| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၇. အာရညိကဝတ္တကထာ
7. Āraññikavattakathā
၃၆၈. အာရညိကဝတ္တေ ဧဝံ ဝိနိစ္ဆယော ဝေဒိတဗ္ဗောတိ ယောဇနာ။ သေနာသနာ ဩတရိတဗ္ဗန္တိ ဧတ္ထ အရညေ ရုက္ခမူလာဒီသု နိသိန္နသ္သ ဝိဟာရာဘာဝတော သေနာသနံ နာမ ဝသနဋ္ဌာနံ သန္ဓာယ ဝုတ္တန္တိ အာဟ ‘‘ဝသနဋ္ဌာနတော နိက္ခမိတဗ္ဗ’’န္တိ။
368. Āraññikavatte evaṃ vinicchayo veditabboti yojanā. Senāsanā otaritabbanti ettha araññe rukkhamūlādīsu nisinnassa vihārābhāvato senāsanaṃ nāma vasanaṭṭhānaṃ sandhāya vuttanti āha ‘‘vasanaṭṭhānato nikkhamitabba’’nti.
ပတ္တံ ထဝိကာယ ပက္ခိပိတ္ဝာတိ ဧတ္ထ ကထံ ပတ္တော ထဝိကာယ ပက္ခိပိတဗ္ဗောတိ အာဟ ‘‘သစေ ဗဟီ’’တိအာဒိ။ တတ္ထ ပတ္တော ပက္ခိပိတဗ္ဗောတိ သမ္ဗန္ဓော။ ဓောဝိတ္ဝာ ကတ္ဝာတိ ပဒေသု ‘‘ပတ္တံ ဝောဒက’’န္တိ ဝိဘတ္တိပရိဏာမံ ကတ္ဝာ သမ္ဗန္ဓိတဗ္ဗံ။ တမ္ပီတိ ဝေဠုနာဠိကမ္ပိ။ သမီပေတိ အာရညကသ္သ သေနာသနသ္သ သမီပေ။ ယထာ စ အာရညကသ္သ အရဏိသဟိတံ ဣစ္ဆိတဗ္ဗံ, ဧဝံ ကန္တာရံ ပဋိပန္နသ္သာပိ အရဏိသဟိတံ ဣစ္ဆိတဗ္ဗန္တိ ယောဇနာ။ ဂဏဝာသိနောတိ ဂဏေန သဟ ဝာသိနော, အာရညကသ္သာတိ သမ္ဗန္ဓော။ တေနာတိ အရဏိသဟိတေန။ ‘‘နက္ခတ္တာနေဝ နက္ခတ္တပဒာနီ’’တိ ဣမိနာ အသ္သယုဇာဒိနက္ခတ္တာနေဝ (အဘိဓာနပ္ပဒီပိကာယံ ၅၈-၆၀ ဂာထာသု) ဒိသာဘာဂဇာနနသ္သ, စ သမယဇာနနသ္သ စ ကာရဏတ္တာ နက္ခတ္တပဒာနိ နာမာတိ ဒသ္သေတိ။
Pattaṃ thavikāya pakkhipitvāti ettha kathaṃ patto thavikāya pakkhipitabboti āha ‘‘sace bahī’’tiādi. Tattha patto pakkhipitabboti sambandho. Dhovitvā katvāti padesu ‘‘pattaṃ vodaka’’nti vibhattipariṇāmaṃ katvā sambandhitabbaṃ. Tampīti veḷunāḷikampi. Samīpeti āraññakassa senāsanassa samīpe. Yathā ca āraññakassa araṇisahitaṃ icchitabbaṃ, evaṃ kantāraṃ paṭipannassāpi araṇisahitaṃ icchitabbanti yojanā. Gaṇavāsinoti gaṇena saha vāsino, āraññakassāti sambandho. Tenāti araṇisahitena. ‘‘Nakkhattāneva nakkhattapadānī’’ti iminā assayujādinakkhattāneva (abhidhānappadīpikāyaṃ 58-60 gāthāsu) disābhāgajānanassa, ca samayajānanassa ca kāraṇattā nakkhattapadāni nāmāti dasseti.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / စူဠဝဂ္ဂပာဠိ • Cūḷavaggapāḷi / ၇. အာရညိကဝတ္တကထာ • 7. Āraññikavattakathā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / အာရညိကဝတ္တကထာ • Āraññikavattakathā
