| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. অরতিসুত্তৰণ্ণনা
2. Aratisuttavaṇṇanā
২১০. ৰিহারগরুকো কিরেস থেরোতি এতেন থেরো অত্তনো সদ্ধিৰিহারিকং ৰঙ্গীসং ওৰদিতুং অনৰসরো। তেন অন্তরন্তরা তস্স চিত্তং রাগো অনুদ্ধংসেতীতি দস্সেতি। সাসনে অরতিন্তি সীলপরিপূরণে সমথৰিপস্সনাভাৰনায চ অনভিরতিং। কামগুণেসু চ রতিন্তি পঞ্চসু কামকোট্ঠাসেসু অস্সাদং। পাপৰিতক্কন্তি কামসঙ্কপ্পং। সব্বাকারেনাতি সব্বে তদঙ্গৰিক্খম্ভনসমুচ্ছিন্দনাকারেন। যথা মহন্তং অরঞ্ঞং ৰনথন্তি, এৰং মহন্তং কিলেসৰনং ‘‘ৰনথ’’ন্তি ৰুত্তং।
210.Vihāragarukokiresa theroti etena thero attano saddhivihārikaṃ vaṅgīsaṃ ovadituṃ anavasaro. Tena antarantarā tassa cittaṃ rāgo anuddhaṃsetīti dasseti. Sāsane aratinti sīlaparipūraṇe samathavipassanābhāvanāya ca anabhiratiṃ. Kāmaguṇesu ca ratinti pañcasu kāmakoṭṭhāsesu assādaṃ. Pāpavitakkanti kāmasaṅkappaṃ. Sabbākārenāti sabbe tadaṅgavikkhambhanasamucchindanākārena. Yathā mahantaṃ araññaṃ vanathanti, evaṃ mahantaṃ kilesavanaṃ ‘‘vanatha’’nti vuttaṃ.
পথৰিঞ্চ ৰেহাসন্তি ভুম্মত্থে পচ্চত্তৰচনং, তস্মা পথৰিযং আকাসে চাতি অত্থো। তেনাহ ‘‘পথৰিট্ঠিত’’ন্তিআদি। জগতীতি চ পথৰিযা ৰেৰচনং। তেনাহ ‘‘অন্তোপথৰিয’’ন্তি। পরিজীরতীতি সব্ব্বসো জরং পাপুণাতি। সমাগন্ত্ৰাতি ঞাণেন সমাগন্ত্ৰাতি অত্থো। তেনাহ ‘‘মুতত্তাতি ৰিঞ্ঞাতত্তভাৰা’’তি।
Pathaviñca vehāsanti bhummatthe paccattavacanaṃ, tasmā pathaviyaṃ ākāse cāti attho. Tenāha ‘‘pathaviṭṭhita’’ntiādi. Jagatīti ca pathaviyā vevacanaṃ. Tenāha ‘‘antopathaviya’’nti. Parijīratīti sabbbaso jaraṃ pāpuṇāti. Samāgantvāti ñāṇena samāgantvāti attho. Tenāha ‘‘mutattāti viññātattabhāvā’’ti.
পটিঘপদেন গন্ধরসা গহিতা ঘানজিৰ্হানং পটিহননৰসেন পৰত্তনতো। মুতপদেন ফোট্ঠব্বারম্মণং গহিতং মুত্ৰা গহেতব্বতো। ন লিপ্পতীতি ন মক্খীযতি।
Paṭighapadena gandharasā gahitā ghānajivhānaṃ paṭihananavasena pavattanato. Mutapadena phoṭṭhabbārammaṇaṃ gahitaṃ mutvā gahetabbato. Na lippatīti na makkhīyati.
সট্ঠি-সদ্দো ছ-সদ্দেন সমানত্থোতি ‘‘সট্ঠিনিস্সিতা’’তি পদস্স ‘‘ছআরম্মণনিস্সিতা’’তি অত্থো ৰুত্তো। পুথূ অধম্মৰিতক্কাতি রূপৰিতক্কাদিৰসেন বহূ নানাৰিতক্কা মিচ্ছাসঙ্কপ্পা। জনতায নিৰিট্ঠাতি মহাজনে পতিট্ঠিতা। তেসং ৰসেনাতি তেসম্পি মিচ্ছাৰিতক্কানং ৰসেন। ন কত্থচি আরম্মণে। কিলেসৰগ্গগতোতি কিলেসসঙ্গণিকং উপগতো ন ভৰেয্য, কিলেসৰিতক্কা ন উপ্পাদেতব্বাতি অত্থো। দুট্ঠুল্লৰচনং কামপটিসংযুত্তকথা।
Saṭṭhi-saddo cha-saddena samānatthoti ‘‘saṭṭhinissitā’’ti padassa ‘‘chaārammaṇanissitā’’ti attho vutto. Puthū adhammavitakkāti rūpavitakkādivasena bahū nānāvitakkā micchāsaṅkappā. Janatāya niviṭṭhāti mahājane patiṭṭhitā. Tesaṃ vasenāti tesampi micchāvitakkānaṃ vasena. Na katthaci ārammaṇe. Kilesavaggagatoti kilesasaṅgaṇikaṃ upagato na bhaveyya, kilesavitakkā na uppādetabbāti attho. Duṭṭhullavacanaṃ kāmapaṭisaṃyuttakathā.
দব্বজাতিকোতি দব্বরূপো। নেপক্কেনাতি কোসল্লেন। নিব্বানং পটিচ্চাতি অসঙ্খতধাতুং আরম্মণৰসেন পটিচ্চ। পরিনিব্বানকালন্তি অনুপাদিসেসনিব্বানকালং।
Dabbajātikoti dabbarūpo. Nepakkenāti kosallena. Nibbānaṃ paṭiccāti asaṅkhatadhātuṃ ārammaṇavasena paṭicca. Parinibbānakālanti anupādisesanibbānakālaṃ.
অরতিসুত্তৰণ্ণনা নিট্ঠিতা।
Aratisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. অরতিসুত্তং • 2. Aratisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. অরতীসুত্তৰণ্ণনা • 2. Aratīsuttavaṇṇanā
