| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๙. อรญฺญายตนอิสิสุตฺตํ
9. Araññāyatanaisisuttaṃ
๒๕๕. สาวตฺถิยํ ฯ ‘‘ภูตปุพฺพํ, ภิกฺขเว, สมฺพหุลา อิสโย สีลวโนฺต กลฺยาณธมฺมา อรญฺญายตเน ปณฺณกุฎีสุ สมฺมนฺติฯ อถ โข, ภิกฺขเว, สโกฺก จ เทวานมิโนฺท เวปจิตฺติ จ อสุริโนฺท เยน เต อิสโย สีลวโนฺต กลฺยาณธมฺมา เตนุปสงฺกมิํสุฯ อถ โข, ภิกฺขเว, เวปจิตฺติ อสุริโนฺท ปฎลิโย 1 อุปาหนา อาโรหิตฺวา ขคฺคํ โอลเคฺคตฺวา ฉเตฺตน ธาริยมาเนน อคฺคทฺวาเรน อสฺสมํ ปวิสิตฺวา เต อิสโย สีลวเนฺต กลฺยาณธเมฺม อปพฺยามโต กริตฺวา อติกฺกมิฯ อถ โข, ภิกฺขเว, สโกฺก เทวานมิโนฺท ปฎลิโย อุปาหนา โอโรหิตฺวา ขคฺคํ อเญฺญสํ ทตฺวา ฉตฺตํ อปนาเมตฺวา ทฺวาเรเนว อสฺสมํ ปวิสิตฺวา เต อิสโย สีลวเนฺต กลฺยาณธเมฺม อนุวาตํ ปญฺชลิโก นมสฺสมาโน อฎฺฐาสิ’’ฯ อถ โข, ภิกฺขเว, เต อิสโย สีลวโนฺต กลฺยาณธมฺมา สกฺกํ เทวานมินฺทํ คาถาย อชฺฌภาสิํสุ –
255. Sāvatthiyaṃ . ‘‘Bhūtapubbaṃ, bhikkhave, sambahulā isayo sīlavanto kalyāṇadhammā araññāyatane paṇṇakuṭīsu sammanti. Atha kho, bhikkhave, sakko ca devānamindo vepacitti ca asurindo yena te isayo sīlavanto kalyāṇadhammā tenupasaṅkamiṃsu. Atha kho, bhikkhave, vepacitti asurindo paṭaliyo 2 upāhanā ārohitvā khaggaṃ olaggetvā chattena dhāriyamānena aggadvārena assamaṃ pavisitvā te isayo sīlavante kalyāṇadhamme apabyāmato karitvā atikkami. Atha kho, bhikkhave, sakko devānamindo paṭaliyo upāhanā orohitvā khaggaṃ aññesaṃ datvā chattaṃ apanāmetvā dvāreneva assamaṃ pavisitvā te isayo sīlavante kalyāṇadhamme anuvātaṃ pañjaliko namassamāno aṭṭhāsi’’. Atha kho, bhikkhave, te isayo sīlavanto kalyāṇadhammā sakkaṃ devānamindaṃ gāthāya ajjhabhāsiṃsu –
‘‘คโนฺธ อิสีนํ จิรทิกฺขิตานํ,
‘‘Gandho isīnaṃ ciradikkhitānaṃ,
กายา จุโต คจฺฉติ มาลุเตน;
Kāyā cuto gacchati mālutena;
อิโต ปฎิกฺกมฺม สหสฺสเนตฺต,
Ito paṭikkamma sahassanetta,
คโนฺธ อิสีนํ อสุจิ เทวราชา’’ติฯ
Gandho isīnaṃ asuci devarājā’’ti.
‘‘คโนฺธ อิสีนํ จิรทิกฺขิตานํ,
‘‘Gandho isīnaṃ ciradikkhitānaṃ,
สุจิตฺรปุปฺผํ สิรสฺมิํว มาลํ;
Sucitrapupphaṃ sirasmiṃva mālaṃ;
คนฺธํ เอตํ ปฎิกงฺขาม ภเนฺต,
Gandhaṃ etaṃ paṭikaṅkhāma bhante,
น เหตฺถ เทวา ปฎิกูลสญฺญิโน’’ติฯ
Na hettha devā paṭikūlasaññino’’ti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๙. อรญฺญายตนอิสิสุตฺตวณฺณนา • 9. Araññāyatanaisisuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๙. อรญฺญายตนอิสิสุตฺตวณฺณนา • 9. Araññāyatanaisisuttavaṇṇanā
