| Library / Tipiṭaka / तिपिटक • Tipiṭaka / अङ्गुत्तरनिकाय • Aṅguttaranikāya |
२. अरियपच्चोरोहणीसुत्तं
2. Ariyapaccorohaṇīsuttaṃ
१६८. ‘‘अरियं वो, भिक्खवे, पच्चोरोहणिं देसेस्सामि। तं सुणाथ, साधुकं मनसि करोथ; भासिस्सामी’’ति। ‘‘एवं, भन्ते’’ति खो ते भिक्खू भगवतो पच्चस्सोसुं । भगवा एतदवोच –
168. ‘‘Ariyaṃ vo, bhikkhave, paccorohaṇiṃ desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ . Bhagavā etadavoca –
‘‘कतमा च, भिक्खवे, अरिया पच्चोरोहणी? इध , भिक्खवे, अरियसावको इति पटिसञ्चिक्खति – ‘पाणातिपातस्स खो पापको विपाको – दिट्ठे चेव धम्मे अभिसम्परायञ्चा’ति। सो इति पटिसङ्खाय पाणातिपातं पजहति; पाणातिपाता पच्चोरोहति।
‘‘Katamā ca, bhikkhave, ariyā paccorohaṇī? Idha , bhikkhave, ariyasāvako iti paṭisañcikkhati – ‘pāṇātipātassa kho pāpako vipāko – diṭṭhe ceva dhamme abhisamparāyañcā’ti. So iti paṭisaṅkhāya pāṇātipātaṃ pajahati; pāṇātipātā paccorohati.
… ‘अदिन्नादानस्स खो पापको विपाको – दिट्ठे चेव धम्मे अभिसम्परायञ्चा’ति। सो इति पटिसङ्खाय अदिन्नादानं पजहति; अदिन्नादाना पच्चोरोहति।
… ‘Adinnādānassa kho pāpako vipāko – diṭṭhe ceva dhamme abhisamparāyañcā’ti. So iti paṭisaṅkhāya adinnādānaṃ pajahati; adinnādānā paccorohati.
… ‘कामेसुमिच्छाचारस्स खो पापको विपाको…पे॰… कामेसुमिच्छाचारा पच्चोरोहति।
… ‘Kāmesumicchācārassa kho pāpako vipāko…pe… kāmesumicchācārā paccorohati.
… ‘मुसावादस्स खो पापको विपाको…पे॰… मुसावादा पच्चोरोहति।
… ‘Musāvādassa kho pāpako vipāko…pe… musāvādā paccorohati.
… ‘पिसुणाय वाचाय खो पापको विपाको…पे॰… पिसुणाय वाचाय पच्चोरोहति।
… ‘Pisuṇāya vācāya kho pāpako vipāko…pe… pisuṇāya vācāya paccorohati.
… ‘फरुसाय वाचाय खो पापको विपाको…पे॰… फरुसाय वाचाय पच्चोरोहति।
… ‘Pharusāya vācāya kho pāpako vipāko…pe… pharusāya vācāya paccorohati.
… ‘सम्फप्पलापस्स खो पापको विपाको…पे॰… सम्फप्पलापा पच्चोरोहति।
… ‘Samphappalāpassa kho pāpako vipāko…pe… samphappalāpā paccorohati.
… ‘अभिज्झाय खो पापको विपाको…पे॰… अभिज्झाय पच्चोरोहति।
… ‘Abhijjhāya kho pāpako vipāko…pe… abhijjhāya paccorohati.
… ‘ब्यापादस्स खो पापको विपाको…पे॰… ब्यापादा पच्चोरोहति।
… ‘Byāpādassa kho pāpako vipāko…pe… byāpādā paccorohati.
‘‘कतमा च, भिक्खवे, अरिया पच्चोरोहणी? इध, भिक्खवे, अरियसावको इति पटिसञ्चिक्खति – ‘मिच्छादिट्ठिया खो पापको विपाको दिट्ठे चेव धम्मे अभिसम्परायञ्चा’ति। सो इति पटिसङ्खाय मिच्छादिट्ठिं पजहति; मिच्छादिट्ठिया पच्चोरोहति। अयं वुच्चति, भिक्खवे, अरिया पच्चोरोहणी’’ति। दुतियं।
‘‘Katamā ca, bhikkhave, ariyā paccorohaṇī? Idha, bhikkhave, ariyasāvako iti paṭisañcikkhati – ‘micchādiṭṭhiyā kho pāpako vipāko diṭṭhe ceva dhamme abhisamparāyañcā’ti. So iti paṭisaṅkhāya micchādiṭṭhiṃ pajahati; micchādiṭṭhiyā paccorohati. Ayaṃ vuccati, bhikkhave, ariyā paccorohaṇī’’ti. Dutiyaṃ.
Related texts:
टीका • Tīkā / सुत्तपिटक (टीका) • Suttapiṭaka (ṭīkā) / अङ्गुत्तरनिकाय (टीका) • Aṅguttaranikāya (ṭīkā) / १-४४. ब्राह्मणपच्चोरोहणीसुत्तादिवण्णना • 1-44. Brāhmaṇapaccorohaṇīsuttādivaṇṇanā
