| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๒. อริยปโจฺจโรหณีสุตฺตํ
2. Ariyapaccorohaṇīsuttaṃ
๑๖๘. ‘‘อริยํ โว, ภิกฺขเว, ปโจฺจโรหณิํ เทเสสฺสามิฯ ตํ สุณาถ, สาธุกํ มนสิ กโรถ; ภาสิสฺสามี’’ติฯ ‘‘เอวํ, ภเนฺต’’ติ โข เต ภิกฺขู ภควโต ปจฺจโสฺสสุํ ฯ ภควา เอตทโวจ –
168. ‘‘Ariyaṃ vo, bhikkhave, paccorohaṇiṃ desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ . Bhagavā etadavoca –
‘‘กตมา จ, ภิกฺขเว, อริยา ปโจฺจโรหณี? อิธ , ภิกฺขเว, อริยสาวโก อิติ ปฎิสญฺจิกฺขติ – ‘ปาณาติปาตสฺส โข ปาปโก วิปาโก – ทิเฎฺฐ เจว ธเมฺม อภิสมฺปรายญฺจา’ติฯ โส อิติ ปฎิสงฺขาย ปาณาติปาตํ ปชหติ; ปาณาติปาตา ปโจฺจโรหติฯ
‘‘Katamā ca, bhikkhave, ariyā paccorohaṇī? Idha , bhikkhave, ariyasāvako iti paṭisañcikkhati – ‘pāṇātipātassa kho pāpako vipāko – diṭṭhe ceva dhamme abhisamparāyañcā’ti. So iti paṭisaṅkhāya pāṇātipātaṃ pajahati; pāṇātipātā paccorohati.
… ‘อทินฺนาทานสฺส โข ปาปโก วิปาโก – ทิเฎฺฐ เจว ธเมฺม อภิสมฺปรายญฺจา’ติฯ โส อิติ ปฎิสงฺขาย อทินฺนาทานํ ปชหติ; อทินฺนาทานา ปโจฺจโรหติฯ
… ‘Adinnādānassa kho pāpako vipāko – diṭṭhe ceva dhamme abhisamparāyañcā’ti. So iti paṭisaṅkhāya adinnādānaṃ pajahati; adinnādānā paccorohati.
… ‘กาเมสุมิจฺฉาจารสฺส โข ปาปโก วิปาโก…เป.… กาเมสุมิจฺฉาจารา ปโจฺจโรหติฯ
… ‘Kāmesumicchācārassa kho pāpako vipāko…pe… kāmesumicchācārā paccorohati.
… ‘มุสาวาทสฺส โข ปาปโก วิปาโก…เป.… มุสาวาทา ปโจฺจโรหติฯ
… ‘Musāvādassa kho pāpako vipāko…pe… musāvādā paccorohati.
… ‘ปิสุณาย วาจาย โข ปาปโก วิปาโก…เป.… ปิสุณาย วาจาย ปโจฺจโรหติฯ
… ‘Pisuṇāya vācāya kho pāpako vipāko…pe… pisuṇāya vācāya paccorohati.
… ‘ผรุสาย วาจาย โข ปาปโก วิปาโก…เป.… ผรุสาย วาจาย ปโจฺจโรหติฯ
… ‘Pharusāya vācāya kho pāpako vipāko…pe… pharusāya vācāya paccorohati.
… ‘สมฺผปฺปลาปสฺส โข ปาปโก วิปาโก…เป.… สมฺผปฺปลาปา ปโจฺจโรหติฯ
… ‘Samphappalāpassa kho pāpako vipāko…pe… samphappalāpā paccorohati.
… ‘อภิชฺฌาย โข ปาปโก วิปาโก…เป.… อภิชฺฌาย ปโจฺจโรหติฯ
… ‘Abhijjhāya kho pāpako vipāko…pe… abhijjhāya paccorohati.
… ‘พฺยาปาทสฺส โข ปาปโก วิปาโก…เป.… พฺยาปาทา ปโจฺจโรหติฯ
… ‘Byāpādassa kho pāpako vipāko…pe… byāpādā paccorohati.
‘‘กตมา จ, ภิกฺขเว, อริยา ปโจฺจโรหณี? อิธ, ภิกฺขเว, อริยสาวโก อิติ ปฎิสญฺจิกฺขติ – ‘มิจฺฉาทิฎฺฐิยา โข ปาปโก วิปาโก ทิเฎฺฐ เจว ธเมฺม อภิสมฺปรายญฺจา’ติฯ โส อิติ ปฎิสงฺขาย มิจฺฉาทิฎฺฐิํ ปชหติ; มิจฺฉาทิฎฺฐิยา ปโจฺจโรหติฯ อยํ วุจฺจติ, ภิกฺขเว, อริยา ปโจฺจโรหณี’’ติฯ ทุติยํฯ
‘‘Katamā ca, bhikkhave, ariyā paccorohaṇī? Idha, bhikkhave, ariyasāvako iti paṭisañcikkhati – ‘micchādiṭṭhiyā kho pāpako vipāko diṭṭhe ceva dhamme abhisamparāyañcā’ti. So iti paṭisaṅkhāya micchādiṭṭhiṃ pajahati; micchādiṭṭhiyā paccorohati. Ayaṃ vuccati, bhikkhave, ariyā paccorohaṇī’’ti. Dutiyaṃ.
Related texts:
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑-๔๔. พฺราหฺมณปโจฺจโรหณีสุตฺตาทิวณฺณนา • 1-44. Brāhmaṇapaccorohaṇīsuttādivaṇṇanā
