| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၉. အရိယဓမ္မဝိပာကကထာဝဏ္ဏနာ
9. Ariyadhammavipākakathāvaṇṇanā
၄၉၈. ဣဒာနိ အရိယဓမ္မဝိပာကကထာ နာမ ဟောတိ။ တတ္ထ ယေသံ ကိလေသပ္ပဟာနမတ္တမေဝ သာမညဖလံ, န စိတ္တစေတသိကာ ဓမ္မာတိ လဒ္ဓိ, သေယ္ယထာပိ အန္ဓကာနံ; တေ သန္ဓာယ နတ္ထိ အရိယဓမ္မဝိပာကောတိ ပုစ္ဆာ သကဝာဒိသ္သ။ တတ္ထ အရိယဓမ္မဝိပာကောတိ မဂ္ဂသင္ခာတသ္သ အရိယဓမ္မသ္သ ဝိပာကော။ ကိလေသက္ခယမတ္တံ အရိယဖလန္တိ လဒ္ဓိယာ ပဋိညာ ဣတရသ္သ။ သာမညန္တိ သမဏဘာဝော, မဂ္ဂသ္သေတံ နာမံ။ ‘‘သာမညဉ္စ ဝော, ဘိက္ခဝေ, ဒေသေသ္သာမိ သာမညဖလဉ္စာ’’တိ ဟိ ဝုတ္တံ။ ဗ္ရဟ္မညေပိ ဧသေဝ နယော။
498. Idāni ariyadhammavipākakathā nāma hoti. Tattha yesaṃ kilesappahānamattameva sāmaññaphalaṃ, na cittacetasikā dhammāti laddhi, seyyathāpi andhakānaṃ; te sandhāya natthi ariyadhammavipākoti pucchā sakavādissa. Tattha ariyadhammavipākoti maggasaṅkhātassa ariyadhammassa vipāko. Kilesakkhayamattaṃ ariyaphalanti laddhiyā paṭiññā itarassa. Sāmaññanti samaṇabhāvo, maggassetaṃ nāmaṃ. ‘‘Sāmaññañca vo, bhikkhave, desessāmi sāmaññaphalañcā’’ti hi vuttaṃ. Brahmaññepi eseva nayo.
သောတာပတ္တိဖလံ န ဝိပာကောတိအာဒီသု သောတာပတ္တိမဂ္ဂာဒီနံ အပစယဂာမိတံ သန္ဓာယ အရိယဖလာနံ နဝိပာကဘာဝံ ပဋိဇာနာတိ, ဒာနဖလာဒီနံ ပဋိက္ခိပတိ ။ သော ဟိ အာစယဂာမိတ္တိကသ္သ ဧဝံ အတ္ထံ ဓာရေတိ – ဝိပာကသင္ခာတံ အာစယံ ဂစ္ဆန္တိ, တံ ဝာ အာစိနန္တာ ဂစ္ဆန္တီတိ အာစယဂာမိနော, ဝိပာကံ အပစိနန္တာ ဂစ္ဆန္တီတိ အပစယဂာမိနောတိ။ တသ္မာ ဧဝံ ပဋိဇာနာတိ စ ပဋိက္ခိပတိ စ။
Sotāpattiphalaṃ na vipākotiādīsu sotāpattimaggādīnaṃ apacayagāmitaṃ sandhāya ariyaphalānaṃ navipākabhāvaṃ paṭijānāti, dānaphalādīnaṃ paṭikkhipati . So hi ācayagāmittikassa evaṃ atthaṃ dhāreti – vipākasaṅkhātaṃ ācayaṃ gacchanti, taṃ vā ācinantā gacchantīti ācayagāmino, vipākaṃ apacinantā gacchantīti apacayagāminoti. Tasmā evaṃ paṭijānāti ca paṭikkhipati ca.
၅၀၀. ကာမာဝစရံ ကုသလံ သဝိပာကံ အာစယဂာမီတိအာဒိကာ ပုစ္ဆာ ပရဝာဒိသ္သ, ပဋိညာ စ ပဋိက္ခေပော စ သကဝာဒိသ္သ။ လောကိယဉ္ဟိ ကုသလံ ဝိပာကစုတိပဋိသန္ဓိယော စေဝ ဝဋ္ဋဉ္စ အာစိနန္တံ ဂစ္ဆတီတိ အာစယဂာမိ။ လောကုတ္တရကုသလံ စုတိပဋိသန္ဓိယော စေဝ ဝဋ္ဋဉ္စ အပစိနန္တံ ဂစ္ဆတီတိ အပစယဂာမိ။ ဧဝမေတံ သဝိပာကမေဝ ဟောတိ, န အပစယဂာမိဝစနမတ္တေန အဝိပာကံ။ ဣမမတ္ထံ သန္ဓာယေတ္ထ သကဝာဒိနော ပဋိညာ စ ပဋိက္ခေပော စ ဝေဒိတဗ္ဗာတိ။
500. Kāmāvacaraṃ kusalaṃ savipākaṃ ācayagāmītiādikā pucchā paravādissa, paṭiññā ca paṭikkhepo ca sakavādissa. Lokiyañhi kusalaṃ vipākacutipaṭisandhiyo ceva vaṭṭañca ācinantaṃ gacchatīti ācayagāmi. Lokuttarakusalaṃ cutipaṭisandhiyo ceva vaṭṭañca apacinantaṃ gacchatīti apacayagāmi. Evametaṃ savipākameva hoti, na apacayagāmivacanamattena avipākaṃ. Imamatthaṃ sandhāyettha sakavādino paṭiññā ca paṭikkhepo ca veditabbāti.
အရိယဓမ္မဝိပာကကထာဝဏ္ဏနာ။
Ariyadhammavipākakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၇၁) ၉. အရိယဓမ္မဝိပာကကထာ • (71) 9. Ariyadhammavipākakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၉. အရိယဓမ္မဝိပာကကထာဝဏ္ဏနာ • 9. Ariyadhammavipākakathāvaṇṇanā
