| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. அரிட்ட²ஸிக்கா²பத³வண்ணனா
8. Ariṭṭhasikkhāpadavaṇṇanā
தங்தங்ஸம்பத்தியா (ஸாரத்த²॰ டீ॰ பாசித்திய 3.417) விப³ந்த⁴னவஸேன ஸத்தஸந்தானஸ்ஸ அந்தரே வேமஜ்ஜே² ஏதி ஆக³ச்ச²தீதி அந்தராயோ, தி³ட்ட²த⁴ம்மிகாதி³அனத்தோ², அனதிக்கமனத்தே²ன தஸ்மிங் அந்தராயே நியுத்தா, அந்தராயங் வா ப²லங் அரஹந்தி, அந்தராயஸ்ஸ வா கரணஸீலாதி அந்தராயிகா. தேனாஹ ‘‘ஸக்³க³மொக்கா²னங் அந்தராயங் கரொந்தீதி அந்தராயிகா’’தி (ம॰ நி॰ அட்ட²॰ 1.234). தே கம்மகிலேஸவிபாகஉபவாத³பஞ்ஞத்திவீதிக்கமவஸேன பஞ்சவிதா⁴தி எத்த² ச பஞ்சானந்தரியகம்மங் கம்மந்தராயிகங் நாம, ததா² பி⁴க்கு²னிதூ³ஸககம்மங். தங் பன மொக்க²ஸ்ஸேவ அந்தராயங் கரோதி, ந ஸக்³க³ஸ்ஸ. நியதமிச்சா²தி³ட்டி²த⁴ம்மா கிலேஸந்தராயிகா நாம. பண்ட³கதிரச்சா²னக³தஉப⁴தொப்³யஞ்ஜனகானங் படிஸந்தி⁴த⁴ம்மா விபாகந்தராயிகா நாம. அரியூபவாதா³ உபவாத³ந்தராயிகா நாம. தே பன யாவ அரியே ந க²மாபெந்தி, தாவதே³வ, ந ததோ பரங். ஸஞ்சிச்ச ஆபன்னா ஆபத்தியோ பஞ்ஞத்திவீதிக்கமந்தராயிகா நாம. தாபி யாவ பி⁴க்கு²பா⁴வங் வா படிஜானாதி, ந வுட்டா²தி வா ந தே³ஸேதி வா, தாவதே³வ, ந ததோ பரங்.
Taṃtaṃsampattiyā (sārattha. ṭī. pācittiya 3.417) vibandhanavasena sattasantānassa antare vemajjhe eti āgacchatīti antarāyo, diṭṭhadhammikādianattho, anatikkamanatthena tasmiṃ antarāye niyuttā, antarāyaṃ vā phalaṃ arahanti, antarāyassa vā karaṇasīlāti antarāyikā. Tenāha ‘‘saggamokkhānaṃ antarāyaṃ karontīti antarāyikā’’ti (ma. ni. aṭṭha. 1.234). Te kammakilesavipākaupavādapaññattivītikkamavasena pañcavidhāti ettha ca pañcānantariyakammaṃ kammantarāyikaṃ nāma, tathā bhikkhunidūsakakammaṃ. Taṃ pana mokkhasseva antarāyaṃ karoti, na saggassa. Niyatamicchādiṭṭhidhammā kilesantarāyikā nāma. Paṇḍakatiracchānagataubhatobyañjanakānaṃ paṭisandhidhammā vipākantarāyikā nāma. Ariyūpavādā upavādantarāyikā nāma. Te pana yāva ariye na khamāpenti, tāvadeva, na tato paraṃ. Sañcicca āpannā āpattiyo paññattivītikkamantarāyikā nāma. Tāpi yāva bhikkhubhāvaṃ vā paṭijānāti, na vuṭṭhāti vā na deseti vā, tāvadeva, na tato paraṃ.
தத்ராயங் (ம॰ நி॰ அட்ட²॰ 1.234; பாசி॰ அட்ட²॰ 417) அரிட்டோ² பி⁴க்கு² ப³ஹுஸ்ஸுதோ த⁴ம்மகதி²கோ ஸேஸந்தராயிகே ஜானாதி, வினயே பன அகோவித³த்தா பண்ணத்திவீதிக்கமந்தராயிகே ந ஜானாதி, தஸ்மா ரஹோக³தோ ஏவங் சிந்தேஸி ‘‘இமே ஆகா³ரிகா பஞ்ச காமகு³ணே பரிபு⁴ஞ்ஜந்தா ஸோதாபன்னாபி ஸகதா³கா³மினோபி அனாகா³மினோபி ஹொந்தி, பி⁴க்கூ²பி மனாபிகானி சக்கு²விஞ்ஞெய்யானி ரூபானி பஸ்ஸந்தி…பே॰… காயவிஞ்ஞெய்யே பொ²ட்ட²ப்³பே³ பு²ஸந்தி, முது³கானி அத்த²ரணபாவுரணாதீ³னி பரிபு⁴ஞ்ஜந்தி, ஏதங் ஸப்³ப³ங் வட்டதி. கஸ்மா? இத்தி²ரூபா…பே॰… இத்தி²பொ²ட்ட²ப்³பா³ ஏவ ந வட்டந்தி, ஏதேபி வட்டந்தீ’’தி ஏவங் ரஸேன ரஸங் ஸங்ஸந்தி³த்வா ஸச்ச²ந்த³ராக³பரிபோ⁴க³ஞ்ச நிச்ச²ந்த³ராக³பரிபோ⁴க³ஞ்ச ஏகங் கத்வா தூ²லவாகேஹி ஸத்³தி⁴ங் அதிஸுகு²மஸுத்தங் க⁴டெந்தோ விய, ஸாஸபேன ஸத்³தி⁴ங் ஸினேருங் உபஸங்ஹரந்தோ விய ச பாபகங் தி³ட்டி²க³தங் உப்பாதெ³த்வா ‘‘கிங் ப⁴க³வதா மஹாஸமுத்³த³ங் ப³ந்த⁴ந்தேன விய மஹதா உஸ்ஸாஹேன பட²மபாராஜிகங் பஞ்ஞத்தங், நத்தி² எத்த² தோ³ஸோ’’தி ஸப்³ப³ஞ்ஞுதஞ்ஞாணேன ஸத்³தி⁴ங் படிவிருஜ்ஜ²ந்தோ ப⁴ப்³ப³புக்³க³லானங் ஆஸங் சி²ந்த³ந்தோ ஜினஸ்ஸ ஆணாசக்கே பஹாரமதா³ஸி. தேனாஹ ‘‘தேஸூ’’திஆதி³.
Tatrāyaṃ (ma. ni. aṭṭha. 1.234; pāci. aṭṭha. 417) ariṭṭho bhikkhu bahussuto dhammakathiko sesantarāyike jānāti, vinaye pana akovidattā paṇṇattivītikkamantarāyike na jānāti, tasmā rahogato evaṃ cintesi ‘‘ime āgārikā pañca kāmaguṇe paribhuñjantā sotāpannāpi sakadāgāminopi anāgāminopi honti, bhikkhūpi manāpikāni cakkhuviññeyyāni rūpāni passanti…pe… kāyaviññeyye phoṭṭhabbe phusanti, mudukāni attharaṇapāvuraṇādīni paribhuñjanti, etaṃ sabbaṃ vaṭṭati. Kasmā? Itthirūpā…pe… itthiphoṭṭhabbā eva na vaṭṭanti, etepi vaṭṭantī’’ti evaṃ rasena rasaṃ saṃsanditvā sacchandarāgaparibhogañca nicchandarāgaparibhogañca ekaṃ katvā thūlavākehi saddhiṃ atisukhumasuttaṃ ghaṭento viya, sāsapena saddhiṃ sineruṃ upasaṃharanto viya ca pāpakaṃ diṭṭhigataṃ uppādetvā ‘‘kiṃ bhagavatā mahāsamuddaṃ bandhantena viya mahatā ussāhena paṭhamapārājikaṃ paññattaṃ, natthi ettha doso’’ti sabbaññutaññāṇena saddhiṃ paṭivirujjhanto bhabbapuggalānaṃ āsaṃ chindanto jinassa āṇācakke pahāramadāsi. Tenāha ‘‘tesū’’tiādi.
தத்த² தேஸூதி யதா²வுத்தேஸு அந்தராயேஸு. அட்டி²கங்கலூபமா காமாதி எத்த² அட்டி²கங்கலங் (ஸாரத்த²॰ டீ॰ பாசித்திய 3.417) நாம உரட்டி² வா பிட்டி²கண்டகங் வா ஸீஸட்டி² வா. தஞ்ஹி நிம்மங்ஸத்தா ‘‘கங்கல’’ந்தி வுச்சதி. விக³தமங்ஸாய ஹி அட்டி²ஸங்க²லிகாய ஏகட்டி²ம்ஹி வா கங்கலஸத்³தோ³ நிருள்ஹோ , தங்ஸதி³ஸா காமா அப்பஸ்ஸாத³ட்டே²னாதி அத்தோ². ஆதி³ஸத்³தே³ன ‘‘மங்ஸபேஸூபமா காமா, திணுக்கூபமா காமா, அங்கா³ரகாஸூபமா காமா, ஸுபினகூபமா காமா, யாசிதகூபமா காமா, ருக்க²ப²லூபமா காமா, அஸிஸூனூபமா காமா, ஸத்திஸூலூபமா காமா, ஸப்பஸிரூபமா காமா’’தி (ம॰ நி॰ 1.234, 236; 2.43-48; பாசி॰ 417; சூளவ॰ 65) ஏதேஸங் க³ஹணங்.
Tattha tesūti yathāvuttesu antarāyesu. Aṭṭhikaṅkalūpamā kāmāti ettha aṭṭhikaṅkalaṃ (sārattha. ṭī. pācittiya 3.417) nāma uraṭṭhi vā piṭṭhikaṇṭakaṃ vā sīsaṭṭhi vā. Tañhi nimmaṃsattā ‘‘kaṅkala’’nti vuccati. Vigatamaṃsāya hi aṭṭhisaṅkhalikāya ekaṭṭhimhi vā kaṅkalasaddo niruḷho , taṃsadisā kāmā appassādaṭṭhenāti attho. Ādisaddena ‘‘maṃsapesūpamā kāmā, tiṇukkūpamā kāmā, aṅgārakāsūpamā kāmā, supinakūpamā kāmā, yācitakūpamā kāmā, rukkhaphalūpamā kāmā, asisūnūpamā kāmā, sattisūlūpamā kāmā, sappasirūpamā kāmā’’ti (ma. ni. 1.234, 236; 2.43-48; pāci. 417; cūḷava. 65) etesaṃ gahaṇaṃ.
தத்த² மங்ஸபேஸூபமா காமா (பாசி॰ அட்ட²॰ 417) ப³ஹுஸாதா⁴ரணட்டே²ன. திணுக்கூபமா காமா அனுத³ஹனட்டே²ன. அங்கா³ரகாஸூபமா காமா மஹாபி⁴தாபனட்டே²ன. ஸுபினகூபமா காமா இத்தரபச்சுபட்டா²னட்டே²ன. யாசிதகூபமா காமா தாவகாலிகட்டே²ன. ருக்க²ப²லூபமா காமா ஸப்³ப³ங்க³பச்சங்க³பலிப⁴ஞ்ஜனட்டே²ன. அஸிஸூனூபமா அதி⁴குட்டனட்டே²ன. ஸத்திஸூலூபமா வினிவிஜ்ஜ²னட்டே²ன. ஸப்பஸிரூபமா ஸாஸங்கஸப்படிப⁴யட்டே²ன.
Tattha maṃsapesūpamā kāmā (pāci. aṭṭha. 417) bahusādhāraṇaṭṭhena. Tiṇukkūpamā kāmā anudahanaṭṭhena. Aṅgārakāsūpamā kāmā mahābhitāpanaṭṭhena. Supinakūpamā kāmā ittarapaccupaṭṭhānaṭṭhena. Yācitakūpamā kāmā tāvakālikaṭṭhena. Rukkhaphalūpamā kāmā sabbaṅgapaccaṅgapalibhañjanaṭṭhena. Asisūnūpamā adhikuṭṭanaṭṭhena. Sattisūlūpamā vinivijjhanaṭṭhena. Sappasirūpamā sāsaṅkasappaṭibhayaṭṭhena.
ததே²வாதி ‘‘மா ஆயஸ்மா’’திஆதீ³ஹி. இதரேஸந்தி ஸோ ஸங்க⁴மஜ்ஜ²ங் ஆகட்³டி⁴த்வா யேஹி ‘‘மா ஆயஸ்மா’’திஆதி³னா வுத்தோ, தத்த² தேஹி அஞ்ஞேஸங் ஸுதானங் பி⁴க்கூ²னங். ஞத்திசதுத்தே²ன கம்மேனாதி ‘‘ஸுணாது மே, ப⁴ந்தே, ஸங்கோ⁴, இத்த²ன்னாமஸ்ஸ பி⁴க்கு²னோ ஏவரூபங் பாபகங் தி³ட்டி²க³தங் உப்பன்ன’’ந்திஆதி³னா (பாசி॰ 420) பத³பா⁴ஜனியங் வுத்தேன ஞத்திசதுத்தே²ன கம்மேன.
Tathevāti ‘‘mā āyasmā’’tiādīhi. Itaresanti so saṅghamajjhaṃ ākaḍḍhitvā yehi ‘‘mā āyasmā’’tiādinā vutto, tattha tehi aññesaṃ sutānaṃ bhikkhūnaṃ. Ñatticatutthena kammenāti ‘‘suṇātu me, bhante, saṅgho, itthannāmassa bhikkhuno evarūpaṃ pāpakaṃ diṭṭhigataṃ uppanna’’ntiādinā (pāci. 420) padabhājaniyaṃ vuttena ñatticatutthena kammena.
அரிட்ட²ஸிக்கா²பத³வண்ணனா நிட்டி²தா.
Ariṭṭhasikkhāpadavaṇṇanā niṭṭhitā.
