| Library / Tipiṭaka / ཏིཔིཊཀ • Tipiṭaka / པཱཙིཏྱཱདིཡོཛནཱཔཱལི༹ • Pācityādiyojanāpāḷi |
༧. ཨཱརཉྙིཀཝཏྟཀཐཱ
7. Āraññikavattakathā
༣༦༨. ཨཱརཉྙིཀཝཏྟེ ཨེཝཾ ཝིནིཙྪཡོ ཝེདིཏབྦོཏི ཡོཛནཱ། སེནཱསནཱ ཨོཏརིཏབྦནྟི ཨེཏྠ ཨརཉྙེ རུཀྑམཱུལཱདཱིསུ ནིསིནྣསྶ ཝིཧཱརཱབྷཱཝཏོ སེནཱསནཾ ནཱམ ཝསནཊྛཱནཾ སནྡྷཱཡ ཝུཏྟནྟི ཨཱཧ ‘‘ཝསནཊྛཱནཏོ ནིཀྑམིཏབྦ’’ནྟི།
368. Āraññikavatte evaṃ vinicchayo veditabboti yojanā. Senāsanā otaritabbanti ettha araññe rukkhamūlādīsu nisinnassa vihārābhāvato senāsanaṃ nāma vasanaṭṭhānaṃ sandhāya vuttanti āha ‘‘vasanaṭṭhānato nikkhamitabba’’nti.
པཏྟཾ ཐཝིཀཱཡ པཀྑིཔིཏྭཱཏི ཨེཏྠ ཀཐཾ པཏྟོ ཐཝིཀཱཡ པཀྑིཔིཏབྦོཏི ཨཱཧ ‘‘སཙེ བཧཱི’’ཏིཨཱདི། ཏཏྠ པཏྟོ པཀྑིཔིཏབྦོཏི སམྦནྡྷོ། དྷོཝིཏྭཱ ཀཏྭཱཏི པདེསུ ‘‘པཏྟཾ ཝོདཀ’’ནྟི ཝིབྷཏྟིཔརིཎཱམཾ ཀཏྭཱ སམྦནྡྷིཏབྦཾ། ཏམྤཱིཏི ཝེལུ༹ནཱལི༹ཀམྤི། སམཱིཔེཏི ཨཱརཉྙཀསྶ སེནཱསནསྶ སམཱིཔེ། ཡཐཱ ཙ ཨཱརཉྙཀསྶ ཨརཎིསཧིཏཾ ཨིཙྪིཏབྦཾ, ཨེཝཾ ཀནྟཱརཾ པཊིཔནྣསྶཱཔི ཨརཎིསཧིཏཾ ཨིཙྪིཏབྦནྟི ཡོཛནཱ། གཎཝཱསིནོཏི གཎེན སཧ ཝཱསིནོ, ཨཱརཉྙཀསྶཱཏི སམྦནྡྷོ། ཏེནཱཏི ཨརཎིསཧིཏེན། ‘‘ནཀྑཏྟཱནེཝ ནཀྑཏྟཔདཱནཱི’’ཏི ཨིམིནཱ ཨསྶཡུཛཱདིནཀྑཏྟཱནེཝ (ཨབྷིདྷཱནཔྤདཱིཔིཀཱཡཾ ༥༨-༦༠ གཱཐཱསུ) དིསཱབྷཱགཛཱནནསྶ, ཙ སམཡཛཱནནསྶ ཙ ཀཱརཎཏྟཱ ནཀྑཏྟཔདཱནི ནཱམཱཏི དསྶེཏི།
Pattaṃ thavikāya pakkhipitvāti ettha kathaṃ patto thavikāya pakkhipitabboti āha ‘‘sace bahī’’tiādi. Tattha patto pakkhipitabboti sambandho. Dhovitvā katvāti padesu ‘‘pattaṃ vodaka’’nti vibhattipariṇāmaṃ katvā sambandhitabbaṃ. Tampīti veḷunāḷikampi. Samīpeti āraññakassa senāsanassa samīpe. Yathā ca āraññakassa araṇisahitaṃ icchitabbaṃ, evaṃ kantāraṃ paṭipannassāpi araṇisahitaṃ icchitabbanti yojanā. Gaṇavāsinoti gaṇena saha vāsino, āraññakassāti sambandho. Tenāti araṇisahitena. ‘‘Nakkhattāneva nakkhattapadānī’’ti iminā assayujādinakkhattāneva (abhidhānappadīpikāyaṃ 58-60 gāthāsu) disābhāgajānanassa, ca samayajānanassa ca kāraṇattā nakkhattapadāni nāmāti dasseti.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / ཙཱུལ༹ཝགྒཔཱལི༹ • Cūḷavaggapāḷi / ༧. ཨཱརཉྙིཀཝཏྟཀཐཱ • 7. Āraññikavattakathā
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / ཙཱུལ༹ཝགྒ-ཨཊྛཀཐཱ • Cūḷavagga-aṭṭhakathā / ཨཱརཉྙིཀཝཏྟཀཐཱ • Āraññikavattakathā
