| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೨. ಅರತೀಸುತ್ತವಣ್ಣನಾ
2. Aratīsuttavaṇṇanā
೨೧೦. ದುತಿಯೇ ನಿಕ್ಖಮತೀತಿ ವಿಹಾರಾ ನಿಕ್ಖಮತಿ। ಅಪರಜ್ಜು ವಾ ಕಾಲೇತಿ ದುತಿಯದಿವಸೇ ವಾ ಭಿಕ್ಖಾಚಾರಕಾಲೇ। ವಿಹಾರಗರುಕೋ ಕಿರೇಸ ಥೇರೋ। ಅರತಿಞ್ಚ ರತಿಞ್ಚಾತಿ ಸಾಸನೇ ಅರತಿಂ ಕಾಮಗುಣೇಸು ಚ ರತಿಂ। ಸಬ್ಬಸೋ ಗೇಹಸಿತಞ್ಚ ವಿತಕ್ಕನ್ತಿ ಪಞ್ಚಕಾಮಗುಣಗೇಹನಿಸ್ಸಿತಂ ಪಾಪವಿತಕ್ಕಞ್ಚ ಸಬ್ಬಾಕಾರೇನ ಪಹಾಯ। ವನಥನ್ತಿ ಕಿಲೇಸಮಹಾವನಂ। ಕುಹಿಞ್ಚೀತಿ ಕಿಸ್ಮಿಞ್ಚಿ ಆರಮ್ಮಣೇ। ನಿಬ್ಬನಥೋತಿ ನಿಕ್ಕಿಲೇಸವನೋ। ಅರತೋತಿ ತಣ್ಹಾರತಿರಹಿತೋ।
210. Dutiye nikkhamatīti vihārā nikkhamati. Aparajju vā kāleti dutiyadivase vā bhikkhācārakāle. Vihāragaruko kiresa thero. Aratiñca ratiñcāti sāsane aratiṃ kāmaguṇesu ca ratiṃ. Sabbaso gehasitañca vitakkanti pañcakāmaguṇagehanissitaṃ pāpavitakkañca sabbākārena pahāya. Vanathanti kilesamahāvanaṃ. Kuhiñcīti kismiñci ārammaṇe. Nibbanathoti nikkilesavano. Aratoti taṇhāratirahito.
ಪಥವಿಞ್ಚ ವೇಹಾಸನ್ತಿ ಪಥವಿಟ್ಠಿತಞ್ಚ ಇತ್ಥಿಪುರಿಸವತ್ಥಾಲಙ್ಕಾರಾದಿವಣ್ಣಂ, ವೇಹಾಸಟ್ಠಕಞ್ಚ ಚನ್ದಸೂರಿಯೋಭಾಸಾದಿ। ರೂಪಗತನ್ತಿ ರೂಪಮೇವ। ಜಗತೋಗಧನ್ತಿ ಜಗತಿಯಾ ಓಗಧಂ, ಅನ್ತೋಪಥವಿಯಂ ನಾಗಭವನಗತನ್ತಿ ಅತ್ಥೋ। ಪರಿಜೀಯತೀತಿ ಪರಿಜೀರತಿ। ಸಬ್ಬಮನಿಚ್ಚನ್ತಿ ಸಬ್ಬಂ ತಂ ಅನಿಚ್ಚಂ। ಅಯಂ ಥೇರಸ್ಸ ಮಹಾವಿಪಸ್ಸನಾತಿ ವದನ್ತಿ। ಏವಂ ಸಮಚ್ಚಾತಿ ಏವಂ ಸಮಾಗನ್ತ್ವಾ। ಚರನ್ತಿ ಮುತತ್ತಾತಿ ವಿಞ್ಞಾತತ್ತಭಾವಾ ವಿಹರನ್ತಿ।
Pathaviñca vehāsanti pathaviṭṭhitañca itthipurisavatthālaṅkārādivaṇṇaṃ, vehāsaṭṭhakañca candasūriyobhāsādi. Rūpagatanti rūpameva. Jagatogadhanti jagatiyā ogadhaṃ, antopathaviyaṃ nāgabhavanagatanti attho. Parijīyatīti parijīrati. Sabbamaniccanti sabbaṃ taṃ aniccaṃ. Ayaṃ therassa mahāvipassanāti vadanti. Evaṃ samaccāti evaṃ samāgantvā. Caranti mutattāti viññātattabhāvā viharanti.
ಉಪಧೀಸೂತಿ ಖನ್ಧಕಿಲೇಸಾಭಿಸಙ್ಖಾರೇಸು। ಗಧಿತಾತಿ ಗಿದ್ಧಾ। ದಿಟ್ಠಸುತೇತಿ ಚಕ್ಖುನಾ ದಿಟ್ಠೇ ರೂಪೇ, ಸೋತೇನ ಸುತೇ ಸದ್ದೇ। ಪಟಿಘೇ ಚ ಮುತೇ ಚಾತಿ ಏತ್ಥ ಪಟಿಘಪದೇನ ಗನ್ಧರಸಾ ಗಹಿತಾ, ಮುತಪದೇನ ಫೋಟ್ಠಬ್ಬಾರಮ್ಮಣಂ । ಯೋ ಏತ್ಥ ನ ಲಿಮ್ಪತೀತಿ ಯೋ ಏತೇಸು ಪಞ್ಚಕಾಮಗುಣೇಸು ತಣ್ಹಾದಿಟ್ಠಿಲೇಪೇಹಿ ನ ಲಿಮ್ಪತಿ।
Upadhīsūti khandhakilesābhisaṅkhāresu. Gadhitāti giddhā. Diṭṭhasuteti cakkhunā diṭṭhe rūpe, sotena sute sadde. Paṭighe ca mute cāti ettha paṭighapadena gandharasā gahitā, mutapadena phoṭṭhabbārammaṇaṃ . Yo ettha na limpatīti yo etesu pañcakāmaguṇesu taṇhādiṭṭhilepehi na limpati.
ಅಥ ಸಟ್ಠಿನಿಸ್ಸಿತಾ ಸವಿತಕ್ಕಾ, ಪುಥೂ ಜನತಾಯ ಅಧಮ್ಮಾ ನಿವಿಟ್ಠಾತಿ ಅಥ ಛ ಆರಮ್ಮಣನಿಸ್ಸಿತಾ ಪುಥೂ ಅಧಮ್ಮವಿತಕ್ಕಾ ಜನತಾಯ ನಿವಿಟ್ಠಾತಿ ಅತ್ಥೋ। ನ ಚ ವಗ್ಗಗತಸ್ಸ ಕುಹಿಞ್ಚೀತಿ ತೇಸಂ ವಸೇನ ನ ಕತ್ಥಚಿ ಕಿಲೇಸವಗ್ಗಗತೋ ಭವೇಯ್ಯ। ನೋ ಪನ ದುಟ್ಠುಲ್ಲಭಾಣೀತಿ ದುಟ್ಠುಲ್ಲವಚನಭಾಣೀಪಿ ನ ಸಿಯಾ। ಸ ಭಿಕ್ಖೂತಿ ಸೋ ಏವಂವಿಧೋ ಭಿಕ್ಖು ನಾಮ ಹೋತಿ।
Atha saṭṭhinissitā savitakkā, puthū janatāya adhammā niviṭṭhāti atha cha ārammaṇanissitā puthū adhammavitakkā janatāya niviṭṭhāti attho. Naca vaggagatassa kuhiñcīti tesaṃ vasena na katthaci kilesavaggagato bhaveyya. No pana duṭṭhullabhāṇīti duṭṭhullavacanabhāṇīpi na siyā. Sa bhikkhūti so evaṃvidho bhikkhu nāma hoti.
ದಬ್ಬೋತಿ ದಬ್ಬಜಾತಿಕೋ ಪಣ್ಡಿತೋ। ಚಿರರತ್ತಸಮಾಹಿತೋತಿ ದೀಘರತ್ತಂ ಸಮಾಹಿತಚಿತ್ತೋ। ನಿಪಕೋತಿ ನೇಪಕ್ಕೇನ ಸಮನ್ನಾಗತೋ ಪರಿಣತಪಞ್ಞೋ। ಅಪಿಹಾಲೂತಿ ನಿತ್ತಣ್ಹೋ। ಸನ್ತಂ ಪದನ್ತಿ ನಿಬ್ಬಾನಂ। ಅಜ್ಝಗಮಾ ಮುನೀತಿ ಅಧಿಗತೋ ಮುನಿ। ಪಟಿಚ್ಚ ಪರಿನಿಬ್ಬುತೋ ಕಙ್ಖತಿ ಕಾಲನ್ತಿ ನಿಬ್ಬಾನಂ ಪಟಿಚ್ಚ ಕಿಲೇಸಪರಿನಿಬ್ಬಾನೇನ ಪರಿನಿಬ್ಬುತೋ ಪರಿನಿಬ್ಬಾನಕಾಲಂ ಆಗಮೇತಿ। ದುತಿಯಂ।
Dabboti dabbajātiko paṇḍito. Cirarattasamāhitoti dīgharattaṃ samāhitacitto. Nipakoti nepakkena samannāgato pariṇatapañño. Apihālūti nittaṇho. Santaṃ padanti nibbānaṃ. Ajjhagamā munīti adhigato muni. Paṭicca parinibbuto kaṅkhati kālanti nibbānaṃ paṭicca kilesaparinibbānena parinibbuto parinibbānakālaṃ āgameti. Dutiyaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ಅರತಿಸುತ್ತಂ • 2. Aratisuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨. ಅರತಿಸುತ್ತವಣ್ಣನಾ • 2. Aratisuttavaṇṇanā
