| Library / Tipiṭaka / ਤਿਪਿਟਕ • Tipiṭaka / ਚੂਲ਼વਗ੍ਗਪਾਲ਼ਿ • Cūḷavaggapāḷi |
੭. ਆਰਞ੍ਞਿਕવਤ੍ਤਕਥਾ
7. Āraññikavattakathā
੩੬੭. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਅਰਞ੍ਞੇ વਿਹਰਨ੍ਤਿ। ਤੇ ਨੇવ ਪਾਨੀਯਂ ਉਪਟ੍ਠਾਪੇਨ੍ਤਿ, ਨ ਪਰਿਭੋਜਨੀਯਂ ਉਪਟ੍ਠਾਪੇਨ੍ਤਿ , ਨ ਅਗ੍ਗਿਂ ਉਪਟ੍ਠਾਪੇਨ੍ਤਿ, ਨ ਅਰਣਿਸਹਿਤਂ ਉਪਟ੍ਠਾਪੇਨ੍ਤਿ, ਨ ਨਕ੍ਖਤ੍ਤਪਦਾਨਿ ਜਾਨਨ੍ਤਿ, ਨ ਦਿਸਾਭਾਗਂ ਜਾਨਨ੍ਤਿ। ਚੋਰਾ ਤਤ੍ਥ ਗਨ੍ਤ੍વਾ ਤੇ ਭਿਕ੍ਖੂ ਏਤਦવੋਚੁਂ – ‘‘ਅਤ੍ਥਿ, ਭਨ੍ਤੇ, ਪਾਨੀਯ’’ਨ੍ਤਿ? ‘‘ਨਤ੍ਥਾવੁਸੋ’’ਤਿ। ‘‘ਅਤ੍ਥਿ, ਭਨ੍ਤੇ, ਪਰਿਭੋਜਨੀਯ’’ਨ੍ਤਿ? ‘‘ਨਤ੍ਥਾવੁਸੋ’’ਤਿ। ‘‘ਅਤ੍ਥਿ, ਭਨ੍ਤੇ, ਅਗ੍ਗੀ’’ਤਿ? ‘‘ਨਤ੍ਥਾવੁਸੋ’’ਤਿ। ‘‘ਅਤ੍ਥਿ, ਭਨ੍ਤੇ, ਅਰਣਿਸਹਿਤ’’ਨ੍ਤਿ? ‘‘ਨਤ੍ਥਾવੁਸੋ’’ਤਿ। ( ) 1 ‘‘ਕੇਨਜ੍ਜ, ਭਨ੍ਤੇ, ਯੁਤ੍ਤ’’ਨ੍ਤਿ? ‘‘ਨ ਖੋ ਮਯਂ, ਆવੁਸੋ, ਜਾਨਾਮਾ’’ਤਿ। ‘‘ਕਤਮਾਯਂ, ਭਨ੍ਤੇ, ਦਿਸਾ’’ਤਿ? ‘‘ਨ ਖੋ ਮਯਂ, ਆવੁਸੋ, ਜਾਨਾਮਾ’’ਤਿ। ਅਥ ਖੋ ਤੇ ਚੋਰਾ – ‘ਨੇવਿਮੇਸਂ ਪਾਨੀਯਂ ਅਤ੍ਥਿ, ਨ ਪਰਿਭੋਜਨੀਯਂ ਅਤ੍ਥਿ, ਨ ਅਗ੍ਗਿ ਅਤ੍ਥਿ, ਨ ਅਰਣਿਸਹਿਤਂ ਅਤ੍ਥਿ, ਨ ਨਕ੍ਖਤ੍ਤਪਦਾਨਿ ਜਾਨਨ੍ਤਿ, ਨ ਦਿਸਾਭਾਗਂ ਜਾਨਨ੍ਤਿ; ਚੋਰਾ ਇਮੇ, ਨਯਿਮੇ ਭਿਕ੍ਖੂ’ਤਿ – ਆਕੋਟੇਤ੍વਾ ਪਕ੍ਕਮਿਂਸੁ। ਅਥ ਖੋ ਤੇ ਭਿਕ੍ਖੂ ਭਿਕ੍ਖੂਨਂ ਏਤਮਤ੍ਥਂ ਆਰੋਚੇਸੁਂ। ਭਿਕ੍ਖੂ ਭਗવਤੋ ਏਤਮਤ੍ਥਂ ਆਰੋਚੇਸੁਂ। ਅਥ ਖੋ ਭਗવਾ ਏਤਸ੍ਮਿਂ ਨਿਦਾਨੇ ਏਤਸ੍ਮਿਂ ਪਕਰਣੇ ਧਮ੍ਮਿਂ ਕਥਂ ਕਤ੍વਾ ਭਿਕ੍ਖੂ ਆਮਨ੍ਤੇਸਿ –
367. Tena kho pana samayena sambahulā bhikkhū araññe viharanti. Te neva pānīyaṃ upaṭṭhāpenti, na paribhojanīyaṃ upaṭṭhāpenti , na aggiṃ upaṭṭhāpenti, na araṇisahitaṃ upaṭṭhāpenti, na nakkhattapadāni jānanti, na disābhāgaṃ jānanti. Corā tattha gantvā te bhikkhū etadavocuṃ – ‘‘atthi, bhante, pānīya’’nti? ‘‘Natthāvuso’’ti. ‘‘Atthi, bhante, paribhojanīya’’nti? ‘‘Natthāvuso’’ti. ‘‘Atthi, bhante, aggī’’ti? ‘‘Natthāvuso’’ti. ‘‘Atthi, bhante, araṇisahita’’nti? ‘‘Natthāvuso’’ti. ( ) 2 ‘‘Kenajja, bhante, yutta’’nti? ‘‘Na kho mayaṃ, āvuso, jānāmā’’ti. ‘‘Katamāyaṃ, bhante, disā’’ti? ‘‘Na kho mayaṃ, āvuso, jānāmā’’ti. Atha kho te corā – ‘nevimesaṃ pānīyaṃ atthi, na paribhojanīyaṃ atthi, na aggi atthi, na araṇisahitaṃ atthi, na nakkhattapadāni jānanti, na disābhāgaṃ jānanti; corā ime, nayime bhikkhū’ti – ākoṭetvā pakkamiṃsu. Atha kho te bhikkhū bhikkhūnaṃ etamatthaṃ ārocesuṃ. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi –
੩੬੮. ‘‘ਤੇਨ ਹਿ, ਭਿਕ੍ਖવੇ, ਆਰਞ੍ਞਿਕਾਨਂ ਭਿਕ੍ਖੂਨਂ વਤ੍ਤਂ ਪਞ੍ਞਪੇਸ੍ਸਾਮਿ ਯਥਾ ਆਰਞ੍ਞਿਕੇਹਿ ਭਿਕ੍ਖੂਹਿ ਸਮ੍ਮਾ વਤ੍ਤਿਤਬ੍ਬਂ। ਆਰਞ੍ਞਿਕੇਨ, ਭਿਕ੍ਖવੇ, ਭਿਕ੍ਖੁਨਾ ਕਾਲਸ੍ਸੇવ ਉਟ੍ਠਾਯ ਪਤ੍ਤਂ ਥવਿਕਾਯ ਪਕ੍ਖਿਪਿਤ੍વਾ ਅਂਸੇ ਆਲਗ੍ਗੇਤ੍વਾ ਚੀવਰਂ ਖਨ੍ਧੇ ਕਰਿਤ੍વਾ ਉਪਾਹਨਾ ਆਰੋਹਿਤ੍વਾ ਦਾਰੁਭਣ੍ਡਂ ਮਤ੍ਤਿਕਾਭਣ੍ਡਂ ਪਟਿਸਾਮੇਤ੍વਾ ਦ੍વਾਰવਾਤਪਾਨਂ ਥਕੇਤ੍વਾ ਸੇਨਾਸਨਾ ਓਤਰਿਤਬ੍ਬਂ – ਇਦਾਨਿ ਗਾਮਂ ਪવਿਸਿਸ੍ਸਾਮੀਤਿ। ਉਪਾਹਨਾ ਓਮੁਞ੍ਚਿਤ੍વਾ ਨੀਚਂ ਕਤ੍વਾ ਪਪ੍ਫੋਟੇਤ੍વਾ ਥવਿਕਾਯ ਪਕ੍ਖਿਪਿਤ੍વਾ ਅਂਸੇ ਆਲਗ੍ਗੇਤ੍વਾ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿવਾਸੇਤ੍વਾ ਕਾਯਬਨ੍ਧਨਂ ਬਨ੍ਧਿਤ੍વਾ ਸਗੁਣਂ ਕਤ੍વਾ ਸਙ੍ਘਾਟਿਯੋ ਪਾਰੁਪਿਤ੍વਾ ਗਣ੍ਠਿਕਂ ਪਟਿਮੁਞ੍ਚਿਤ੍વਾ ਧੋવਿਤ੍વਾ ਪਤ੍ਤਂ ਗਹੇਤ੍વਾ ਸਾਧੁਕਂ ਅਤਰਮਾਨੇਨ ਗਾਮੋ ਪવਿਸਿਤਬ੍ਬੋ। ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ…ਪੇ॰… ਨ ਖਮ੍ਭਕਤੇਨ ਅਨ੍ਤਰਘਰੇ ਗਨ੍ਤਬ੍ਬਂ। ਨ ਓਗੁਣ੍ਠਿਤੇਨ ਅਨ੍ਤਰਘਰੇ ਗਨ੍ਤਬ੍ਬਂ। ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ।
368. ‘‘Tena hi, bhikkhave, āraññikānaṃ bhikkhūnaṃ vattaṃ paññapessāmi yathā āraññikehi bhikkhūhi sammā vattitabbaṃ. Āraññikena, bhikkhave, bhikkhunā kālasseva uṭṭhāya pattaṃ thavikāya pakkhipitvā aṃse ālaggetvā cīvaraṃ khandhe karitvā upāhanā ārohitvā dārubhaṇḍaṃ mattikābhaṇḍaṃ paṭisāmetvā dvāravātapānaṃ thaketvā senāsanā otaritabbaṃ – idāni gāmaṃ pavisissāmīti. Upāhanā omuñcitvā nīcaṃ katvā papphoṭetvā thavikāya pakkhipitvā aṃse ālaggetvā timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā saguṇaṃ katvā saṅghāṭiyo pārupitvā gaṇṭhikaṃ paṭimuñcitvā dhovitvā pattaṃ gahetvā sādhukaṃ ataramānena gāmo pavisitabbo. Suppaṭicchannena antaraghare gantabbaṃ…pe… na khambhakatena antaraghare gantabbaṃ. Na oguṇṭhitena antaraghare gantabbaṃ. Na ukkuṭikāya antaraghare gantabbaṃ.
‘‘ਨਿવੇਸਨਂ ਪવਿਸਨ੍ਤੇਨ ਸਲ੍ਲਕ੍ਖੇਤਬ੍ਬਂ – ‘ਇਮਿਨਾ ਪવਿਸਿਸ੍ਸਾਮਿ, ਇਮਿਨਾ ਨਿਕ੍ਖਮਿਸ੍ਸਾਮੀ’ਤਿ। ਨਾਤਿਸਹਸਾ ਪવਿਸਿਤਬ੍ਬਂ। ਨਾਤਿਸਹਸਾ ਨਿਕ੍ਖਮਿਤਬ੍ਬਂ। ਨਾਤਿਦੂਰੇ ਠਾਤਬ੍ਬਂ। ਨਾਚ੍ਚਾਸਨ੍ਨੇ ਠਾਤਬ੍ਬਂ। ਨਾਤਿਚਿਰਂ ਠਾਤਬ੍ਬਂ। ਨਾਤਿਲਹੁਂ ਨਿવਤ੍ਤਿਤਬ੍ਬਂ। ਠਿਤਕੇਨ ਸਲ੍ਲਕ੍ਖੇਤਬ੍ਬਂ – ‘ਭਿਕ੍ਖਂ ਦਾਤੁਕਾਮਾ વਾ ਅਦਾਤੁਕਾਮਾ વਾ’ਤਿ। ਸਚੇ ਕਮ੍ਮਂ વਾ ਨਿਕ੍ਖਿਪਤਿ, ਆਸਨਾ વਾ વੁਟ੍ਠਾਤਿ, ਕਟਚ੍ਛੁਂ વਾ ਪਰਾਮਸਤਿ, ਭਾਜਨਂ વਾ ਪਰਾਮਸਤਿ, ਠਪੇਤਿ વਾ – ਦਾਤੁਕਾਮਸ੍ਸਾਤਿ ਠਾਤਬ੍ਬਂ। ਭਿਕ੍ਖਾਯ ਦਿਯ੍ਯਮਾਨਾਯ વਾਮੇਨ ਹਤ੍ਥੇਨ ਸਙ੍ਘਾਟਿਂ ਉਚ੍ਚਾਰੇਤ੍વਾ ਦਕ੍ਖਿਣੇਨ ਹਤ੍ਥੇਨ ਪਤ੍ਤਂ ਪਣਾਮੇਤ੍વਾ ਉਭੋਹਿ ਹਤ੍ਥੇਹਿ ਪਤ੍ਤਂ ਪਟਿਗ੍ਗਹੇਤ੍વਾ ਭਿਕ੍ਖਾ ਪਟਿਗ੍ਗਹੇਤਬ੍ਬਾ। ਨ ਚ ਭਿਕ੍ਖਾਦਾਯਿਕਾਯ ਮੁਖਂ ਉਲ੍ਲੋਕੇਤਬ੍ਬਂ। ਸਲ੍ਲਕ੍ਖੇਤਬ੍ਬਂ – ‘ਸੂਪਂ ਦਾਤੁਕਾਮਾ વਾ ਅਦਾਤੁਕਾਮਾ વਾ’ਤਿ। ਸਚੇ ਕਟਚ੍ਛੁ વਾ ਪਰਾਮਸਤਿ, ਭਾਜਨਂ વਾ ਪਰਾਮਸਤਿ, ਠਪੇਤਿ વਾ – ਦਾਤੁਕਾਮਸ੍ਸਾਤਿ ਠਾਤਬ੍ਬਂ। ਭਿਕ੍ਖਾਯ ਦਿਨ੍ਨਾਯ ਸਙ੍ਘਾਟਿਯਾ ਪਤ੍ਤਂ ਪਟਿਚ੍ਛਾਦੇਤ੍વਾ ਸਾਧੁਕਂ ਅਤਰਮਾਨੇਨ ਨਿવਤ੍ਤਿਤਬ੍ਬਂ।
‘‘Nivesanaṃ pavisantena sallakkhetabbaṃ – ‘iminā pavisissāmi, iminā nikkhamissāmī’ti. Nātisahasā pavisitabbaṃ. Nātisahasā nikkhamitabbaṃ. Nātidūre ṭhātabbaṃ. Nāccāsanne ṭhātabbaṃ. Nāticiraṃ ṭhātabbaṃ. Nātilahuṃ nivattitabbaṃ. Ṭhitakena sallakkhetabbaṃ – ‘bhikkhaṃ dātukāmā vā adātukāmā vā’ti. Sace kammaṃ vā nikkhipati, āsanā vā vuṭṭhāti, kaṭacchuṃ vā parāmasati, bhājanaṃ vā parāmasati, ṭhapeti vā – dātukāmassāti ṭhātabbaṃ. Bhikkhāya diyyamānāya vāmena hatthena saṅghāṭiṃ uccāretvā dakkhiṇena hatthena pattaṃ paṇāmetvā ubhohi hatthehi pattaṃ paṭiggahetvā bhikkhā paṭiggahetabbā. Na ca bhikkhādāyikāya mukhaṃ ulloketabbaṃ. Sallakkhetabbaṃ – ‘sūpaṃ dātukāmā vā adātukāmā vā’ti. Sace kaṭacchu vā parāmasati, bhājanaṃ vā parāmasati, ṭhapeti vā – dātukāmassāti ṭhātabbaṃ. Bhikkhāya dinnāya saṅghāṭiyā pattaṃ paṭicchādetvā sādhukaṃ ataramānena nivattitabbaṃ.
‘‘ਸੁਪ੍ਪਟਿਚ੍ਛਨ੍ਨੇਨ ਅਨ੍ਤਰਘਰੇ ਗਨ੍ਤਬ੍ਬਂ…ਪੇ॰… ਨ ਉਕ੍ਕੁਟਿਕਾਯ ਅਨ੍ਤਰਘਰੇ ਗਨ੍ਤਬ੍ਬਂ। ਗਾਮਤੋ ਨਿਕ੍ਖਮਿਤ੍વਾ ਪਤ੍ਤਂ ਥવਿਕਾਯ ਪਕ੍ਖਿਪਿਤ੍વਾ ਅਂਸੇ ਆਲਗ੍ਗੇਤ੍વਾ ਚੀવਰਂ ਸਙ੍ਘਰਿਤ੍વਾ ਸੀਸੇ ਕਰਿਤ੍વਾ ਉਪਾਹਨਾ ਆਰੋਹਿਤ੍વਾ ਗਨ੍ਤਬ੍ਬਂ।
‘‘Suppaṭicchannena antaraghare gantabbaṃ…pe… na ukkuṭikāya antaraghare gantabbaṃ. Gāmato nikkhamitvā pattaṃ thavikāya pakkhipitvā aṃse ālaggetvā cīvaraṃ saṅgharitvā sīse karitvā upāhanā ārohitvā gantabbaṃ.
‘‘ਆਰਞ੍ਞਿਕੇਨ, ਭਿਕ੍ਖવੇ, ਭਿਕ੍ਖੁਨਾ ਪਾਨੀਯਂ ਉਪਟ੍ਠਾਪੇਤਬ੍ਬਂ, ਪਰਿਭੋਜਨੀਯਂ ਉਪਟ੍ਠਾਪੇਤਬ੍ਬਂ, ਅਗ੍ਗਿ ਉਪਟ੍ਠਾਪੇਤਬ੍ਬੋ, ਅਰਣਿਸਹਿਤਂ ਉਪਟ੍ਠਾਪੇਤਬ੍ਬਂ, ਕਤ੍ਤਰਦਣ੍ਡੋ ਉਪਟ੍ਠਾਪੇਤਬ੍ਬੋ, ਨਕ੍ਖਤ੍ਤਪਦਾਨਿ ਉਗ੍ਗਹੇਤਬ੍ਬਾਨਿ – ਸਕਲਾਨਿ વਾ ਏਕਦੇਸਾਨਿ વਾ, ਦਿਸਾਕੁਸਲੇਨ ਭવਿਤਬ੍ਬਂ। ਇਦਂ ਖੋ, ਭਿਕ੍ਖવੇ, ਆਰਞ੍ਞਿਕਾਨਂ ਭਿਕ੍ਖੂਨਂ વਤ੍ਤਂ ਯਥਾ ਆਰਞ੍ਞਿਕੇਹਿ ਭਿਕ੍ਖੂਹਿ ਸਮ੍ਮਾ વਤ੍ਤਿਤਬ੍ਬ’’ਨ੍ਤਿ।
‘‘Āraññikena, bhikkhave, bhikkhunā pānīyaṃ upaṭṭhāpetabbaṃ, paribhojanīyaṃ upaṭṭhāpetabbaṃ, aggi upaṭṭhāpetabbo, araṇisahitaṃ upaṭṭhāpetabbaṃ, kattaradaṇḍo upaṭṭhāpetabbo, nakkhattapadāni uggahetabbāni – sakalāni vā ekadesāni vā, disākusalena bhavitabbaṃ. Idaṃ kho, bhikkhave, āraññikānaṃ bhikkhūnaṃ vattaṃ yathā āraññikehi bhikkhūhi sammā vattitabba’’nti.
Footnotes:
Related texts:
ਅਟ੍ਠਕਥਾ • Aṭṭhakathā / વਿਨਯਪਿਟਕ (ਅਟ੍ਠਕਥਾ) • Vinayapiṭaka (aṭṭhakathā) / ਚੂਲ਼વਗ੍ਗ-ਅਟ੍ਠਕਥਾ • Cūḷavagga-aṭṭhakathā / ਆਰਞ੍ਞਿਕવਤ੍ਤਕਥਾ • Āraññikavattakathā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਸਾਰਤ੍ਥਦੀਪਨੀ-ਟੀਕਾ • Sāratthadīpanī-ṭīkā / ਆਰਞ੍ਞਿਕવਤ੍ਤਕਥਾવਣ੍ਣਨਾ • Āraññikavattakathāvaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / વਿਮਤਿવਿਨੋਦਨੀ-ਟੀਕਾ • Vimativinodanī-ṭīkā / ਪਿਣ੍ਡਚਾਰਿਕવਤ੍ਤਕਥਾਦਿવਣ੍ਣਨਾ • Piṇḍacārikavattakathādivaṇṇanā
ਟੀਕਾ • Tīkā / વਿਨਯਪਿਟਕ (ਟੀਕਾ) • Vinayapiṭaka (ṭīkā) / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi / ੭. ਆਰਞ੍ਞਿਕવਤ੍ਤਕਥਾ • 7. Āraññikavattakathā
