| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
10. аран̃н̃асуд̇д̇аван̣н̣анаа
10. Araññasuttavaṇṇanā
10. санд̇агилзсаананд̇и вуубасанд̇агилзсабарил̣аахаанам̣. яасмаа сийлаад̣̇иг̇ун̣асамбхавам̣ д̇ад̇о зва бхаяасанд̇ан̃жа убаад̣̇ааяа бан̣д̣ид̇аа ‘‘санд̇о’’д̇и вужжанд̇и, д̇асмаа вуд̇д̇ам̣ ‘‘бан̣д̣ид̇аанам̣ ваа’’д̇и. д̇знааха ‘‘санд̇о хавз’’д̇иаад̣̇и. сздтажаарийнанд̇и сздтажарияам̣ жаранд̇аанам̣. яасмаа бут̇уж̇ж̇анагаляаан̣ад̇о бадтааяа бхигку маг̇г̇аб̣рахмажарияаваасам̣ васад̇и наама, д̇асмаа ааха ‘‘маг̇г̇аб̣рахмажарияаваасам̣ васанд̇аана’’нд̇и. арияаанам̣ бана мукаван̣н̣асса басийд̣̇анз вад̇д̇аб̣б̣амзва над̇т̇и. муулагаммадтаананд̇и баарихаарияагаммадтаанам̣. висабхааг̇асанд̇ад̇ийд̇и наанаарамман̣зсу бавад̇д̇ажид̇д̇асанд̇ад̇и. саа хи вигкзбаб̣яаагулад̇ааяа аббасаннаа самаахид̇ажид̇д̇асанд̇ад̇ияаа висабхааг̇асанд̇ад̇и. оггамад̇ийд̇и самаад̇хисабхааг̇аа жид̇д̇асанд̇ад̇и самат̇авийт̇им̣ анубависад̇и. жид̇д̇ам̣ басийд̣̇ад̇ийд̇и гаммадтаананирад̇ам̣ бхааванаажид̇д̇ам̣ санд̇хааяааха, д̇ам̣ басаннам̣ худ̇ваа бавад̇д̇ад̇и. лохид̇ам̣ басийд̣̇ад̇ийд̇и жид̇д̇агаалуссияассаабхаавад̇о лохид̇ам̣ анаавилам̣ ход̇и. барисуд̣̇д̇хаани хонд̇и гааран̣асса барисуд̣̇д̇хабхаавад̇о. д̇аалапаламукасса вияа мукасса ван̣н̣о ход̇ийд̇и мука-сад̣̇д̣̇асса аад̣̇имхи бамуд̇д̇абад̣̇зна яож̇зд̇аб̣б̣о. зван̃хи жасса бамуд̇д̇аг̇г̇ахан̣ам̣ самад̇т̇ид̇ам̣ ход̇и д̇аалапаламукасса ван̣н̣асамбад̣̇аасад̣̇исад̇д̇аа. д̇ибхуумаго зва д̇збхуумаго.
10.Santakilesānanti vūpasantakilesapariḷāhānaṃ. Yasmā sīlādiguṇasambhavaṃ tato eva bhayasantañca upādāya paṇḍitā ‘‘santo’’ti vuccanti, tasmā vuttaṃ ‘‘paṇḍitānaṃ vā’’ti. Tenāha ‘‘santo have’’tiādi. Seṭṭhacārīnanti seṭṭhacariyaṃ carantānaṃ. Yasmā puthujjanakalyāṇato paṭṭhāya bhikkhu maggabrahmacariyavāsaṃ vasati nāma, tasmā āha ‘‘maggabrahmacariyavāsaṃ vasantāna’’nti. Ariyānaṃ pana mukhavaṇṇassa pasīdane vattabbameva natthi. Mūlakammaṭṭhānanti pārihāriyakammaṭṭhānaṃ. Visabhāgasantatīti nānārammaṇesu pavattacittasantati. Sā hi vikkhepabyākulatāya appasannā samāhitacittasantatiyā visabhāgasantati. Okkamatīti samādhisabhāgā cittasantati samathavīthiṃ anupavisati. Cittaṃ pasīdatīti kammaṭṭhānanirataṃ bhāvanācittaṃ sandhāyāha, taṃ pasannaṃ hutvā pavattati. Lohitaṃ pasīdatīti cittakālussiyassābhāvato lohitaṃ anāvilaṃ hoti. Parisuddhāni honti kāraṇassa parisuddhabhāvato. Tālaphalamukhassa viya mukhassa vaṇṇo hotīti mukha-saddassa ādimhi pamuttapadena yojetabbo. Evañhi cassa pamuttaggahaṇaṃ samatthitaṃ hoti tālaphalamukhassa vaṇṇasampadāsadisattā. Tibhūmako eva tebhūmako.
ад̇ийд̇ам̣ наанусожанд̇и ад̇ийд̇ам̣ бажжаяалаабхам̣ лагкан̣ам̣ гад̇ваа на сожанд̇и на ануд̇т̇унанд̇и. ж̇аббанад̇ан̣хааяа васзна на баригаббанд̇ийд̇и ааха ‘‘на бад̇т̇знд̇ий’’д̇и . язна гзнажийд̇и ид̇арийд̇арзна. д̇ан̇кан̣з лад̣̇д̇хзнаад̇и саннид̇хигаарабарибхог̇аабхаавамааха. д̇ивид̇хзнаби гааран̣знаад̇и д̇иббагаарзна хзд̇унаа, д̇илагкан̣асанд̇осанимид̇д̇анд̇и ад̇т̇о.
Atītaṃ nānusocanti atītaṃ paccayalābhaṃ lakkhaṇaṃ katvā na socanti na anutthunanti. Jappanataṇhāya vasena na parikappantīti āha ‘‘na patthentī’’ti . Yena kenacīti itarītarena. Taṅkhaṇe laddhenāti sannidhikāraparibhogābhāvamāha. Tividhenapi kāraṇenāti tippakārena hetunā, tilakkhaṇasantosanimittanti attho.
винаасанд̇и винаасанахзд̇ум̣. винассанд̇и зд̇зхийд̇и винаасо, лобхад̣̇осаа д̇ад̣̇згадтаа жа баабад̇хаммаа . аруубагааяасса вияа руубагааяассаби висзсад̇о сугкабхаавагааран̣анд̇и ааха ‘‘зд̇зна гааран̣ад̣̇ваязнаа’’д̇и. луд̇од̇и лууно.
Vināsanti vināsanahetuṃ. Vinassanti etehīti vināso, lobhadosā tadekaṭṭhā ca pāpadhammā . Arūpakāyassa viya rūpakāyassapi visesato sukkhabhāvakāraṇanti āha ‘‘etena kāraṇadvayenā’’ti. Lutoti lūno.
аран̃н̃асуд̇д̇аван̣н̣анаа нидтид̇аа.
Araññasuttavaṇṇanā niṭṭhitā.
нал̣аваг̇г̇аван̣н̣анаа нидтид̇аа.
Naḷavaggavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 10. аран̃н̃асуд̇д̇ам̣ • 10. Araññasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 10. аран̃н̃асуд̇д̇аван̣н̣анаа • 10. Araññasuttavaṇṇanā
