| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৭. আরঞ্ঞিকৰত্তকথা
7. Āraññikavattakathā
৩৬৮. আরঞ্ঞিকৰত্তে এৰং ৰিনিচ্ছযো ৰেদিতব্বোতি যোজনা। সেনাসনা ওতরিতব্বন্তি এত্থ অরঞ্ঞে রুক্খমূলাদীসু নিসিন্নস্স ৰিহারাভাৰতো সেনাসনং নাম ৰসনট্ঠানং সন্ধায ৰুত্তন্তি আহ ‘‘ৰসনট্ঠানতো নিক্খমিতব্ব’’ন্তি।
368. Āraññikavatte evaṃ vinicchayo veditabboti yojanā. Senāsanā otaritabbanti ettha araññe rukkhamūlādīsu nisinnassa vihārābhāvato senāsanaṃ nāma vasanaṭṭhānaṃ sandhāya vuttanti āha ‘‘vasanaṭṭhānato nikkhamitabba’’nti.
পত্তং থৰিকায পক্খিপিত্ৰাতি এত্থ কথং পত্তো থৰিকায পক্খিপিতব্বোতি আহ ‘‘সচে বহী’’তিআদি। তত্থ পত্তো পক্খিপিতব্বোতি সম্বন্ধো। ধোৰিত্ৰা কত্ৰাতি পদেসু ‘‘পত্তং ৰোদক’’ন্তি ৰিভত্তিপরিণামং কত্ৰা সম্বন্ধিতব্বং। তম্পীতি ৰেল়ুনাল়িকম্পি। সমীপেতি আরঞ্ঞকস্স সেনাসনস্স সমীপে। যথা চ আরঞ্ঞকস্স অরণিসহিতং ইচ্ছিতব্বং, এৰং কন্তারং পটিপন্নস্সাপি অরণিসহিতং ইচ্ছিতব্বন্তি যোজনা। গণৰাসিনোতি গণেন সহ ৰাসিনো, আরঞ্ঞকস্সাতি সম্বন্ধো। তেনাতি অরণিসহিতেন। ‘‘নক্খত্তানেৰ নক্খত্তপদানী’’তি ইমিনা অস্সযুজাদিনক্খত্তানেৰ (অভিধানপ্পদীপিকাযং ৫৮-৬০ গাথাসু) দিসাভাগজাননস্স, চ সমযজাননস্স চ কারণত্তা নক্খত্তপদানি নামাতি দস্সেতি।
Pattaṃ thavikāya pakkhipitvāti ettha kathaṃ patto thavikāya pakkhipitabboti āha ‘‘sace bahī’’tiādi. Tattha patto pakkhipitabboti sambandho. Dhovitvā katvāti padesu ‘‘pattaṃ vodaka’’nti vibhattipariṇāmaṃ katvā sambandhitabbaṃ. Tampīti veḷunāḷikampi. Samīpeti āraññakassa senāsanassa samīpe. Yathā ca āraññakassa araṇisahitaṃ icchitabbaṃ, evaṃ kantāraṃ paṭipannassāpi araṇisahitaṃ icchitabbanti yojanā. Gaṇavāsinoti gaṇena saha vāsino, āraññakassāti sambandho. Tenāti araṇisahitena. ‘‘Nakkhattāneva nakkhattapadānī’’ti iminā assayujādinakkhattāneva (abhidhānappadīpikāyaṃ 58-60 gāthāsu) disābhāgajānanassa, ca samayajānanassa ca kāraṇattā nakkhattapadāni nāmāti dasseti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ৭. আরঞ্ঞিকৰত্তকথা • 7. Āraññikavattakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / আরঞ্ঞিকৰত্তকথা • Āraññikavattakathā
