| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
2. அரியந்திகதா²வண்ணனா
2. Ariyantikathāvaṇṇanā
357. இதா³னி அரியந்திகதா² நாம ஹோதி. தத்த² யேஸங் ‘‘ந கேவலங் ஆஸவக்க²யஞாணமேவ அரியங், அத² கோ² புரிமானிபி நவ ப³லானி அரியானி’’ச்சேவ லத்³தி⁴, ஸெய்யதா²பி ஏதரஹி அந்த⁴கானங்; தே ஸந்தா⁴ய அரியந்தி புச்சா² ஸகவாதி³ஸ்ஸ, படிஞ்ஞா இதரஸ்ஸ. புன யதி³ தங் அரியங், மக்³கா³தீ³ஸு தேன அஞ்ஞதரேன ப⁴விதப்³ப³ந்தி மக்³கா³தி³வஸேன புச்சா² ஸகவாதி³ஸ்ஸ, படிக்கே²போ இதரஸ்ஸ.
357. Idāni ariyantikathā nāma hoti. Tattha yesaṃ ‘‘na kevalaṃ āsavakkhayañāṇameva ariyaṃ, atha kho purimānipi nava balāni ariyāni’’cceva laddhi, seyyathāpi etarahi andhakānaṃ; te sandhāya ariyanti pucchā sakavādissa, paṭiññā itarassa. Puna yadi taṃ ariyaṃ, maggādīsu tena aññatarena bhavitabbanti maggādivasena pucchā sakavādissa, paṭikkhepo itarassa.
புன ஸுஞ்ஞதாரம்மணாதி³வஸேன புச்சா² ஸகவாதி³ஸ்ஸ. தத்த² த்³வே ஸுஞ்ஞதா – ஸத்தஸுஞ்ஞதா ச ஸங்கா²ரஸுஞ்ஞதா ச. ஸத்தஸுஞ்ஞதா நாம தி³ட்டி²யா பரிகப்பிதேன ஸத்தேன ஸுஞ்ஞா பஞ்சக்க²ந்தா⁴. ஸங்கா²ரஸுஞ்ஞதா நாம ஸப்³ப³ஸங்கா²ரேஹி ஸுஞ்ஞங் விவித்தங் நிஸ்ஸடங் நிப்³பா³னங். தத்த² பரவாதீ³ நிப்³பா³னாரம்மணதங் ஸந்தா⁴ய படிக்கி²பதி, ஸங்கா²ராரம்மணதங் ஸந்தா⁴ய படிஜானாதி. மனஸி கரோதீதி புட்டோ²பி நிப்³பா³னமேவ ஸந்தா⁴ய படிக்கி²பதி, ஸங்கா²ரே ஸந்தா⁴ய படிஜானாதி. ததோ ஸகவாதி³னா ‘‘டா²னாட்டா²னாதி³மனஸிகாரோ ஸங்கா²ராரம்மணோ, ஸுஞ்ஞதமனஸிகாரோ நிப்³பா³னாரம்மணோ’’தி இமங் நயங் க³ஹெத்வா ‘‘த்³வின்னங் ப²ஸ்ஸானங் த்³வின்னங் சித்தானங் ஸமோதா⁴னங் ஹோதீ’’தி புட்டோ² லேஸோகாஸங் அலப⁴ந்தோ படிக்கி²பதி. அனிமித்தாபணிஹிதேஸுபி ஏஸேவ நயோ. ஸத்தனிமித்தாபா⁴வதோ ஹி க²ந்தா⁴ அனிமித்தா. ஸங்கா²ரனிமித்தாபா⁴வதோ நிப்³பா³னங். ஏகத⁴ம்மஸ்மிம்பி ஆரோபெத்வா ட²பேதப்³ப³ஸங்கா²தேன ச பணித³ஹிதப்³ப³ட்டே²ன பணிஹிதஸங்க²ங் க³தேன ஸத்தபணிதி⁴னா அப்பணிஹிதா க²ந்தா⁴. தண்ஹாபணிதி⁴னா தண்ஹாய வா ஆரம்மணபூ⁴தேன ஸப்³ப³ஸங்கா²ரபணிதி⁴னா அப்பணிஹிதங் நிப்³பா³னங். தஸ்மா இதா⁴பி படிக்கே²போ ச படிஞ்ஞா ச புரிமனயேனேவ வேதி³தப்³பா³.
Puna suññatārammaṇādivasena pucchā sakavādissa. Tattha dve suññatā – sattasuññatā ca saṅkhārasuññatā ca. Sattasuññatā nāma diṭṭhiyā parikappitena sattena suññā pañcakkhandhā. Saṅkhārasuññatā nāma sabbasaṅkhārehi suññaṃ vivittaṃ nissaṭaṃ nibbānaṃ. Tattha paravādī nibbānārammaṇataṃ sandhāya paṭikkhipati, saṅkhārārammaṇataṃ sandhāya paṭijānāti. Manasi karotīti puṭṭhopi nibbānameva sandhāya paṭikkhipati, saṅkhāre sandhāya paṭijānāti. Tato sakavādinā ‘‘ṭhānāṭṭhānādimanasikāro saṅkhārārammaṇo, suññatamanasikāro nibbānārammaṇo’’ti imaṃ nayaṃ gahetvā ‘‘dvinnaṃ phassānaṃ dvinnaṃ cittānaṃ samodhānaṃ hotī’’ti puṭṭho lesokāsaṃ alabhanto paṭikkhipati. Animittāpaṇihitesupi eseva nayo. Sattanimittābhāvato hi khandhā animittā. Saṅkhāranimittābhāvato nibbānaṃ. Ekadhammasmimpi āropetvā ṭhapetabbasaṅkhātena ca paṇidahitabbaṭṭhena paṇihitasaṅkhaṃ gatena sattapaṇidhinā appaṇihitā khandhā. Taṇhāpaṇidhinā taṇhāya vā ārammaṇabhūtena sabbasaṅkhārapaṇidhinā appaṇihitaṃ nibbānaṃ. Tasmā idhāpi paṭikkhepo ca paṭiññā ca purimanayeneva veditabbā.
358. ததோ ‘‘யதா² ஸதிபட்டா²னாத³யோ லோகுத்தரத⁴ம்மா அரியா சேவ ஸுஞ்ஞதாதி³ஆரம்மணா ச, கிங் தே ஏவங் டா²னாட்டா²னஞாண’’ந்தி அனுலோமபடிலோமபுச்சா² ஹொந்தி. தத்த² ஸப்³பா³பி படிஞ்ஞா ஸப்³பே³ ச படிக்கே²பா பரவாதி³ஸ்ஸேவ. இமினாவுபாயேன ஸேஸஞாணேஸுபி புச்சா²விஸ்ஸஜ்ஜனங் வேதி³தப்³ப³ங். பாளியங் பன ஸேஸானி ஸங்கி²பித்வா அவஸானே சுதூபபாதஞாணமேவ விப⁴த்தங். ததோ பரங் ஸகஸமயேபி ‘‘அரிய’’ந்தி ஸித்³தே⁴ன ஆஸவானங் க²யஞாணேன ஸத்³தி⁴ங் ஸங்ஸந்தி³த்வா ஸேஸஞாணானங் அனுலோமதோ ச படிலோமதோ ச அரியபா⁴வபுச்சா² ஹொந்தி. தா ஸப்³பா³ பரவாதி³ஸ்ஸ, படிஞ்ஞா படிக்கே²போ ச ஸகவாதி³ஸ்ஸ . தே உத்தானத்தா²யேவ. பாளியங் பனெத்த² பட²மனவமானேவ த³ஸ்ஸெத்வா ஸத்த ஞாணானி ஸங்கி²த்தானீதி.
358. Tato ‘‘yathā satipaṭṭhānādayo lokuttaradhammā ariyā ceva suññatādiārammaṇā ca, kiṃ te evaṃ ṭhānāṭṭhānañāṇa’’nti anulomapaṭilomapucchā honti. Tattha sabbāpi paṭiññā sabbe ca paṭikkhepā paravādisseva. Imināvupāyena sesañāṇesupi pucchāvissajjanaṃ veditabbaṃ. Pāḷiyaṃ pana sesāni saṅkhipitvā avasāne cutūpapātañāṇameva vibhattaṃ. Tato paraṃ sakasamayepi ‘‘ariya’’nti siddhena āsavānaṃ khayañāṇena saddhiṃ saṃsanditvā sesañāṇānaṃ anulomato ca paṭilomato ca ariyabhāvapucchā honti. Tā sabbā paravādissa, paṭiññā paṭikkhepo ca sakavādissa . Te uttānatthāyeva. Pāḷiyaṃ panettha paṭhamanavamāneva dassetvā satta ñāṇāni saṅkhittānīti.
அரியந்திகதா²வண்ணனா.
Ariyantikathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (22) 2. அரியந்திகதா² • (22) 2. Ariyantikathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. அரியந்திகதா²வண்ணனா • 2. Ariyantikathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. அரியந்திகதா²வண்ணனா • 2. Ariyantikathāvaṇṇanā
