| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೯. ಅರಞ್ಞಾಯತನಇಸಿಸುತ್ತಂ
9. Araññāyatanaisisuttaṃ
೨೫೫. ಸಾವತ್ಥಿಯಂ । ‘‘ಭೂತಪುಬ್ಬಂ, ಭಿಕ್ಖವೇ, ಸಮ್ಬಹುಲಾ ಇಸಯೋ ಸೀಲವನ್ತೋ ಕಲ್ಯಾಣಧಮ್ಮಾ ಅರಞ್ಞಾಯತನೇ ಪಣ್ಣಕುಟೀಸು ಸಮ್ಮನ್ತಿ। ಅಥ ಖೋ, ಭಿಕ್ಖವೇ, ಸಕ್ಕೋ ಚ ದೇವಾನಮಿನ್ದೋ ವೇಪಚಿತ್ತಿ ಚ ಅಸುರಿನ್ದೋ ಯೇನ ತೇ ಇಸಯೋ ಸೀಲವನ್ತೋ ಕಲ್ಯಾಣಧಮ್ಮಾ ತೇನುಪಸಙ್ಕಮಿಂಸು। ಅಥ ಖೋ, ಭಿಕ್ಖವೇ, ವೇಪಚಿತ್ತಿ ಅಸುರಿನ್ದೋ ಪಟಲಿಯೋ 1 ಉಪಾಹನಾ ಆರೋಹಿತ್ವಾ ಖಗ್ಗಂ ಓಲಗ್ಗೇತ್ವಾ ಛತ್ತೇನ ಧಾರಿಯಮಾನೇನ ಅಗ್ಗದ್ವಾರೇನ ಅಸ್ಸಮಂ ಪವಿಸಿತ್ವಾ ತೇ ಇಸಯೋ ಸೀಲವನ್ತೇ ಕಲ್ಯಾಣಧಮ್ಮೇ ಅಪಬ್ಯಾಮತೋ ಕರಿತ್ವಾ ಅತಿಕ್ಕಮಿ। ಅಥ ಖೋ, ಭಿಕ್ಖವೇ, ಸಕ್ಕೋ ದೇವಾನಮಿನ್ದೋ ಪಟಲಿಯೋ ಉಪಾಹನಾ ಓರೋಹಿತ್ವಾ ಖಗ್ಗಂ ಅಞ್ಞೇಸಂ ದತ್ವಾ ಛತ್ತಂ ಅಪನಾಮೇತ್ವಾ ದ್ವಾರೇನೇವ ಅಸ್ಸಮಂ ಪವಿಸಿತ್ವಾ ತೇ ಇಸಯೋ ಸೀಲವನ್ತೇ ಕಲ್ಯಾಣಧಮ್ಮೇ ಅನುವಾತಂ ಪಞ್ಜಲಿಕೋ ನಮಸ್ಸಮಾನೋ ಅಟ್ಠಾಸಿ’’। ಅಥ ಖೋ, ಭಿಕ್ಖವೇ, ತೇ ಇಸಯೋ ಸೀಲವನ್ತೋ ಕಲ್ಯಾಣಧಮ್ಮಾ ಸಕ್ಕಂ ದೇವಾನಮಿನ್ದಂ ಗಾಥಾಯ ಅಜ್ಝಭಾಸಿಂಸು –
255. Sāvatthiyaṃ . ‘‘Bhūtapubbaṃ, bhikkhave, sambahulā isayo sīlavanto kalyāṇadhammā araññāyatane paṇṇakuṭīsu sammanti. Atha kho, bhikkhave, sakko ca devānamindo vepacitti ca asurindo yena te isayo sīlavanto kalyāṇadhammā tenupasaṅkamiṃsu. Atha kho, bhikkhave, vepacitti asurindo paṭaliyo 2 upāhanā ārohitvā khaggaṃ olaggetvā chattena dhāriyamānena aggadvārena assamaṃ pavisitvā te isayo sīlavante kalyāṇadhamme apabyāmato karitvā atikkami. Atha kho, bhikkhave, sakko devānamindo paṭaliyo upāhanā orohitvā khaggaṃ aññesaṃ datvā chattaṃ apanāmetvā dvāreneva assamaṃ pavisitvā te isayo sīlavante kalyāṇadhamme anuvātaṃ pañjaliko namassamāno aṭṭhāsi’’. Atha kho, bhikkhave, te isayo sīlavanto kalyāṇadhammā sakkaṃ devānamindaṃ gāthāya ajjhabhāsiṃsu –
‘‘ಗನ್ಧೋ ಇಸೀನಂ ಚಿರದಿಕ್ಖಿತಾನಂ,
‘‘Gandho isīnaṃ ciradikkhitānaṃ,
ಕಾಯಾ ಚುತೋ ಗಚ್ಛತಿ ಮಾಲುತೇನ।
Kāyā cuto gacchati mālutena;
ಇತೋ ಪಟಿಕ್ಕಮ್ಮ ಸಹಸ್ಸನೇತ್ತ,
Ito paṭikkamma sahassanetta,
ಗನ್ಧೋ ಇಸೀನಂ ಅಸುಚಿ ದೇವರಾಜಾ’’ತಿ॥
Gandho isīnaṃ asuci devarājā’’ti.
‘‘ಗನ್ಧೋ ಇಸೀನಂ ಚಿರದಿಕ್ಖಿತಾನಂ,
‘‘Gandho isīnaṃ ciradikkhitānaṃ,
ಸುಚಿತ್ರಪುಪ್ಫಂ ಸಿರಸ್ಮಿಂವ ಮಾಲಂ।
Sucitrapupphaṃ sirasmiṃva mālaṃ;
ಗನ್ಧಂ ಏತಂ ಪಟಿಕಙ್ಖಾಮ ಭನ್ತೇ,
Gandhaṃ etaṃ paṭikaṅkhāma bhante,
ನ ಹೇತ್ಥ ದೇವಾ ಪಟಿಕೂಲಸಞ್ಞಿನೋ’’ತಿ॥
Na hettha devā paṭikūlasaññino’’ti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೯. ಅರಞ್ಞಾಯತನಇಸಿಸುತ್ತವಣ್ಣನಾ • 9. Araññāyatanaisisuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೯. ಅರಞ್ಞಾಯತನಇಸಿಸುತ್ತವಣ್ಣನಾ • 9. Araññāyatanaisisuttavaṇṇanā
