| Library / Tipiṭaka / திபிடக • Tipiṭaka / த⁴ம்மஸங்க³ணீ-அனுடீகா • Dhammasaṅgaṇī-anuṭīkā |
அரூபாவசரகுஸலகதா²வண்ணனா
Arūpāvacarakusalakathāvaṇṇanā
265. ரூபனிமித்தந்தி ரூபஹேது ரூபாதி⁴கரணங். ரூபாரூபனிமித்தேஸூதி ரூபத⁴ம்மேஸு ச பத²வீகஸிணாதி³னிமித்தேஸு ச. ததா³ரம்மணஜ்ஜா²னேஸூதி எத்த² தங்-ஸத்³தே³ன ரூபனிமித்தங் பச்சாமஸதி ரூபம்பி வா ரூபத⁴ம்மாரம்மணானம்பி ரூபாவசரஜ்ஜா²னானங் ஸம்ப⁴வதோ. ரூபாதீ³ஸூதி ரூபாரூபனிமித்தததா³ரம்மணஜ்ஜா²னேஸு ரூபபடிப³த்³த⁴த⁴ம்மேஸு ச. அனாவஜ்ஜிதுகாமதாதி³னாதி ஆதி³-ஸத்³தே³ன அஸமாபஜ்ஜிதுகாமதாதி³ங் ஸங்க³ண்ஹாதி.
265. Rūpanimittanti rūpahetu rūpādhikaraṇaṃ. Rūpārūpanimittesūti rūpadhammesu ca pathavīkasiṇādinimittesu ca. Tadārammaṇajjhānesūti ettha taṃ-saddena rūpanimittaṃ paccāmasati rūpampi vā rūpadhammārammaṇānampi rūpāvacarajjhānānaṃ sambhavato. Rūpādīsūti rūpārūpanimittatadārammaṇajjhānesu rūpapaṭibaddhadhammesu ca. Anāvajjitukāmatādināti ādi-saddena asamāpajjitukāmatādiṃ saṅgaṇhāti.
சுதிதோ உத்³த⁴ங் உப்பத்திரஹானங்…பே॰… அனுப்பத்தித⁴ம்மதாபாத³னேன ஸமதிக்கமோதி ஏதேன ஸமதிக்கமிதப்³ப³த்தேன ரூபாவசரகுஸலானங் ரூபாவசரவிபாககிரியேஹி விஸேஸாபா⁴வங் த³ஸ்ஸேதி அனதி⁴க³தபா⁴வதோ. யேஸஞ்ஹி ரூபஸஞ்ஞாதீ³னங் அரூபபா⁴வனாய ஸமதிக்கமாதி³கோ லப்³ப⁴தி, தே த³ஸ்ஸேதுங் ‘‘அரூபபா⁴வனாய அபா⁴வே சுதிதோ உத்³த⁴ங் உப்பத்திரஹான’’ந்தி வுத்தந்தி. யாதி ஏகந்தரூபனிஸ்ஸிதா அவஸிட்ட²பரித்தவிபாகஸஞ்ஞாத³யோ.
Cutito uddhaṃ uppattirahānaṃ…pe… anuppattidhammatāpādanena samatikkamoti etena samatikkamitabbattena rūpāvacarakusalānaṃ rūpāvacaravipākakiriyehi visesābhāvaṃ dasseti anadhigatabhāvato. Yesañhi rūpasaññādīnaṃ arūpabhāvanāya samatikkamādiko labbhati, te dassetuṃ ‘‘arūpabhāvanāya abhāve cutito uddhaṃ uppattirahāna’’nti vuttanti. Yāti ekantarūpanissitā avasiṭṭhaparittavipākasaññādayo.
ஆனேஞ்ஜஸந்தஸமாபத்திஸுகா²னுப⁴வனப⁴வவிஸேஸூபபஜ்ஜனாத³யோ ஆருப்பஸமாபத்தீனங் அத்தா²தி ஆஹ ‘‘ரூபஸஞ்ஞா…பே॰… ந அத்தோ²’’தி.
Āneñjasantasamāpattisukhānubhavanabhavavisesūpapajjanādayo āruppasamāpattīnaṃ atthāti āha ‘‘rūpasaññā…pe… na attho’’ti.
இத⁴ உக்³கா⁴டிதகஸிணவஸேன பரித்தானந்ததா ஹோதி நிப்பரியாயதே³ஸனத்தாதி அதி⁴ப்பாயோ. யதி³ ஏவங் பரித்தகஸிணுக்³கா⁴டிதே கத²மாகாஸானஞ்சாயதனவசனந்தி? தத்தா²பி அனந்தப²ரணஸப்³பா⁴வதோ. தேனேவாஹ ‘‘அனந்தப²ரணதாஸப்³பா⁴வே’’தி. யதி³ ஸப்³ப³த்த² அனந்தப²ரணதா அத்தி², அத² கஸ்மா ‘‘அனந்தோ ஆகாஸோ’’தி ந வுத்தந்தி ஆஹ ‘‘ஸமயவவத்தா²பனா’’திஆதி³. தத்த² படிபத்தீதி ஜா²னபா⁴வனாகாரமாஹ.
Idha ugghāṭitakasiṇavasena parittānantatā hoti nippariyāyadesanattāti adhippāyo. Yadi evaṃ parittakasiṇugghāṭite kathamākāsānañcāyatanavacananti? Tatthāpi anantapharaṇasabbhāvato. Tenevāha ‘‘anantapharaṇatāsabbhāve’’ti. Yadi sabbattha anantapharaṇatā atthi, atha kasmā ‘‘ananto ākāso’’ti na vuttanti āha ‘‘samayavavatthāpanā’’tiādi. Tattha paṭipattīti jhānabhāvanākāramāha.
266. உக்³கா⁴டபா⁴வோ உக்³கா⁴டிமங். யதா² பாகிமங்.
266. Ugghāṭabhāvo ugghāṭimaṃ. Yathā pākimaṃ.
268. ஆகாஸே பவத்திதவிஞ்ஞாணாதிக்கமதோ ததியாதி பது³த்³தா⁴ரங் கத்வா யுத்திதோ ஆக³மதோ ச தத³த்த²ங் விபா⁴வேதுங் ‘‘தத³திக்கமதோ ஹீ’’திஆதி³மாஹ. ஆருப்பஸமாபத்தீனங் ஆரம்மணாதிக்கமேன பத்தப்³ப³த்தா விஸேஸதோ ஆரம்மணே தோ³ஸத³ஸ்ஸனங் ததே³வ அதிக்கமிதப்³ப³ந்தி அயங் யுத்தி, ஆரம்மணே பன அதிக்கந்தே ததா³ரம்மணங் ஜா²னம்பி அதிக்கந்தமேவ ஹோதி. பா⁴வனாய ஆரம்மணஸ்ஸ விக³மனங் அபனயனங் விபா⁴வனா. பாளியந்தி விப⁴ங்கே³. நனு ச பாளியங் ‘‘தஞ்ஞேவ விஞ்ஞாண’’ந்தி அவிஸேஸேன வுத்தங் ‘‘ந ஆகாஸானஞ்சாயதனவிஞ்ஞாண’’ந்தி. ‘‘ந தஞ்ஞேவவிஞ்ஞாணந்தி விஸேஸவசனேன அயமத்தோ² ஸித்³தோ⁴’’தி த³ஸ்ஸெந்தோ ‘‘விஞ்ஞாணஞ்சாயதன’’ந்திஆதி³மாஹ.
268. Ākāse pavattitaviññāṇātikkamato tatiyāti paduddhāraṃ katvā yuttito āgamato ca tadatthaṃ vibhāvetuṃ ‘‘tadatikkamato hī’’tiādimāha. Āruppasamāpattīnaṃ ārammaṇātikkamena pattabbattā visesato ārammaṇe dosadassanaṃ tadeva atikkamitabbanti ayaṃ yutti, ārammaṇe pana atikkante tadārammaṇaṃ jhānampi atikkantameva hoti. Bhāvanāya ārammaṇassa vigamanaṃ apanayanaṃ vibhāvanā. Pāḷiyanti vibhaṅge. Nanu ca pāḷiyaṃ ‘‘taññeva viññāṇa’’nti avisesena vuttaṃ ‘‘na ākāsānañcāyatanaviññāṇa’’nti. ‘‘Na taññevaviññāṇanti visesavacanena ayamattho siddho’’ti dassento ‘‘viññāṇañcāyatana’’ntiādimāha.
அரூபாவசரகுஸலகதா²வண்ணனா நிட்டி²தா.
Arūpāvacarakusalakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / அரூபாவசரகுஸலங் • Arūpāvacarakusalaṃ
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā
ஆகாஸானஞ்சாயதனங் • Ākāsānañcāyatanaṃ
விஞ்ஞாணஞ்சாயதனங் • Viññāṇañcāyatanaṃ
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / அரூபாவசரகுஸலகதா²வண்ணனா • Arūpāvacarakusalakathāvaṇṇanā
