| Library / Tipiṭaka / තිපිටක • Tipiṭaka / පඤ්‌චපකරණ-අට්‌ඨකථා • Pañcapakaraṇa-aṭṭhakathā |
9. අරියධම්‌මවිපාකකථාවණ්‌ණනා
9. Ariyadhammavipākakathāvaṇṇanā
498. ඉදානි අරියධම්‌මවිපාකකථා නාම හොති. තත්‌ථ යෙසං කිලෙසප්‌පහානමත්‌තමෙව සාමඤ්‌ඤඵලං, න චිත්‌තචෙතසිකා ධම්‌මාති ලද්‌ධි, සෙය්‍යථාපි අන්‌ධකානං; තෙ සන්‌ධාය නත්‌ථි අරියධම්‌මවිපාකොති පුච්‌ඡා සකවාදිස්‌ස. තත්‌ථ අරියධම්‌මවිපාකොති මග්‌ගසඞ්‌ඛාතස්‌ස අරියධම්‌මස්‌ස විපාකො. කිලෙසක්‌ඛයමත්‌තං අරියඵලන්‌ති ලද්‌ධියා පටිඤ්‌ඤා ඉතරස්‌ස. සාමඤ්‌ඤන්‌ති සමණභාවො, මග්‌ගස්‌සෙතං නාමං. ‘‘සාමඤ්‌ඤඤ්‌ච වො, භික්‌ඛවෙ, දෙසෙස්‌සාමි සාමඤ්‌ඤඵලඤ්‌චා’’ති හි වුත්‌තං. බ්‍රහ්‌මඤ්‌ඤෙපි එසෙව නයො.
498. Idāni ariyadhammavipākakathā nāma hoti. Tattha yesaṃ kilesappahānamattameva sāmaññaphalaṃ, na cittacetasikā dhammāti laddhi, seyyathāpi andhakānaṃ; te sandhāya natthi ariyadhammavipākoti pucchā sakavādissa. Tattha ariyadhammavipākoti maggasaṅkhātassa ariyadhammassa vipāko. Kilesakkhayamattaṃ ariyaphalanti laddhiyā paṭiññā itarassa. Sāmaññanti samaṇabhāvo, maggassetaṃ nāmaṃ. ‘‘Sāmaññañca vo, bhikkhave, desessāmi sāmaññaphalañcā’’ti hi vuttaṃ. Brahmaññepi eseva nayo.
සොතාපත්‌තිඵලං න විපාකොතිආදීසු සොතාපත්‌තිමග්‌ගාදීනං අපචයගාමිතං සන්‌ධාය අරියඵලානං නවිපාකභාවං පටිජානාති, දානඵලාදීනං පටික්‌ඛිපති . සො හි ආචයගාමිත්‌තිකස්‌ස එවං අත්‌ථං ධාරෙති – විපාකසඞ්‌ඛාතං ආචයං ගච්‌ඡන්‌ති, තං වා ආචිනන්‌තා ගච්‌ඡන්‌තීති ආචයගාමිනො, විපාකං අපචිනන්‌තා ගච්‌ඡන්‌තීති අපචයගාමිනොති. තස්‌මා එවං පටිජානාති ච පටික්‌ඛිපති ච.
Sotāpattiphalaṃ na vipākotiādīsu sotāpattimaggādīnaṃ apacayagāmitaṃ sandhāya ariyaphalānaṃ navipākabhāvaṃ paṭijānāti, dānaphalādīnaṃ paṭikkhipati . So hi ācayagāmittikassa evaṃ atthaṃ dhāreti – vipākasaṅkhātaṃ ācayaṃ gacchanti, taṃ vā ācinantā gacchantīti ācayagāmino, vipākaṃ apacinantā gacchantīti apacayagāminoti. Tasmā evaṃ paṭijānāti ca paṭikkhipati ca.
500. කාමාවචරං කුසලං සවිපාකං ආචයගාමීතිආදිකා පුච්‌ඡා පරවාදිස්‌ස, පටිඤ්‌ඤා ච පටික්‌ඛෙපො ච සකවාදිස්‌ස. ලොකියඤ්‌හි කුසලං විපාකචුතිපටිසන්‌ධියො චෙව වට්‌ටඤ්‌ච ආචිනන්‌තං ගච්‌ඡතීති ආචයගාමි. ලොකුත්‌තරකුසලං චුතිපටිසන්‌ධියො චෙව වට්‌ටඤ්‌ච අපචිනන්‌තං ගච්‌ඡතීති අපචයගාමි. එවමෙතං සවිපාකමෙව හොති, න අපචයගාමිවචනමත්‌තෙන අවිපාකං. ඉමමත්‌ථං සන්‌ධායෙත්‌ථ සකවාදිනො පටිඤ්‌ඤා ච පටික්‌ඛෙපො ච වෙදිතබ්‌බාති.
500. Kāmāvacaraṃ kusalaṃ savipākaṃ ācayagāmītiādikā pucchā paravādissa, paṭiññā ca paṭikkhepo ca sakavādissa. Lokiyañhi kusalaṃ vipākacutipaṭisandhiyo ceva vaṭṭañca ācinantaṃ gacchatīti ācayagāmi. Lokuttarakusalaṃ cutipaṭisandhiyo ceva vaṭṭañca apacinantaṃ gacchatīti apacayagāmi. Evametaṃ savipākameva hoti, na apacayagāmivacanamattena avipākaṃ. Imamatthaṃ sandhāyettha sakavādino paṭiññā ca paṭikkhepo ca veditabbāti.
අරියධම්‌මවිපාකකථාවණ්‌ණනා.
Ariyadhammavipākakathāvaṇṇanā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / (71) 9. අරියධම්‌මවිපාකකථා • (71) 9. Ariyadhammavipākakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 9. අරියධම්‌මවිපාකකථාවණ්‌ණනා • 9. Ariyadhammavipākakathāvaṇṇanā
