| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
7. ஆரஞ்ஞிகவத்தகதா²
7. Āraññikavattakathā
367. தேன கோ² பன ஸமயேன ஸம்ப³ஹுலா பி⁴க்கூ² அரஞ்ஞே விஹரந்தி. தே நேவ பானீயங் உபட்டா²பெந்தி, ந பரிபோ⁴ஜனீயங் உபட்டா²பெந்தி , ந அக்³கி³ங் உபட்டா²பெந்தி, ந அரணிஸஹிதங் உபட்டா²பெந்தி, ந நக்க²த்தபதா³னி ஜானந்தி, ந தி³ஸாபா⁴க³ங் ஜானந்தி. சோரா தத்த² க³ந்த்வா தே பி⁴க்கூ² ஏதத³வோசுங் – ‘‘அத்தி², ப⁴ந்தே, பானீய’’ந்தி? ‘‘நத்தா²வுஸோ’’தி. ‘‘அத்தி², ப⁴ந்தே, பரிபோ⁴ஜனீய’’ந்தி? ‘‘நத்தா²வுஸோ’’தி. ‘‘அத்தி², ப⁴ந்தே, அக்³கீ³’’தி? ‘‘நத்தா²வுஸோ’’தி. ‘‘அத்தி², ப⁴ந்தே, அரணிஸஹித’’ந்தி? ‘‘நத்தா²வுஸோ’’தி. ( ) 1 ‘‘கேனஜ்ஜ, ப⁴ந்தே, யுத்த’’ந்தி? ‘‘ந கோ² மயங், ஆவுஸோ, ஜானாமா’’தி. ‘‘கதமாயங், ப⁴ந்தே, தி³ஸா’’தி? ‘‘ந கோ² மயங், ஆவுஸோ, ஜானாமா’’தி. அத² கோ² தே சோரா – ‘நேவிமேஸங் பானீயங் அத்தி², ந பரிபோ⁴ஜனீயங் அத்தி², ந அக்³கி³ அத்தி², ந அரணிஸஹிதங் அத்தி², ந நக்க²த்தபதா³னி ஜானந்தி, ந தி³ஸாபா⁴க³ங் ஜானந்தி; சோரா இமே, நயிமே பி⁴க்கூ²’தி – ஆகோடெத்வா பக்கமிங்ஸு. அத² கோ² தே பி⁴க்கூ² பி⁴க்கூ²னங் ஏதமத்த²ங் ஆரோசேஸுங். பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி –
367. Tena kho pana samayena sambahulā bhikkhū araññe viharanti. Te neva pānīyaṃ upaṭṭhāpenti, na paribhojanīyaṃ upaṭṭhāpenti , na aggiṃ upaṭṭhāpenti, na araṇisahitaṃ upaṭṭhāpenti, na nakkhattapadāni jānanti, na disābhāgaṃ jānanti. Corā tattha gantvā te bhikkhū etadavocuṃ – ‘‘atthi, bhante, pānīya’’nti? ‘‘Natthāvuso’’ti. ‘‘Atthi, bhante, paribhojanīya’’nti? ‘‘Natthāvuso’’ti. ‘‘Atthi, bhante, aggī’’ti? ‘‘Natthāvuso’’ti. ‘‘Atthi, bhante, araṇisahita’’nti? ‘‘Natthāvuso’’ti. ( ) 2 ‘‘Kenajja, bhante, yutta’’nti? ‘‘Na kho mayaṃ, āvuso, jānāmā’’ti. ‘‘Katamāyaṃ, bhante, disā’’ti? ‘‘Na kho mayaṃ, āvuso, jānāmā’’ti. Atha kho te corā – ‘nevimesaṃ pānīyaṃ atthi, na paribhojanīyaṃ atthi, na aggi atthi, na araṇisahitaṃ atthi, na nakkhattapadāni jānanti, na disābhāgaṃ jānanti; corā ime, nayime bhikkhū’ti – ākoṭetvā pakkamiṃsu. Atha kho te bhikkhū bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi –
368. ‘‘தேன ஹி, பி⁴க்க²வே, ஆரஞ்ஞிகானங் பி⁴க்கூ²னங் வத்தங் பஞ்ஞபெஸ்ஸாமி யதா² ஆரஞ்ஞிகேஹி பி⁴க்கூ²ஹி ஸம்மா வத்திதப்³ப³ங். ஆரஞ்ஞிகேன, பி⁴க்க²வே, பி⁴க்கு²னா காலஸ்ஸேவ உட்டா²ய பத்தங் த²விகாய பக்கி²பித்வா அங்ஸே ஆலக்³கெ³த்வா சீவரங் க²ந்தே⁴ கரித்வா உபாஹனா ஆரோஹித்வா தா³ருப⁴ண்ட³ங் மத்திகாப⁴ண்ட³ங் படிஸாமெத்வா த்³வாரவாதபானங் த²கெத்வா ஸேனாஸனா ஓதரிதப்³ப³ங் – இதா³னி கா³மங் பவிஸிஸ்ஸாமீதி. உபாஹனா ஓமுஞ்சித்வா நீசங் கத்வா பப்போ²டெத்வா த²விகாய பக்கி²பித்வா அங்ஸே ஆலக்³கெ³த்வா திமண்ட³லங் படிச்சா²தெ³ந்தேன பரிமண்ட³லங் நிவாஸெத்வா காயப³ந்த⁴னங் ப³ந்தி⁴த்வா ஸகு³ணங் கத்வா ஸங்கா⁴டியோ பாருபித்வா க³ண்டி²கங் படிமுஞ்சித்வா தோ⁴வித்வா பத்தங் க³ஹெத்வா ஸாது⁴கங் அதரமானேன கா³மோ பவிஸிதப்³போ³. ஸுப்படிச்ச²ன்னேன அந்தரக⁴ரே க³ந்தப்³ப³ங்…பே॰… ந க²ம்ப⁴கதேன அந்தரக⁴ரே க³ந்தப்³ப³ங். ந ஓகு³ண்டி²தேன அந்தரக⁴ரே க³ந்தப்³ப³ங். ந உக்குடிகாய அந்தரக⁴ரே க³ந்தப்³ப³ங்.
368. ‘‘Tena hi, bhikkhave, āraññikānaṃ bhikkhūnaṃ vattaṃ paññapessāmi yathā āraññikehi bhikkhūhi sammā vattitabbaṃ. Āraññikena, bhikkhave, bhikkhunā kālasseva uṭṭhāya pattaṃ thavikāya pakkhipitvā aṃse ālaggetvā cīvaraṃ khandhe karitvā upāhanā ārohitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā senāsanā otaritabbaṃ – idāni gāmaṃ pavisissāmīti. Upāhanā omuñcitvā nīcaṃ katvā papphoṭetvā thavikāya pakkhipitvā aṃse ālaggetvā timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo. Suppaṭicchannena antaraghare gantabbaṃ…pe… na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘நிவேஸனங் பவிஸந்தேன ஸல்லக்கே²தப்³ப³ங் – ‘இமினா பவிஸிஸ்ஸாமி, இமினா நிக்க²மிஸ்ஸாமீ’தி. நாதிஸஹஸா பவிஸிதப்³ப³ங். நாதிஸஹஸா நிக்க²மிதப்³ப³ங். நாதிதூ³ரே டா²தப்³ப³ங். நாச்சாஸன்னே டா²தப்³ப³ங். நாதிசிரங் டா²தப்³ப³ங். நாதிலஹுங் நிவத்திதப்³ப³ங். டி²தகேன ஸல்லக்கே²தப்³ப³ங் – ‘பி⁴க்க²ங் தா³துகாமா வா அதா³துகாமா வா’தி. ஸசே கம்மங் வா நிக்கி²பதி, ஆஸனா வா வுட்டா²தி, கடச்சு²ங் வா பராமஸதி, பா⁴ஜனங் வா பராமஸதி, ட²பேதி வா – தா³துகாமஸ்ஸாதி டா²தப்³ப³ங். பி⁴க்கா²ய தி³ய்யமானாய வாமேன ஹத்தே²ன ஸங்கா⁴டிங் உச்சாரெத்வா த³க்கி²ணேன ஹத்தே²ன பத்தங் பணாமெத்வா உபோ⁴ஹி ஹத்தே²ஹி பத்தங் படிக்³க³ஹெத்வா பி⁴க்கா² படிக்³க³ஹேதப்³பா³. ந ச பி⁴க்கா²தா³யிகாய முக²ங் உல்லோகேதப்³ப³ங். ஸல்லக்கே²தப்³ப³ங் – ‘ஸூபங் தா³துகாமா வா அதா³துகாமா வா’தி. ஸசே கடச்சு² வா பராமஸதி, பா⁴ஜனங் வா பராமஸதி, ட²பேதி வா – தா³துகாமஸ்ஸாதி டா²தப்³ப³ங். பி⁴க்கா²ய தி³ன்னாய ஸங்கா⁴டியா பத்தங் படிச்சா²தெ³த்வா ஸாது⁴கங் அதரமானேன நிவத்திதப்³ப³ங்.
‘‘Nivesanaṃ pavisantena sallakkhetabbaṃ – ‘iminā pavisissāmi, iminā nikkhamissāmī’ti. Nātisahasā pavisitabbaṃ. Nātisahasā nikkhamitabbaṃ. Nātidūre ṭhātabbaṃ. Nāccāsanne ṭhātabbaṃ. Nāticiraṃ ṭhātabbaṃ. Nātilahuṃ nivattitabbaṃ. Ṭhitakena sallakkhetabbaṃ – ‘bhikkhaṃ dātukāmā vā adātukāmā vā’ti. Sace kammaṃ vā nikkhipati, āsanā vā vuṭṭhāti, kaṭacchuṃ vā parāmasati, bhājanaṃ vā parāmasati, ṭhapeti vā – dātukāmassāti ṭhātabbaṃ. Bhikkhāya diyyamānāya vāmena hatthena saṅghāṭiṃ uccāretvā dakkhiṇena hatthena pattaṃ paṇāmetvā ubhohi hatthehi pattaṃ paṭiggahetvā bhikkhā paṭiggahetabbā. Na ca bhikkhādāyikāya mukhaṃ ulloketabbaṃ. Sallakkhetabbaṃ – ‘sūpaṃ dātukāmā vā adātukāmā vā’ti. Sace kaṭacchu vā parāmasati, bhājanaṃ vā parāmasati, ṭhapeti vā – dātukāmassāti ṭhātabbaṃ. Bhikkhāya dinnāya saṅghāṭiyā pattaṃ paṭicchādetvā sādhukaṃ ataramānena nivattitabbaṃ.
‘‘ஸுப்படிச்ச²ன்னேன அந்தரக⁴ரே க³ந்தப்³ப³ங்…பே॰… ந உக்குடிகாய அந்தரக⁴ரே க³ந்தப்³ப³ங். கா³மதோ நிக்க²மித்வா பத்தங் த²விகாய பக்கி²பித்வா அங்ஸே ஆலக்³கெ³த்வா சீவரங் ஸங்க⁴ரித்வா ஸீஸே கரித்வா உபாஹனா ஆரோஹித்வா க³ந்தப்³ப³ங்.
‘‘Suppaṭicchannena antaraghare gantabbaṃ…pe… na ukkuṭikāya antaraghare gantabbaṃ. Gāmato nikkhamitvā pattaṃ thavikāya pakkhipitvā aṃse ālaggetvā cīvaraṃ saṅgharitvā sīse karitvā upāhanā ārohitvā gantabbaṃ.
‘‘ஆரஞ்ஞிகேன, பி⁴க்க²வே, பி⁴க்கு²னா பானீயங் உபட்டா²பேதப்³ப³ங், பரிபோ⁴ஜனீயங் உபட்டா²பேதப்³ப³ங், அக்³கி³ உபட்டா²பேதப்³போ³, அரணிஸஹிதங் உபட்டா²பேதப்³ப³ங், கத்தரத³ண்டோ³ உபட்டா²பேதப்³போ³, நக்க²த்தபதா³னி உக்³க³ஹேதப்³பா³னி – ஸகலானி வா ஏகதே³ஸானி வா, தி³ஸாகுஸலேன ப⁴விதப்³ப³ங். இத³ங் கோ², பி⁴க்க²வே, ஆரஞ்ஞிகானங் பி⁴க்கூ²னங் வத்தங் யதா² ஆரஞ்ஞிகேஹி பி⁴க்கூ²ஹி ஸம்மா வத்திதப்³ப³’’ந்தி.
‘‘Āraññikena, bhikkhave, bhikkhunā pānīyaṃ upaṭṭhāpetabbaṃ, paribhojanīyaṃ upaṭṭhāpetabbaṃ, aggi upaṭṭhāpetabbo, araṇisahitaṃ upaṭṭhāpetabbaṃ, kattaradaṇḍo upaṭṭhāpetabbo, nakkhattapadāni uggahetabbāni – sakalāni vā ekadesāni vā, disākusalena bhavitabbaṃ. Idaṃ kho, bhikkhave, āraññikānaṃ bhikkhūnaṃ vattaṃ yathā āraññikehi bhikkhūhi sammā vattitabba’’nti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / ஆரஞ்ஞிகவத்தகதா² • Āraññikavattakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஆரஞ்ஞிகவத்தகதா²வண்ணனா • Āraññikavattakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பிண்ட³சாரிகவத்தகதா²தி³வண்ணனா • Piṇḍacārikavattakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. ஆரஞ்ஞிகவத்தகதா² • 7. Āraññikavattakathā
