| Library / Tipiṭaka / তিপিটক • Tipiṭaka / ধম্মসঙ্গণী-মূলটীকা • Dhammasaṅgaṇī-mūlaṭīkā |
অরূপাৰচরকুসলকথাৰণ্ণনা
Arūpāvacarakusalakathāvaṇṇanā
২৬৫. সব্বাকারেনাতি এৰং রূপনিমিত্তং দণ্ডাদানসম্ভৰদস্সনাদিনা সব্বেন রূপরূপনিমিত্তেসু তদারম্মণজ্ঝানেসু দোসদস্সনাকারেন, রূপাদীসু নিকন্তিপ্পহানঅনাৰজ্জিতুকামতাদিনা ৰা। ৰিরাগাতি জিগুচ্ছনা। আনেঞ্জাভিসঙ্খারৰচনাদীহি আনেঞ্জতা ‘‘সন্তা ইমে চুন্দ অরিযস্স ৰিনযে ৰিমোক্খা’’তিআদিনা সন্তৰিমোক্খতা চ ৰুত্তা। দোসদস্সনপটিপক্খভাৰনাৰসেন পটিঘসঞ্ঞানং সুপ্পহীনত্তা মহতাপি সদ্দেন অরূপসমাপত্তিতো ন ৰুট্ঠাতি। তথা পন ন সুপ্পহীনত্তা সব্বরূপসমাপত্তিতো ৰুট্ঠানং সিযা, পঠমজ্ঝানং পন অপ্পকম্পি সদ্দং ন সহতীতি তং সমাপন্নস্স সদ্দো কণ্টকোতি ৰুত্তং।
265. Sabbākārenāti evaṃ rūpanimittaṃ daṇḍādānasambhavadassanādinā sabbena rūparūpanimittesu tadārammaṇajjhānesu dosadassanākārena, rūpādīsu nikantippahānaanāvajjitukāmatādinā vā. Virāgāti jigucchanā. Āneñjābhisaṅkhāravacanādīhi āneñjatā ‘‘santā ime cunda ariyassa vinaye vimokkhā’’tiādinā santavimokkhatā ca vuttā. Dosadassanapaṭipakkhabhāvanāvasena paṭighasaññānaṃ suppahīnattā mahatāpi saddena arūpasamāpattito na vuṭṭhāti. Tathā pana na suppahīnattā sabbarūpasamāpattito vuṭṭhānaṃ siyā, paṭhamajjhānaṃ pana appakampi saddaṃ na sahatīti taṃ samāpannassa saddo kaṇṭakoti vuttaṃ.
আরুপ্পভাৰনায অভাৰে চুতিতো উদ্ধং উপ্পত্তিরহানং রূপসঞ্ঞাপটিঘসঞ্ঞানং যাৰ অত্তনো ৰিপাকপ্পৰত্তি, তাৰ অনুপ্পত্তিধম্মতাপাদনেন সমতিক্কমো অত্থঙ্গমো চ ৰুত্তো। নানত্তসঞ্ঞাসু পন যা তস্মিং ভৰে ন উপ্পজ্জন্তি, তা অনোকাসতায ন উপ্পজ্জন্তি, ন আরুপ্পভাৰনায নিৰারিতত্তা। অনিৰারিতত্তা চ কাচি উপ্পজ্জন্তি। তস্মা তাসং অমনসিকারো অনাৰজ্জনং অপচ্চৰেক্খণং, জৰনপটিপাদকেন ৰা ভৰঙ্গমনস্স অন্তরে অকরণং অপ্পৰেসনং ৰুত্তং, তেন চ নানত্তসঞ্ঞামনসিকারহেতূনং রূপানং সমতিক্কমা সমাধিস্স থিরভাৰং দস্সেতি। রূপসমতিক্কমাভাৰেনেৰ হি রূপসমাপত্তীসু ‘‘নানত্তসঞ্ঞানং অমনসিকারা’’তি একস্স অৰচনন্তি। কো আনিসংসো, ন হি সব্বস্সাদৰত্থুরহিতে আকাসে পৰত্তিতসঞ্ঞায আনিসংসো দিস্সতীতি ৰুত্তং হোতি। রূপসঞ্ঞাসমতিক্কমনাদিকং ৰচনং আনিসংসস্স পকাসনং, ন অত্থো।
Āruppabhāvanāya abhāve cutito uddhaṃ uppattirahānaṃ rūpasaññāpaṭighasaññānaṃ yāva attano vipākappavatti, tāva anuppattidhammatāpādanena samatikkamo atthaṅgamo ca vutto. Nānattasaññāsu pana yā tasmiṃ bhave na uppajjanti, tā anokāsatāya na uppajjanti, na āruppabhāvanāya nivāritattā. Anivāritattā ca kāci uppajjanti. Tasmā tāsaṃ amanasikāro anāvajjanaṃ apaccavekkhaṇaṃ, javanapaṭipādakena vā bhavaṅgamanassa antare akaraṇaṃ appavesanaṃ vuttaṃ, tena ca nānattasaññāmanasikārahetūnaṃ rūpānaṃ samatikkamā samādhissa thirabhāvaṃ dasseti. Rūpasamatikkamābhāveneva hi rūpasamāpattīsu ‘‘nānattasaññānaṃ amanasikārā’’ti ekassa avacananti. Ko ānisaṃso, na hi sabbassādavatthurahite ākāse pavattitasaññāya ānisaṃso dissatīti vuttaṃ hoti. Rūpasaññāsamatikkamanādikaṃ vacanaṃ ānisaṃsassa pakāsanaṃ, na attho.
অঞ্ঞত্থাতি সুত্তেসু। তত্থ হি পরিত্তকসিণুগ্ঘাটনেপি রূপৰিৰেকমত্তগ্গহণেন পরিচ্ছেদস্স অগ্গহণতো অনন্তফরণতা চ ৰুত্তা, ইধ পন অনন্তফরণতাসব্ভাৰেপি উগ্ঘাটিতকসিণৰসেন পরিত্তানন্ততা হোতীতি দস্সনত্থং ‘‘অনন্তো আকাসো’’তি ন ৰুত্তন্তি অধিপ্পাযো। সমযৰৰত্থাপনঝানৰিসেসনেনেৰেত্থ অত্থো, ন পটিপত্তিযাতি তদৰচনং।
Aññatthāti suttesu. Tattha hi parittakasiṇugghāṭanepi rūpavivekamattaggahaṇena paricchedassa aggahaṇato anantapharaṇatā ca vuttā, idha pana anantapharaṇatāsabbhāvepi ugghāṭitakasiṇavasena parittānantatā hotīti dassanatthaṃ ‘‘ananto ākāso’’ti na vuttanti adhippāyo. Samayavavatthāpanajhānavisesanenevettha attho, na paṭipattiyāti tadavacanaṃ.
২৬৬. পঠমারুপ্পৰিঞ্ঞাণং অত্তনো ফরণাকারেনেৰ অনন্তন্তি মনসিকাতব্বত্তা ‘‘অনন্ত’’ন্তি ৰুত্তং। উগ্ঘাটভাৰো উগ্ঘাটিমং।
266. Paṭhamāruppaviññāṇaṃ attano pharaṇākāreneva anantanti manasikātabbattā ‘‘ananta’’nti vuttaṃ. Ugghāṭabhāvo ugghāṭimaṃ.
২৬৭. অকিঞ্চনন্তি ৰিঞ্ঞাণস্স কিঞ্চি পকারং অগ্গহেত্ৰা সব্বেন সব্বং ৰিভাৰনং আহ।
267. Akiñcananti viññāṇassa kiñci pakāraṃ aggahetvā sabbena sabbaṃ vibhāvanaṃ āha.
২৬৮. যাযাতি সঙ্খারাৰসেসসঞ্ঞায। তং তাৰ পটিপত্তিং। আৰজ্জিস্সামীতিআদিনা তন্নিন্নাৰজ্জনাদিপৰত্তিযা অভাৰং দস্সেতি, ন তদতিক্কমনত্থায আৰজ্জনভাৰনাপৰত্তিযা। নাসঞ্ঞাতি সঞ্ঞাভাৰো চ এতিস্সা অত্থীতি অত্থো। সমূহগহণৰসেন পৰত্তং কলাপসম্মসনং। ফস্সাদিএকেকধম্মগহণৰসেন পৰত্তা অনুপদধম্মৰিপস্সনা।
268. Yāyāti saṅkhārāvasesasaññāya. Taṃ tāva paṭipattiṃ. Āvajjissāmītiādinā tanninnāvajjanādipavattiyā abhāvaṃ dasseti, na tadatikkamanatthāya āvajjanabhāvanāpavattiyā. Nāsaññāti saññābhāvo ca etissā atthīti attho. Samūhagahaṇavasena pavattaṃ kalāpasammasanaṃ. Phassādiekekadhammagahaṇavasena pavattā anupadadhammavipassanā.
আকাসে পৰত্তিতৰিঞ্ঞাণাতিক্কমতো ততিযা। তদতিক্কমতো হি তস্সেৰ ৰিভাৰনং হোতি। দুতিযারুপ্পৰিঞ্ঞাণৰিভাৰনে হি তদেৰ অতিক্কন্তং সিযা, ন তস্স আরম্মণং, ন চারম্মণে দোসং দিস্ৰা অনারম্মণস্স ৰিভাৰনাতিক্কমো যুজ্জতি। পাল়িযঞ্চ ‘‘ৰিঞ্ঞাণঞ্চাযতনসমাপত্তিং সতো সমাপজ্জিত্ৰা ততো ৰুট্ঠহিত্ৰা তঞ্ঞেৰ ৰিঞ্ঞাণং অভাৰেতী’’তি (চূল়নি॰ উপসীৰমাণৰপুচ্ছানিদ্দেস ৩৯) ত্তং, ন ৰুত্তং ‘‘তঞ্ঞেৰ ৰিঞ্ঞাণঞ্চাযতনং অভাৰেতী’’তি, ‘‘তঞ্ঞেৰ অভাৰেতী’’তি ৰা। ‘‘অনন্তং ৰিঞ্ঞাণন্তি ৰিঞ্ঞাণঞ্চাযতনং উপসম্পজ্জা’’তি (ৰিভ॰ ৫০৮) এত্থ পন দ্ৰযং ৰুত্তং আরম্মণঞ্চ ৰিঞ্ঞাণং ৰিঞ্ঞাণঞ্চাযতনঞ্চ। তস্মিং দ্ৰযে যেন কেনচি যতো ৰা ৰুট্ঠিতো, তেনেৰ পট্ঠাননিদ্দিট্ঠেন তংসদ্দস্স সম্বন্ধে আপন্নে ৰিঞ্ঞাণঞ্চাযতনস্স নিৰত্তনত্থং ৰিঞ্ঞাণৰচনং, তস্মা পঠমারুপ্পৰিঞ্ঞাণস্সেৰ অভাৰনাতিক্কমো ৰুত্তো। তন্নিস্সিতন্তি তেন নিস্সিতং। তং মণ্ডপলগ্গং অনিস্সায তেন ৰিনাভূতে ৰিৰিত্তে বহি ওকাসে ঠানং ৰিয আকাসলগ্গৰিঞ্ঞাণস্স ৰিৰেকে তদপগমে ততিযারুপ্পস্স ঠানং।
Ākāse pavattitaviññāṇātikkamato tatiyā. Tadatikkamato hi tasseva vibhāvanaṃ hoti. Dutiyāruppaviññāṇavibhāvane hi tadeva atikkantaṃ siyā, na tassa ārammaṇaṃ, na cārammaṇe dosaṃ disvā anārammaṇassa vibhāvanātikkamo yujjati. Pāḷiyañca ‘‘viññāṇañcāyatanasamāpattiṃ sato samāpajjitvā tato vuṭṭhahitvā taññeva viññāṇaṃ abhāvetī’’ti (cūḷani. upasīvamāṇavapucchāniddesa 39) ttaṃ, na vuttaṃ ‘‘taññeva viññāṇañcāyatanaṃ abhāvetī’’ti, ‘‘taññeva abhāvetī’’ti vā. ‘‘Anantaṃ viññāṇanti viññāṇañcāyatanaṃ upasampajjā’’ti (vibha. 508) ettha pana dvayaṃ vuttaṃ ārammaṇañca viññāṇaṃ viññāṇañcāyatanañca. Tasmiṃ dvaye yena kenaci yato vā vuṭṭhito, teneva paṭṭhānaniddiṭṭhena taṃsaddassa sambandhe āpanne viññāṇañcāyatanassa nivattanatthaṃ viññāṇavacanaṃ, tasmā paṭhamāruppaviññāṇasseva abhāvanātikkamo vutto. Tannissitanti tena nissitaṃ. Taṃ maṇḍapalaggaṃ anissāya tena vinābhūte vivitte bahi okāse ṭhānaṃ viya ākāsalaggaviññāṇassa viveke tadapagame tatiyāruppassa ṭhānaṃ.
অরূপাৰচরকুসলকথাৰণ্ণনা নিট্ঠিতা।
Arūpāvacarakusalakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ধম্মসঙ্গণীপাল়ি • Dhammasaṅgaṇīpāḷi / অরূপাৰচরকুসলং • Arūpāvacarakusalaṃ
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / ধম্মসঙ্গণি-অট্ঠকথা • Dhammasaṅgaṇi-aṭṭhakathā
আকাসানঞ্চাযতনং • Ākāsānañcāyatanaṃ
ৰিঞ্ঞাণঞ্চাযতনং • Viññāṇañcāyatanaṃ
আকিঞ্চঞ্ঞাযতনং • Ākiñcaññāyatanaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ধম্মসঙ্গণী-অনুটীকা • Dhammasaṅgaṇī-anuṭīkā / অরূপাৰচরকুসলকথাৰণ্ণনা • Arūpāvacarakusalakathāvaṇṇanā
