| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
9. අරඤ්‌ඤායතනඉසිසුත්‌තං
9. Araññāyatanaisisuttaṃ
255. සාවත්‌ථියං . ‘‘භූතපුබ්‌බං, භික්‌ඛවෙ, සම්‌බහුලා ඉසයො සීලවන්‌තො කල්‍යාණධම්‌මා අරඤ්‌ඤායතනෙ පණ්‌ණකුටීසු සම්‌මන්‌ති. අථ ඛො, භික්‌ඛවෙ, සක්‌කො ච දෙවානමින්‌දො වෙපචිත්‌ති ච අසුරින්‌දො යෙන තෙ ඉසයො සීලවන්‌තො කල්‍යාණධම්‌මා තෙනුපසඞ්‌කමිංසු. අථ ඛො, භික්‌ඛවෙ, වෙපචිත්‌ති අසුරින්‌දො පටලියො 1 උපාහනා ආරොහිත්‌වා ඛග්‌ගං ඔලග්‌ගෙත්‌වා ඡත්‌තෙන ධාරියමානෙන අග්‌ගද්‌වාරෙන අස්‌සමං පවිසිත්‌වා තෙ ඉසයො සීලවන්‌තෙ කල්‍යාණධම්‌මෙ අපබ්‍යාමතො කරිත්‌වා අතික්‌කමි. අථ ඛො, භික්‌ඛවෙ, සක්‌කො දෙවානමින්‌දො පටලියො උපාහනා ඔරොහිත්‌වා ඛග්‌ගං අඤ්‌ඤෙසං දත්‌වා ඡත්‌තං අපනාමෙත්‌වා ද්‌වාරෙනෙව අස්‌සමං පවිසිත්‌වා තෙ ඉසයො සීලවන්‌තෙ කල්‍යාණධම්‌මෙ අනුවාතං පඤ්‌ජලිකො නමස්‌සමානො අට්‌ඨාසි’’. අථ ඛො, භික්‌ඛවෙ, තෙ ඉසයො සීලවන්‌තො කල්‍යාණධම්‌මා සක්‌කං දෙවානමින්‌දං ගාථාය අජ්‌ඣභාසිංසු –
255. Sāvatthiyaṃ . ‘‘Bhūtapubbaṃ, bhikkhave, sambahulā isayo sīlavanto kalyāṇadhammā araññāyatane paṇṇakuṭīsu sammanti. Atha kho, bhikkhave, sakko ca devānamindo vepacitti ca asurindo yena te isayo sīlavanto kalyāṇadhammā tenupasaṅkamiṃsu. Atha kho, bhikkhave, vepacitti asurindo paṭaliyo 2 upāhanā ārohitvā khaggaṃ olaggetvā chattena dhāriyamānena aggadvārena assamaṃ pavisitvā te isayo sīlavante kalyāṇadhamme apabyāmato karitvā atikkami. Atha kho, bhikkhave, sakko devānamindo paṭaliyo upāhanā orohitvā khaggaṃ aññesaṃ datvā chattaṃ apanāmetvā dvāreneva assamaṃ pavisitvā te isayo sīlavante kalyāṇadhamme anuvātaṃ pañjaliko namassamāno aṭṭhāsi’’. Atha kho, bhikkhave, te isayo sīlavanto kalyāṇadhammā sakkaṃ devānamindaṃ gāthāya ajjhabhāsiṃsu –
‘‘ගන්‌ධො ඉසීනං චිරදික්‌ඛිතානං,
‘‘Gandho isīnaṃ ciradikkhitānaṃ,
කායා චුතො ගච්‌ඡති මාලුතෙන;
Kāyā cuto gacchati mālutena;
ඉතො පටික්‌කම්‌ම සහස්‌සනෙත්‌ත,
Ito paṭikkamma sahassanetta,
ගන්‌ධො ඉසීනං අසුචි දෙවරාජා’’ති.
Gandho isīnaṃ asuci devarājā’’ti.
‘‘ගන්‌ධො ඉසීනං චිරදික්‌ඛිතානං,
‘‘Gandho isīnaṃ ciradikkhitānaṃ,
සුචිත්‍රපුප්‌ඵං සිරස්‌මිංව මාලං;
Sucitrapupphaṃ sirasmiṃva mālaṃ;
ගන්‌ධං එතං පටිකඞ්‌ඛාම භන්‌තෙ,
Gandhaṃ etaṃ paṭikaṅkhāma bhante,
න හෙත්‌ථ දෙවා පටිකූලසඤ්‌ඤිනො’’ති.
Na hettha devā paṭikūlasaññino’’ti.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9. අරඤ්‌ඤායතනඉසිසුත්‌තවණ්‌ණනා • 9. Araññāyatanaisisuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. අරඤ්‌ඤායතනඉසිසුත්‌තවණ්‌ණනා • 9. Araññāyatanaisisuttavaṇṇanā
