| Library / Tipiṭaka / තිපිටක • Tipiṭaka / පාචිත්‍යාදියොජනාපාළි • Pācityādiyojanāpāḷi |
7. ආරඤ්‌ඤිකවත්‌තකථා
7. Āraññikavattakathā
368. ආරඤ්‌ඤිකවත්‌තෙ එවං විනිච්‌ඡයො වෙදිතබ්‌බොති යොජනා. සෙනාසනා ඔතරිතබ්‌බන්‌ති එත්‌ථ අරඤ්‌ඤෙ රුක්‌ඛමූලාදීසු නිසින්‌නස්‌ස විහාරාභාවතො සෙනාසනං නාම වසනට්‌ඨානං සන්‌ධාය වුත්‌තන්‌ති ආහ ‘‘වසනට්‌ඨානතො නික්‌ඛමිතබ්‌බ’’න්‌ති.
368. Āraññikavatte evaṃ vinicchayo veditabboti yojanā. Senāsanā otaritabbanti ettha araññe rukkhamūlādīsu nisinnassa vihārābhāvato senāsanaṃ nāma vasanaṭṭhānaṃ sandhāya vuttanti āha ‘‘vasanaṭṭhānato nikkhamitabba’’nti.
පත්‌තං ථවිකාය පක්‌ඛිපිත්‌වාති එත්‌ථ කථං පත්‌තො ථවිකාය පක්‌ඛිපිතබ්‌බොති ආහ ‘‘සචෙ බහී’’තිආදි. තත්‌ථ පත්‌තො පක්‌ඛිපිතබ්‌බොති සම්‌බන්‌ධො. ධොවිත්‌වා කත්‌වාති පදෙසු ‘‘පත්‌තං වොදක’’න්‌ති විභත්‌තිපරිණාමං කත්‌වා සම්‌බන්‌ධිතබ්‌බං. තම්‌පීති වෙළුනාළිකම්‌පි. සමීපෙති ආරඤ්‌ඤකස්‌ස සෙනාසනස්‌ස සමීපෙ. යථා ච ආරඤ්‌ඤකස්‌ස අරණිසහිතං ඉච්‌ඡිතබ්‌බං, එවං කන්‌තාරං පටිපන්‌නස්‌සාපි අරණිසහිතං ඉච්‌ඡිතබ්‌බන්‌ති යොජනා. ගණවාසිනොති ගණෙන සහ වාසිනො, ආරඤ්‌ඤකස්‌සාති සම්‌බන්‌ධො. තෙනාති අරණිසහිතෙන. ‘‘නක්‌ඛත්‌තානෙව නක්‌ඛත්‌තපදානී’’ති ඉමිනා අස්‌සයුජාදිනක්‌ඛත්‌තානෙව (අභිධානප්‌පදීපිකායං 58-60 ගාථාසු) දිසාභාගජානනස්‌ස, ච සමයජානනස්‌ස ච කාරණත්‌තා නක්‌ඛත්‌තපදානි නාමාති දස්‌සෙති.
Pattaṃ thavikāya pakkhipitvāti ettha kathaṃ patto thavikāya pakkhipitabboti āha ‘‘sace bahī’’tiādi. Tattha patto pakkhipitabboti sambandho. Dhovitvā katvāti padesu ‘‘pattaṃ vodaka’’nti vibhattipariṇāmaṃ katvā sambandhitabbaṃ. Tampīti veḷunāḷikampi. Samīpeti āraññakassa senāsanassa samīpe. Yathā ca āraññakassa araṇisahitaṃ icchitabbaṃ, evaṃ kantāraṃ paṭipannassāpi araṇisahitaṃ icchitabbanti yojanā. Gaṇavāsinoti gaṇena saha vāsino, āraññakassāti sambandho. Tenāti araṇisahitena. ‘‘Nakkhattāneva nakkhattapadānī’’ti iminā assayujādinakkhattāneva (abhidhānappadīpikāyaṃ 58-60 gāthāsu) disābhāgajānanassa, ca samayajānanassa ca kāraṇattā nakkhattapadāni nāmāti dasseti.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / චූළවග්‌ගපාළි • Cūḷavaggapāḷi / 7. ආරඤ්‌ඤිකවත්‌තකථා • 7. Āraññikavattakathā
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / ආරඤ්‌ඤිකවත්‌තකථා • Āraññikavattakathā
