| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. அருணவதீஸுத்தவண்ணனா
4. Aruṇavatīsuttavaṇṇanā
185. சதுத்தே² அபி⁴பூ⁴ஸம்ப⁴வந்தி அபி⁴பூ⁴ ச ஸம்ப⁴வோ ச. தேஸு அபி⁴பூ⁴தே²ரோ ஸாரிபுத்தத்தே²ரோ விய பஞ்ஞாய அக்³கோ³, ஸம்ப⁴வத்தே²ரோ மஹாமொக்³க³ல்லானோ விய ஸமாதி⁴னா அக்³கோ³. உஜ்ஜா²யந்தீதி அவஜ்ஜா²யந்தி, லாமகதோ வா சிந்தெந்தி. கி²ய்யந்தீதி, கின்னாமேதங் கின்னாமேதந்தி? அஞ்ஞமஞ்ஞங் கதெ²ந்தி. விபாசெந்தீதி வித்தா²ரயந்தா புனப்புனங் கதெ²ந்தி. ஹெட்டி²மேன உபட்³ட⁴காயேனாதி நாபி⁴தோ பட்டா²ய ஹெட்டி²மகாயேன. பாளியங் எத்தகமேவ ஆக³தங். தே²ரோ பன ‘‘பகதிவண்ணங் விஜஹித்வா நாக³வண்ணங் க³ஹெத்வா த³ஸ்ஸேதி, ஸுபண்ணவண்ணங் க³ஹெத்வா வா த³ஸ்ஸேதீ’’திஆதி³னா (படி॰ ம॰ 3.13) நயேன ஆக³தங் அனேகப்பகாரங் இத்³தி⁴விகுப்³ப³னங் த³ஸ்ஸேஸி. இமா கா³தா²யோ அபா⁴ஸீதி தே²ரோ கிர சிந்தேஸி – ‘‘கத²ங் தே³ஸிதா நு கோ² த⁴ம்மதே³ஸனா ஸப்³பே³ஸங் பியா அஸ்ஸ மனாபா’’தி. ததோ ஆவஜ்ஜெந்தோ – ‘‘ஸப்³பே³பி பாஸண்டா³ ஸப்³பே³ தே³வமனுஸ்ஸா அத்தனோ அத்தனோ ஸமயே புரிஸகாரங் வண்ணயந்தி, வீரியஸ்ஸ அவண்ணவாதீ³ நாம நத்தி², வீரியபடிஸங்யுத்தங் கத்வா தே³ஸெஸ்ஸாமி, ஏவங் அயங் த⁴ம்மதே³ஸனா ஸப்³பே³ஸங் பியா ப⁴விஸ்ஸதி மனாபா’’தி ஞத்வா தீஸு பிடகேஸு விசினித்வா இமா கா³தா² அபா⁴ஸி.
185. Catutthe abhibhūsambhavanti abhibhū ca sambhavo ca. Tesu abhibhūthero sāriputtatthero viya paññāya aggo, sambhavatthero mahāmoggallāno viya samādhinā aggo. Ujjhāyantīti avajjhāyanti, lāmakato vā cintenti. Khiyyantīti, kinnāmetaṃ kinnāmetanti? Aññamaññaṃ kathenti. Vipācentīti vitthārayantā punappunaṃ kathenti. Heṭṭhimena upaḍḍhakāyenāti nābhito paṭṭhāya heṭṭhimakāyena. Pāḷiyaṃ ettakameva āgataṃ. Thero pana ‘‘pakativaṇṇaṃ vijahitvā nāgavaṇṇaṃ gahetvā dasseti, supaṇṇavaṇṇaṃ gahetvā vā dassetī’’tiādinā (paṭi. ma. 3.13) nayena āgataṃ anekappakāraṃ iddhivikubbanaṃ dassesi. Imā gāthāyo abhāsīti thero kira cintesi – ‘‘kathaṃ desitā nu kho dhammadesanā sabbesaṃ piyā assa manāpā’’ti. Tato āvajjento – ‘‘sabbepi pāsaṇḍā sabbe devamanussā attano attano samaye purisakāraṃ vaṇṇayanti, vīriyassa avaṇṇavādī nāma natthi, vīriyapaṭisaṃyuttaṃ katvā desessāmi, evaṃ ayaṃ dhammadesanā sabbesaṃ piyā bhavissati manāpā’’ti ñatvā tīsu piṭakesu vicinitvā imā gāthā abhāsi.
தத்த² ஆரம்ப⁴தா²தி ஆரம்ப⁴வீரியங் கரோத². நிக்கமதா²தி நிக்கமவீரியங் கரோத². யுஞ்ஜதா²தி பயோக³ங் கரோத² பரக்கமத². மச்சுனோ ஸேனந்தி மச்சுனோ ஸேனா நாம கிலேஸஸேனா, தங் து⁴னாத². ஜாதிஸங்ஸாரந்தி ஜாதிஞ்ச ஸங்ஸாரஞ்ச, ஜாதிஸங்கா²தங் வா ஸங்ஸாரங். து³க்க²ஸ்ஸந்தங் கரிஸ்ஸதீதி வட்டது³க்க²ஸ்ஸ பரிச்சே²த³ங் கரிஸ்ஸதி. கிங் பன கத்வா தே²ரோ ஸஹஸ்ஸிலோகதா⁴துங் விஞ்ஞாபேஸீதி? நீலகஸிணங் தாவ ஸமாபஜ்ஜித்வா ஸப்³ப³த்த² ஆலோகட்டா²னே அந்த⁴காரங் ப²ரி, ஓதா³தகஸிணங் ஸமாபஜ்ஜித்வா அந்த⁴காரட்டா²னே ஓபா⁴ஸங். ததோ ‘‘கிமித³ங் அந்த⁴கார’’ந்தி? ஸத்தானங் ஆபோ⁴கே³ உப்பன்னே ஆலோகங் த³ஸ்ஸேஸி. ஆலோகட்டா²னே ஆலோககிச்சங் நத்தி², ‘‘கிங் ஆலோகோ அய’’ந்தி? விசினந்தானங் அத்தானங் த³ஸ்ஸேஸி. அத² தேஸங் தே²ரோதி வத³ந்தானங் இமா கா³தா²யோ அபா⁴ஸி, ஸப்³பே³ ஓஸடாய பரிஸாய மஜ்ஜே² நிஸீதி³த்வா த⁴ம்மங் தே³ஸெந்தஸ்ஸ விய ஸத்³த³ங் ஸுணிங்ஸு. அத்தோ²பி நேஸங் பாகடோ அஹோஸி. சதுத்த²ங்.
Tattha ārambhathāti ārambhavīriyaṃ karotha. Nikkamathāti nikkamavīriyaṃ karotha. Yuñjathāti payogaṃ karotha parakkamatha. Maccuno senanti maccuno senā nāma kilesasenā, taṃ dhunātha. Jātisaṃsāranti jātiñca saṃsārañca, jātisaṅkhātaṃ vā saṃsāraṃ. Dukkhassantaṃ karissatīti vaṭṭadukkhassa paricchedaṃ karissati. Kiṃ pana katvā thero sahassilokadhātuṃ viññāpesīti? Nīlakasiṇaṃ tāva samāpajjitvā sabbattha ālokaṭṭhāne andhakāraṃ phari, odātakasiṇaṃ samāpajjitvā andhakāraṭṭhāne obhāsaṃ. Tato ‘‘kimidaṃ andhakāra’’nti? Sattānaṃ ābhoge uppanne ālokaṃ dassesi. Ālokaṭṭhāne ālokakiccaṃ natthi, ‘‘kiṃ āloko aya’’nti? Vicinantānaṃ attānaṃ dassesi. Atha tesaṃ theroti vadantānaṃ imā gāthāyo abhāsi, sabbe osaṭāya parisāya majjhe nisīditvā dhammaṃ desentassa viya saddaṃ suṇiṃsu. Atthopi nesaṃ pākaṭo ahosi. Catutthaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. அருணவதீஸுத்தங் • 4. Aruṇavatīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. அருணவதீஸுத்தவண்ணனா • 4. Aruṇavatīsuttavaṇṇanā
