| Library / Tipiṭaka / তিপিটক • Tipiṭaka / পেটকোপদেসপাল়ি • Peṭakopadesapāḷi |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
খুদ্দকনিকাযে
Khuddakanikāye
পেটকোপদেসপাল়ি
Peṭakopadesapāḷi
১. অরিযসচ্চপ্পকাসনপঠমভূমি
1. Ariyasaccappakāsanapaṭhamabhūmi
নমো সম্মাসম্বুদ্ধানং পরমত্থদস্সীনং
Namo sammāsambuddhānaṃ paramatthadassīnaṃ
সীলাদিগুণপারমিপ্পত্তানং।
Sīlādiguṇapāramippattānaṃ.
১. দুৰে হেতূ দুৰে পচ্চযা সাৰকস্স সম্মাদিট্ঠিযা উপ্পাদায – পরতো চ ঘোসো সচ্চানুসন্ধি, অজ্ঝত্তঞ্চ যোনিসো মনসিকারো। তত্থ কতমো পরতো ঘোসো? যা পরতো দেসনা ওৰাদো অনুসাসনী সচ্চকথা সচ্চানুলোমো। চত্তারি সচ্চানি – দুক্খং সমুদযো নিরোধো মগ্গো। ইমেসং চতুন্নং সচ্চানং যা দেসনা সন্দস্সনা ৰিৰরণা ৰিভজনা উত্তানীকিরিযা 1 পকাসনা – অযং ৰুচ্চতি সচ্চানুলোমো ঘোসোতি।
1. Duve hetū duve paccayā sāvakassa sammādiṭṭhiyā uppādāya – parato ca ghoso saccānusandhi, ajjhattañca yoniso manasikāro. Tattha katamo parato ghoso? Yā parato desanā ovādo anusāsanī saccakathā saccānulomo. Cattāri saccāni – dukkhaṃ samudayo nirodho maggo. Imesaṃ catunnaṃ saccānaṃ yā desanā sandassanā vivaraṇā vibhajanā uttānīkiriyā 2 pakāsanā – ayaṃ vuccati saccānulomo ghosoti.
২. তত্থ কতমো অজ্ঝত্তং যোনিসো মনসিকারো?
2. Tattha katamo ajjhattaṃ yoniso manasikāro?
অজ্ঝত্তং যোনিসো মনসিকারো নাম যো যথাদেসিতে ধম্মে বহিদ্ধা আরম্মণং অনভিনীহরিত্ৰা যোনিসো মনসিকারো – অযং ৰুচ্চতি যোনিসো মনসিকারো।
Ajjhattaṃ yoniso manasikāro nāma yo yathādesite dhamme bahiddhā ārammaṇaṃ anabhinīharitvā yoniso manasikāro – ayaṃ vuccati yoniso manasikāro.
তংআকারো যোনিসো দ্ৰারো ৰিধি উপাযো। যথা পুরিসো সুক্খে কট্ঠে ৰিগতস্নেহে সুক্খায উত্তরারণিযা থলে অভিমন্থমানং ভব্বো জোতিস্স অধিগমায । তং কিস্স হেতু। যোনিসো অগ্গিস্স অধিগমায। এৰমেৰস্স যমিদং দুক্খসমুদযনিরোধমগ্গানং অৰিপরীতধম্মদেসনং মনসিকরোতি – অযং ৰুচ্চতি যোনিসো মনসিকারো।
Taṃākāro yoniso dvāro vidhi upāyo. Yathā puriso sukkhe kaṭṭhe vigatasnehe sukkhāya uttarāraṇiyā thale abhimanthamānaṃ bhabbo jotissa adhigamāya . Taṃ kissa hetu. Yoniso aggissa adhigamāya. Evamevassa yamidaṃ dukkhasamudayanirodhamaggānaṃ aviparītadhammadesanaṃ manasikaroti – ayaṃ vuccati yoniso manasikāro.
যথা তিস্সো উপমা পুব্বে অস্সুতা চ অস্সুতপুব্বা চ পটিভন্তি। যো হি কোচি কামেসু অৰীতরাগোতি…পে॰… দুৰে উপমা অযোনিসো কাতব্বা পচ্ছিমেসু ৰুত্তং। তত্থ যো চ পরতো ঘোসো যো চ অজ্ঝত্তং যোনিসো মনসিকারো – ইমে দ্ৰে পচ্চযা। পরতো ঘোসেন যা উপ্পজ্জতি পঞ্ঞা – অযং ৰুচ্চতি সুতমযী পঞ্ঞা। যা অজ্ঝত্তং যোনিসো মনসিকারেন উপ্পজ্জতি পঞ্ঞা – অযং ৰুচ্চতি চিন্তামযী পঞ্ঞাতি। ইমা দ্ৰে পঞ্ঞা ৰেদিতব্বা। পুরিমকা চ দ্ৰে পচ্চযা। ইমে দ্ৰে হেতূ দ্ৰে পচ্চযা সাৰকস্স সম্মাদিট্ঠিযা উপ্পাদায।
Yathā tisso upamā pubbe assutā ca assutapubbā ca paṭibhanti. Yo hi koci kāmesu avītarāgoti…pe… duve upamā ayoniso kātabbā pacchimesu vuttaṃ. Tattha yo ca parato ghoso yo ca ajjhattaṃ yoniso manasikāro – ime dve paccayā. Parato ghosena yā uppajjati paññā – ayaṃ vuccati sutamayī paññā. Yā ajjhattaṃ yoniso manasikārena uppajjati paññā – ayaṃ vuccati cintāmayī paññāti. Imā dve paññā veditabbā. Purimakā ca dve paccayā. Ime dve hetū dve paccayā sāvakassa sammādiṭṭhiyā uppādāya.
৩. তত্থ পরতো ঘোসস্স সচ্চানুসন্ধিস্স দেসিতস্স অত্থং অৰিজানন্তো অত্থপ্পটিসংৰেদী ভৰিস্সতীতি নেতং ঠানং ৰিজ্জতি। ন চ অত্থপ্পটিসংৰেদী যোনিসো মনসিকরিস্সতীতি নেতং ঠানং ৰিজ্জতি। পরতো ঘোসস্স সচ্চানুসন্ধিস্স দেসিতস্স অত্থং ৰিজানন্তো অত্থপ্পটিসংৰেদী ভৰিস্সতীতি ঠানমেতং ৰিজ্জতি। অত্থপ্পটিসংৰেদী চ যোনিসো মনসিকরিস্সতীতি ঠানমেতং ৰিজ্জতি। এস হেতু এতং আরম্মণং এসো উপাযো সাৰকস্স নিয্যানস্স, নত্থঞ্ঞো। সোযং ন চ সুত্তস্স অত্থৰিজাননায সহ যুত্তো নাপি ঘোসানুযোগেন পরতো ঘোসস্স অত্থং অৰিজানন্তেন সক্কা উত্তরিমনুস্সধম্মং অলমরিযঞাণদস্সনং অধিগন্তুং, তস্মা নিব্বাযিতুকামেন সুতমযেন অত্থা পরিযেসিতব্বা। তত্থ পরিযেসনায অযং অনুপুব্বী ভৰতি সোল়স হারা, পঞ্চ নযা, অট্ঠারস মূলপদানি।
3. Tattha parato ghosassa saccānusandhissa desitassa atthaṃ avijānanto atthappaṭisaṃvedī bhavissatīti netaṃ ṭhānaṃ vijjati. Na ca atthappaṭisaṃvedī yoniso manasikarissatīti netaṃ ṭhānaṃ vijjati. Parato ghosassa saccānusandhissa desitassa atthaṃ vijānanto atthappaṭisaṃvedī bhavissatīti ṭhānametaṃ vijjati. Atthappaṭisaṃvedī ca yoniso manasikarissatīti ṭhānametaṃ vijjati. Esa hetu etaṃ ārammaṇaṃ eso upāyo sāvakassa niyyānassa, natthañño. Soyaṃ na ca suttassa atthavijānanāya saha yutto nāpi ghosānuyogena parato ghosassa atthaṃ avijānantena sakkā uttarimanussadhammaṃ alamariyañāṇadassanaṃ adhigantuṃ, tasmā nibbāyitukāmena sutamayena atthā pariyesitabbā. Tattha pariyesanāya ayaṃ anupubbī bhavati soḷasa hārā, pañca nayā, aṭṭhārasa mūlapadāni.
তত্থাযং উদ্দানগাথা
Tatthāyaṃ uddānagāthā
সোল়সহারা নেত্তী, পঞ্চনযা সাসনস্স পরিযেট্ঠি।
Soḷasahārā nettī, pañcanayā sāsanassa pariyeṭṭhi;
অট্ঠারসমূলপদা, কচ্চাযনগোত্তনিদ্দিট্ঠা॥
Aṭṭhārasamūlapadā, kaccāyanagottaniddiṭṭhā.
৪. তত্থ কতমে সোল়সহারা?
4. Tattha katame soḷasahārā?
দেসনা ৰিচযো যুত্তি পদট্ঠানং লক্খণং চতুব্যূহো আৰট্টো ৰিভত্তি পরিৰত্তনো ৰেৰচনো পঞ্ঞত্তি ওতরণো সোধনো অধিট্ঠানো পরিক্খারো সমারোপনো – ইমে সোল়স হারা।
Desanā vicayo yutti padaṭṭhānaṃ lakkhaṇaṃ catubyūho āvaṭṭo vibhatti parivattano vevacano paññatti otaraṇo sodhano adhiṭṭhāno parikkhāro samāropano – ime soḷasa hārā.
তত্থ উদ্দানগাথা
Tattha uddānagāthā
চতুব্যূহো চ আৰট্টো, ৰিভত্তি পরিৰত্তনো॥
Catubyūho ca āvaṭṭo, vibhatti parivattano.
ৰেৰচনো চ পঞ্ঞত্তি, ওতরণো চ সোধনো।
Vevacano ca paññatti, otaraṇo ca sodhano;
৫. তত্থ কতমে পঞ্চ নযা?
5. Tattha katame pañca nayā?
নন্দিযাৰট্টো তিপুক্খলো সীহৰিক্কীল়িতো দিসালোচনো অঙ্কুসোতি।
Nandiyāvaṭṭo tipukkhalo sīhavikkīḷito disālocano aṅkusoti.
তত্থ উদ্দানগাথা
Tattha uddānagāthā
পঠমো নন্দিযাৰট্টো, দুতিযো চ তিপুক্খলো।
Paṭhamo nandiyāvaṭṭo, dutiyo ca tipukkhalo;
সীহৰিক্কীল়িতো নাম, ততিযো হোতি সো নযো॥
Sīhavikkīḷito nāma, tatiyo hoti so nayo.
দিসালোচনমাহংসু, চতুত্থো নযলঞ্জকো।
Disālocanamāhaṃsu, catuttho nayalañjako;
৬. তত্থ কতমানি অট্ঠারস মূলপদানি?
6. Tattha katamāni aṭṭhārasa mūlapadāni?
অৰিজ্জা তণ্হা লোভো দোসো মোহো সুভসঞ্ঞা সুখসঞ্ঞা নিচ্চসঞ্ঞা অত্তসঞ্ঞা সমথো ৰিপস্সনা অলোভো অদোসো অমোহো অসুভসঞ্ঞা দুক্খসঞ্ঞা অনিচ্চসঞ্ঞা অনত্তসঞ্ঞা, ইমানি অট্ঠারস মূলপদানি। তত্থ নৰ পদানি অকুসলানি যত্থ সব্বং অকুসলং সমোসরতি। নৰ পদানি কুসলানি যত্থ সব্বং কুসলং সমোসরতি।
Avijjā taṇhā lobho doso moho subhasaññā sukhasaññā niccasaññā attasaññā samatho vipassanā alobho adoso amoho asubhasaññā dukkhasaññā aniccasaññā anattasaññā, imāni aṭṭhārasa mūlapadāni. Tattha nava padāni akusalāni yattha sabbaṃ akusalaṃ samosarati. Nava padāni kusalāni yattha sabbaṃ kusalaṃ samosarati.
কতমানি নৰ পদানি অকুসলানি যত্থ সব্বং অকুসলং সমোসরতি?
Katamāni nava padāni akusalāni yattha sabbaṃ akusalaṃ samosarati?
অৰিজ্জা যাৰ অত্তসঞ্ঞা, ইমানি নৰ পদানি অকুসলানি, যত্থ সব্বং অকুসলং সমোসরতি।
Avijjā yāva attasaññā, imāni nava padāni akusalāni, yattha sabbaṃ akusalaṃ samosarati.
কতমানি নৰ পদানি কুসলানি যত্থ সব্বং কুসলং সমোসরতি?
Katamāni nava padāni kusalāni yattha sabbaṃ kusalaṃ samosarati?
সমথো যাৰ অনত্তসঞ্ঞা, ইমানি নৰ পদানি কুসলানি যত্থ সব্বং কুসলং সমোসরতি। ইমানি অট্ঠারস মূলপদানি।
Samatho yāva anattasaññā, imāni nava padāni kusalāni yattha sabbaṃ kusalaṃ samosarati. Imāni aṭṭhārasa mūlapadāni.
তত্থ ইমা উদ্দানগাথা
Tattha imā uddānagāthā
তণ্হা চ অৰিজ্জা লোভো, দোসো তথেৰ মোহো চ।
Taṇhā ca avijjā lobho, doso tatheva moho ca;
চত্তারো চ ৰিপল্লাসা, কিলেসভূমি নৰ পদানি॥
Cattāro ca vipallāsā, kilesabhūmi nava padāni.
যে চ সতিপট্ঠানা সমথো, ৰিপস্সনা কুসলমূলং।
Ye ca satipaṭṭhānā samatho, vipassanā kusalamūlaṃ;
এতং সব্বং কুসলং, ইন্দ্রিযভূমি নৰপদানি॥
Etaṃ sabbaṃ kusalaṃ, indriyabhūmi navapadāni.
সব্বং কুসলং নৰহি পদেহি যুজ্জতি, নৰহি চেৰ অকুসলং।
Sabbaṃ kusalaṃ navahi padehi yujjati, navahi ceva akusalaṃ;
এককে নৰ মূলপদানি, উভযতো অট্ঠারস মূলপদানি॥
Ekake nava mūlapadāni, ubhayato aṭṭhārasa mūlapadāni.
ইমেসং অট্ঠারসন্নং মূলপদানং যানি নৰ পদানি অকুসলানি, অযং দুক্খসমুদযো; যানি নৰ পদানি কুসলানি, অযং দুক্খনিরোধগামিনী পটিপদা। ইতি সমুদযস্স দুক্খং ফলং, দুক্খনিরোধগামিনিযা পটিপদায নিরোধং ফলং। ইমানি চত্তারি অরিযসচ্চানি ভগৰতা বারাণসিযং দেসিতানি।
Imesaṃ aṭṭhārasannaṃ mūlapadānaṃ yāni nava padāni akusalāni, ayaṃ dukkhasamudayo; yāni nava padāni kusalāni, ayaṃ dukkhanirodhagāminī paṭipadā. Iti samudayassa dukkhaṃ phalaṃ, dukkhanirodhagāminiyā paṭipadāya nirodhaṃ phalaṃ. Imāni cattāri ariyasaccāni bhagavatā bārāṇasiyaṃ desitāni.
৭. তত্থ দুক্খস্স অরিযসচ্চস্স অপরিমাণানি অক্খরানি পদানি ব্যঞ্জনানি আকারানি নিরুত্তিযো নিদ্দেসা দেসিতা এতস্সেৰত্থস্স সঙ্কাসনায পকাসনায ৰিৰরণায ৰিভজনায উত্তানীকম্মতায পঞ্ঞাপনাযাতি যা এৰং সব্বেসং সচ্চানং। ইতি একমেকং সচ্চং অপরিমাণেহি অক্খরপদব্যঞ্জনআকারনিরুত্তিনিদ্দেসেহি পরিযেসিতব্বং, তঞ্চ ব্যঞ্জনং অত্থপুথুত্তেন পন অত্থেৰ ব্যঞ্জনপুথুত্তেন।
7. Tattha dukkhassa ariyasaccassa aparimāṇāni akkharāni padāni byañjanāni ākārāni niruttiyo niddesā desitā etassevatthassa saṅkāsanāya pakāsanāya vivaraṇāya vibhajanāya uttānīkammatāya paññāpanāyāti yā evaṃ sabbesaṃ saccānaṃ. Iti ekamekaṃ saccaṃ aparimāṇehi akkharapadabyañjanaākāraniruttiniddesehi pariyesitabbaṃ, tañca byañjanaṃ atthaputhuttena pana attheva byañjanaputhuttena.
যো হি কোচি সমণো ৰা ব্রাহ্মণো ৰা এৰং ৰদেয্য ‘‘অহং ইদং দুক্খং পচ্চক্খায অঞ্ঞং দুক্খং পঞ্ঞপেস্সামী’’তি তস্স তং ৰাচাৰত্থুকমেৰস্স পুচ্ছিতো চ ন সম্পাযিস্সতি। এৰং সচ্চানি। যঞ্চ রত্তিং ভগৰা অভিসম্বুদ্ধো, যঞ্চ রত্তিং অনুপাদায পরিনিব্বুতো, এত্থন্তরে যং কিঞ্চি ভগৰতা ভাসিতং সুত্তং গেয্যং ৰেয্যাকরণং গাথা উদানং ইতিৰুত্তকং জাতকং অব্ভুতধম্মং ৰেদল্লং, সব্বং তং ধম্মচক্কং পৰত্তিতং। ন কিঞ্চি বুদ্ধানং ভগৰন্তানং ধম্মদেসনায ধম্মচক্কতো বহিদ্ধা, তস্স সব্বং সুত্তং অরিযধম্মেসু পরিযেসিতব্বং। তত্থ পরিগ্গণ্হনায আলোকসভানি চত্তারি অরিযসচ্চানি থাৰরানি ইমানি।
Yo hi koci samaṇo vā brāhmaṇo vā evaṃ vadeyya ‘‘ahaṃ idaṃ dukkhaṃ paccakkhāya aññaṃ dukkhaṃ paññapessāmī’’ti tassa taṃ vācāvatthukamevassa pucchito ca na sampāyissati. Evaṃ saccāni. Yañca rattiṃ bhagavā abhisambuddho, yañca rattiṃ anupādāya parinibbuto, etthantare yaṃ kiñci bhagavatā bhāsitaṃ suttaṃ geyyaṃ veyyākaraṇaṃ gāthā udānaṃ itivuttakaṃ jātakaṃ abbhutadhammaṃ vedallaṃ, sabbaṃ taṃ dhammacakkaṃ pavattitaṃ. Na kiñci buddhānaṃ bhagavantānaṃ dhammadesanāya dhammacakkato bahiddhā, tassa sabbaṃ suttaṃ ariyadhammesu pariyesitabbaṃ. Tattha pariggaṇhanāya ālokasabhāni cattāri ariyasaccāni thāvarāni imāni.
তত্থ কতমং দুক্খং? জাতি জরা ব্যাধি মরণং সংখিত্তেন পঞ্চুপাদানক্খন্ধা দুক্খা। তত্থাযং লক্খণনিদ্দেসো, পাতুভাৰলক্খণা জাতি, পরিপাকলক্খণা জরা, দুক্খদুক্খতালক্খণো ব্যাধি, চুতিলক্খণং মরণং, পিযৰিপ্পযোগৰিপরিণামপরিতাপনলক্খণো সোকো, লালপ্পনলক্খণো পরিদেৰো, কাযসম্পীল়নলক্খণং দুক্খং, চিত্তসম্পীল়নলক্খণং দোমনস্সং, কিলেসপরিদহনলক্খণো উপাযাসো, অমনাপসমোধানলক্খণো অপ্পিযসম্পযোগো, মনাপৰিনাভাৰলক্খণো পিযৰিপ্পযোগো, অধিপ্পাযৰিৰত্তনলক্খণো অলাভো, অপরিঞ্ঞালক্খণা পঞ্চুপাদানক্খন্ধা, পরিপাকচুতিলক্খণং জরামরণং, পাতুভাৰচুতিলক্খণং চুতোপপত্তি, পটিসন্ধিনিব্বত্তনলক্খণো সমুদযো, সমুদযপরিজহনলক্খণো নিরোধো, অনুসযসমুচ্ছেদলক্খণো মগ্গো। ব্যাধিলক্খণং দুক্খং, সঞ্জাননলক্খণো সমুদযো, নিয্যানিকলক্খণো মগ্গো, সন্তিলক্খণো নিরোধো। অপ্পটিসন্ধিভাৰনিরোধলক্খণা অনুপাদিসেসা নিব্বানধাতু, দুক্খঞ্চ সমুদযো চ, দুক্খঞ্চ নিরোধো চ, দুক্খঞ্চ মগ্গো চ, সমুদযো চ দুক্খঞ্চ, সমুদযো চ নিরোধো চ, সমুদযো চ মগ্গো চ, নিরোধো চ সমুদযো চ, নিরোধো চ দুক্খঞ্চ, নিরোধো চ মগ্গো চ, মগ্গো চ নিরোধো চ, মগ্গো চ সমুদযো চ, মগ্গো চ দুক্খঞ্চ।
Tattha katamaṃ dukkhaṃ? Jāti jarā byādhi maraṇaṃ saṃkhittena pañcupādānakkhandhā dukkhā. Tatthāyaṃ lakkhaṇaniddeso, pātubhāvalakkhaṇā jāti, paripākalakkhaṇā jarā, dukkhadukkhatālakkhaṇo byādhi, cutilakkhaṇaṃ maraṇaṃ, piyavippayogavipariṇāmaparitāpanalakkhaṇo soko, lālappanalakkhaṇo paridevo, kāyasampīḷanalakkhaṇaṃ dukkhaṃ, cittasampīḷanalakkhaṇaṃ domanassaṃ, kilesaparidahanalakkhaṇo upāyāso, amanāpasamodhānalakkhaṇo appiyasampayogo, manāpavinābhāvalakkhaṇo piyavippayogo, adhippāyavivattanalakkhaṇo alābho, apariññālakkhaṇā pañcupādānakkhandhā, paripākacutilakkhaṇaṃ jarāmaraṇaṃ, pātubhāvacutilakkhaṇaṃ cutopapatti, paṭisandhinibbattanalakkhaṇo samudayo, samudayaparijahanalakkhaṇo nirodho, anusayasamucchedalakkhaṇo maggo. Byādhilakkhaṇaṃ dukkhaṃ, sañjānanalakkhaṇo samudayo, niyyānikalakkhaṇo maggo, santilakkhaṇo nirodho. Appaṭisandhibhāvanirodhalakkhaṇā anupādisesā nibbānadhātu, dukkhañca samudayo ca, dukkhañca nirodho ca, dukkhañca maggo ca, samudayo ca dukkhañca, samudayo ca nirodho ca, samudayo ca maggo ca, nirodho ca samudayo ca, nirodho ca dukkhañca, nirodho ca maggo ca, maggo ca nirodho ca, maggo ca samudayo ca, maggo ca dukkhañca.
৮. তত্থিমানি সুত্তানি।
8. Tatthimāni suttāni.
অব্ভুট্ঠিতোৰ সো যাতি, স গচ্ছং ন নিৰত্ততী’’তি॥
Abbhuṭṭhitova so yāti, sa gacchaṃ na nivattatī’’ti.
অট্ঠিমা, আনন্দ, দানুপপত্তিযো একুত্তরিকে সুত্তং – অযং জাতি।
Aṭṭhimā, ānanda, dānupapattiyo ekuttarike suttaṃ – ayaṃ jāti.
তত্থ কতমা জরা?
Tattha katamā jarā?
জিণ্ণকোঞ্চাৰ ঝাযন্তি, খীণমচ্ছেৰ পল্ললে॥
Jiṇṇakoñcāva jhāyanti, khīṇamaccheva pallale.
পঞ্চ পুব্বনিমিত্তানি দেৰেসু – অযং জরা।
Pañca pubbanimittāni devesu – ayaṃ jarā.
তত্থ কতমো ব্যাধি?
Tattha katamo byādhi?
সামং তেন কুতো রাজ, তুৰম্পি জরাযন্তি ৰেদেসি।
Sāmaṃ tena kuto rāja, tuvampi jarāyanti vedesi;
খত্তিয কম্মস্স ফলো, লোকো ন হি কম্মং পনযতি॥
Khattiya kammassa phalo, loko na hi kammaṃ panayati.
তযো গিলানা – অযং ব্যাধি।
Tayo gilānā – ayaṃ byādhi.
তত্থ কতমং মরণং?
Tattha katamaṃ maraṇaṃ?
খুদ্দকঞ্চ মহন্তঞ্চ, যং পক্কং যঞ্চ আমকং।
Khuddakañca mahantañca, yaṃ pakkaṃ yañca āmakaṃ;
সব্বং ভেদনপরিযন্তং, এৰং মচ্চান জীৰিতং॥
Sabbaṃ bhedanapariyantaṃ, evaṃ maccāna jīvitaṃ.
মমাযিতে পস্সথ ফন্দমানে 15, মচ্ছেৰ অপ্পোদকে খীণসোতে।
Mamāyite passatha phandamāne 16, maccheva appodake khīṇasote;
এতম্পি দিস্ৰা অমমো চরেয্য, ভৰেসু আসত্তিমকুব্বমানো॥
Etampi disvā amamo careyya, bhavesu āsattimakubbamāno.
উদকপ্পনসুত্তং – ইদং মরণং।
Udakappanasuttaṃ – idaṃ maraṇaṃ.
তত্থ কতমো সোকো?
Tattha katamo soko?
ইধ সোচতি পেচ্চ সোচতি, পাপকারী উভযত্থ সোচতি।
Idha socati pecca socati, pāpakārī ubhayattha socati;
সো সোচতি সো ৰিহঞ্ঞতি, দিস্ৰা কম্মকিলিট্ঠমত্তনো 17॥
So socati so vihaññati, disvā kammakiliṭṭhamattano 18.
তীণি দুচ্চরিতানি – অযং সোকো।
Tīṇi duccaritāni – ayaṃ soko.
তত্থ কতমো পরিদেৰো?
Tattha katamo paridevo?
কামেসু 19 গিদ্ধা পসুতা পমূল়্হা, অৰদানিযা তে ৰিসমে নিৰিট্ঠা।
Kāmesu 20 giddhā pasutā pamūḷhā, avadāniyā te visame niviṭṭhā;
দুক্খূপনীতা পরিদেৰযন্তি, কিংসু ভৰিস্সাম ইতো চুতাসে॥
Dukkhūpanītā paridevayanti, kiṃsu bhavissāma ito cutāse.
তিস্সো ৰিপত্তিযো – অযং পরিদেৰো।
Tisso vipattiyo – ayaṃ paridevo.
তত্থ কতমং দুক্খং?
Tattha katamaṃ dukkhaṃ?
জলিতা জাতৰেদাৰ, অচ্চিসঙ্ঘসমাকুলা॥
Jalitā jātavedāva, accisaṅghasamākulā.
মহা ৰত সো পরিল়াহো 23 সংযুত্তকে সুত্তং সচ্চসংযুত্তেসু – ইদং দুক্খং।
Mahā vata so pariḷāho 24 saṃyuttake suttaṃ saccasaṃyuttesu – idaṃ dukkhaṃ.
তত্থ কতমং দোমনস্সং?
Tattha katamaṃ domanassaṃ?
সুত্ৰা পরেসং নিগ্ঘোসং, মঙ্কু হোতি তথাৰিধো॥
Sutvā paresaṃ nigghosaṃ, maṅku hoti tathāvidho.
দ্ৰেমে তপনীযা ধম্মা – ইদং দোমনস্সং।
Dveme tapanīyā dhammā – idaṃ domanassaṃ.
তত্থ কতমো উপাযাসো?
Tattha katamo upāyāso?
কম্মারানং যথা উক্কা, অন্তো ডয্হতি নো বহি।
Kammārānaṃ yathā ukkā, anto ḍayhati no bahi;
এৰং ডয্হতি মে হদযং, সুত্ৰা নিব্বত্তমম্বুজং॥
Evaṃ ḍayhati me hadayaṃ, sutvā nibbattamambujaṃ.
তযো অগ্গী – অযং উপাযাসো।
Tayo aggī – ayaṃ upāyāso.
তত্থ কতমো অপ্পিযসম্পযোগো?
Tattha katamo appiyasampayogo?
অযসাৰ 27 মলং সমুট্ঠিতং, ততুট্ঠায তমেৰ খাদতি।
Ayasāva 28 malaṃ samuṭṭhitaṃ, tatuṭṭhāya tameva khādati;
এৰং অতিধোনচারিনং, সানি কম্মানি নযন্তি দুগ্গতিং॥
Evaṃ atidhonacārinaṃ, sāni kammāni nayanti duggatiṃ.
দ্ৰেমে তথাগতং অব্ভাচিক্খন্তি, একুত্তরিকে সুত্তং দুকেসু – অযং অপ্পিযসম্পযোগো।
Dveme tathāgataṃ abbhācikkhanti, ekuttarike suttaṃ dukesu – ayaṃ appiyasampayogo.
তত্থ কতমো পিযৰিপ্পযোগো?
Tattha katamo piyavippayogo?
সুপিনেন যথাপি সঙ্গতং, পটিবুদ্ধো পুরিসো ন পস্সতি।
Supinena yathāpi saṅgataṃ, paṭibuddho puriso na passati;
তে দেৰা চৰনধম্মং ৰিদিত্ৰা তীহি ৰাচাহি অনুসাসন্তি। অযং পিযৰিপ্পযোগো।
Te devā cavanadhammaṃ viditvā tīhi vācāhi anusāsanti. Ayaṃ piyavippayogo.
যম্পিচ্ছং ন লভতি, তিস্সো মারধীতরো।
Yampicchaṃ na labhati, tisso māradhītaro;
তে কামা পরিহাযন্তি, সল্লৰিদ্ধোৰ রুপ্পতি॥
Te kāmā parihāyanti, sallaviddhova ruppati.
সংখিত্তেন পঞ্চুপাদানক্খন্ধা দুক্খা।
Saṃkhittena pañcupādānakkhandhā dukkhā.
চক্খু সোতঞ্চ ঘানঞ্চ, জিৰ্হা কাযো ততো মনং।
Cakkhu sotañca ghānañca, jivhā kāyo tato manaṃ;
এতে লোকামিসা ঘোরা, যত্থ সত্তা পুথুজ্জনা॥
Ete lokāmisā ghorā, yattha sattā puthujjanā.
পঞ্চিমে ভিক্খৰে খন্ধা – ইদং দুক্খং।
Pañcime bhikkhave khandhā – idaṃ dukkhaṃ.
তত্থ কতমা জরা চ মরণঞ্চ?
Tattha katamā jarā ca maraṇañca?
অথ ৰাপি অকিচ্ছং জীৰিতং, অথ খো সো জরসাপি মীযতে॥
Atha vāpi akicchaṃ jīvitaṃ, atha kho so jarasāpi mīyate.
সংযুত্তকে পসেনদিসংযুত্তকে সুত্তং অয্যিকা মে কালঙ্কতা – অযং জরা চ মরণঞ্চ।
Saṃyuttake pasenadisaṃyuttake suttaṃ ayyikā me kālaṅkatā – ayaṃ jarā ca maraṇañca.
তত্থ কতমা চুতি চ উপপত্তি চ?
Tattha katamā cuti ca upapatti ca?
‘‘সব্বে সত্তা মরিস্সন্তি, মরণন্তং হি জীৰিতং।
‘‘Sabbe sattā marissanti, maraṇantaṃ hi jīvitaṃ;
অযং চুতি চ উপপত্তি চ।
Ayaṃ cuti ca upapatti ca.
ইমেহি সুত্তেহি একসদিসেহি চ অঞ্ঞেহি নৰৰিধং সুত্তং তং অনুপৰিট্ঠেহি লক্খণতো দুক্খং ঞত্ৰা সাধারণঞ্চ অসাধারণঞ্চ দুক্খং অরিযসচ্চং নিদ্দিসিতব্বং। গাথাহি গাথা অনুমিনিতব্বা, ব্যাকরণেহি ৰা ব্যাকরণং – ইদং দুক্খং।
Imehi suttehi ekasadisehi ca aññehi navavidhaṃ suttaṃ taṃ anupaviṭṭhehi lakkhaṇato dukkhaṃ ñatvā sādhāraṇañca asādhāraṇañca dukkhaṃ ariyasaccaṃ niddisitabbaṃ. Gāthāhi gāthā anuminitabbā, byākaraṇehi vā byākaraṇaṃ – idaṃ dukkhaṃ.
৯. তত্থ কতমো দুক্খসমুদযো?
9. Tattha katamo dukkhasamudayo?
কামেসু সত্তা কামসঙ্গসত্তা 39, সংযোজনে ৰজ্জমপস্সমানা।
Kāmesu sattā kāmasaṅgasattā 40, saṃyojane vajjamapassamānā;
ন হি জাতু সংযোজনসঙ্গসত্তা, ওঘং তরেয্যুং ৰিপুলং মহন্তং॥
Na hi jātu saṃyojanasaṅgasattā, oghaṃ tareyyuṃ vipulaṃ mahantaṃ.
চত্তারো আসৰা সুত্তং – অযং দুক্খসমুদযো।
Cattāro āsavā suttaṃ – ayaṃ dukkhasamudayo.
তত্থ কতমো দুক্খনিরোধো?
Tattha katamo dukkhanirodho?
যম্হি ন মাযা ৰসতী ন মানো,
Yamhi na māyā vasatī na māno,
যো ৰীতলোভো অমমো নিরাসো,
Yo vītalobho amamo nirāso,
সো ব্রাহ্মণো সো সমণো স ভিক্খু॥
So brāhmaṇo so samaṇo sa bhikkhu.
দ্ৰেমা ৰিমুত্তিযো, রাগৰিরাগা চ চেতোৰিমুত্তি; অৰিজ্জাৰিরাগা চ পঞ্ঞাৰিমুত্তি – অযং নিরোধো।
Dvemā vimuttiyo, rāgavirāgā ca cetovimutti; avijjāvirāgā ca paññāvimutti – ayaṃ nirodho.
তত্থ কতমো মগ্গো?
Tattha katamo maggo?
এসেৰ মগ্গো নত্থঞ্ঞো, দস্সনস্স ৰিসুদ্ধিযা।
Eseva maggo natthañño, dassanassa visuddhiyā;
অরিযো অট্ঠঙ্গিকো মগ্গো, মারস্সেতং পমোহনং॥
Ariyo aṭṭhaṅgiko maggo, mārassetaṃ pamohanaṃ.
সত্তিমে, ভিক্খৰে, বোজ্ঝঙ্গা – অযং মগ্গো।
Sattime, bhikkhave, bojjhaṅgā – ayaṃ maggo.
তত্থ কতমানি চত্তারি অরিযসচ্চানি?
Tattha katamāni cattāri ariyasaccāni?
‘‘যে ধম্মা 43 হেতুপ্পভৰা, তেসং হেতুং তথাগতো আহ।
‘‘Ye dhammā 44 hetuppabhavā, tesaṃ hetuṃ tathāgato āha;
তেসঞ্চ যো নিরোধো, এৰংৰাদী মহাসমণো’’তি॥
Tesañca yo nirodho, evaṃvādī mahāsamaṇo’’ti.
হেতুপ্পভৰা ধম্মা দুক্খং, হেতুসমুদযো, যং ভগৰতো ৰচনং। অযং ধম্মো যো নিরোধো, যে হি কেচি সংযোজনিযেসু ধম্মেসু অস্সদানুপস্সিনো ৰিহরন্তি। কিলেসা তণ্হা পৰড্ঢতি, তণ্হাপচ্চযা উপাদানং…পে॰… এৰমেতস্স কেৰলস্স দুক্খক্খন্ধস্স সমুদযো হোতি। তত্থ যং সংযোজনং – অযং সমুদযো। যে সংযোজনিযা ধম্মা যে চ সোকপরিদেৰদুক্খদোমনস্সুপাযাসা সম্ভৰন্তি – ইদং দুক্খং। যা সংযোজনিযেসু ধম্মেসু আদীনৰানুপস্সনা – অযং মগ্গো। পরিমুচ্চতি জাতিযা জরায ব্যাধীহি মরণেহি সোকেহি পরিদেৰেহি যাৰ উপাযাসেহি – ইদং নিব্বানং। ইমানি চত্তারি সচ্চানি।
Hetuppabhavā dhammā dukkhaṃ, hetusamudayo, yaṃ bhagavato vacanaṃ. Ayaṃ dhammo yo nirodho, ye hi keci saṃyojaniyesu dhammesu assadānupassino viharanti. Kilesā taṇhā pavaḍḍhati, taṇhāpaccayā upādānaṃ…pe… evametassa kevalassa dukkhakkhandhassa samudayo hoti. Tattha yaṃ saṃyojanaṃ – ayaṃ samudayo. Ye saṃyojaniyā dhammā ye ca sokaparidevadukkhadomanassupāyāsā sambhavanti – idaṃ dukkhaṃ. Yā saṃyojaniyesu dhammesu ādīnavānupassanā – ayaṃ maggo. Parimuccati jātiyā jarāya byādhīhi maraṇehi sokehi paridevehi yāva upāyāsehi – idaṃ nibbānaṃ. Imāni cattāri saccāni.
তত্থ কতমা অনুপাদিসেসা নিব্বানধাতু?
Tattha katamā anupādisesā nibbānadhātu?
অত্থঙ্গতস্স ন পমাণমত্থি, তং হি ৰা নত্থি যেন নং পঞ্ঞপেয্য।
Atthaṅgatassa na pamāṇamatthi, taṃ hi vā natthi yena naṃ paññapeyya;
সব্বসঙ্গানং সমূহতত্তা ৰিদূ, সিতা ৰাদসতস্সু 45 সব্বে॥
Sabbasaṅgānaṃ samūhatattā vidū, sitā vādasatassu 46 sabbe.
সংযুত্তকে গোধিকসংযুত্তং।
Saṃyuttake godhikasaṃyuttaṃ.
ইমানি অসাধারণানি সুত্তানি। যহিং যহিং সচ্চানি নিদ্দিট্ঠানি, তহিং তহিং সচ্চলক্খণতো ওতারেত্ৰা 47 অপরিমাণেহি ব্যঞ্জনেহি সো অত্থো পরিযেসিতব্বো। তত্থ অত্থানুপরিৰত্তি ব্যঞ্জনেন পুন ব্যঞ্জনানুপরিৰত্তি অত্থেন তস্স একমেকস্স অপরিমাণানি ব্যঞ্জনানি ইমেহি সুত্তেহি যথানিক্খিত্তেহি চত্তারি অরিযসচ্চানি নিদ্দিসিতব্বানি। পঞ্চনিকাযে অনুপৰিট্ঠাহি গাথাহি গাথা অনুমিনিতব্বা, ব্যাকরণেন ব্যাকরণং। ইমানি অসাধারণানি সুত্তানি।
Imāni asādhāraṇāni suttāni. Yahiṃ yahiṃ saccāni niddiṭṭhāni, tahiṃ tahiṃ saccalakkhaṇato otāretvā 48 aparimāṇehi byañjanehi so attho pariyesitabbo. Tattha atthānuparivatti byañjanena puna byañjanānuparivatti atthena tassa ekamekassa aparimāṇāni byañjanāni imehi suttehi yathānikkhittehi cattāri ariyasaccāni niddisitabbāni. Pañcanikāye anupaviṭṭhāhi gāthāhi gāthā anuminitabbā, byākaraṇena byākaraṇaṃ. Imāni asādhāraṇāni suttāni.
তেসং ইমা উদ্দানগাথা
Tesaṃ imā uddānagāthā
যমেকরত্তিং পঠমং, অট্ঠ দানূপপত্তিযো।
Yamekarattiṃ paṭhamaṃ, aṭṭha dānūpapattiyo;
পঞ্চ পুব্বনিমিত্তানি, খীণমচ্ছংৰ পল্ললং॥
Pañca pubbanimittāni, khīṇamacchaṃva pallalaṃ.
সামং তেন কুতো রাজ, তযো দেৰা গিলানকা।
Sāmaṃ tena kuto rāja, tayo devā gilānakā;
যথাপি কুম্ভকারস্স, যথা নদিদকপ্পনং॥
Yathāpi kumbhakārassa, yathā nadidakappanaṃ.
ইধ সোচতি পেচ্চ সোচতি, তীণি দুচ্চরিতানি চ।
Idha socati pecca socati, tīṇi duccaritāni ca;
কামেসু গিদ্ধা পসুতা, যাৰ তিস্সো ৰিপত্তিযো॥
Kāmesu giddhā pasutā, yāva tisso vipattiyo.
সঙ্কপ্পেহি পরেতো সো, তত্থ তপনিযেহি চ॥
Saṅkappehi pareto so, tattha tapaniyehi ca.
কম্মারানং যথা উক্কা, তযো অগ্গী পকাসিতা।
Kammārānaṃ yathā ukkā, tayo aggī pakāsitā;
অযতো মলমুপ্পন্নং, অব্ভক্খানং তথাগতে॥
Ayato malamuppannaṃ, abbhakkhānaṃ tathāgate.
তিৰিধং দেৰানুসাসন্তি, সুপিনেন সঙ্গমো যথা।
Tividhaṃ devānusāsanti, supinena saṅgamo yathā;
তিস্সো চেৰ মারধীতা, সল্লৰিদ্ধোৰ রুপ্পতি॥
Tisso ceva māradhītā, sallaviddhova ruppati.
চক্খু সোতঞ্চ ঘানঞ্চ, পঞ্চক্খন্ধা পকাসিতা।
Cakkhu sotañca ghānañca, pañcakkhandhā pakāsitā;
অপ্পং ৰত জীৰিতং ইদং, অয্যিকা মে মহল্লিকা॥
Appaṃ vata jīvitaṃ idaṃ, ayyikā me mahallikā.
সব্বে সত্তা মরিস্সন্তি, উপপত্তি চুতিচযং।
Sabbe sattā marissanti, upapatti cuticayaṃ;
কামেসু সত্তা পসুতা, আসৰেহি চতূহি চ॥
Kāmesu sattā pasutā, āsavehi catūhi ca.
যম্হি ন মাযা ৰসতি, দ্ৰেমা চেতোৰিমুত্তিযো।
Yamhi na māyā vasati, dvemā cetovimuttiyo;
এসেৰ মগ্গো নত্থঞ্ঞো, বোজ্ঝঙ্গা চ সুদেসিতা॥
Eseva maggo natthañño, bojjhaṅgā ca sudesitā.
অত্থঙ্গতস্স ন পমাণমত্থি, গোধিকো পরিনিব্বুতো।
Atthaṅgatassa na pamāṇamatthi, godhiko parinibbuto;
যে ধম্মা হেতুপ্পভৰা, সংযোজনানুপস্সিনো॥
Ye dhammā hetuppabhavā, saṃyojanānupassino.
ইমা দস তেসং উদ্দানগাথা।
Imā dasa tesaṃ uddānagāthā.
১০. তত্থিমানি সাধারণানি সুত্তানি যেসু সুত্তেসু সাধারণানি সচ্চানি দেসিতানি অনুলোমম্পি পটিলোমম্পি ৰোমিস্সকম্পি। তত্থ অযং আদি।
10. Tatthimāni sādhāraṇāni suttāni yesu suttesu sādhāraṇāni saccāni desitāni anulomampi paṭilomampi vomissakampi. Tattha ayaṃ ādi.
অৰিজ্জায নিৰুতো লোকো, [অজিতাতি ভগৰা]
Avijjāya nivuto loko, [ajitāti bhagavā]
ৰিৰিচ্ছা পমাদা নপ্পকাসতি।
Vivicchā pamādā nappakāsati;
তত্থ যা অৰিজ্জা চ ৰিৰিচ্ছা চ, অযং সমুদযো। যং মহব্ভযং, ইদং দুক্খং। ইমানি দ্ৰে সচ্চানি – দুক্খঞ্চ সমুদযো চ। ‘‘সংযোজনং সংযোজনিযা চ ধম্মা’’তি সংযুত্তকে চিত্তসংযুত্তকেসু ব্যাকরণং। তত্থ যং সংযোজনং, অযং সমুদযো। যে সংযোজনিযা ধম্মা, ইদং দুক্খং। ইমানি দ্ৰে সচ্চানি – দুক্খঞ্চ সমুদযো চ।
Tattha yā avijjā ca vivicchā ca, ayaṃ samudayo. Yaṃ mahabbhayaṃ, idaṃ dukkhaṃ. Imāni dve saccāni – dukkhañca samudayo ca. ‘‘Saṃyojanaṃ saṃyojaniyā ca dhammā’’ti saṃyuttake cittasaṃyuttakesu byākaraṇaṃ. Tattha yaṃ saṃyojanaṃ, ayaṃ samudayo. Ye saṃyojaniyā dhammā, idaṃ dukkhaṃ. Imāni dve saccāni – dukkhañca samudayo ca.
তত্থ কতমং দুক্খঞ্চ নিরোধো চ?
Tattha katamaṃ dukkhañca nirodho ca?
উচ্ছিন্নভৰতণ্হস্স, নেত্তিচ্ছিন্নস্স 53 ভিক্খুনো।
Ucchinnabhavataṇhassa, netticchinnassa 54 bhikkhuno;
ৰিক্খীণো জাতিসংসারো, নত্থি দানি পুনব্ভৰো॥
Vikkhīṇo jātisaṃsāro, natthi dāni punabbhavo.
যং চিত্তং, ইদং দুক্খং। যো ভৰতণ্হায উপচ্ছেদো, অযং দুক্খনিরোধো। ৰিক্খীণো জাতিসংসারো, নত্থি দানি পুনব্ভৰোতি নিদ্দেসো। ইমানি দ্ৰে সচ্চানি – দুক্খঞ্চ নিরোধো চ। দ্ৰেমা, ভিক্খৰে, ৰিমুত্তিযো; রাগৰিরাগা চ চেতোৰিমুত্তি, অৰিজ্জাৰিরাগা চ পঞ্ঞাৰিমুত্তি। যং চিত্তং, ইদং দুক্খং। যা ৰিমুত্তি, অযং নিরোধো। ইমানি দ্ৰে সচ্চানি – দুক্খঞ্চ নিরোধো চ।
Yaṃ cittaṃ, idaṃ dukkhaṃ. Yo bhavataṇhāya upacchedo, ayaṃ dukkhanirodho. Vikkhīṇo jātisaṃsāro, natthi dāni punabbhavoti niddeso. Imāni dve saccāni – dukkhañca nirodho ca. Dvemā, bhikkhave, vimuttiyo; rāgavirāgā ca cetovimutti, avijjāvirāgā ca paññāvimutti. Yaṃ cittaṃ, idaṃ dukkhaṃ. Yā vimutti, ayaṃ nirodho. Imāni dve saccāni – dukkhañca nirodho ca.
তত্থ কতমং দুক্খঞ্চ মগ্গো চ?
Tattha katamaṃ dukkhañca maggo ca?
কুম্ভূপমং 55 কাযমিমং ৰিদিত্ৰা, নগরূপমং চিত্তমিদং ঠপেত্ৰা।
Kumbhūpamaṃ 56 kāyamimaṃ viditvā, nagarūpamaṃ cittamidaṃ ṭhapetvā;
যোধেথ মারং পঞ্ঞাৰুধেন, জিতঞ্চ রক্খে অনিৰেসনো সিযা॥
Yodhetha māraṃ paññāvudhena, jitañca rakkhe anivesano siyā.
তত্থ যঞ্চ কুম্ভূপমো কাযো যঞ্চ নগরূপমং চিত্তং, ইদং দুক্খং। যং পঞ্ঞাৰুধেন মারং যোধেথাতি অযং মগ্গো। ইমানি দ্ৰে সচ্চানি। যং, ভিক্খৰে, ন তুম্হাকং, তং পজহিতব্বং। যা সংযোজনা, অযং মগ্গো। যে তে ধম্মা অনত্তনিযা পহাতব্বা, রূপং যাৰ ৰিঞ্ঞাণং, ইদং দুক্খঞ্চ মগ্গো চ।
Tattha yañca kumbhūpamo kāyo yañca nagarūpamaṃ cittaṃ, idaṃ dukkhaṃ. Yaṃ paññāvudhena māraṃ yodhethāti ayaṃ maggo. Imāni dve saccāni. Yaṃ, bhikkhave, na tumhākaṃ, taṃ pajahitabbaṃ. Yā saṃyojanā, ayaṃ maggo. Ye te dhammā anattaniyā pahātabbā, rūpaṃ yāva viññāṇaṃ, idaṃ dukkhañca maggo ca.
তত্থ কতমং দুক্খঞ্চ সমুদযো চ নিরোধো চ?
Tattha katamaṃ dukkhañca samudayo ca nirodho ca?
যে কেচি সোকা পরিদেৰিতা ৰা, দুক্খা চ 57 লোকস্মিমনেকরূপা।
Ye keci sokā paridevitā vā, dukkhā ca 58 lokasmimanekarūpā;
পিযং পটিচ্চপ্পভৰন্তি এতে, পিযে অসন্তে ন ভৰন্তি এতে॥
Piyaṃ paṭiccappabhavanti ete, piye asante na bhavanti ete.
যে সোকপরিদেৰা, যং চ অনেকরূপং দুক্খং, যং পেমতো ভৰতি, ইদং দুক্খং। যং পেমং, অযং সমুদযো। যো তত্থ ছন্দরাগৰিনযো পিযস্স অকিরিযা, অযং নিরোধো। ইমানি তীণি সচ্চানি। তিম্বরুকো পরিব্বাজকো পচ্চেতি ‘‘সযংকতং পরংকত’’ন্তি। যথেসা ৰীমংসা, ইদং দুক্খং। যা এতে দ্ৰে অন্তে অনুপগম্ম মজ্ঝিমা পটিপদা অৰিজ্জাপচ্চযা সঙ্খারা যাৰ জাতিপচ্চযা জরামরণং, ইদম্পি দুক্খঞ্চ সমুদযো চ। ৰিঞ্ঞাণং নামরূপং সল়াযতনং ফস্সো ৰেদনা ভৰো জাতি জরামরণং, ইদং দুক্খং। অৰিজ্জা সঙ্খারা তণ্হা উপাদানং, অযং সমুদযো। ইতি ইদং সযংকতং ৰীমংসেয্যাতি 59 যঞ্চ পটিচ্চসমুপ্পাদে দুক্খং, ইদং এসো সমুদযো নিদ্দিট্ঠো। অৰিজ্জানিরোধা সঙ্খারনিরোধো চ যাৰ চ জরামরণনিরোধোতি অযং নিরোধো। ইমানি তীণি সচ্চানি দুক্খঞ্চ সমুদযো চ নিরোধো চ।
Ye sokaparidevā, yaṃ ca anekarūpaṃ dukkhaṃ, yaṃ pemato bhavati, idaṃ dukkhaṃ. Yaṃ pemaṃ, ayaṃ samudayo. Yo tattha chandarāgavinayo piyassa akiriyā, ayaṃ nirodho. Imāni tīṇi saccāni. Timbaruko paribbājako pacceti ‘‘sayaṃkataṃ paraṃkata’’nti. Yathesā vīmaṃsā, idaṃ dukkhaṃ. Yā ete dve ante anupagamma majjhimā paṭipadā avijjāpaccayā saṅkhārā yāva jātipaccayā jarāmaraṇaṃ, idampi dukkhañca samudayo ca. Viññāṇaṃ nāmarūpaṃ saḷāyatanaṃ phasso vedanā bhavo jāti jarāmaraṇaṃ, idaṃ dukkhaṃ. Avijjā saṅkhārā taṇhā upādānaṃ, ayaṃ samudayo. Iti idaṃ sayaṃkataṃ vīmaṃseyyāti 60 yañca paṭiccasamuppāde dukkhaṃ, idaṃ eso samudayo niddiṭṭho. Avijjānirodhā saṅkhāranirodho ca yāva ca jarāmaraṇanirodhoti ayaṃ nirodho. Imāni tīṇi saccāni dukkhañca samudayo ca nirodho ca.
১১. তত্থ কতমং দুক্খঞ্চ সমুদযো চ মগ্গো চ?
11. Tattha katamaṃ dukkhañca samudayo ca maggo ca?
‘‘যো দুক্খমদ্দক্খি 61 যতোনিদানং, কামেসু সো জন্তু কথং নমেয্য।
‘‘Yo dukkhamaddakkhi 62 yatonidānaṃ, kāmesu so jantu kathaṃ nameyya;
কামা হি লোকে সঙ্গাতি ঞত্ৰা, তেসং সতীমা ৰিনযায সিক্খে’’তি॥
Kāmā hi loke saṅgāti ñatvā, tesaṃ satīmā vinayāya sikkhe’’ti.
যো দুক্খমদ্দক্খি, ইদং দুক্খং। যতো ভৰতি, অযং সমুদযো। সন্দিট্ঠং যতো ভৰতি যাৰ তস্স ৰিনযায সিক্খা, অযং মগ্গো। ইমানি তীণি সচ্চানি।
Yo dukkhamaddakkhi, idaṃ dukkhaṃ. Yato bhavati, ayaṃ samudayo. Sandiṭṭhaṃ yato bhavati yāva tassa vinayāya sikkhā, ayaṃ maggo. Imāni tīṇi saccāni.
একাদসঙ্গুত্তরেসু গোপালকোপমসুত্তং।
Ekādasaṅguttaresu gopālakopamasuttaṃ.
তত্থ যাৰ রূপসঞ্ঞুত্তা যঞ্চ সল়াযতনং যথা ৰণং পটিচ্ছাদেতি যঞ্চ তিত্থং যথা চ লভতি ধম্মূপসঞ্হিতং উল়ারং পীতিপামোজ্জং চতুব্বিধং চ অত্তভাৰতো চ ৰত্থু, ইদং দুক্খং। যাৰ আসাটিকং হারেতা 63 হোতি, অযং সমুদযো। রূপসঞ্ঞুত্তা আসাটকহরণং 64 ৰণপটিচ্ছাদনং ৰীথিঞ্ঞুতা গোচরকুসলঞ্চ, অযং মগ্গো। অৰসেসা ধম্মা অত্থি হেতূ অত্থি পচ্চযা অত্থি নিস্সযা সাৰসেসদোহিতা অনেকপূজা চ কল্যাণমিত্ততপ্পচ্চযা ধম্মা ৰীথিঞ্ঞুতা চ হেতু, ইমানি তীণি সচ্চানি।
Tattha yāva rūpasaññuttā yañca saḷāyatanaṃ yathā vaṇaṃ paṭicchādeti yañca titthaṃ yathā ca labhati dhammūpasañhitaṃ uḷāraṃ pītipāmojjaṃ catubbidhaṃ ca attabhāvato ca vatthu, idaṃ dukkhaṃ. Yāva āsāṭikaṃ hāretā 65 hoti, ayaṃ samudayo. Rūpasaññuttā āsāṭakaharaṇaṃ 66 vaṇapaṭicchādanaṃ vīthiññutā gocarakusalañca, ayaṃ maggo. Avasesā dhammā atthi hetū atthi paccayā atthi nissayā sāvasesadohitā anekapūjā ca kalyāṇamittatappaccayā dhammā vīthiññutā ca hetu, imāni tīṇi saccāni.
তত্থ কতমং দুক্খঞ্চ মগ্গো চ নিরোধো চ?
Tattha katamaṃ dukkhañca maggo ca nirodho ca?
সতি কাযগতা উপট্ঠিতা, ছসু ফস্সাযতনেসু সংৰুতো 67।
Sati kāyagatā upaṭṭhitā, chasu phassāyatanesu saṃvuto 68;
তত্থ যা চ কাযগতা সতি যঞ্চ সল়াযতনং যত্থ সব্বঞ্চেতং দুক্খং। যা চ কাযগতা সতি যো চ সীলসংৰরো যো চ সমাধি যত্থ যা সতি, অযং পঞ্ঞাক্খন্ধো। সব্বম্পি সীলক্খন্ধো সমাধিক্খন্ধো, অযং মগ্গো। এৰংৰিহারিনা ঞাতব্বং নিব্বানং। অযং নিরোধো, ইমানি তীণি সচ্চানি। সীলে পতিট্ঠায দ্ৰে ধম্মা ভাৰেতব্বা সমথো চ ৰিপস্সনা চ। তত্থ যং চিত্তসহজাতা ধম্মা, ইদং দুক্খং। যো চ সমথো যা চ ৰিপস্সনা, অযং মগ্গো। রাগৰিরাগা চ চেতোৰিমুত্তি, অৰিজ্জাৰিরাগা চ পঞ্ঞাৰিমুত্তি, অযং নিরোধো। ইমানি তীণি সচ্চানি।
Tattha yā ca kāyagatā sati yañca saḷāyatanaṃ yattha sabbañcetaṃ dukkhaṃ. Yā ca kāyagatā sati yo ca sīlasaṃvaro yo ca samādhi yattha yā sati, ayaṃ paññākkhandho. Sabbampi sīlakkhandho samādhikkhandho, ayaṃ maggo. Evaṃvihārinā ñātabbaṃ nibbānaṃ. Ayaṃ nirodho, imāni tīṇi saccāni. Sīle patiṭṭhāya dve dhammā bhāvetabbā samatho ca vipassanā ca. Tattha yaṃ cittasahajātā dhammā, idaṃ dukkhaṃ. Yo ca samatho yā ca vipassanā, ayaṃ maggo. Rāgavirāgā ca cetovimutti, avijjāvirāgā ca paññāvimutti, ayaṃ nirodho. Imāni tīṇi saccāni.
তত্থ কতমো সমুদযো চ নিরোধো চ?
Tattha katamo samudayo ca nirodho ca?
আসা চ পীহা অভিনন্দনা চ, অনেকধাতূসু সরা পতিট্ঠিতা।
Āsā ca pīhā abhinandanā ca, anekadhātūsu sarā patiṭṭhitā;
অঞ্ঞাণমূলপ্পভৰা পজপ্পিতা, সব্বা মযা ব্যন্তিকতা সমূলিকা॥
Aññāṇamūlappabhavā pajappitā, sabbā mayā byantikatā samūlikā.
অঞ্ঞাণমূলপ্পভৰাতি পুরিমকেহি সমুদযো। সব্বা মযা ব্যন্তিকতা সমূলিকাতি নিরোধো। ইমানি দ্ৰে সচ্চানি। চতুন্নং ধম্মানং অননুবোধা অপ্পটিৰেধা ৰিত্থারেন কাতব্বং। অরিযস্স সীলস্স সমাধিনো পঞ্ঞায ৰিমুত্তিযা। তত্থ যো ইমেসং চতুন্নং ধম্মানং অননুবোধা অপ্পটিৰেধা, অযং সমুদযো। পটিৰেধো ভৰনেত্তিযা, অযং নিরোধো। অযং সমুদযো চ নিরোধো চ।
Aññāṇamūlappabhavāti purimakehi samudayo. Sabbā mayā byantikatā samūlikāti nirodho. Imāni dve saccāni. Catunnaṃ dhammānaṃ ananubodhā appaṭivedhā vitthārena kātabbaṃ. Ariyassa sīlassa samādhino paññāya vimuttiyā. Tattha yo imesaṃ catunnaṃ dhammānaṃ ananubodhā appaṭivedhā, ayaṃ samudayo. Paṭivedho bhavanettiyā, ayaṃ nirodho. Ayaṃ samudayo ca nirodho ca.
তত্থ কতমো সমুদযো চ মগ্গো চ?
Tattha katamo samudayo ca maggo ca?
সতি তেসং নিৰারণং।
Sati tesaṃ nivāraṇaṃ;
সোতানং সংৰরং ব্রূমি, পঞ্ঞাযেতে পিধীযরে॥
Sotānaṃ saṃvaraṃ brūmi, paññāyete pidhīyare.
যানি সোতানীতি অযং সমুদযো। যা চ পঞ্ঞা যা চ সতি নিৰারণং পিধানঞ্চ, অযং মগ্গো। ইমানি দ্ৰে সচ্চানি। সঞ্চেতনিযং সুত্তং দল়্হনেমিযানাকারো ছহি মাসেহি নিদ্দিট্ঠো। তত্থ যং কাযং কাযকম্মং সৰঙ্কং সদোসং সকসাৰং যা সৰঙ্কতা সদোসতা সকসাৰতা, অযং সমুদযো। এৰং ৰচীকম্মং মনোকম্মং অৰঙ্কং অদোসং অকসাৰং, যা অৰঙ্কতা অদোসতা অকসাৰতা, অযং মগ্গো। এৰং ৰচীকম্মং মনোকম্মং। ইমানি দ্ৰে সচ্চানি সমুদযো চ মগ্গো চ।
Yāni sotānīti ayaṃ samudayo. Yā ca paññā yā ca sati nivāraṇaṃ pidhānañca, ayaṃ maggo. Imāni dve saccāni. Sañcetaniyaṃ suttaṃ daḷhanemiyānākāro chahi māsehi niddiṭṭho. Tattha yaṃ kāyaṃ kāyakammaṃ savaṅkaṃ sadosaṃ sakasāvaṃ yā savaṅkatā sadosatā sakasāvatā, ayaṃ samudayo. Evaṃ vacīkammaṃ manokammaṃ avaṅkaṃ adosaṃ akasāvaṃ, yā avaṅkatā adosatā akasāvatā, ayaṃ maggo. Evaṃ vacīkammaṃ manokammaṃ. Imāni dve saccāni samudayo ca maggo ca.
তত্থ কতমো সমুদযো চ নিরোধো চ মগ্গো চ?
Tattha katamo samudayo ca nirodho ca maggo ca?
‘‘নিস্সিতস্স চলিতং, অনিস্সিতস্স চলিতং নত্থি, চলিতে অসতি পস্সদ্ধি, পস্সদ্ধিযা সতি নতি ন হোতি, নতিযা অসতি 73 আগতিগতি ন হোতি, আগতিগতিযা অসতি চুতূপপাতো ন হোতি, চুতূপপাতে অসতি নেৰিধ ন হুরং ন উভযমন্তরেন। এসেৰন্তো দুক্খস্সা’’তি।
‘‘Nissitassa calitaṃ, anissitassa calitaṃ natthi, calite asati passaddhi, passaddhiyā sati nati na hoti, natiyā asati 74 āgatigati na hoti, āgatigatiyā asati cutūpapāto na hoti, cutūpapāte asati nevidha na huraṃ na ubhayamantarena. Esevanto dukkhassā’’ti.
তত্থ দ্ৰে নিস্সযা, অযং সমুদযো। যো চ অনিস্সযো, যা চ অনতি, অযং মগ্গো। যা আগতিগতি ন হোতি চুতূপপাতো চ যো এসেৰন্তো দুক্খস্সাতি, অযং নিরোধো। ইমানি তীণি সচ্চানি। অনুপট্ঠিতকাযগতা সতি…পে॰… যং ৰিমুত্তিঞাণদস্সনং, অযং সমুদযো। একারসউপনিস্সযা ৰিমুত্তিযো যাৰ উপনিস্সযউপসম্পদা উপট্ঠিতকাযগতাসতিস্স ৰিহরতি। সীলসংৰরো সোসানিযো হোতি, যঞ্চ ৰিমুত্তিঞাণদস্সনং, অযং মগ্গো। যা চ ৰিমুত্তি, অযং নিরোধো। ইমানি তীণি সচ্চানি। সমুদযো চ নিরোধো চ মগ্গো চ।
Tattha dve nissayā, ayaṃ samudayo. Yo ca anissayo, yā ca anati, ayaṃ maggo. Yā āgatigati na hoti cutūpapāto ca yo esevanto dukkhassāti, ayaṃ nirodho. Imāni tīṇi saccāni. Anupaṭṭhitakāyagatā sati…pe… yaṃ vimuttiñāṇadassanaṃ, ayaṃ samudayo. Ekārasaupanissayā vimuttiyo yāva upanissayaupasampadā upaṭṭhitakāyagatāsatissa viharati. Sīlasaṃvaro sosāniyo hoti, yañca vimuttiñāṇadassanaṃ, ayaṃ maggo. Yā ca vimutti, ayaṃ nirodho. Imāni tīṇi saccāni. Samudayo ca nirodho ca maggo ca.
১২. তত্থ কতমো নিরোধো চ মগ্গো চ?
12. Tattha katamo nirodho ca maggo ca?
সযং কতেন সচ্চেন, তেন অত্তনা অভিনিব্বানগতো ৰিতিণ্ণকঙ্খো।
Sayaṃ katena saccena, tena attanā abhinibbānagato vitiṇṇakaṅkho;
ৰিভৰঞ্চ ঞত্ৰা লোকস্মিং, তাৰ খীণপুনব্ভৰো স ভিক্খু॥
Vibhavañca ñatvā lokasmiṃ, tāva khīṇapunabbhavo sa bhikkhu.
যং সচ্চেন, অযং মগ্গো। যং খীণপুনব্ভৰো, অযং নিরোধো। ইমানি দ্ৰে সচ্চানি। পঞ্চ ৰিমুত্তাযতনানি সত্থা ৰা ধম্মং দেসেসি অঞ্ঞতরো ৰা ৰিঞ্ঞূ সব্রহ্মচারীতি ৰিত্থারেন কাতব্বা। তস্স অত্থপ্পটিসংৰেদিস্স পামোজ্জং জাযতি, পমুদিতস্স পীতি জাযতি, যাৰ নিব্বিন্দন্তো ৰিরজ্জতি, অযং মগ্গো। যা ৰিমুত্তি, অযং নিরোধো। এৰং পঞ্চ ৰিমুত্তাযতনানি ৰিত্থারেন। ইমানি দ্ৰে সচ্চানি নিরোধো চ মগ্গো চ।
Yaṃ saccena, ayaṃ maggo. Yaṃ khīṇapunabbhavo, ayaṃ nirodho. Imāni dve saccāni. Pañca vimuttāyatanāni satthā vā dhammaṃ desesi aññataro vā viññū sabrahmacārīti vitthārena kātabbā. Tassa atthappaṭisaṃvedissa pāmojjaṃ jāyati, pamuditassa pīti jāyati, yāva nibbindanto virajjati, ayaṃ maggo. Yā vimutti, ayaṃ nirodho. Evaṃ pañca vimuttāyatanāni vitthārena. Imāni dve saccāni nirodho ca maggo ca.
ইমানি সাধারণানি সুত্তানি। ইমেহি সাধারণেহি সুত্তেহি যথানিক্খিত্তেহি পটিৰেধতো চ লক্খণতো চ ওতারেত্ৰা অঞ্ঞানি সুত্তানি নিদ্দিসিতব্বানি অপরিহাযন্তেন। গাথাহি গাথা অনুমিনিতব্বা, ব্যাকরণেহি ব্যাকরণং। ইমে চ সাধারণা দস পরিৰড্ঢকা একো চ চতুক্কো নিদ্দেসো সাধারণো। অযঞ্চ পকিণ্ণকনিদ্দেসো। একং পঞ্চ ছ চ সৰেকদেসো সব্বং। ইমে দ্ৰে পরিৰজ্জনা পুরিমকা চ দস। ইমে দ্ৰাদস পরিৰড্ঢকা সচ্চানি। এত্তাৰতা সব্বং সুত্তং নত্থি, তং ব্যাকরণং ৰা গাথা ৰিয। ইমেহি দ্ৰাদসহি পরিৰড্ঢকেহি ন ওতরিতুং অপ্পমত্তেন পরিযেসিত্ৰা নিদ্দিসিতব্বা।
Imāni sādhāraṇāni suttāni. Imehi sādhāraṇehi suttehi yathānikkhittehi paṭivedhato ca lakkhaṇato ca otāretvā aññāni suttāni niddisitabbāni aparihāyantena. Gāthāhi gāthā anuminitabbā, byākaraṇehi byākaraṇaṃ. Ime ca sādhāraṇā dasa parivaḍḍhakā eko ca catukko niddeso sādhāraṇo. Ayañca pakiṇṇakaniddeso. Ekaṃ pañca cha ca savekadeso sabbaṃ. Ime dve parivajjanā purimakā ca dasa. Ime dvādasa parivaḍḍhakā saccāni. Ettāvatā sabbaṃ suttaṃ natthi, taṃ byākaraṇaṃ vā gāthā viya. Imehi dvādasahi parivaḍḍhakehi na otarituṃ appamattena pariyesitvā niddisitabbā.
তত্থাযং সঙ্খেপো। সব্বং দুক্খং সত্তহি পদেহি সমোসরণং গচ্ছতি। কতরেহি সত্তহি? অপ্পিযসম্পযোগো চ পিযৰিপ্পযোগো চ, ইমেহি দ্ৰীহি পদেহি সব্বং দুক্খং নিদ্দিসিতব্বং। তস্স দ্ৰে নিস্সযা – কাযো চ চিত্তঞ্চ । তেন ৰুচ্চতি ‘‘কাযিকং দুক্খং চেতসিকঞ্চে’’তি, নত্থি তং দুক্খং ন কাযিকং ৰা ন চেতসিকং, সব্বং দুক্খং দ্ৰীহি দুক্খেহি নিদ্দিসিতব্বং কাযিকেন চ চেতসিকেন চ। তীহি দুক্খতাহি সঙ্গহিতং দুক্খদুক্খতায সঙ্খারদুক্খতায ৰিপরিণামদুক্খতায। ইতি তং সব্বং দুক্খং তীহি দুক্খতাহি সঙ্গহিতং। ইতি ইদঞ্চ দুক্খং তিৰিধং। দুৰিধং দুক্খং কাযিকঞ্চ চেতসিকঞ্চ। দুৰিধং অপ্পিযসম্পযোগো চ পিযৰিপ্পযোগো চ। ইদং সত্তৰিধং দুক্খং।
Tatthāyaṃ saṅkhepo. Sabbaṃ dukkhaṃ sattahi padehi samosaraṇaṃ gacchati. Katarehi sattahi? Appiyasampayogo ca piyavippayogo ca, imehi dvīhi padehi sabbaṃ dukkhaṃ niddisitabbaṃ. Tassa dve nissayā – kāyo ca cittañca . Tena vuccati ‘‘kāyikaṃ dukkhaṃ cetasikañce’’ti, natthi taṃ dukkhaṃ na kāyikaṃ vā na cetasikaṃ, sabbaṃ dukkhaṃ dvīhi dukkhehi niddisitabbaṃ kāyikena ca cetasikena ca. Tīhi dukkhatāhi saṅgahitaṃ dukkhadukkhatāya saṅkhāradukkhatāya vipariṇāmadukkhatāya. Iti taṃ sabbaṃ dukkhaṃ tīhi dukkhatāhi saṅgahitaṃ. Iti idañca dukkhaṃ tividhaṃ. Duvidhaṃ dukkhaṃ kāyikañca cetasikañca. Duvidhaṃ appiyasampayogo ca piyavippayogo ca. Idaṃ sattavidhaṃ dukkhaṃ.
তত্থ তিৰিধো সমুদযো অচতুত্থো অপঞ্চমো। কতমো তিৰিধো? তণ্হা চ দিট্ঠি চ কম্মং। তত্থ তণ্হা চ ভৰসমুদযো কম্মং। তথা 75 নিব্বত্তস্স হীনপণীততা 76, অযং সমুদযো। ইতি যাপি ভৰগতীসু হীনতা চ পণীততা চ, যাপি তীহি দুক্খতাহি সঙ্গহিতা, যোপি দ্ৰীহি মূলেহি সমুদানীতো অৰিজ্জায নিৰুতস্স ভৰতণ্হাসংযুত্তস্স সৰিঞ্ঞাণকো কাযো, সোপি তীহি দুক্খতাহি সঙ্গহিতো।
Tattha tividho samudayo acatuttho apañcamo. Katamo tividho? Taṇhā ca diṭṭhi ca kammaṃ. Tattha taṇhā ca bhavasamudayo kammaṃ. Tathā 77 nibbattassa hīnapaṇītatā 78, ayaṃ samudayo. Iti yāpi bhavagatīsu hīnatā ca paṇītatā ca, yāpi tīhi dukkhatāhi saṅgahitā, yopi dvīhi mūlehi samudānīto avijjāya nivutassa bhavataṇhāsaṃyuttassa saviññāṇako kāyo, sopi tīhi dukkhatāhi saṅgahito.
তথা ৰিপল্লাসতো দিট্ঠিভৰগন্তব্বা। সা সত্তৰিধা নিদ্দিসিতব্বা। একো ৰিপল্লাসো তীণি নিদ্দিসীযতি, চত্তারি ৰিপল্লাসৰত্থূনি। তত্থ কতমো একো ৰিপল্লাসো? যো ৰিপরীতগ্গাহো পটিক্খেপেন, ওতরণং যথা ‘‘অনিচ্চে নিচ্চ’’মিতি ৰিপরীতং গণ্হাতি। এৰং চত্তারো ৰিপল্লাসা। অযমেকো ৰিপল্লাসীযতি সঞ্ঞা চিত্তং দিট্ঠি। কতমানি চত্তারি ৰিপল্লাসৰত্থূনি ? কাযো ৰেদনা চিত্তং ধম্মা। এৰং ৰিপল্লাসগতস্স অকুসলঞ্চ পৰড্ঢেতি। তত্থ সঞ্ঞাৰিপল্লাসো দোসং অকুসলমূলং পৰড্ঢেতি। চিত্তৰিপল্লাসো লোভং অকুসলমূলং পৰড্ঢেতি। দিট্ঠিৰিপল্লাসো মোহং অকুসলমূলং পৰড্ঢেতি। তত্থ দোসস্স অকুসলমূলস্স তীণি মিচ্ছত্তানি ফলং – মিচ্ছাৰাচা মিচ্ছাকম্মন্তো মিচ্ছাআজীৰো; লোভস্স অকুসলমূলস্স তীণি মিচ্ছত্তানি ফলং – মিচ্ছাসঙ্কপ্পো মিচ্ছাৰাযামো মিচ্ছাসমাধি; মোহস্স অকুসলমূলস্স দ্ৰে মিচ্ছত্তানি ফলং – মিচ্ছাদিট্ঠি চ মিচ্ছাসতি চ। এৰং অকুসলং সহেতু সপ্পচ্চযং ৰিপল্লাসা চ পচ্চযো, অকুসলমূলানি সহেতূ এতেযেৰ পটিপক্খেন অনূনা অনধিকা দ্ৰীহি পচ্চযেহি নিদ্দিসিতব্বা। নিরোধে চ মগ্গে চ ৰিপল্লাসমুপাদায পরতো 79 পটিপক্খেন চতস্সো।
Tathā vipallāsato diṭṭhibhavagantabbā. Sā sattavidhā niddisitabbā. Eko vipallāso tīṇi niddisīyati, cattāri vipallāsavatthūni. Tattha katamo eko vipallāso? Yo viparītaggāho paṭikkhepena, otaraṇaṃ yathā ‘‘anicce nicca’’miti viparītaṃ gaṇhāti. Evaṃ cattāro vipallāsā. Ayameko vipallāsīyati saññā cittaṃ diṭṭhi. Katamāni cattāri vipallāsavatthūni ? Kāyo vedanā cittaṃ dhammā. Evaṃ vipallāsagatassa akusalañca pavaḍḍheti. Tattha saññāvipallāso dosaṃ akusalamūlaṃ pavaḍḍheti. Cittavipallāso lobhaṃ akusalamūlaṃ pavaḍḍheti. Diṭṭhivipallāso mohaṃ akusalamūlaṃ pavaḍḍheti. Tattha dosassa akusalamūlassa tīṇi micchattāni phalaṃ – micchāvācā micchākammanto micchāājīvo; lobhassa akusalamūlassa tīṇi micchattāni phalaṃ – micchāsaṅkappo micchāvāyāmo micchāsamādhi; mohassa akusalamūlassa dve micchattāni phalaṃ – micchādiṭṭhi ca micchāsati ca. Evaṃ akusalaṃ sahetu sappaccayaṃ vipallāsā ca paccayo, akusalamūlāni sahetū eteyeva paṭipakkhena anūnā anadhikā dvīhi paccayehi niddisitabbā. Nirodhe ca magge ca vipallāsamupādāya parato 80 paṭipakkhena catasso.
তত্থিমা উদ্দানগাথা
Tatthimā uddānagāthā
অৰিজ্জায নিৰুতো লোকো, চিত্তং সংযোজনম্পি।
Avijjāya nivuto loko, cittaṃ saṃyojanampi;
সা পচ্ছিন্নভৰতণ্হা, দ্ৰেমা চেৰ ৰিমুত্তিযো॥
Sā pacchinnabhavataṇhā, dvemā ceva vimuttiyo.
যে কেচি সোকপরিদেৰা, তিম্বরুকো চ সযংকতং॥
Ye keci sokaparidevā, timbaruko ca sayaṃkataṃ.
দুক্খং দিট্ঠি চ উপ্পন্নং, যঞ্চ গোপালকোপমং।
Dukkhaṃ diṭṭhi ca uppannaṃ, yañca gopālakopamaṃ;
সতি কাযগতা মাহু, সমথো চ ৰিপস্সনা॥
Sati kāyagatā māhu, samatho ca vipassanā.
আসা পিহা চ অভিনন্দনা চ, চতুন্নমননুবোধনা।
Āsā pihā ca abhinandanā ca, catunnamananubodhanā;
যানি সোতানি লোকস্মিং, দল়্হং নেমিযানাকারো॥
Yāni sotāni lokasmiṃ, daḷhaṃ nemiyānākāro.
যং নিস্সিতস্স চলিতং, অনুপট্ঠিতকাযগতাসতি।
Yaṃ nissitassa calitaṃ, anupaṭṭhitakāyagatāsati;
সযং কতেন সচ্চেন, ৰিমুত্তাযতনেহি চ॥
Sayaṃ katena saccena, vimuttāyatanehi ca.
পেটকোপদেসে মহাকচ্চাযনেন ভাসিতে পঠমভূমি অরিযসচ্চপ্পকাসনা নাতং জীৰতা ভগৰতা মাদিসেন সমুদ্দনেন তথাগতেনাতি।
Peṭakopadese mahākaccāyanena bhāsite paṭhamabhūmi ariyasaccappakāsanā nātaṃ jīvatā bhagavatā mādisena samuddanena tathāgatenāti.
Footnotes:
