| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
அரஞ்ஞட்ட²கதா²வண்ணனா
Araññaṭṭhakathāvaṇṇanā
107. அரஞ்ஞட்ட²கதா²யங் அரஞ்ஞங் நாமாதி இத³ங் பன ந கேவலங் புப்³பே³ வுத்தஅரஞ்ஞலக்க²ணப்பத்திமத்தேன அரஞ்ஞங் இதா⁴தி⁴ப்பேதங், கிந்து யங் அத்தனோ அரஞ்ஞலக்க²ணேன அரஞ்ஞங் பரபரிக்³க³ஹிதஞ்ச ஹோதி, தங் அரஞ்ஞங் இதா⁴தி⁴ப்பேதந்தி த³ஸ்ஸேதுங் வுத்தங். தேனாதி புன அரஞ்ஞவசனேன. ந பரிக்³க³ஹிதபா⁴வோ அரஞ்ஞஸ்ஸ லக்க²ணந்தி யதி³ ஹி பரிக்³க³ஹிதபா⁴வோ அரஞ்ஞலக்க²ணங் ஸியா, ‘‘அரஞ்ஞங் நாம யங் மனுஸ்ஸானங் பரிக்³க³ஹித’’ந்தி எத்தகமேவ வதெ³ய்யாதி அதி⁴ப்பாயோ. யந்தி இமினா புப்³பே³ வுத்தலக்க²ணமேவ அரஞ்ஞங் பராமட்ட²ந்தி ஆஹ ‘‘யங் பன அத்தனோ அரஞ்ஞலக்க²ணேன அரஞ்ஞ’’ந்தி.
107. Araññaṭṭhakathāyaṃ araññaṃ nāmāti idaṃ pana na kevalaṃ pubbe vuttaaraññalakkhaṇappattimattena araññaṃ idhādhippetaṃ, kintu yaṃ attano araññalakkhaṇena araññaṃ parapariggahitañca hoti, taṃ araññaṃ idhādhippetanti dassetuṃ vuttaṃ. Tenāti puna araññavacanena. Na pariggahitabhāvo araññassa lakkhaṇanti yadi hi pariggahitabhāvo araññalakkhaṇaṃ siyā, ‘‘araññaṃ nāma yaṃ manussānaṃ pariggahita’’nti ettakameva vadeyyāti adhippāyo. Yanti iminā pubbe vuttalakkhaṇameva araññaṃ parāmaṭṭhanti āha ‘‘yaṃ pana attano araññalakkhaṇena arañña’’nti.
வினிவிஜ்ஜி²த்வாதி உஜுகமேவ வினிவிஜ்ஜி²த்வா. பண்ணங் வாதி தாலபண்ணாதி³ பண்ணங் வா. அத்³த⁴க³தோபீதி சிரகாலங் தத்தே²வ டி²தோபி. ந க³ஹேதப்³போ³தி எத்த² பன யோ பரேஹி அரஞ்ஞஸாமிகானங் ஹத்த²தோ கிணித்வா தச்செ²த்வா தத்தே²வ ட²பிதோ, ஸோ அரஞ்ஞஸாமிகேன அனுஞ்ஞாதோபி ந க³ஹேதப்³போ³. ஸாமிகேஹி ச²ட்³டி³தோதி க³ஹேதுங் வட்டதீதி பங்ஸுகூலஸஞ்ஞாய க³ஹணங் வுத்தங். லக்க²ணச்சி²ன்னஸ்ஸாபீதி அரஞ்ஞஸாமிகானங் ஹத்த²தோ கிணித்வா க³ண்ஹந்தேஹி கதஸஞ்ஞாணஸ்ஸ. ச²ல்லியா பரியோனத்³த⁴ங் ஹோதீதி இமினா ஸாமிகானங் நிரபெக்க²தங் தீ³பேதி. தேன வுத்தங் ‘‘க³ஹேதுங் வட்டதீ’’தி. யதி³ ஸாமிகானங் ஸாபெக்க²தா அத்தி², ந வட்டதி. தானி கதானி அஜ்ஜா²வுத்தா²னி ச ஹொந்தீதி தானி கே³ஹாதீ³னி கதானி பரினிட்டி²தானி மனுஸ்ஸேஹி ச அஜ்ஜா²வுத்தா²னி ஹொந்தி. தா³ரூனிபீதி கே³ஹாதீ³னங் கதத்தா ததோ அவஸிட்ட²தா³ரூனிபி. ஏதேஸந்தி ஏதேஸங் யதா²வுத்ததா³ரூனங்.
Vinivijjhitvāti ujukameva vinivijjhitvā. Paṇṇaṃ vāti tālapaṇṇādi paṇṇaṃ vā. Addhagatopīti cirakālaṃ tattheva ṭhitopi. Na gahetabboti ettha pana yo parehi araññasāmikānaṃ hatthato kiṇitvā tacchetvā tattheva ṭhapito, so araññasāmikena anuññātopi na gahetabbo. Sāmikehi chaḍḍitoti gahetuṃ vaṭṭatīti paṃsukūlasaññāya gahaṇaṃ vuttaṃ. Lakkhaṇacchinnassāpīti araññasāmikānaṃ hatthato kiṇitvā gaṇhantehi katasaññāṇassa. Challiyā pariyonaddhaṃ hotīti iminā sāmikānaṃ nirapekkhataṃ dīpeti. Tena vuttaṃ ‘‘gahetuṃ vaṭṭatī’’ti. Yadi sāmikānaṃ sāpekkhatā atthi, na vaṭṭati. Tāni katāni ajjhāvutthāni ca hontīti tāni gehādīni katāni pariniṭṭhitāni manussehi ca ajjhāvutthāni honti. Dārūnipīti gehādīnaṃ katattā tato avasiṭṭhadārūnipi. Etesanti etesaṃ yathāvuttadārūnaṃ.
தேஸங் ஆரக்க²ட்டா²னந்தி தேஸங் அரஞ்ஞபாலானங் டி²தட்டா²னங். தே³ஹீதி வுத்தே தா³தப்³ப³மேவாதி எத்த² ‘‘தே³ஹீ’’தி வுத்தே ‘‘த³ஸ்ஸாமீ’’தி ஆபோ⁴க³ஸப்³பா⁴வதோ ‘‘தே³ஹீ’’தி அவுத்தே அத³த்வாபி க³ந்துங் வட்டதியேவ. க³ந்துங் தே³தா²தி க³மனங் தே³த². அதி³ஸ்வா க³ச்ச²தி, ப⁴ண்ட³தெ³ய்யந்தி பரிஸுத்³த⁴சித்தேன க³ச்ச²தி, ப⁴ண்ட³தெ³ய்யங். யத்த² கத்த²சி நீதானம்பி தா³ரூனங் அரஞ்ஞஸாமிகானங்யேவ ஸந்தகத்தா ஸுத்³த⁴சித்தேன நிக்க²ந்தோபி புன தெ²ய்யசித்தங் உப்பாதெ³த்வா க³ச்ச²தி, பாராஜிகமேவாதி வத³ந்தி.
Tesaṃārakkhaṭṭhānanti tesaṃ araññapālānaṃ ṭhitaṭṭhānaṃ. Dehīti vutte dātabbamevāti ettha ‘‘dehī’’ti vutte ‘‘dassāmī’’ti ābhogasabbhāvato ‘‘dehī’’ti avutte adatvāpi gantuṃ vaṭṭatiyeva. Gantuṃ dethāti gamanaṃ detha. Adisvā gacchati, bhaṇḍadeyyanti parisuddhacittena gacchati, bhaṇḍadeyyaṃ. Yattha katthaci nītānampi dārūnaṃ araññasāmikānaṃyeva santakattā suddhacittena nikkhantopi puna theyyacittaṃ uppādetvā gacchati, pārājikamevāti vadanti.
அரஞ்ஞட்ட²கதா²வண்ணனா நிட்டி²தா.
Araññaṭṭhakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / அரஞ்ஞட்ட²கதா²வண்ணனா • Araññaṭṭhakathāvaṇṇanā
