| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
அரஞ்ஞட்ட²கதா²வண்ணனா
Araññaṭṭhakathāvaṇṇanā
107. அரஞ்ஞட்ட²கதா²யங் வினிவிஜ்ஜி²த்வாதி உஜுகமேவ வினிவிஜ்ஜி²த்வா. லக்க²ணச்சி²ன்னஸ்ஸாதி அரஞ்ஞஸாமிகானங் ஹத்த²தோ கிணித்வா க³ண்ஹந்தேஹி கதஅக்க²ராதி³ஸஞ்ஞாணஸ்ஸ. ச²ல்லியா பரியோனத்³த⁴ந்தி இமினா ஸாமிகானங் நிராபெக்க²தாய சிரச²ட்³டி³தபா⁴வங் தீ³பேதி, தேனாஹ ‘‘க³ஹேதுங் வட்டதீ’’தி. யதி³ ஸாமிகானங் ஸாபெக்க²தா அத்தி², ந வட்டதி. தானி கதானி அஜ்ஜா²வுத்தா²னி ச ஹொந்தீதி தானி கே³ஹாதீ³னி கதானி பரினிட்டி²தானி மனுஸ்ஸேஹி ச அஜ்ஜா²வுத்தா²னி ச ஹொந்தி. தா³ரூனீதி கே³ஹாதீ³னங் கதத்தா அவஸிட்ட²தா³ரூனி. க³ஹேதுங் வட்டதீதி ஸாமிகானங் அனாலயத்தா வுத்தங், தே ச யதி³ க³ஹணகாலே தி³ஸ்வா ஸாலயா ஹுத்வா வாரெந்தி, க³ஹேதுங் ந வட்டதியேவ. ‘‘தே³ஹீ’’தி வுத்தே தா³தப்³ப³மேவாதி ‘‘தே³ஹீ’’தி வுத்தே ‘‘த³ஸ்ஸாமீ’’தி ஆபோ⁴க³ங் கத்வா க³ச்ச²ந்தஸ்ஸ ‘‘தே³ஹீ’’தி அவுத்தே அத³த்வா க³மனே ஆபத்தி நத்தி². பச்சா²பி தேஹி சோதி³தே தா³தப்³ப³மேவ.
107. Araññaṭṭhakathāyaṃ vinivijjhitvāti ujukameva vinivijjhitvā. Lakkhaṇacchinnassāti araññasāmikānaṃ hatthato kiṇitvā gaṇhantehi kataakkharādisaññāṇassa. Challiyā pariyonaddhanti iminā sāmikānaṃ nirāpekkhatāya cirachaḍḍitabhāvaṃ dīpeti, tenāha ‘‘gahetuṃ vaṭṭatī’’ti. Yadi sāmikānaṃ sāpekkhatā atthi, na vaṭṭati. Tāni katāni ajjhāvutthāni ca hontīti tāni gehādīni katāni pariniṭṭhitāni manussehi ca ajjhāvutthāni ca honti. Dārūnīti gehādīnaṃ katattā avasiṭṭhadārūni. Gahetuṃ vaṭṭatīti sāmikānaṃ anālayattā vuttaṃ, te ca yadi gahaṇakāle disvā sālayā hutvā vārenti, gahetuṃ na vaṭṭatiyeva. ‘‘Dehī’’ti vutte dātabbamevāti ‘‘dehī’’ti vutte ‘‘dassāmī’’ti ābhogaṃ katvā gacchantassa ‘‘dehī’’ti avutte adatvā gamane āpatti natthi. Pacchāpi tehi codite dātabbameva.
அதி³ஸ்வா க³ச்ச²தி, ப⁴ண்ட³தெ³ய்யந்தி ஸுத்³த⁴சித்தேன க³தஸ்ஸ ப⁴ண்ட³தெ³ய்யங். ஆரக்க²ட்டா²னம்பி ஸுத்³த⁴சித்தேன அதிக்கமித்வா தெ²ய்யசித்தே உப்பன்னேபி அவஹாரோ நத்தி² ஆரக்க²ட்டா²னஸ்ஸ அதிக்கந்தத்தா. கேசி பன ‘‘யத்த² கத்த²சி நீதானம்பி தா³ரூனங் அரஞ்ஞஸாமிகானஞ்ஞேவ ஸந்தகத்தா புன தெ²ய்யசித்தங் உப்பாதெ³த்வா க³ச்ச²தி, பாராஜிகமேவா’’தி வத³ந்தி, தங் ந யுத்தங் ‘‘ஆரக்க²ட்டா²னங் பத்வா…பே॰… அஸ்ஸதியா அதிக்கமதீ’’தி, ஸஹஸா தங் டா²னங் அதிக்கமதீதிஆதி³னா (பாரா॰ அட்ட²॰ 1.107) ச ஆரக்க²ட்டா²னாதிக்கமேயேவ ஆபத்தியா வுச்சமானத்தா, ஆரக்க²ட்டா²னாதிக்கமமேவ ஸந்தா⁴ய ‘‘இத³ங் பன தெ²ய்யசித்தேன பரிஹரந்தஸ்ஸ ஆகாஸேன க³ச்ச²தோபி பாராஜிகமேவா’’தி வுத்தங். யஞ்ச ‘‘யத்த² கத்த²சி நீதானம்பி தா³ரூனங் அரஞ்ஞஸாமிகானஞ்ஞேவ ஸந்தகத்தா’’தி காரணங் வுத்தங், தம்பி ஆரக்க²ட்டா²னதோ ப³ஹி பாராஜிகாபஜ்ஜனஸ்ஸ காரணங் ந ஹோதி ப⁴ண்ட³தெ³ய்யபா⁴வஸ்ஸேவ காரணத்தா. தேஸங் ஸந்தகத்தேனேவ ஹி ப³ஹி கதஸ்ஸாபி ப⁴ண்ட³தெ³ய்யங் ஜாதங், இதரதா² ச ப⁴ண்ட³தெ³ய்யம்பி ந ஸியா ஸுங்ககா⁴தாதிக்கமே விய. அத்³தி⁴கேஹி தி³ன்னமேவ ஸுங்கிகானங் ஸந்தகங் ஹோதி, நாதி³ன்னங், தேன தங் டா²னங் யதோ குதோசி பச்சயதோ ஸுத்³த⁴சித்தேன அதிக்கந்தஸ்ஸ ப⁴ண்ட³தெ³ய்யம்பி ந ஹோதி. இத⁴ பன அரஞ்ஞஸாமிகானங் ஸந்தகத்தா ஸப்³ப³த்தா²பி ப⁴ண்ட³தெ³ய்யமேவ ஹோதி, தேனேவேதங் அரஞ்ஞே ஆரக்க²ட்டா²னங் ஸுங்ககா⁴ததோபி க³ருதரங் ஜாதங். யதி³ ஹி ஆரக்க²ட்டா²னதோ ப³ஹிபி தெ²ய்யசித்தே ஸதி அவஹாரோ ப⁴வெய்ய, ஆரக்க²ட்டா²னங் பத்வாதிஆதி³னா டா²னநியமோ நிரத்த²கோ ஸியா யத்த² கத்த²சி தெ²ய்யசித்தே உப்பன்னே பாராஜிகந்தி வத்தப்³ப³தோ. தஸ்மா ஆரக்க²ட்டா²னதோ ப³ஹி தெ²ய்யசித்தேன க³ச்ச²ந்தஸ்ஸ அவஹாரோ ந ப⁴வதி ஏவாதி நிட்ட²மெத்த² க³ந்தப்³ப³ங். இத³ங் பன தெ²ய்யசித்தேன பரிஹரந்தஸ்ஸாதி யஸ்மிங் பதே³ஸே அதிக்கந்தே தேஸங் அரஞ்ஞங் ஆரக்க²ட்டா²னஞ்ச அதிக்கந்தோ நாம ஹோதி, தங் பதே³ஸங் ஆகாஸேனாபி அதிக்கமனவஸேன க³ச்ச²ந்தஸ்ஸாபீதி அத்தோ².
Adisvā gacchati, bhaṇḍadeyyanti suddhacittena gatassa bhaṇḍadeyyaṃ. Ārakkhaṭṭhānampi suddhacittena atikkamitvā theyyacitte uppannepi avahāro natthi ārakkhaṭṭhānassa atikkantattā. Keci pana ‘‘yattha katthaci nītānampi dārūnaṃ araññasāmikānaññeva santakattā puna theyyacittaṃ uppādetvā gacchati, pārājikamevā’’ti vadanti, taṃ na yuttaṃ ‘‘ārakkhaṭṭhānaṃ patvā…pe… assatiyā atikkamatī’’ti, sahasā taṃ ṭhānaṃ atikkamatītiādinā (pārā. aṭṭha. 1.107) ca ārakkhaṭṭhānātikkameyeva āpattiyā vuccamānattā, ārakkhaṭṭhānātikkamameva sandhāya ‘‘idaṃ pana theyyacittena pariharantassa ākāsena gacchatopi pārājikamevā’’ti vuttaṃ. Yañca ‘‘yattha katthaci nītānampi dārūnaṃ araññasāmikānaññeva santakattā’’ti kāraṇaṃ vuttaṃ, tampi ārakkhaṭṭhānato bahi pārājikāpajjanassa kāraṇaṃ na hoti bhaṇḍadeyyabhāvasseva kāraṇattā. Tesaṃ santakatteneva hi bahi katassāpi bhaṇḍadeyyaṃ jātaṃ, itarathā ca bhaṇḍadeyyampi na siyā suṅkaghātātikkame viya. Addhikehi dinnameva suṅkikānaṃ santakaṃ hoti, nādinnaṃ, tena taṃ ṭhānaṃ yato kutoci paccayato suddhacittena atikkantassa bhaṇḍadeyyampi na hoti. Idha pana araññasāmikānaṃ santakattā sabbatthāpi bhaṇḍadeyyameva hoti, tenevetaṃ araññe ārakkhaṭṭhānaṃ suṅkaghātatopi garutaraṃ jātaṃ. Yadi hi ārakkhaṭṭhānato bahipi theyyacitte sati avahāro bhaveyya, ārakkhaṭṭhānaṃ patvātiādinā ṭhānaniyamo niratthako siyā yattha katthaci theyyacitte uppanne pārājikanti vattabbato. Tasmā ārakkhaṭṭhānato bahi theyyacittena gacchantassa avahāro na bhavati evāti niṭṭhamettha gantabbaṃ. Idaṃ pana theyyacittena pariharantassāti yasmiṃ padese atikkante tesaṃ araññaṃ ārakkhaṭṭhānañca atikkanto nāma hoti, taṃ padesaṃ ākāsenāpi atikkamanavasena gacchantassāpīti attho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / அரஞ்ஞட்ட²கதா²வண்ணனா • Araññaṭṭhakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
