ahosi, so amhākaṃ paṇīte paccaye adāsi. Ācariyupajjhāyā lābhino ahesuṃ. Atha mayaṃ evarūpāni bhojanāni bhuñjimhā, cīvarāni pārupimhāti evaṃ ekacce paccayabāhullikā viya ime bhikkhū atītaṃ nānusocanti. Nappajappanti nāgatanti anāgate dhammiko rājā bhavissati, phītā janapadā bhavissanti, bahūni sappinavanītādīni uppajjissanti, ‘‘khādatha bhuñjathā’’ti tattha tattha vattāro bhavissanti, tadā mayaṃ evarūpāni bhojanāni bhuñjissāma, cīvarāni pārupissāmāti evaṃ anāgataṃ na patthenti. Paccuppannenāti yena kenaci taṅkhaṇe laddhena yāpenti. Tenāti tena tividhenāpi kāraṇena.
звам̣ ван̣н̣асамбад̇д̇им̣ д̣̇ассзд̇ваа ид̣̇аани д̇ассзва ван̣н̣асса винаасам̣ д̣̇ассзнд̇о ананд̇арам̣ г̇аат̇амааха. д̇ад̇т̇а анааг̇ад̇аббаж̇аббааяаад̇и анааг̇ад̇асса бад̇т̇анааяа. зд̇знаад̇и зд̇зна гааран̣ад̣̇ваязна. нал̣ова харид̇о луд̇од̇и яат̇аа харид̇о нал̣о лааяид̇ваа ун̣хабаасаан̣з багкид̇д̇о суссад̇и, звам̣ суссанд̇ийд̇и.
Evaṃ vaṇṇasampattiṃ dassetvā idāni tasseva vaṇṇassa vināsaṃ dassento anantaraṃ gāthamāha. Tattha anāgatappajappāyāti anāgatassa patthanāya. Etenāti etena kāraṇadvayena. Naḷova harito lutoti yathā harito naḷo lāyitvā uṇhapāsāṇe pakkhitto sussati, evaṃ sussantīti.
аран̃н̃асуд̇д̇аван̣н̣анаа нидтид̇аа. нал̣аваг̇г̇о батамо.
Araññasuttavaṇṇanā niṭṭhitā. Naḷavaggo paṭhamo.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 10. аран̃н̃асуд̇д̇ам̣ • 10. Araññasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 10. аран̃н̃асуд̇д̇аван̣н̣анаа • 10. Araññasuttavaṇṇanā
