| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༦. ཨརཱུཔདྷམྨཝཝཏྠཱནདུཀྐརཔཉྷོ
16. Arūpadhammavavatthānadukkarapañho
༡༦. རཱཛཱ ཨཱཧ ‘‘བྷནྟེ ནཱགསེན, དུཀྐརཾ ནུ ཁོ བྷགཝཏཱ ཀཏ’’ནྟི? ཐེརོ ཨཱཧ ‘‘དུཀྐརཾ, མཧཱརཱཛ, བྷགཝཏཱ ཀཏ’’ནྟི། ‘‘ཀིཾ པན, བྷནྟེ ནཱགསེན, བྷགཝཏཱ དུཀྐརཾ ཀཏ’’ནྟི། ‘‘དུཀྐརཾ, མཧཱརཱཛ, བྷགཝཏཱ ཀཏཾ ཨིམེསཾ ཨརཱུཔཱིནཾ ཙིཏྟཙེཏསིཀཱནཾ དྷམྨཱནཾ ཨེཀཱརམྨཎེ ཝཏྟམཱནཱནཾ ཝཝཏྠཱནཾ ཨཀྑཱཏཾ ‘ཨཡཾ ཕསྶོ, ཨཡཾ ཝེདནཱ, ཨཡཾ སཉྙཱ, ཨཡཾ ཙེཏནཱ, ཨིདཾ ཙིཏྟ’’’ནྟི།
16. Rājā āha ‘‘bhante nāgasena, dukkaraṃ nu kho bhagavatā kata’’nti? Thero āha ‘‘dukkaraṃ, mahārāja, bhagavatā kata’’nti. ‘‘Kiṃ pana, bhante nāgasena, bhagavatā dukkaraṃ kata’’nti. ‘‘Dukkaraṃ, mahārāja, bhagavatā kataṃ imesaṃ arūpīnaṃ cittacetasikānaṃ dhammānaṃ ekārammaṇe vattamānānaṃ vavatthānaṃ akkhātaṃ ‘ayaṃ phasso, ayaṃ vedanā, ayaṃ saññā, ayaṃ cetanā, idaṃ citta’’’nti.
‘‘ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, ཀོཙིདེཝ པུརིསོ ནཱཝཱཡ མཧཱསམུདྡཾ ཨཛ྄ཛྷོགཱཧེཏྭཱ ཧཏྠཔུཊེན ཨུདཀཾ གཧེཏྭཱ ཛིཝ྄ཧཱཡ སཱཡིཏྭཱ ཛཱནེཡྻ ནུ ཁོ, མཧཱརཱཛ, སོ པུརིསོ ‘‘ཨིདཾ གངྒཱཡ ཨུདཀཾ, ཨིདཾ ཡམུནཱཡ ཨུདཀཾ, ཨིདཾ ཨཙིརཝཏིཡཱ ཨུདཀཾ, ཨིདཾ སརབྷུཡཱ ཨུདཀཾ, ཨིདཾ མཧིཡཱ ཨུདཀ’’’ནྟི? ‘‘དུཀྐརཾ, བྷནྟེ, ཛཱནིཏུ’’ནྟི། ‘‘ཨིཏོ དུཀྐརཏརཾ ཁོ, མཧཱརཱཛ, བྷགཝཏཱ ཀཏཾ ཨིམེསཾ ཨརཱུཔཱིནཾ ཙིཏྟཙེཏསིཀཱནཾ དྷམྨཱནཾ ཨེཀཱརམྨཎེ ཝཏྟམཱནཱནཾ ཝཝཏྠཱནཾ ཨཀྑཱཏཾ ‘ཨཡཾ ཕསྶོ, ཨཡཾ ཝེདནཱ, ཨཡཾ སཉྙཱ, ཨཡཾ ཙེཏནཱ, ཨིདཾ ཙིཏྟ’’’ནྟི། ‘‘སུཊྛུ, བྷནྟེ’’ཏི རཱཛཱ ཨབྦྷཱནུམོདཱིཏི།
‘‘Opammaṃ karohī’’ti. ‘‘Yathā, mahārāja, kocideva puriso nāvāya mahāsamuddaṃ ajjhogāhetvā hatthapuṭena udakaṃ gahetvā jivhāya sāyitvā jāneyya nu kho, mahārāja, so puriso ‘‘idaṃ gaṅgāya udakaṃ, idaṃ yamunāya udakaṃ, idaṃ aciravatiyā udakaṃ, idaṃ sarabhuyā udakaṃ, idaṃ mahiyā udaka’’’nti? ‘‘Dukkaraṃ, bhante, jānitu’’nti. ‘‘Ito dukkarataraṃ kho, mahārāja, bhagavatā kataṃ imesaṃ arūpīnaṃ cittacetasikānaṃ dhammānaṃ ekārammaṇe vattamānānaṃ vavatthānaṃ akkhātaṃ ‘ayaṃ phasso, ayaṃ vedanā, ayaṃ saññā, ayaṃ cetanā, idaṃ citta’’’nti. ‘‘Suṭṭhu, bhante’’ti rājā abbhānumodīti.
ཨརཱུཔདྷམྨཝཝཏྠཱནདུཀྐརཔཉྷོ སོལ༹སམོ།
Arūpadhammavavatthānadukkarapañho soḷasamo.
ཨརཱུཔདྷམྨཝཝཏྠཱནཝགྒོ སཏྟམོ།
Arūpadhammavavatthānavaggo sattamo.
ཨིམསྨིཾ ཝགྒེ སོལ༹ས པཉྷཱ།
Imasmiṃ vagge soḷasa pañhā.
