| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೯. ಅರಿಯಧಮ್ಮವಿಪಾಕಕಥಾವಣ್ಣನಾ
9. Ariyadhammavipākakathāvaṇṇanā
೪೯೮. ಇದಾನಿ ಅರಿಯಧಮ್ಮವಿಪಾಕಕಥಾ ನಾಮ ಹೋತಿ। ತತ್ಥ ಯೇಸಂ ಕಿಲೇಸಪ್ಪಹಾನಮತ್ತಮೇವ ಸಾಮಞ್ಞಫಲಂ, ನ ಚಿತ್ತಚೇತಸಿಕಾ ಧಮ್ಮಾತಿ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಂ; ತೇ ಸನ್ಧಾಯ ನತ್ಥಿ ಅರಿಯಧಮ್ಮವಿಪಾಕೋತಿ ಪುಚ್ಛಾ ಸಕವಾದಿಸ್ಸ। ತತ್ಥ ಅರಿಯಧಮ್ಮವಿಪಾಕೋತಿ ಮಗ್ಗಸಙ್ಖಾತಸ್ಸ ಅರಿಯಧಮ್ಮಸ್ಸ ವಿಪಾಕೋ। ಕಿಲೇಸಕ್ಖಯಮತ್ತಂ ಅರಿಯಫಲನ್ತಿ ಲದ್ಧಿಯಾ ಪಟಿಞ್ಞಾ ಇತರಸ್ಸ। ಸಾಮಞ್ಞನ್ತಿ ಸಮಣಭಾವೋ, ಮಗ್ಗಸ್ಸೇತಂ ನಾಮಂ। ‘‘ಸಾಮಞ್ಞಞ್ಚ ವೋ, ಭಿಕ್ಖವೇ, ದೇಸೇಸ್ಸಾಮಿ ಸಾಮಞ್ಞಫಲಞ್ಚಾ’’ತಿ ಹಿ ವುತ್ತಂ। ಬ್ರಹ್ಮಞ್ಞೇಪಿ ಏಸೇವ ನಯೋ।
498. Idāni ariyadhammavipākakathā nāma hoti. Tattha yesaṃ kilesappahānamattameva sāmaññaphalaṃ, na cittacetasikā dhammāti laddhi, seyyathāpi andhakānaṃ; te sandhāya natthi ariyadhammavipākoti pucchā sakavādissa. Tattha ariyadhammavipākoti maggasaṅkhātassa ariyadhammassa vipāko. Kilesakkhayamattaṃ ariyaphalanti laddhiyā paṭiññā itarassa. Sāmaññanti samaṇabhāvo, maggassetaṃ nāmaṃ. ‘‘Sāmaññañca vo, bhikkhave, desessāmi sāmaññaphalañcā’’ti hi vuttaṃ. Brahmaññepi eseva nayo.
ಸೋತಾಪತ್ತಿಫಲಂ ನ ವಿಪಾಕೋತಿಆದೀಸು ಸೋತಾಪತ್ತಿಮಗ್ಗಾದೀನಂ ಅಪಚಯಗಾಮಿತಂ ಸನ್ಧಾಯ ಅರಿಯಫಲಾನಂ ನವಿಪಾಕಭಾವಂ ಪಟಿಜಾನಾತಿ, ದಾನಫಲಾದೀನಂ ಪಟಿಕ್ಖಿಪತಿ । ಸೋ ಹಿ ಆಚಯಗಾಮಿತ್ತಿಕಸ್ಸ ಏವಂ ಅತ್ಥಂ ಧಾರೇತಿ – ವಿಪಾಕಸಙ್ಖಾತಂ ಆಚಯಂ ಗಚ್ಛನ್ತಿ, ತಂ ವಾ ಆಚಿನನ್ತಾ ಗಚ್ಛನ್ತೀತಿ ಆಚಯಗಾಮಿನೋ, ವಿಪಾಕಂ ಅಪಚಿನನ್ತಾ ಗಚ್ಛನ್ತೀತಿ ಅಪಚಯಗಾಮಿನೋತಿ। ತಸ್ಮಾ ಏವಂ ಪಟಿಜಾನಾತಿ ಚ ಪಟಿಕ್ಖಿಪತಿ ಚ।
Sotāpattiphalaṃ na vipākotiādīsu sotāpattimaggādīnaṃ apacayagāmitaṃ sandhāya ariyaphalānaṃ navipākabhāvaṃ paṭijānāti, dānaphalādīnaṃ paṭikkhipati . So hi ācayagāmittikassa evaṃ atthaṃ dhāreti – vipākasaṅkhātaṃ ācayaṃ gacchanti, taṃ vā ācinantā gacchantīti ācayagāmino, vipākaṃ apacinantā gacchantīti apacayagāminoti. Tasmā evaṃ paṭijānāti ca paṭikkhipati ca.
೫೦೦. ಕಾಮಾವಚರಂ ಕುಸಲಂ ಸವಿಪಾಕಂ ಆಚಯಗಾಮೀತಿಆದಿಕಾ ಪುಚ್ಛಾ ಪರವಾದಿಸ್ಸ, ಪಟಿಞ್ಞಾ ಚ ಪಟಿಕ್ಖೇಪೋ ಚ ಸಕವಾದಿಸ್ಸ। ಲೋಕಿಯಞ್ಹಿ ಕುಸಲಂ ವಿಪಾಕಚುತಿಪಟಿಸನ್ಧಿಯೋ ಚೇವ ವಟ್ಟಞ್ಚ ಆಚಿನನ್ತಂ ಗಚ್ಛತೀತಿ ಆಚಯಗಾಮಿ। ಲೋಕುತ್ತರಕುಸಲಂ ಚುತಿಪಟಿಸನ್ಧಿಯೋ ಚೇವ ವಟ್ಟಞ್ಚ ಅಪಚಿನನ್ತಂ ಗಚ್ಛತೀತಿ ಅಪಚಯಗಾಮಿ। ಏವಮೇತಂ ಸವಿಪಾಕಮೇವ ಹೋತಿ, ನ ಅಪಚಯಗಾಮಿವಚನಮತ್ತೇನ ಅವಿಪಾಕಂ। ಇಮಮತ್ಥಂ ಸನ್ಧಾಯೇತ್ಥ ಸಕವಾದಿನೋ ಪಟಿಞ್ಞಾ ಚ ಪಟಿಕ್ಖೇಪೋ ಚ ವೇದಿತಬ್ಬಾತಿ।
500. Kāmāvacaraṃ kusalaṃ savipākaṃ ācayagāmītiādikā pucchā paravādissa, paṭiññā ca paṭikkhepo ca sakavādissa. Lokiyañhi kusalaṃ vipākacutipaṭisandhiyo ceva vaṭṭañca ācinantaṃ gacchatīti ācayagāmi. Lokuttarakusalaṃ cutipaṭisandhiyo ceva vaṭṭañca apacinantaṃ gacchatīti apacayagāmi. Evametaṃ savipākameva hoti, na apacayagāmivacanamattena avipākaṃ. Imamatthaṃ sandhāyettha sakavādino paṭiññā ca paṭikkhepo ca veditabbāti.
ಅರಿಯಧಮ್ಮವಿಪಾಕಕಥಾವಣ್ಣನಾ।
Ariyadhammavipākakathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೭೧) ೯. ಅರಿಯಧಮ್ಮವಿಪಾಕಕಥಾ • (71) 9. Ariyadhammavipākakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೯. ಅರಿಯಧಮ್ಮವಿಪಾಕಕಥಾವಣ್ಣನಾ • 9. Ariyadhammavipākakathāvaṇṇanā
