| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
២. អរតីសុត្តវណ្ណនា
2. Aratīsuttavaṇṇanā
២១០. ទុតិយេ និក្ខមតីតិ វិហារា និក្ខមតិ។ អបរជ្ជុ វា កាលេតិ ទុតិយទិវសេ វា ភិក្ខាចារកាលេ។ វិហារគរុកោ កិរេស ថេរោ។ អរតិញ្ច រតិញ្ចាតិ សាសនេ អរតិំ កាមគុណេសុ ច រតិំ។ សព្ពសោ គេហសិតញ្ច វិតក្កន្តិ បញ្ចកាមគុណគេហនិស្សិតំ បាបវិតក្កញ្ច សព្ពាការេន បហាយ។ វនថន្តិ កិលេសមហាវនំ។ កុហិញ្ចីតិ កិស្មិញ្ចិ អារម្មណេ។ និព្ពនថោតិ និក្កិលេសវនោ។ អរតោតិ តណ្ហារតិរហិតោ។
210. Dutiye nikkhamatīti vihārā nikkhamati. Aparajju vā kāleti dutiyadivase vā bhikkhācārakāle. Vihāragaruko kiresa thero. Aratiñca ratiñcāti sāsane aratiṃ kāmaguṇesu ca ratiṃ. Sabbaso gehasitañca vitakkanti pañcakāmaguṇagehanissitaṃ pāpavitakkañca sabbākārena pahāya. Vanathanti kilesamahāvanaṃ. Kuhiñcīti kismiñci ārammaṇe. Nibbanathoti nikkilesavano. Aratoti taṇhāratirahito.
បថវិញ្ច វេហាសន្តិ បថវិដ្ឋិតញ្ច ឥត្ថិបុរិសវត្ថាលង្ការាទិវណ្ណំ, វេហាសដ្ឋកញ្ច ចន្ទសូរិយោភាសាទិ។ រូបគតន្តិ រូបមេវ។ ជគតោគធន្តិ ជគតិយា ឱគធំ, អន្តោបថវិយំ នាគភវនគតន្តិ អត្ថោ។ បរិជីយតីតិ បរិជីរតិ។ សព្ពមនិច្ចន្តិ សព្ពំ តំ អនិច្ចំ។ អយំ ថេរស្ស មហាវិបស្សនាតិ វទន្តិ។ ឯវំ សមច្ចាតិ ឯវំ សមាគន្ត្វា។ ចរន្តិ មុតត្តាតិ វិញ្ញាតត្តភាវា វិហរន្តិ។
Pathaviñca vehāsanti pathaviṭṭhitañca itthipurisavatthālaṅkārādivaṇṇaṃ, vehāsaṭṭhakañca candasūriyobhāsādi. Rūpagatanti rūpameva. Jagatogadhanti jagatiyā ogadhaṃ, antopathaviyaṃ nāgabhavanagatanti attho. Parijīyatīti parijīrati. Sabbamaniccanti sabbaṃ taṃ aniccaṃ. Ayaṃ therassa mahāvipassanāti vadanti. Evaṃ samaccāti evaṃ samāgantvā. Caranti mutattāti viññātattabhāvā viharanti.
ឧបធីសូតិ ខន្ធកិលេសាភិសង្ខារេសុ។ គធិតាតិ គិទ្ធា។ ទិដ្ឋសុតេតិ ចក្ខុនា ទិដ្ឋេ រូបេ, សោតេន សុតេ សទ្ទេ។ បដិឃេ ច មុតេ ចាតិ ឯត្ថ បដិឃបទេន គន្ធរសា គហិតា, មុតបទេន ផោដ្ឋព្ពារម្មណំ ។ យោ ឯត្ថ ន លិម្បតីតិ យោ ឯតេសុ បញ្ចកាមគុណេសុ តណ្ហាទិដ្ឋិលេបេហិ ន លិម្បតិ។
Upadhīsūti khandhakilesābhisaṅkhāresu. Gadhitāti giddhā. Diṭṭhasuteti cakkhunā diṭṭhe rūpe, sotena sute sadde. Paṭighe ca mute cāti ettha paṭighapadena gandharasā gahitā, mutapadena phoṭṭhabbārammaṇaṃ . Yo ettha na limpatīti yo etesu pañcakāmaguṇesu taṇhādiṭṭhilepehi na limpati.
អថ សដ្ឋិនិស្សិតា សវិតក្កា, បុថូ ជនតាយ អធម្មា និវិដ្ឋាតិ អថ ឆ អារម្មណនិស្សិតា បុថូ អធម្មវិតក្កា ជនតាយ និវិដ្ឋាតិ អត្ថោ។ ន ច វគ្គគតស្ស កុហិញ្ចីតិ តេសំ វសេន ន កត្ថចិ កិលេសវគ្គគតោ ភវេយ្យ។ នោ បន ទុដ្ឋុល្លភាណីតិ ទុដ្ឋុល្លវចនភាណីបិ ន សិយា។ ស ភិក្ខូតិ សោ ឯវំវិធោ ភិក្ខុ នាម ហោតិ។
Atha saṭṭhinissitā savitakkā, puthū janatāya adhammā niviṭṭhāti atha cha ārammaṇanissitā puthū adhammavitakkā janatāya niviṭṭhāti attho. Naca vaggagatassa kuhiñcīti tesaṃ vasena na katthaci kilesavaggagato bhaveyya. No pana duṭṭhullabhāṇīti duṭṭhullavacanabhāṇīpi na siyā. Sa bhikkhūti so evaṃvidho bhikkhu nāma hoti.
ទព្ពោតិ ទព្ពជាតិកោ បណ្ឌិតោ។ ចិររត្តសមាហិតោតិ ទីឃរត្តំ សមាហិតចិត្តោ។ និបកោតិ នេបក្កេន សមន្នាគតោ បរិណតបញ្ញោ។ អបិហាលូតិ និត្តណ្ហោ។ សន្តំ បទន្តិ និព្ពានំ។ អជ្ឈគមា មុនីតិ អធិគតោ មុនិ។ បដិច្ច បរិនិព្ពុតោ កង្ខតិ កាលន្តិ និព្ពានំ បដិច្ច កិលេសបរិនិព្ពានេន បរិនិព្ពុតោ បរិនិព្ពានកាលំ អាគមេតិ។ ទុតិយំ។
Dabboti dabbajātiko paṇḍito. Cirarattasamāhitoti dīgharattaṃ samāhitacitto. Nipakoti nepakkena samannāgato pariṇatapañño. Apihālūti nittaṇho. Santaṃ padanti nibbānaṃ. Ajjhagamā munīti adhigato muni. Paṭicca parinibbuto kaṅkhati kālanti nibbānaṃ paṭicca kilesaparinibbānena parinibbuto parinibbānakālaṃ āgameti. Dutiyaṃ.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ២. អរតិសុត្តំ • 2. Aratisuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ២. អរតិសុត្តវណ្ណនា • 2. Aratisuttavaṇṇanā
