| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৯. অরিযধম্মৰিপাককথাৰণ্ণনা
9. Ariyadhammavipākakathāvaṇṇanā
৪৯৮. ইদানি অরিযধম্মৰিপাককথা নাম হোতি। তত্থ যেসং কিলেসপ্পহানমত্তমেৰ সামঞ্ঞফলং, ন চিত্তচেতসিকা ধম্মাতি লদ্ধি, সেয্যথাপি অন্ধকানং; তে সন্ধায নত্থি অরিযধম্মৰিপাকোতি পুচ্ছা সকৰাদিস্স। তত্থ অরিযধম্মৰিপাকোতি মগ্গসঙ্খাতস্স অরিযধম্মস্স ৰিপাকো। কিলেসক্খযমত্তং অরিযফলন্তি লদ্ধিযা পটিঞ্ঞা ইতরস্স। সামঞ্ঞন্তি সমণভাৰো, মগ্গস্সেতং নামং। ‘‘সামঞ্ঞঞ্চ ৰো, ভিক্খৰে, দেসেস্সামি সামঞ্ঞফলঞ্চা’’তি হি ৰুত্তং। ব্রহ্মঞ্ঞেপি এসেৰ নযো।
498. Idāni ariyadhammavipākakathā nāma hoti. Tattha yesaṃ kilesappahānamattameva sāmaññaphalaṃ, na cittacetasikā dhammāti laddhi, seyyathāpi andhakānaṃ; te sandhāya natthi ariyadhammavipākoti pucchā sakavādissa. Tattha ariyadhammavipākoti maggasaṅkhātassa ariyadhammassa vipāko. Kilesakkhayamattaṃ ariyaphalanti laddhiyā paṭiññā itarassa. Sāmaññanti samaṇabhāvo, maggassetaṃ nāmaṃ. ‘‘Sāmaññañca vo, bhikkhave, desessāmi sāmaññaphalañcā’’ti hi vuttaṃ. Brahmaññepi eseva nayo.
সোতাপত্তিফলং ন ৰিপাকোতিআদীসু সোতাপত্তিমগ্গাদীনং অপচযগামিতং সন্ধায অরিযফলানং নৰিপাকভাৰং পটিজানাতি, দানফলাদীনং পটিক্খিপতি । সো হি আচযগামিত্তিকস্স এৰং অত্থং ধারেতি – ৰিপাকসঙ্খাতং আচযং গচ্ছন্তি, তং ৰা আচিনন্তা গচ্ছন্তীতি আচযগামিনো, ৰিপাকং অপচিনন্তা গচ্ছন্তীতি অপচযগামিনোতি। তস্মা এৰং পটিজানাতি চ পটিক্খিপতি চ।
Sotāpattiphalaṃ na vipākotiādīsu sotāpattimaggādīnaṃ apacayagāmitaṃ sandhāya ariyaphalānaṃ navipākabhāvaṃ paṭijānāti, dānaphalādīnaṃ paṭikkhipati . So hi ācayagāmittikassa evaṃ atthaṃ dhāreti – vipākasaṅkhātaṃ ācayaṃ gacchanti, taṃ vā ācinantā gacchantīti ācayagāmino, vipākaṃ apacinantā gacchantīti apacayagāminoti. Tasmā evaṃ paṭijānāti ca paṭikkhipati ca.
৫০০. কামাৰচরং কুসলং সৰিপাকং আচযগামীতিআদিকা পুচ্ছা পরৰাদিস্স, পটিঞ্ঞা চ পটিক্খেপো চ সকৰাদিস্স। লোকিযঞ্হি কুসলং ৰিপাকচুতিপটিসন্ধিযো চেৰ ৰট্টঞ্চ আচিনন্তং গচ্ছতীতি আচযগামি। লোকুত্তরকুসলং চুতিপটিসন্ধিযো চেৰ ৰট্টঞ্চ অপচিনন্তং গচ্ছতীতি অপচযগামি। এৰমেতং সৰিপাকমেৰ হোতি, ন অপচযগামিৰচনমত্তেন অৰিপাকং। ইমমত্থং সন্ধাযেত্থ সকৰাদিনো পটিঞ্ঞা চ পটিক্খেপো চ ৰেদিতব্বাতি।
500. Kāmāvacaraṃ kusalaṃ savipākaṃ ācayagāmītiādikā pucchā paravādissa, paṭiññā ca paṭikkhepo ca sakavādissa. Lokiyañhi kusalaṃ vipākacutipaṭisandhiyo ceva vaṭṭañca ācinantaṃ gacchatīti ācayagāmi. Lokuttarakusalaṃ cutipaṭisandhiyo ceva vaṭṭañca apacinantaṃ gacchatīti apacayagāmi. Evametaṃ savipākameva hoti, na apacayagāmivacanamattena avipākaṃ. Imamatthaṃ sandhāyettha sakavādino paṭiññā ca paṭikkhepo ca veditabbāti.
অরিযধম্মৰিপাককথাৰণ্ণনা।
Ariyadhammavipākakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৭১) ৯. অরিযধম্মৰিপাককথা • (71) 9. Ariyadhammavipākakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. অরিযধম্মৰিপাককথাৰণ্ণনা • 9. Ariyadhammavipākakathāvaṇṇanā
