| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. অরঞ্ঞাযতনইসিসুত্তং
9. Araññāyatanaisisuttaṃ
২৫৫. সাৰত্থিযং । ‘‘ভূতপুব্বং, ভিক্খৰে, সম্বহুলা ইসযো সীলৰন্তো কল্যাণধম্মা অরঞ্ঞাযতনে পণ্ণকুটীসু সম্মন্তি। অথ খো, ভিক্খৰে, সক্কো চ দেৰানমিন্দো ৰেপচিত্তি চ অসুরিন্দো যেন তে ইসযো সীলৰন্তো কল্যাণধম্মা তেনুপসঙ্কমিংসু। অথ খো, ভিক্খৰে, ৰেপচিত্তি অসুরিন্দো পটলিযো 1 উপাহনা আরোহিত্ৰা খগ্গং ওলগ্গেত্ৰা ছত্তেন ধারিযমানেন অগ্গদ্ৰারেন অস্সমং পৰিসিত্ৰা তে ইসযো সীলৰন্তে কল্যাণধম্মে অপব্যামতো করিত্ৰা অতিক্কমি। অথ খো, ভিক্খৰে, সক্কো দেৰানমিন্দো পটলিযো উপাহনা ওরোহিত্ৰা খগ্গং অঞ্ঞেসং দত্ৰা ছত্তং অপনামেত্ৰা দ্ৰারেনেৰ অস্সমং পৰিসিত্ৰা তে ইসযো সীলৰন্তে কল্যাণধম্মে অনুৰাতং পঞ্জলিকো নমস্সমানো অট্ঠাসি’’। অথ খো, ভিক্খৰে, তে ইসযো সীলৰন্তো কল্যাণধম্মা সক্কং দেৰানমিন্দং গাথায অজ্ঝভাসিংসু –
255. Sāvatthiyaṃ . ‘‘Bhūtapubbaṃ, bhikkhave, sambahulā isayo sīlavanto kalyāṇadhammā araññāyatane paṇṇakuṭīsu sammanti. Atha kho, bhikkhave, sakko ca devānamindo vepacitti ca asurindo yena te isayo sīlavanto kalyāṇadhammā tenupasaṅkamiṃsu. Atha kho, bhikkhave, vepacitti asurindo paṭaliyo 2 upāhanā ārohitvā khaggaṃ olaggetvā chattena dhāriyamānena aggadvārena assamaṃ pavisitvā te isayo sīlavante kalyāṇadhamme apabyāmato karitvā atikkami. Atha kho, bhikkhave, sakko devānamindo paṭaliyo upāhanā orohitvā khaggaṃ aññesaṃ datvā chattaṃ apanāmetvā dvāreneva assamaṃ pavisitvā te isayo sīlavante kalyāṇadhamme anuvātaṃ pañjaliko namassamāno aṭṭhāsi’’. Atha kho, bhikkhave, te isayo sīlavanto kalyāṇadhammā sakkaṃ devānamindaṃ gāthāya ajjhabhāsiṃsu –
‘‘গন্ধো ইসীনং চিরদিক্খিতানং,
‘‘Gandho isīnaṃ ciradikkhitānaṃ,
কাযা চুতো গচ্ছতি মালুতেন।
Kāyā cuto gacchati mālutena;
ইতো পটিক্কম্ম সহস্সনেত্ত,
Ito paṭikkamma sahassanetta,
গন্ধো ইসীনং অসুচি দেৰরাজা’’তি॥
Gandho isīnaṃ asuci devarājā’’ti.
‘‘গন্ধো ইসীনং চিরদিক্খিতানং,
‘‘Gandho isīnaṃ ciradikkhitānaṃ,
সুচিত্রপুপ্ফং সিরস্মিংৰ মালং।
Sucitrapupphaṃ sirasmiṃva mālaṃ;
গন্ধং এতং পটিকঙ্খাম ভন্তে,
Gandhaṃ etaṃ paṭikaṅkhāma bhante,
ন হেত্থ দেৰা পটিকূলসঞ্ঞিনো’’তি॥
Na hettha devā paṭikūlasaññino’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. অরঞ্ঞাযতনইসিসুত্তৰণ্ণনা • 9. Araññāyatanaisisuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. অরঞ্ঞাযতনইসিসুত্তৰণ্ণনা • 9. Araññāyatanaisisuttavaṇṇanā
