| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೨. ಅರತಿಸುತ್ತವಣ್ಣನಾ
2. Aratisuttavaṇṇanā
೨೧೦. ವಿಹಾರಗರುಕೋ ಕಿರೇಸ ಥೇರೋತಿ ಏತೇನ ಥೇರೋ ಅತ್ತನೋ ಸದ್ಧಿವಿಹಾರಿಕಂ ವಙ್ಗೀಸಂ ಓವದಿತುಂ ಅನವಸರೋ। ತೇನ ಅನ್ತರನ್ತರಾ ತಸ್ಸ ಚಿತ್ತಂ ರಾಗೋ ಅನುದ್ಧಂಸೇತೀತಿ ದಸ್ಸೇತಿ। ಸಾಸನೇ ಅರತಿನ್ತಿ ಸೀಲಪರಿಪೂರಣೇ ಸಮಥವಿಪಸ್ಸನಾಭಾವನಾಯ ಚ ಅನಭಿರತಿಂ। ಕಾಮಗುಣೇಸು ಚ ರತಿನ್ತಿ ಪಞ್ಚಸು ಕಾಮಕೋಟ್ಠಾಸೇಸು ಅಸ್ಸಾದಂ। ಪಾಪವಿತಕ್ಕನ್ತಿ ಕಾಮಸಙ್ಕಪ್ಪಂ। ಸಬ್ಬಾಕಾರೇನಾತಿ ಸಬ್ಬೇ ತದಙ್ಗವಿಕ್ಖಮ್ಭನಸಮುಚ್ಛಿನ್ದನಾಕಾರೇನ। ಯಥಾ ಮಹನ್ತಂ ಅರಞ್ಞಂ ವನಥನ್ತಿ, ಏವಂ ಮಹನ್ತಂ ಕಿಲೇಸವನಂ ‘‘ವನಥ’’ನ್ತಿ ವುತ್ತಂ।
210.Vihāragarukokiresa theroti etena thero attano saddhivihārikaṃ vaṅgīsaṃ ovadituṃ anavasaro. Tena antarantarā tassa cittaṃ rāgo anuddhaṃsetīti dasseti. Sāsane aratinti sīlaparipūraṇe samathavipassanābhāvanāya ca anabhiratiṃ. Kāmaguṇesu ca ratinti pañcasu kāmakoṭṭhāsesu assādaṃ. Pāpavitakkanti kāmasaṅkappaṃ. Sabbākārenāti sabbe tadaṅgavikkhambhanasamucchindanākārena. Yathā mahantaṃ araññaṃ vanathanti, evaṃ mahantaṃ kilesavanaṃ ‘‘vanatha’’nti vuttaṃ.
ಪಥವಿಞ್ಚ ವೇಹಾಸನ್ತಿ ಭುಮ್ಮತ್ಥೇ ಪಚ್ಚತ್ತವಚನಂ, ತಸ್ಮಾ ಪಥವಿಯಂ ಆಕಾಸೇ ಚಾತಿ ಅತ್ಥೋ। ತೇನಾಹ ‘‘ಪಥವಿಟ್ಠಿತ’’ನ್ತಿಆದಿ। ಜಗತೀತಿ ಚ ಪಥವಿಯಾ ವೇವಚನಂ। ತೇನಾಹ ‘‘ಅನ್ತೋಪಥವಿಯ’’ನ್ತಿ। ಪರಿಜೀರತೀತಿ ಸಬ್ಬ್ಬಸೋ ಜರಂ ಪಾಪುಣಾತಿ। ಸಮಾಗನ್ತ್ವಾತಿ ಞಾಣೇನ ಸಮಾಗನ್ತ್ವಾತಿ ಅತ್ಥೋ। ತೇನಾಹ ‘‘ಮುತತ್ತಾತಿ ವಿಞ್ಞಾತತ್ತಭಾವಾ’’ತಿ।
Pathaviñca vehāsanti bhummatthe paccattavacanaṃ, tasmā pathaviyaṃ ākāse cāti attho. Tenāha ‘‘pathaviṭṭhita’’ntiādi. Jagatīti ca pathaviyā vevacanaṃ. Tenāha ‘‘antopathaviya’’nti. Parijīratīti sabbbaso jaraṃ pāpuṇāti. Samāgantvāti ñāṇena samāgantvāti attho. Tenāha ‘‘mutattāti viññātattabhāvā’’ti.
ಪಟಿಘಪದೇನ ಗನ್ಧರಸಾ ಗಹಿತಾ ಘಾನಜಿವ್ಹಾನಂ ಪಟಿಹನನವಸೇನ ಪವತ್ತನತೋ। ಮುತಪದೇನ ಫೋಟ್ಠಬ್ಬಾರಮ್ಮಣಂ ಗಹಿತಂ ಮುತ್ವಾ ಗಹೇತಬ್ಬತೋ। ನ ಲಿಪ್ಪತೀತಿ ನ ಮಕ್ಖೀಯತಿ।
Paṭighapadena gandharasā gahitā ghānajivhānaṃ paṭihananavasena pavattanato. Mutapadena phoṭṭhabbārammaṇaṃ gahitaṃ mutvā gahetabbato. Na lippatīti na makkhīyati.
ಸಟ್ಠಿ-ಸದ್ದೋ ಛ-ಸದ್ದೇನ ಸಮಾನತ್ಥೋತಿ ‘‘ಸಟ್ಠಿನಿಸ್ಸಿತಾ’’ತಿ ಪದಸ್ಸ ‘‘ಛಆರಮ್ಮಣನಿಸ್ಸಿತಾ’’ತಿ ಅತ್ಥೋ ವುತ್ತೋ। ಪುಥೂ ಅಧಮ್ಮವಿತಕ್ಕಾತಿ ರೂಪವಿತಕ್ಕಾದಿವಸೇನ ಬಹೂ ನಾನಾವಿತಕ್ಕಾ ಮಿಚ್ಛಾಸಙ್ಕಪ್ಪಾ। ಜನತಾಯ ನಿವಿಟ್ಠಾತಿ ಮಹಾಜನೇ ಪತಿಟ್ಠಿತಾ। ತೇಸಂ ವಸೇನಾತಿ ತೇಸಮ್ಪಿ ಮಿಚ್ಛಾವಿತಕ್ಕಾನಂ ವಸೇನ। ನ ಕತ್ಥಚಿ ಆರಮ್ಮಣೇ। ಕಿಲೇಸವಗ್ಗಗತೋತಿ ಕಿಲೇಸಸಙ್ಗಣಿಕಂ ಉಪಗತೋ ನ ಭವೇಯ್ಯ, ಕಿಲೇಸವಿತಕ್ಕಾ ನ ಉಪ್ಪಾದೇತಬ್ಬಾತಿ ಅತ್ಥೋ। ದುಟ್ಠುಲ್ಲವಚನಂ ಕಾಮಪಟಿಸಂಯುತ್ತಕಥಾ।
Saṭṭhi-saddo cha-saddena samānatthoti ‘‘saṭṭhinissitā’’ti padassa ‘‘chaārammaṇanissitā’’ti attho vutto. Puthū adhammavitakkāti rūpavitakkādivasena bahū nānāvitakkā micchāsaṅkappā. Janatāya niviṭṭhāti mahājane patiṭṭhitā. Tesaṃ vasenāti tesampi micchāvitakkānaṃ vasena. Na katthaci ārammaṇe. Kilesavaggagatoti kilesasaṅgaṇikaṃ upagato na bhaveyya, kilesavitakkā na uppādetabbāti attho. Duṭṭhullavacanaṃ kāmapaṭisaṃyuttakathā.
ದಬ್ಬಜಾತಿಕೋತಿ ದಬ್ಬರೂಪೋ। ನೇಪಕ್ಕೇನಾತಿ ಕೋಸಲ್ಲೇನ। ನಿಬ್ಬಾನಂ ಪಟಿಚ್ಚಾತಿ ಅಸಙ್ಖತಧಾತುಂ ಆರಮ್ಮಣವಸೇನ ಪಟಿಚ್ಚ। ಪರಿನಿಬ್ಬಾನಕಾಲನ್ತಿ ಅನುಪಾದಿಸೇಸನಿಬ್ಬಾನಕಾಲಂ।
Dabbajātikoti dabbarūpo. Nepakkenāti kosallena. Nibbānaṃ paṭiccāti asaṅkhatadhātuṃ ārammaṇavasena paṭicca. Parinibbānakālanti anupādisesanibbānakālaṃ.
ಅರತಿಸುತ್ತವಣ್ಣನಾ ನಿಟ್ಠಿತಾ।
Aratisuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ಅರತಿಸುತ್ತಂ • 2. Aratisuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨. ಅರತೀಸುತ್ತವಣ್ಣನಾ • 2. Aratīsuttavaṇṇanā
