| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. அரதீஸுத்தவண்ணனா
2. Aratīsuttavaṇṇanā
210. து³தியே நிக்க²மதீதி விஹாரா நிக்க²மதி. அபரஜ்ஜு வா காலேதி து³தியதி³வஸே வா பி⁴க்கா²சாரகாலே. விஹாரக³ருகோ கிரேஸ தே²ரோ. அரதிஞ்ச ரதிஞ்சாதி ஸாஸனே அரதிங் காமகு³ணேஸு ச ரதிங். ஸப்³ப³ஸோ கே³ஹஸிதஞ்ச விதக்கந்தி பஞ்சகாமகு³ணகே³ஹனிஸ்ஸிதங் பாபவிதக்கஞ்ச ஸப்³பா³காரேன பஹாய. வனத²ந்தி கிலேஸமஹாவனங். குஹிஞ்சீதி கிஸ்மிஞ்சி ஆரம்மணே. நிப்³ப³னதோ²தி நிக்கிலேஸவனோ. அரதோதி தண்ஹாரதிரஹிதோ.
210. Dutiye nikkhamatīti vihārā nikkhamati. Aparajju vā kāleti dutiyadivase vā bhikkhācārakāle. Vihāragaruko kiresa thero. Aratiñca ratiñcāti sāsane aratiṃ kāmaguṇesu ca ratiṃ. Sabbaso gehasitañca vitakkanti pañcakāmaguṇagehanissitaṃ pāpavitakkañca sabbākārena pahāya. Vanathanti kilesamahāvanaṃ. Kuhiñcīti kismiñci ārammaṇe. Nibbanathoti nikkilesavano. Aratoti taṇhāratirahito.
பத²விஞ்ச வேஹாஸந்தி பத²விட்டி²தஞ்ச இத்தி²புரிஸவத்தா²லங்காராதி³வண்ணங், வேஹாஸட்ட²கஞ்ச சந்த³ஸூரியோபா⁴ஸாதி³. ரூபக³தந்தி ரூபமேவ. ஜக³தோக³த⁴ந்தி ஜக³தியா ஓக³த⁴ங், அந்தோபத²வியங் நாக³ப⁴வனக³தந்தி அத்தோ². பரிஜீயதீதி பரிஜீரதி. ஸப்³ப³மனிச்சந்தி ஸப்³ப³ங் தங் அனிச்சங். அயங் தே²ரஸ்ஸ மஹாவிபஸ்ஸனாதி வத³ந்தி. ஏவங் ஸமச்சாதி ஏவங் ஸமாக³ந்த்வா. சரந்தி முதத்தாதி விஞ்ஞாதத்தபா⁴வா விஹரந்தி.
Pathaviñca vehāsanti pathaviṭṭhitañca itthipurisavatthālaṅkārādivaṇṇaṃ, vehāsaṭṭhakañca candasūriyobhāsādi. Rūpagatanti rūpameva. Jagatogadhanti jagatiyā ogadhaṃ, antopathaviyaṃ nāgabhavanagatanti attho. Parijīyatīti parijīrati. Sabbamaniccanti sabbaṃ taṃ aniccaṃ. Ayaṃ therassa mahāvipassanāti vadanti. Evaṃ samaccāti evaṃ samāgantvā. Caranti mutattāti viññātattabhāvā viharanti.
உபதீ⁴ஸூதி க²ந்த⁴கிலேஸாபி⁴ஸங்கா²ரேஸு. க³தி⁴தாதி கி³த்³தா⁴. தி³ட்ட²ஸுதேதி சக்கு²னா தி³ட்டே² ரூபே, ஸோதேன ஸுதே ஸத்³தே³. படிகே⁴ ச முதே சாதி எத்த² படிக⁴பதே³ன க³ந்த⁴ரஸா க³ஹிதா, முதபதே³ன பொ²ட்ட²ப்³பா³ரம்மணங் . யோ எத்த² ந லிம்பதீதி யோ ஏதேஸு பஞ்சகாமகு³ணேஸு தண்ஹாதி³ட்டி²லேபேஹி ந லிம்பதி.
Upadhīsūti khandhakilesābhisaṅkhāresu. Gadhitāti giddhā. Diṭṭhasuteti cakkhunā diṭṭhe rūpe, sotena sute sadde. Paṭighe ca mute cāti ettha paṭighapadena gandharasā gahitā, mutapadena phoṭṭhabbārammaṇaṃ . Yo ettha na limpatīti yo etesu pañcakāmaguṇesu taṇhādiṭṭhilepehi na limpati.
அத² ஸட்டி²னிஸ்ஸிதா ஸவிதக்கா, புதூ² ஜனதாய அத⁴ம்மா நிவிட்டா²தி அத² ச² ஆரம்மணனிஸ்ஸிதா புதூ² அத⁴ம்மவிதக்கா ஜனதாய நிவிட்டா²தி அத்தோ². ந ச வக்³க³க³தஸ்ஸ குஹிஞ்சீதி தேஸங் வஸேன ந கத்த²சி கிலேஸவக்³க³க³தோ ப⁴வெய்ய. நோ பன து³ட்டு²ல்லபா⁴ணீதி து³ட்டு²ல்லவசனபா⁴ணீபி ந ஸியா. ஸ பி⁴க்கூ²தி ஸோ ஏவங்விதோ⁴ பி⁴க்கு² நாம ஹோதி.
Atha saṭṭhinissitā savitakkā, puthū janatāya adhammā niviṭṭhāti atha cha ārammaṇanissitā puthū adhammavitakkā janatāya niviṭṭhāti attho. Naca vaggagatassa kuhiñcīti tesaṃ vasena na katthaci kilesavaggagato bhaveyya. No pana duṭṭhullabhāṇīti duṭṭhullavacanabhāṇīpi na siyā. Sa bhikkhūti so evaṃvidho bhikkhu nāma hoti.
த³ப்³போ³தி த³ப்³ப³ஜாதிகோ பண்டி³தோ. சிரரத்தஸமாஹிதோதி தீ³க⁴ரத்தங் ஸமாஹிதசித்தோ. நிபகோதி நேபக்கேன ஸமன்னாக³தோ பரிணதபஞ்ஞோ. அபிஹாலூதி நித்தண்ஹோ. ஸந்தங் பத³ந்தி நிப்³பா³னங். அஜ்ஜ²க³மா முனீதி அதி⁴க³தோ முனி. படிச்ச பரினிப்³பு³தோ கங்க²தி காலந்தி நிப்³பா³னங் படிச்ச கிலேஸபரினிப்³பா³னேன பரினிப்³பு³தோ பரினிப்³பா³னகாலங் ஆக³மேதி. து³தியங்.
Dabboti dabbajātiko paṇḍito. Cirarattasamāhitoti dīgharattaṃ samāhitacitto. Nipakoti nepakkena samannāgato pariṇatapañño. Apihālūti nittaṇho. Santaṃ padanti nibbānaṃ. Ajjhagamā munīti adhigato muni. Paṭicca parinibbuto kaṅkhati kālanti nibbānaṃ paṭicca kilesaparinibbānena parinibbuto parinibbānakālaṃ āgameti. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. அரதிஸுத்தங் • 2. Aratisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. அரதிஸுத்தவண்ணனா • 2. Aratisuttavaṇṇanā
