| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
9. අරඤ්‌ඤායතනඉසිසුත්‌තවණ්‌ණනා
9. Araññāyatanaisisuttavaṇṇanā
255. නවමෙ පණ්‌ණකුටීසු සම්‌මන්‌තීති හිමවන්‌තපදෙසෙ රමණීයෙ අරඤ්‌ඤායතනෙ රත්‌තිට්‌ඨානදිවාට්‌ඨානචඞ්‌කමනාදීහි සම්‌පන්‌නාසු පණ්‌ණසාලාසු වසන්‌ති. සක්‌කො ච දෙවානමින්‌දො වෙපචිත්‌ති චාති ඉමෙ ද්‌වෙ ජනා ජාමාතිකසසුරා කාලෙන කලහං කරොන්‌ති, කාලෙන එකතො චරන්‌ති, ඉමස්‌මිං පන කාලෙ එකතො චරන්‌ති. පටලියොති ගණඞ්‌ගණූපාහනා. ඛග්‌ගං ඔලග්‌ගෙත්‌වාති ඛග්‌ගං අංසෙ ඔලග්‌ගෙත්‌වා. ඡත්‌තෙනාති දිබ්‌බසෙතච්‌ඡත්‌තෙන මත්‌ථකෙ ධාරයමානෙන. අපබ්‍යාමතො කරිත්‌වාති බ්‍යාමතො අකත්‌වා. චිරදික්‌ඛිතානන්‌ති චිරසමාදිණ්‌ණවතානං. ඉතො පටික්‌කම්‌මාති ‘‘ඉතො පක්‌කම පරිවජ්‌ජය, මා උපරිවාතෙ තිට්‌ඨා’’ති වදන්‌ති. න හෙත්‌ථ දෙවාති එතස්‌මිං සීලවන්‌තානං ගන්‌ධෙ දෙවා න පටික්‌කූලසඤ්‌ඤිනො, ඉට්‌ඨකන්‌තමනාපසඤ්‌ඤිනොයෙවාති දීපෙති. නවමං.
255. Navame paṇṇakuṭīsu sammantīti himavantapadese ramaṇīye araññāyatane rattiṭṭhānadivāṭṭhānacaṅkamanādīhi sampannāsu paṇṇasālāsu vasanti. Sakko ca devānamindo vepacitti cāti ime dve janā jāmātikasasurā kālena kalahaṃ karonti, kālena ekato caranti, imasmiṃ pana kāle ekato caranti. Paṭaliyoti gaṇaṅgaṇūpāhanā. Khaggaṃ olaggetvāti khaggaṃ aṃse olaggetvā. Chattenāti dibbasetacchattena matthake dhārayamānena. Apabyāmato karitvāti byāmato akatvā. Ciradikkhitānanti cirasamādiṇṇavatānaṃ. Ito paṭikkammāti ‘‘ito pakkama parivajjaya, mā uparivāte tiṭṭhā’’ti vadanti. Na hettha devāti etasmiṃ sīlavantānaṃ gandhe devā na paṭikkūlasaññino, iṭṭhakantamanāpasaññinoyevāti dīpeti. Navamaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. අරඤ්‌ඤායතනඉසිසුත්‌තං • 9. Araññāyatanaisisuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. අරඤ්‌ඤායතනඉසිසුත්‌තවණ්‌ණනා • 9. Araññāyatanaisisuttavaṇṇanā
