| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
8. அரிட்ட²ஸிக்கா²பத³வண்ணனா
8. Ariṭṭhasikkhāpadavaṇṇanā
417. அட்ட²மே அந்தராயந்தி அந்தரா வேமஜ்ஜே² ஏதி ஆக³ச்ச²தீதி அந்தராயோ, தி³ட்ட²த⁴ம்மிகாதி³அனத்தோ². ஆனந்தரியத⁴ம்மாதி அனந்தரே ப⁴வே ப²லனிப்³ப³த்தனே நியுத்தா சேதனாதி³த⁴ம்மாதி அத்தோ². ‘‘ந ஸக்³க³ஸ்ஸா’’தி இத³ங் பி⁴க்கு²னிதூ³ஸனகம்மஸ்ஸ ஆனந்தரியத்தாபா⁴வதோ வுத்தங். அரியஸாவிகாஸு, பன கல்யாணபுது²ஜ்ஜனபூ⁴தாய ச ப³லக்காரேன தூ³ஸெந்தஸ்ஸ ஆனந்தரியஸஅஸமேவ. மொக்க²ந்தராயிகதா பன லோலாயபி பகதத்தபி⁴க்கு²னியா தூ³ஸகஸ்ஸ தஸ்மிங் அத்தபா⁴வே மக்³கு³ப்பத்தியா அபா⁴வதோ வுத்தா.
417. Aṭṭhame antarāyanti antarā vemajjhe eti āgacchatīti antarāyo, diṭṭhadhammikādianattho. Ānantariyadhammāti anantare bhave phalanibbattane niyuttā cetanādidhammāti attho. ‘‘Na saggassā’’ti idaṃ bhikkhunidūsanakammassa ānantariyattābhāvato vuttaṃ. Ariyasāvikāsu, pana kalyāṇaputhujjanabhūtāya ca balakkārena dūsentassa ānantariyasaasameva. Mokkhantarāyikatā pana lolāyapi pakatattabhikkhuniyā dūsakassa tasmiṃ attabhāve magguppattiyā abhāvato vuttā.
தஸ்மிங் அத்தபா⁴வே அனிவத்தனகா அஹேதுகஅகிரியனத்தி²கதி³ட்டி²யோவ நியதமிச்சா²தி³ட்டி²த⁴ம்மா. பண்ட³காதீ³னங் க³ஹணங் நித³ஸ்ஸனமத்தங். ஸப்³பா³பி து³ஹேதுகாஹேதுகபடிஸந்தி⁴யோ விபாகந்தராயிகாவ து³ஹேதுகானம்பி மக்³கா³னுப்பத்திதோ.
Tasmiṃ attabhāve anivattanakā ahetukaakiriyanatthikadiṭṭhiyova niyatamicchādiṭṭhidhammā. Paṇḍakādīnaṃ gahaṇaṃ nidassanamattaṃ. Sabbāpi duhetukāhetukapaṭisandhiyo vipākantarāyikāva duhetukānampi maggānuppattito.
அயந்தி அரிட்டோ². ரஸேன ரஸந்தி அனவஜ்ஜேன பச்சயபரிபு⁴ஞ்ஜனரஸேன பஞ்சகாமகு³ணபஅபோ⁴க³ரஸங் ஸமானெத்வா. உபனெந்தோ வியாதி க⁴டெந்தோ விய, ஸோ ஏவ வா பாடோ².
Ayanti ariṭṭho. Rasena rasanti anavajjena paccayaparibhuñjanarasena pañcakāmaguṇapaabhogarasaṃ samānetvā. Upanento viyāti ghaṭento viya, so eva vā pāṭho.
அட்டி²கங்கலூபமாதி எத்த² அட்டி² ஏவ நிம்மங்ஸதாய கங்கலந்தி ச வுச்சதி. பலிப⁴ஞ்ஜனட்டே²னாதி அவஸ்ஸங் பதனட்டே²ன. அதி⁴குட்டனட்டே²னாதி அதி விய குட்டனட்டே²ன. பாளியங் ‘‘ததா²ஹங் ப⁴க³வதா…பே॰… நாலங் அந்தராயாயா’’தி இத³ங் வத்து²அனுரூபதோ வுத்தங். ஏவங் பன அக்³க³ஹெத்வா அஞ்ஞேனபி ஆகாரேன யங் கிஞ்சி ப⁴க³வதா வுத்தங் விபரீததோ க³ஹெத்வா பரேஹி வுத்தேபி அமுஞ்சித்வா வோஹரந்தஸ்ஸாபி வுத்தனயானுஸாரேன தத³னுகு³ணங் ஸமனுபா⁴ஸனகம்மவாசங் யோஜெத்வா ஆபத்தியா ஆரோபேதுங், ஆபத்தியா அத³ஸ்ஸனாதீ³ஸு தீஸு யங் கிஞ்சி அபி⁴ருசிதங் நிமித்தங் கத்வா உக்கே²பனீயகம்மங் காதுஞ்ச லப்³ப⁴தி. ஸமனுபா⁴ஸனங் அகத்வாபி ‘‘மாயஸ்மா ஏவங் அவசா’’தி பி⁴க்கூ²ஹி வுத்தமத்தே லத்³தி⁴யா அப்படினிஸ்ஸஜ்ஜனபச்சயாய து³க்கடாபத்தியாபி உக்கே²பனீயகம்மங் காதும்பி வட்டதேவாதி த³ட்ட²ப்³ப³ங். த⁴ம்மகம்மதா, ஸமனுபா⁴ஸனாய அப்படினிஸ்ஸஜ்ஜனந்தி த்³வே அங்கா³னி.
Aṭṭhikaṅkalūpamāti ettha aṭṭhi eva nimmaṃsatāya kaṅkalanti ca vuccati. Palibhañjanaṭṭhenāti avassaṃ patanaṭṭhena. Adhikuṭṭanaṭṭhenāti ati viya kuṭṭanaṭṭhena. Pāḷiyaṃ ‘‘tathāhaṃ bhagavatā…pe… nālaṃ antarāyāyā’’ti idaṃ vatthuanurūpato vuttaṃ. Evaṃ pana aggahetvā aññenapi ākārena yaṃ kiñci bhagavatā vuttaṃ viparītato gahetvā parehi vuttepi amuñcitvā voharantassāpi vuttanayānusārena tadanuguṇaṃ samanubhāsanakammavācaṃ yojetvā āpattiyā āropetuṃ, āpattiyā adassanādīsu tīsu yaṃ kiñci abhirucitaṃ nimittaṃ katvā ukkhepanīyakammaṃ kātuñca labbhati. Samanubhāsanaṃ akatvāpi ‘‘māyasmā evaṃ avacā’’ti bhikkhūhi vuttamatte laddhiyā appaṭinissajjanapaccayāya dukkaṭāpattiyāpi ukkhepanīyakammaṃ kātumpi vaṭṭatevāti daṭṭhabbaṃ. Dhammakammatā, samanubhāsanāya appaṭinissajjananti dve aṅgāni.
அரிட்ட²ஸிக்கா²பத³வண்ணனா நிட்டி²தா.
Ariṭṭhasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 7. ஸப்பாணகவக்³கோ³ • 7. Sappāṇakavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 8. அரிட்ட²ஸிக்கா²பத³வண்ணனா • 8. Ariṭṭhasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 8. அரிட்ட²ஸிக்கா²பத³வண்ணனா • 8. Ariṭṭhasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 8. அரிட்ட²ஸிக்கா²பத³வண்ணனா • 8. Ariṭṭhasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 8. அரிட்ட²ஸிக்கா²பத³ங் • 8. Ariṭṭhasikkhāpadaṃ
