| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
9. அரியத⁴ம்மவிபாககதா²வண்ணனா
9. Ariyadhammavipākakathāvaṇṇanā
498. இதா³னி அரியத⁴ம்மவிபாககதா² நாம ஹோதி. தத்த² யேஸங் கிலேஸப்பஹானமத்தமேவ ஸாமஞ்ஞப²லங், ந சித்தசேதஸிகா த⁴ம்மாதி லத்³தி⁴, ஸெய்யதா²பி அந்த⁴கானங்; தே ஸந்தா⁴ய நத்தி² அரியத⁴ம்மவிபாகோதி புச்சா² ஸகவாதி³ஸ்ஸ. தத்த² அரியத⁴ம்மவிபாகோதி மக்³க³ஸங்கா²தஸ்ஸ அரியத⁴ம்மஸ்ஸ விபாகோ. கிலேஸக்க²யமத்தங் அரியப²லந்தி லத்³தி⁴யா படிஞ்ஞா இதரஸ்ஸ. ஸாமஞ்ஞந்தி ஸமணபா⁴வோ, மக்³க³ஸ்ஸேதங் நாமங். ‘‘ஸாமஞ்ஞஞ்ச வோ, பி⁴க்க²வே, தே³ஸெஸ்ஸாமி ஸாமஞ்ஞப²லஞ்சா’’தி ஹி வுத்தங். ப்³ரஹ்மஞ்ஞேபி ஏஸேவ நயோ.
498. Idāni ariyadhammavipākakathā nāma hoti. Tattha yesaṃ kilesappahānamattameva sāmaññaphalaṃ, na cittacetasikā dhammāti laddhi, seyyathāpi andhakānaṃ; te sandhāya natthi ariyadhammavipākoti pucchā sakavādissa. Tattha ariyadhammavipākoti maggasaṅkhātassa ariyadhammassa vipāko. Kilesakkhayamattaṃ ariyaphalanti laddhiyā paṭiññā itarassa. Sāmaññanti samaṇabhāvo, maggassetaṃ nāmaṃ. ‘‘Sāmaññañca vo, bhikkhave, desessāmi sāmaññaphalañcā’’ti hi vuttaṃ. Brahmaññepi eseva nayo.
ஸோதாபத்திப²லங் ந விபாகோதிஆதீ³ஸு ஸோதாபத்திமக்³கா³தீ³னங் அபசயகா³மிதங் ஸந்தா⁴ய அரியப²லானங் நவிபாகபா⁴வங் படிஜானாதி, தா³னப²லாதீ³னங் படிக்கி²பதி . ஸோ ஹி ஆசயகா³மித்திகஸ்ஸ ஏவங் அத்த²ங் தா⁴ரேதி – விபாகஸங்கா²தங் ஆசயங் க³ச்ச²ந்தி, தங் வா ஆசினந்தா க³ச்ச²ந்தீதி ஆசயகா³மினோ, விபாகங் அபசினந்தா க³ச்ச²ந்தீதி அபசயகா³மினோதி. தஸ்மா ஏவங் படிஜானாதி ச படிக்கி²பதி ச.
Sotāpattiphalaṃ na vipākotiādīsu sotāpattimaggādīnaṃ apacayagāmitaṃ sandhāya ariyaphalānaṃ navipākabhāvaṃ paṭijānāti, dānaphalādīnaṃ paṭikkhipati . So hi ācayagāmittikassa evaṃ atthaṃ dhāreti – vipākasaṅkhātaṃ ācayaṃ gacchanti, taṃ vā ācinantā gacchantīti ācayagāmino, vipākaṃ apacinantā gacchantīti apacayagāminoti. Tasmā evaṃ paṭijānāti ca paṭikkhipati ca.
500. காமாவசரங் குஸலங் ஸவிபாகங் ஆசயகா³மீதிஆதி³கா புச்சா² பரவாதி³ஸ்ஸ, படிஞ்ஞா ச படிக்கே²போ ச ஸகவாதி³ஸ்ஸ. லோகியஞ்ஹி குஸலங் விபாகசுதிபடிஸந்தி⁴யோ சேவ வட்டஞ்ச ஆசினந்தங் க³ச்ச²தீதி ஆசயகா³மி. லோகுத்தரகுஸலங் சுதிபடிஸந்தி⁴யோ சேவ வட்டஞ்ச அபசினந்தங் க³ச்ச²தீதி அபசயகா³மி. ஏவமேதங் ஸவிபாகமேவ ஹோதி, ந அபசயகா³மிவசனமத்தேன அவிபாகங். இமமத்த²ங் ஸந்தா⁴யெத்த² ஸகவாதி³னோ படிஞ்ஞா ச படிக்கே²போ ச வேதி³தப்³பா³தி.
500. Kāmāvacaraṃ kusalaṃ savipākaṃ ācayagāmītiādikā pucchā paravādissa, paṭiññā ca paṭikkhepo ca sakavādissa. Lokiyañhi kusalaṃ vipākacutipaṭisandhiyo ceva vaṭṭañca ācinantaṃ gacchatīti ācayagāmi. Lokuttarakusalaṃ cutipaṭisandhiyo ceva vaṭṭañca apacinantaṃ gacchatīti apacayagāmi. Evametaṃ savipākameva hoti, na apacayagāmivacanamattena avipākaṃ. Imamatthaṃ sandhāyettha sakavādino paṭiññā ca paṭikkhepo ca veditabbāti.
அரியத⁴ம்மவிபாககதா²வண்ணனா.
Ariyadhammavipākakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (71) 9. அரியத⁴ம்மவிபாககதா² • (71) 9. Ariyadhammavipākakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 9. அரியத⁴ம்மவிபாககதா²வண்ணனா • 9. Ariyadhammavipākakathāvaṇṇanā
