| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၆. အရိယမဂ္ဂသုတ္တံ
6. Ariyamaggasuttaṃ
၂၃၇. ‘‘စတ္တာရိမာနိ, ဘိက္ခဝေ, ကမ္မာနိ မယာ သယံ အဘိညာ သစ္ဆိကတ္ဝာ ပဝေဒိတာနိ။ ကတမာနိ စတ္တာရိ? အတ္ထိ, ဘိက္ခဝေ, ကမ္မံ ကဏ္ဟံ ကဏ္ဟဝိပာကံ; အတ္ထိ, ဘိက္ခဝေ, ကမ္မံ သုက္ကံ သုက္ကဝိပာကံ; အတ္ထိ, ဘိက္ခဝေ, ကမ္မံ ကဏ္ဟသုက္ကံ ကဏ္ဟသုက္ကဝိပာကံ; အတ္ထိ, ဘိက္ခဝေ, ကမ္မံ အကဏ္ဟအသုက္ကံ အကဏ္ဟအသုက္ကဝိပာကံ ကမ္မက္ခယာယ သံဝတ္တတိ။
237. ‘‘Cattārimāni, bhikkhave, kammāni mayā sayaṃ abhiññā sacchikatvā paveditāni. Katamāni cattāri? Atthi, bhikkhave, kammaṃ kaṇhaṃ kaṇhavipākaṃ; atthi, bhikkhave, kammaṃ sukkaṃ sukkavipākaṃ; atthi, bhikkhave, kammaṃ kaṇhasukkaṃ kaṇhasukkavipākaṃ; atthi, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati.
‘‘ကတမဉ္စ, ဘိက္ခဝေ, ကမ္မံ ကဏ္ဟံ ကဏ္ဟဝိပာကံ? ဣဓ, ဘိက္ခဝေ, ဧကစ္စော သဗ္ယာဗဇ္ဈံ ကာယသင္ခာရံ အဘိသင္ခရောတိ။ပေ.။ ဣဒံ ဝုစ္စတိ, ဘိက္ခဝေ, ကမ္မံ ကဏ္ဟံ ကဏ္ဟဝိပာကံ။
‘‘Katamañca, bhikkhave, kammaṃ kaṇhaṃ kaṇhavipākaṃ? Idha, bhikkhave, ekacco sabyābajjhaṃ kāyasaṅkhāraṃ abhisaṅkharoti…pe… idaṃ vuccati, bhikkhave, kammaṃ kaṇhaṃ kaṇhavipākaṃ.
‘‘ကတမဉ္စ , ဘိက္ခဝေ, ကမ္မံ သုက္ကံ သုက္ကဝိပာကံ? ဣဓ , ဘိက္ခဝေ, ဧကစ္စော အဗ္ယာဗဇ္ဈံ ကာယသင္ခာရံ အဘိသင္ခရောတိ။ပေ.။ ဣဒံ ဝုစ္စတိ, ဘိက္ခဝေ, ကမ္မံ သုက္ကံ သုက္ကဝိပာကံ။
‘‘Katamañca , bhikkhave, kammaṃ sukkaṃ sukkavipākaṃ? Idha , bhikkhave, ekacco abyābajjhaṃ kāyasaṅkhāraṃ abhisaṅkharoti…pe… idaṃ vuccati, bhikkhave, kammaṃ sukkaṃ sukkavipākaṃ.
‘‘ကတမဉ္စ, ဘိက္ခဝေ, ကမ္မံ ကဏ္ဟသုက္ကံ ကဏ္ဟသုက္ကဝိပာကံ? ဣဓ, ဘိက္ခဝေ, ဧကစ္စော သဗ္ယာဗဇ္ဈမ္ပိ အဗ္ယာဗဇ္ဈမ္ပိ ကာယသင္ခာရံ အဘိသင္ခရောတိ။ပေ.။ ဣဒံ ဝုစ္စတိ, ဘိက္ခဝေ, ကမ္မံ ကဏ္ဟသုက္ကံ ကဏ္ဟသုက္ကဝိပာကံ။
‘‘Katamañca, bhikkhave, kammaṃ kaṇhasukkaṃ kaṇhasukkavipākaṃ? Idha, bhikkhave, ekacco sabyābajjhampi abyābajjhampi kāyasaṅkhāraṃ abhisaṅkharoti…pe… idaṃ vuccati, bhikkhave, kammaṃ kaṇhasukkaṃ kaṇhasukkavipākaṃ.
‘‘ကတမဉ္စ, ဘိက္ခဝေ, ကမ္မံ အကဏ္ဟအသုက္ကံ အကဏ္ဟအသုက္ကဝိပာကံ ကမ္မက္ခယာယ သံဝတ္တတိ? သမ္မာဒိဋ္ဌိ။ပေ.။ သမ္မာသမာဓိ။ ဣဒံ ဝုစ္စတိ, ဘိက္ခဝေ, ကမ္မံ အကဏ္ဟအသုက္ကံ အကဏ္ဟအသုက္ကဝိပာကံ ကမ္မက္ခယာယ သံဝတ္တတိ။ ဣမာနိ ခော, ဘိက္ခဝေ, စတ္တာရိ ကမ္မာနိ မယာ သယံ အဘိညာ သစ္ဆိကတ္ဝာ ပဝေဒိတာနီ’’တိ။ ဆဋ္ဌံ။
‘‘Katamañca, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati? Sammādiṭṭhi…pe… sammāsamādhi. Idaṃ vuccati, bhikkhave, kammaṃ akaṇhaasukkaṃ akaṇhaasukkavipākaṃ kammakkhayāya saṃvattati. Imāni kho, bhikkhave, cattāri kammāni mayā sayaṃ abhiññā sacchikatvā paveditānī’’ti. Chaṭṭhaṃ.
Related texts:
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃-၉. သောဏကာယနသုတ္တာဒိဝဏ္ဏနာ • 3-9. Soṇakāyanasuttādivaṇṇanā
