| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
९. अरञ्ञायतनइसिसुत्तं
9. Araññāyatanaisisuttaṃ
२५५. सावत्थियं । ‘‘भूतपुब्बं, भिक्खवे, सम्बहुला इसयो सीलवन्तो कल्याणधम्मा अरञ्ञायतने पण्णकुटीसु सम्मन्ति। अथ खो, भिक्खवे, सक्को च देवानमिन्दो वेपचित्ति च असुरिन्दो येन ते इसयो सीलवन्तो कल्याणधम्मा तेनुपसङ्कमिंसु। अथ खो, भिक्खवे, वेपचित्ति असुरिन्दो पटलियो 1 उपाहना आरोहित्वा खग्गं ओलग्गेत्वा छत्तेन धारियमानेन अग्गद्वारेन अस्समं पविसित्वा ते इसयो सीलवन्ते कल्याणधम्मे अपब्यामतो करित्वा अतिक्कमि। अथ खो, भिक्खवे, सक्को देवानमिन्दो पटलियो उपाहना ओरोहित्वा खग्गं अञ्ञेसं दत्वा छत्तं अपनामेत्वा द्वारेनेव अस्समं पविसित्वा ते इसयो सीलवन्ते कल्याणधम्मे अनुवातं पञ्जलिको नमस्समानो अट्ठासि’’। अथ खो, भिक्खवे, ते इसयो सीलवन्तो कल्याणधम्मा सक्कं देवानमिन्दं गाथाय अज्झभासिंसु –
255. Sāvatthiyaṃ . ‘‘Bhūtapubbaṃ, bhikkhave, sambahulā isayo sīlavanto kalyāṇadhammā araññāyatane paṇṇakuṭīsu sammanti. Atha kho, bhikkhave, sakko ca devānamindo vepacitti ca asurindo yena te isayo sīlavanto kalyāṇadhammā tenupasaṅkamiṃsu. Atha kho, bhikkhave, vepacitti asurindo paṭaliyo 2 upāhanā ārohitvā khaggaṃ olaggetvā chattena dhāriyamānena aggadvārena assamaṃ pavisitvā te isayo sīlavante kalyāṇadhamme apabyāmato karitvā atikkami. Atha kho, bhikkhave, sakko devānamindo paṭaliyo upāhanā orohitvā khaggaṃ aññesaṃ datvā chattaṃ apanāmetvā dvāreneva assamaṃ pavisitvā te isayo sīlavante kalyāṇadhamme anuvātaṃ pañjaliko namassamāno aṭṭhāsi’’. Atha kho, bhikkhave, te isayo sīlavanto kalyāṇadhammā sakkaṃ devānamindaṃ gāthāya ajjhabhāsiṃsu –
‘‘गन्धो इसीनं चिरदिक्खितानं,
‘‘Gandho isīnaṃ ciradikkhitānaṃ,
काया चुतो गच्छति मालुतेन।
Kāyā cuto gacchati mālutena;
इतो पटिक्कम्म सहस्सनेत्त,
Ito paṭikkamma sahassanetta,
गन्धो इसीनं असुचि देवराजा’’ति॥
Gandho isīnaṃ asuci devarājā’’ti.
‘‘गन्धो इसीनं चिरदिक्खितानं,
‘‘Gandho isīnaṃ ciradikkhitānaṃ,
सुचित्रपुप्फं सिरस्मिंव मालं।
Sucitrapupphaṃ sirasmiṃva mālaṃ;
गन्धं एतं पटिकङ्खाम भन्ते,
Gandhaṃ etaṃ paṭikaṅkhāma bhante,
न हेत्थ देवा पटिकूलसञ्ञिनो’’ति॥
Na hettha devā paṭikūlasaññino’’ti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ९. अरञ्ञायतनइसिसुत्तवण्णना • 9. Araññāyatanaisisuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ९. अरञ्ञायतनइसिसुत्तवण्णना • 9. Araññāyatanaisisuttavaṇṇanā
