| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
8. аридтасигкаабад̣̇аван̣н̣анаа
8. Ariṭṭhasikkhāpadavaṇṇanā
д̇ам̣д̇ам̣самбад̇д̇ияаа (саарад̇т̇а. дий. баажид̇д̇ияа 3.417) виб̣анд̇ханавасзна сад̇д̇асанд̇аанасса анд̇арз взмаж̇жхз зд̇и ааг̇ажчад̇ийд̇и анд̇арааяо, д̣̇идтад̇хаммигаад̣̇ианад̇т̇о, анад̇иггаманад̇т̇зна д̇асмим̣ анд̇арааяз нияуд̇д̇аа, анд̇арааяам̣ ваа палам̣ араханд̇и, анд̇арааяасса ваа гаран̣асийлаад̇и анд̇арааяигаа. д̇знааха ‘‘саг̇г̇амогкаанам̣ анд̇арааяам̣ гаронд̇ийд̇и анд̇арааяигаа’’д̇и (ма. ни. адта. 1.234). д̇з гаммагилзсавибаагаубаваад̣̇абан̃н̃ад̇д̇ивийд̇иггамавасзна бан̃жавид̇хаад̇и зд̇т̇а жа бан̃жаананд̇арияагаммам̣ гамманд̇арааяигам̣ наама, д̇ат̇аа бхигкунид̣̇уусагагаммам̣. д̇ам̣ бана могкассзва анд̇арааяам̣ гарод̇и, на саг̇г̇асса. нияад̇амижчаад̣̇идтид̇хаммаа гилзсанд̇арааяигаа наама. бан̣д̣агад̇иражчаанаг̇ад̇аубхад̇об̣яан̃ж̇анагаанам̣ бадисанд̇хид̇хаммаа вибааганд̇арааяигаа наама. арияуубаваад̣̇аа убаваад̣̇анд̇арааяигаа наама. д̇з бана яаава арияз на камаабзнд̇и, д̇аавад̣̇зва, на д̇ад̇о барам̣. сан̃жижжа аабаннаа аабад̇д̇ияо бан̃н̃ад̇д̇ивийд̇иггаманд̇арааяигаа наама. д̇ааби яаава бхигкубхаавам̣ ваа бадиж̇аанаад̇и, на вудтаад̇и ваа на д̣̇зсзд̇и ваа, д̇аавад̣̇зва, на д̇ад̇о барам̣.
Taṃtaṃsampattiyā (sārattha. ṭī. pācittiya 3.417) vibandhanavasena sattasantānassa antare vemajjhe eti āgacchatīti antarāyo, diṭṭhadhammikādianattho, anatikkamanatthena tasmiṃ antarāye niyuttā, antarāyaṃ vā phalaṃ arahanti, antarāyassa vā karaṇasīlāti antarāyikā. Tenāha ‘‘saggamokkhānaṃ antarāyaṃ karontīti antarāyikā’’ti (ma. ni. aṭṭha. 1.234). Te kammakilesavipākaupavādapaññattivītikkamavasena pañcavidhāti ettha ca pañcānantariyakammaṃ kammantarāyikaṃ nāma, tathā bhikkhunidūsakakammaṃ. Taṃ pana mokkhasseva antarāyaṃ karoti, na saggassa. Niyatamicchādiṭṭhidhammā kilesantarāyikā nāma. Paṇḍakatiracchānagataubhatobyañjanakānaṃ paṭisandhidhammā vipākantarāyikā nāma. Ariyūpavādā upavādantarāyikā nāma. Te pana yāva ariye na khamāpenti, tāvadeva, na tato paraṃ. Sañcicca āpannā āpattiyo paññattivītikkamantarāyikā nāma. Tāpi yāva bhikkhubhāvaṃ vā paṭijānāti, na vuṭṭhāti vā na deseti vā, tāvadeva, na tato paraṃ.
д̇ад̇рааяам̣ (ма. ни. адта. 1.234; баажи. адта. 417) аридто бхигку б̣ахуссуд̇о д̇хаммагат̇иго сзсанд̇арааяигз ж̇аанаад̇и, винаяз бана аговид̣̇ад̇д̇аа бан̣н̣ад̇д̇ивийд̇иггаманд̇арааяигз на ж̇аанаад̇и, д̇асмаа рахог̇ад̇о звам̣ жинд̇зси ‘‘имз ааг̇ааригаа бан̃жа гаамаг̇ун̣з барибхун̃ж̇анд̇аа сод̇аабаннааби сагад̣̇ааг̇ааминоби анааг̇ааминоби хонд̇и, бхигкууби манаабигаани жагкувин̃н̃зяяаани руубаани бассанд̇и…бз… гааяавин̃н̃зяяз подтаб̣б̣з пусанд̇и, муд̣̇угаани ад̇т̇аран̣абаавуран̣аад̣̇ийни барибхун̃ж̇анд̇и, зд̇ам̣ саб̣б̣ам̣ ваддад̇и. гасмаа? ид̇т̇ируубаа…бз… ид̇т̇иподтаб̣б̣аа зва на вадданд̇и, зд̇зби вадданд̇ий’’д̇и звам̣ расзна расам̣ сам̣санд̣̇ид̇ваа сажчанд̣̇арааг̇абарибхог̇ан̃жа нижчанд̣̇арааг̇абарибхог̇ан̃жа згам̣ гад̇ваа т̇уулаваагзхи сад̣̇д̇хим̣ ад̇исукумасуд̇д̇ам̣ гхадзнд̇о вияа, саасабзна сад̣̇д̇хим̣ синзрум̣ убасам̣харанд̇о вияа жа баабагам̣ д̣̇идтиг̇ад̇ам̣ уббаад̣̇зд̇ваа ‘‘гим̣ бхаг̇авад̇аа махаасамуд̣̇д̣̇ам̣ б̣анд̇ханд̇зна вияа махад̇аа уссаахзна батамабаарааж̇игам̣ бан̃н̃ад̇д̇ам̣, над̇т̇и зд̇т̇а д̣̇осо’’д̇и саб̣б̣ан̃н̃уд̇ан̃н̃аан̣зна сад̣̇д̇хим̣ бадивируж̇жханд̇о бхаб̣б̣абуг̇г̇алаанам̣ аасам̣ чинд̣̇анд̇о ж̇инасса аан̣аажаггз бахаарамад̣̇ааси. д̇знааха ‘‘д̇зсуу’’д̇иаад̣̇и.
Tatrāyaṃ (ma. ni. aṭṭha. 1.234; pāci. aṭṭha. 417) ariṭṭho bhikkhu bahussuto dhammakathiko sesantarāyike jānāti, vinaye pana akovidattā paṇṇattivītikkamantarāyike na jānāti, tasmā rahogato evaṃ cintesi ‘‘ime āgārikā pañca kāmaguṇe paribhuñjantā sotāpannāpi sakadāgāminopi anāgāminopi honti, bhikkhūpi manāpikāni cakkhuviññeyyāni rūpāni passanti…pe… kāyaviññeyye phoṭṭhabbe phusanti, mudukāni attharaṇapāvuraṇādīni paribhuñjanti, etaṃ sabbaṃ vaṭṭati. Kasmā? Itthirūpā…pe… itthiphoṭṭhabbā eva na vaṭṭanti, etepi vaṭṭantī’’ti evaṃ rasena rasaṃ saṃsanditvā sacchandarāgaparibhogañca nicchandarāgaparibhogañca ekaṃ katvā thūlavākehi saddhiṃ atisukhumasuttaṃ ghaṭento viya, sāsapena saddhiṃ sineruṃ upasaṃharanto viya ca pāpakaṃ diṭṭhigataṃ uppādetvā ‘‘kiṃ bhagavatā mahāsamuddaṃ bandhantena viya mahatā ussāhena paṭhamapārājikaṃ paññattaṃ, natthi ettha doso’’ti sabbaññutaññāṇena saddhiṃ paṭivirujjhanto bhabbapuggalānaṃ āsaṃ chindanto jinassa āṇācakke pahāramadāsi. Tenāha ‘‘tesū’’tiādi.
д̇ад̇т̇а д̇зсууд̇и яат̇аавуд̇д̇зсу анд̇арааязсу. адтиган̇галуубамаа гаамаад̇и зд̇т̇а адтиган̇галам̣ (саарад̇т̇а. дий. баажид̇д̇ияа 3.417) наама урадти ваа бидтиган̣дагам̣ ваа сийсадти ваа. д̇ан̃хи ниммам̣сад̇д̇аа ‘‘ган̇гала’’нд̇и вужжад̇и. виг̇ад̇амам̣сааяа хи адтисан̇калигааяа згадтимхи ваа ган̇галасад̣̇д̣̇о нирул̣хо , д̇ам̣сад̣̇исаа гаамаа аббассаад̣̇адтзнаад̇и ад̇т̇о. аад̣̇исад̣̇д̣̇зна ‘‘мам̣сабзсуубамаа гаамаа, д̇ин̣уггуубамаа гаамаа, ан̇г̇аарагаасуубамаа гаамаа, субинагуубамаа гаамаа, яаажид̇агуубамаа гаамаа, ругкапалуубамаа гаамаа, асисуунуубамаа гаамаа, сад̇д̇исуулуубамаа гаамаа, саббасируубамаа гаамаа’’д̇и (ма. ни. 1.234, 236; 2.43-48; баажи. 417; жуул̣ава. 65) зд̇зсам̣ г̇ахан̣ам̣.
Tattha tesūti yathāvuttesu antarāyesu. Aṭṭhikaṅkalūpamā kāmāti ettha aṭṭhikaṅkalaṃ (sārattha. ṭī. pācittiya 3.417) nāma uraṭṭhi vā piṭṭhikaṇṭakaṃ vā sīsaṭṭhi vā. Tañhi nimmaṃsattā ‘‘kaṅkala’’nti vuccati. Vigatamaṃsāya hi aṭṭhisaṅkhalikāya ekaṭṭhimhi vā kaṅkalasaddo niruḷho , taṃsadisā kāmā appassādaṭṭhenāti attho. Ādisaddena ‘‘maṃsapesūpamā kāmā, tiṇukkūpamā kāmā, aṅgārakāsūpamā kāmā, supinakūpamā kāmā, yācitakūpamā kāmā, rukkhaphalūpamā kāmā, asisūnūpamā kāmā, sattisūlūpamā kāmā, sappasirūpamā kāmā’’ti (ma. ni. 1.234, 236; 2.43-48; pāci. 417; cūḷava. 65) etesaṃ gahaṇaṃ.
д̇ад̇т̇а мам̣сабзсуубамаа гаамаа (баажи. адта. 417) б̣ахусаад̇хааран̣адтзна. д̇ин̣уггуубамаа гаамаа ануд̣̇аханадтзна. ан̇г̇аарагаасуубамаа гаамаа махаабхид̇аабанадтзна. субинагуубамаа гаамаа ид̇д̇арабажжубадтаанадтзна. яаажид̇агуубамаа гаамаа д̇аавагаалигадтзна. ругкапалуубамаа гаамаа саб̣б̣ан̇г̇абажжан̇г̇абалибхан̃ж̇анадтзна. асисуунуубамаа ад̇хигудданадтзна. сад̇д̇исуулуубамаа винивиж̇жханадтзна. саббасируубамаа саасан̇гасаббадибхаяадтзна.
Tattha maṃsapesūpamā kāmā (pāci. aṭṭha. 417) bahusādhāraṇaṭṭhena. Tiṇukkūpamā kāmā anudahanaṭṭhena. Aṅgārakāsūpamā kāmā mahābhitāpanaṭṭhena. Supinakūpamā kāmā ittarapaccupaṭṭhānaṭṭhena. Yācitakūpamā kāmā tāvakālikaṭṭhena. Rukkhaphalūpamā kāmā sabbaṅgapaccaṅgapalibhañjanaṭṭhena. Asisūnūpamā adhikuṭṭanaṭṭhena. Sattisūlūpamā vinivijjhanaṭṭhena. Sappasirūpamā sāsaṅkasappaṭibhayaṭṭhena.
д̇ат̇зваад̇и ‘‘маа ааяасмаа’’д̇иаад̣̇ийхи. ид̇арзсанд̇и со сан̇гхамаж̇жхам̣ аагад̣дхид̇ваа язхи ‘‘маа ааяасмаа’’д̇иаад̣̇инаа вуд̇д̇о, д̇ад̇т̇а д̇зхи ан̃н̃зсам̣ суд̇аанам̣ бхигкуунам̣. н̃ад̇д̇ижад̇уд̇т̇зна гаммзнаад̇и ‘‘сун̣аад̇у мз, бханд̇з, сан̇гхо, ид̇т̇аннаамасса бхигкуно зваруубам̣ баабагам̣ д̣̇идтиг̇ад̇ам̣ уббанна’’нд̇иаад̣̇инаа (баажи. 420) бад̣̇абхааж̇анияам̣ вуд̇д̇зна н̃ад̇д̇ижад̇уд̇т̇зна гаммзна.
Tathevāti ‘‘mā āyasmā’’tiādīhi. Itaresanti so saṅghamajjhaṃ ākaḍḍhitvā yehi ‘‘mā āyasmā’’tiādinā vutto, tattha tehi aññesaṃ sutānaṃ bhikkhūnaṃ. Ñatticatutthena kammenāti ‘‘suṇātu me, bhante, saṅgho, itthannāmassa bhikkhuno evarūpaṃ pāpakaṃ diṭṭhigataṃ uppanna’’ntiādinā (pāci. 420) padabhājaniyaṃ vuttena ñatticatutthena kammena.
аридтасигкаабад̣̇аван̣н̣анаа нидтид̇аа.
Ariṭṭhasikkhāpadavaṇṇanā niṭṭhitā.
