| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
ཨརཉྙཊྛཀཐཱཝཎྞནཱ
Araññaṭṭhakathāvaṇṇanā
༡༠༧. ཨརཉྙཊྛཀཐཱཡཾ ཨརཉྙཾ ནཱམཱཏི ཨིདཾ པན ན ཀེཝལཾ པུབྦེ ཝུཏྟཨརཉྙལཀྑཎཔྤཏྟིམཏྟེན ཨརཉྙཾ ཨིདྷཱདྷིཔྤེཏཾ, ཀིནྟུ ཡཾ ཨཏྟནོ ཨརཉྙལཀྑཎེན ཨརཉྙཾ པརཔརིགྒཧིཏཉྩ ཧོཏི, ཏཾ ཨརཉྙཾ ཨིདྷཱདྷིཔྤེཏནྟི དསྶེཏུཾ ཝུཏྟཾ། ཏེནཱཏི པུན ཨརཉྙཝཙནེན། ན པརིགྒཧིཏབྷཱཝོ ཨརཉྙསྶ ལཀྑཎནྟི ཡདི ཧི པརིགྒཧིཏབྷཱཝོ ཨརཉྙལཀྑཎཾ སིཡཱ, ‘‘ཨརཉྙཾ ནཱམ ཡཾ མནུསྶཱནཾ པརིགྒཧིཏ’’ནྟི ཨེཏྟཀམེཝ ཝདེཡྻཱཏི ཨདྷིཔྤཱཡོ། ཡནྟི ཨིམིནཱ པུབྦེ ཝུཏྟལཀྑཎམེཝ ཨརཉྙཾ པརཱམཊྛནྟི ཨཱཧ ‘‘ཡཾ པན ཨཏྟནོ ཨརཉྙལཀྑཎེན ཨརཉྙ’’ནྟི།
107. Araññaṭṭhakathāyaṃ araññaṃ nāmāti idaṃ pana na kevalaṃ pubbe vuttaaraññalakkhaṇappattimattena araññaṃ idhādhippetaṃ, kintu yaṃ attano araññalakkhaṇena araññaṃ parapariggahitañca hoti, taṃ araññaṃ idhādhippetanti dassetuṃ vuttaṃ. Tenāti puna araññavacanena. Na pariggahitabhāvo araññassa lakkhaṇanti yadi hi pariggahitabhāvo araññalakkhaṇaṃ siyā, ‘‘araññaṃ nāma yaṃ manussānaṃ pariggahita’’nti ettakameva vadeyyāti adhippāyo. Yanti iminā pubbe vuttalakkhaṇameva araññaṃ parāmaṭṭhanti āha ‘‘yaṃ pana attano araññalakkhaṇena arañña’’nti.
ཝིནིཝིཛ྄ཛྷིཏྭཱཏི ཨུཛུཀམེཝ ཝིནིཝིཛ྄ཛྷིཏྭཱ། པཎྞཾ ཝཱཏི ཏཱལཔཎྞཱདི པཎྞཾ ཝཱ། ཨདྡྷགཏོཔཱིཏི ཙིརཀཱལཾ ཏཏྠེཝ ཋིཏོཔི། ན གཧེཏབྦོཏི ཨེཏྠ པན ཡོ པརེཧི ཨརཉྙསཱམིཀཱནཾ ཧཏྠཏོ ཀིཎིཏྭཱ ཏཙྪེཏྭཱ ཏཏྠེཝ ཋཔིཏོ, སོ ཨརཉྙསཱམིཀེན ཨནུཉྙཱཏོཔི ན གཧེཏབྦོ། སཱམིཀེཧི ཚཌྜིཏོཏི གཧེཏུཾ ཝཊྚཏཱིཏི པཾསུཀཱུལསཉྙཱཡ གཧཎཾ ཝུཏྟཾ། ལཀྑཎཙྪིནྣསྶཱཔཱིཏི ཨརཉྙསཱམིཀཱནཾ ཧཏྠཏོ ཀིཎིཏྭཱ གཎྷནྟེཧི ཀཏསཉྙཱཎསྶ། ཚལླིཡཱ པརིཡོནདྡྷཾ ཧོཏཱིཏི ཨིམིནཱ སཱམིཀཱནཾ ནིརཔེཀྑཏཾ དཱིཔེཏི། ཏེན ཝུཏྟཾ ‘‘གཧེཏུཾ ཝཊྚཏཱི’’ཏི། ཡདི སཱམིཀཱནཾ སཱཔེཀྑཏཱ ཨཏྠི, ན ཝཊྚཏི། ཏཱནི ཀཏཱནི ཨཛ྄ཛྷཱཝུཏྠཱནི ཙ ཧོནྟཱིཏི ཏཱནི གེཧཱདཱིནི ཀཏཱནི པརིནིཊྛིཏཱནི མནུསྶེཧི ཙ ཨཛ྄ཛྷཱཝུཏྠཱནི ཧོནྟི། དཱརཱུནིཔཱིཏི གེཧཱདཱིནཾ ཀཏཏྟཱ ཏཏོ ཨཝསིཊྛདཱརཱུནིཔི། ཨེཏེསནྟི ཨེཏེསཾ ཡཐཱཝུཏྟདཱརཱུནཾ།
Vinivijjhitvāti ujukameva vinivijjhitvā. Paṇṇaṃ vāti tālapaṇṇādi paṇṇaṃ vā. Addhagatopīti cirakālaṃ tattheva ṭhitopi. Na gahetabboti ettha pana yo parehi araññasāmikānaṃ hatthato kiṇitvā tacchetvā tattheva ṭhapito, so araññasāmikena anuññātopi na gahetabbo. Sāmikehi chaḍḍitoti gahetuṃ vaṭṭatīti paṃsukūlasaññāya gahaṇaṃ vuttaṃ. Lakkhaṇacchinnassāpīti araññasāmikānaṃ hatthato kiṇitvā gaṇhantehi katasaññāṇassa. Challiyā pariyonaddhaṃ hotīti iminā sāmikānaṃ nirapekkhataṃ dīpeti. Tena vuttaṃ ‘‘gahetuṃ vaṭṭatī’’ti. Yadi sāmikānaṃ sāpekkhatā atthi, na vaṭṭati. Tāni katāni ajjhāvutthāni ca hontīti tāni gehādīni katāni pariniṭṭhitāni manussehi ca ajjhāvutthāni honti. Dārūnipīti gehādīnaṃ katattā tato avasiṭṭhadārūnipi. Etesanti etesaṃ yathāvuttadārūnaṃ.
ཏེསཾ ཨཱརཀྑཊྛཱནནྟི ཏེསཾ ཨརཉྙཔཱལཱནཾ ཋིཏཊྛཱནཾ། དེཧཱིཏི ཝུཏྟེ དཱཏབྦམེཝཱཏི ཨེཏྠ ‘‘དེཧཱི’’ཏི ཝུཏྟེ ‘‘དསྶཱམཱི’’ཏི ཨཱབྷོགསབྦྷཱཝཏོ ‘‘དེཧཱི’’ཏི ཨཝུཏྟེ ཨདཏྭཱཔི གནྟུཾ ཝཊྚཏིཡེཝ། གནྟུཾ དེཐཱཏི གམནཾ དེཐ། ཨདིསྭཱ གཙྪཏི, བྷཎྜདེཡྻནྟི པརིསུདྡྷཙིཏྟེན གཙྪཏི, བྷཎྜདེཡྻཾ། ཡཏྠ ཀཏྠཙི ནཱིཏཱནམྤི དཱརཱུནཾ ཨརཉྙསཱམིཀཱནཾཡེཝ སནྟཀཏྟཱ སུདྡྷཙིཏྟེན ནིཀྑནྟོཔི པུན ཐེཡྻཙིཏྟཾ ཨུཔྤཱདེཏྭཱ གཙྪཏི, པཱརཱཛིཀམེཝཱཏི ཝདནྟི།
Tesaṃārakkhaṭṭhānanti tesaṃ araññapālānaṃ ṭhitaṭṭhānaṃ. Dehīti vutte dātabbamevāti ettha ‘‘dehī’’ti vutte ‘‘dassāmī’’ti ābhogasabbhāvato ‘‘dehī’’ti avutte adatvāpi gantuṃ vaṭṭatiyeva. Gantuṃ dethāti gamanaṃ detha. Adisvā gacchati, bhaṇḍadeyyanti parisuddhacittena gacchati, bhaṇḍadeyyaṃ. Yattha katthaci nītānampi dārūnaṃ araññasāmikānaṃyeva santakattā suddhacittena nikkhantopi puna theyyacittaṃ uppādetvā gacchati, pārājikamevāti vadanti.
ཨརཉྙཊྛཀཐཱཝཎྞནཱ ནིཊྛིཏཱ།
Araññaṭṭhakathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༢. དུཏིཡཔཱརཱཛིཀཾ • 2. Dutiyapārājikaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༢. དུཏིཡཔཱརཱཛིཀཾ • 2. Dutiyapārājikaṃ
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / བྷཱུམཊྛཀཐཱདིཝཎྞནཱ • Bhūmaṭṭhakathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཨརཉྙཊྛཀཐཱཝཎྞནཱ • Araññaṭṭhakathāvaṇṇanā
