| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
(၁၉) ၄. အရညဝဂ္ဂော
(19) 4. Araññavaggo
၁. အာရညိကသုတ္တံ
1. Āraññikasuttaṃ
၁၈၁. ‘‘ပဉ္စိမေ , ဘိက္ခဝေ, အာရညိကာ 1။ ကတမေ ပဉ္စ? မန္ဒတ္တာ မောမူဟတ္တာ အာရညိကော ဟောတိ, ပာပိစ္ဆော ဣစ္ဆာပကတော အာရညိကော ဟောတိ, ဥမ္မာဒာ စိတ္တက္ခေပာ အာရညိကော ဟောတိ, ဝဏ္ဏိတံ ဗုဒ္ဓေဟိ ဗုဒ္ဓသာဝကေဟီတိ အာရညိကော ဟောတိ, အပ္ပိစ္ဆတံယေဝ နိသ္သာယ သန္တုဋ္ဌိံယေဝ နိသ္သာယ သလ္လေခံယေဝ နိသ္သာယ ပဝိဝေကံယေဝ နိသ္သာယ ဣဒမတ္ထိတံယေဝ 2 နိသ္သာယ အာရညိကော ဟောတိ။ ဣမေ ခော, ဘိက္ခဝေ, ပဉ္စ အာရညိကာ။ ဣမေသံ ခော, ဘိက္ခဝေ, ပဉ္စန္နံ အာရညိကာနံ ယ္ဝာယံ အာရညိကော အပ္ပိစ္ဆတံယေဝ နိသ္သာယ သန္တုဋ္ဌိံယေဝ နိသ္သာယ သလ္လေခံယေဝ နိသ္သာယ ပဝိဝေကံယေဝ နိသ္သာယ ဣဒမတ္ထိတံယေဝ နိသ္သာယ အာရညိကော ဟောတိ, အယံ ဣမေသံ ပဉ္စန္နံ အာရညိကာနံ အဂ္ဂော စ သေဋ္ဌော စ မောက္ခော 3 စ ဥတ္တမော စ ပဝရော စ။
181. ‘‘Pañcime , bhikkhave, āraññikā 4. Katame pañca? Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṃ buddhehi buddhasāvakehīti āraññiko hoti, appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva 5 nissāya āraññiko hoti. Ime kho, bhikkhave, pañca āraññikā. Imesaṃ kho, bhikkhave, pañcannaṃ āraññikānaṃ yvāyaṃ āraññiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya āraññiko hoti, ayaṃ imesaṃ pañcannaṃ āraññikānaṃ aggo ca seṭṭho ca mokkho 6 ca uttamo ca pavaro ca.
‘‘သေယ္ယထာပိ, ဘိက္ခဝေ, ဂဝာ ခီရံ, ခီရမ္ဟာ ဒဓိ, ဒဓိမ္ဟာ နဝနီတံ, နဝနီတမ္ဟာ သပ္ပိ, သပ္ပိမ္ဟာ သပ္ပိမဏ္ဍော, သပ္ပိမဏ္ဍော 7 တတ္ထ အဂ္ဂမက္ခာယတိ; ဧဝမေဝံ ခော, ဘိက္ခဝေ, ဣမေသံ ပဉ္စန္နံ အာရညိကာနံ ယ္ဝာယံ အာရညိကော အပ္ပိစ္ဆတံယေဝ နိသ္သာယ သန္တုဋ္ဌိံယေဝ နိသ္သာယ သလ္လေခံယေဝ နိသ္သာယ ပဝိဝေကံယေဝ နိသ္သာယ ဣဒမတ္ထိတံယေဝ နိသ္သာယ အာရညိကော ဟောတိ, အယံ ဣမေသံ ပဉ္စန္နံ အာရညိကာနံ အဂ္ဂော စ သေဋ္ဌော စ မောက္ခော စ ဥတ္တမော စ ပဝရော စာ’’တိ။ ပဌမံ။
‘‘Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo, sappimaṇḍo 8 tattha aggamakkhāyati; evamevaṃ kho, bhikkhave, imesaṃ pañcannaṃ āraññikānaṃ yvāyaṃ āraññiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya āraññiko hoti, ayaṃ imesaṃ pañcannaṃ āraññikānaṃ aggo ca seṭṭho ca mokkho ca uttamo ca pavaro cā’’ti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. အာရညိကသုတ္တဝဏ္ဏနာ • 1. Āraññikasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁. အာရညိကသုတ္တဝဏ္ဏနာ • 1. Āraññikasuttavaṇṇanā
