| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၈. အဋ္ဌမဝဂ္ဂော
8. Aṭṭhamavaggo
(၈၀) ၈. အရူပေ ရူပကထာ
(80) 8. Arūpe rūpakathā
၅၂၄. အတ္ထိ ရူပံ အရူပေသူတိ? အာမန္တာ။ ရူပဘဝော ရူပဂတိ ရူပသတ္တာဝာသော ရူပသံသာရော ရူပယောနိ ရူပတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။ နနု အရူပဘဝော အရူပဂတိ အရူပသတ္တာဝာသော အရူပသံသာရော အရူပယောနိ အရူပတ္တဘာဝပဋိလာဘောတိ? အာမန္တာ။ ဟဉ္စိ အရူပဘဝော။ပေ.။ အရူပတ္တဘာဝပဋိလာဘော, နော စ ဝတ ရေ ဝတ္တဗ္ဗေ – ‘‘အတ္ထိ ရူပံ အရူပေသူ’’တိ။
524. Atthi rūpaṃ arūpesūti? Āmantā. Rūpabhavo rūpagati rūpasattāvāso rūpasaṃsāro rūpayoni rūpattabhāvapaṭilābhoti? Na hevaṃ vattabbe…pe… nanu arūpabhavo arūpagati arūpasattāvāso arūpasaṃsāro arūpayoni arūpattabhāvapaṭilābhoti? Āmantā. Hañci arūpabhavo…pe… arūpattabhāvapaṭilābho, no ca vata re vattabbe – ‘‘atthi rūpaṃ arūpesū’’ti.
အတ္ထိ ရူပံ အရူပေသူတိ? အာမန္တာ။ ပဉ္စဝောကာရဘဝော ဂတိ သတ္တာဝာသော သံသာရော ယောနိ ဝိညာဏဋ္ဌိတိ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။ နနု စတုဝောကာရဘဝော။ပေ.။ အတ္တဘာဝပဋိလာဘောတိ? အာမန္တာ။ ဟဉ္စိ စတုဝောကာရဘဝော ဂတိ။ပေ.။ အတ္တဘာဝပဋိလာဘော, နော စ ဝတ ရေ ဝတ္တဗ္ဗေ – ‘‘အတ္ထိ ရူပံ အရူပေသူ’’တိ။
Atthi rūpaṃ arūpesūti? Āmantā. Pañcavokārabhavo gati sattāvāso saṃsāro yoni viññāṇaṭṭhiti attabhāvapaṭilābhoti? Na hevaṃ vattabbe…pe… nanu catuvokārabhavo…pe… attabhāvapaṭilābhoti? Āmantā. Hañci catuvokārabhavo gati…pe… attabhāvapaṭilābho, no ca vata re vattabbe – ‘‘atthi rūpaṃ arūpesū’’ti.
၅၂၅. အတ္ထိ ရူပံ ရူပဓာတုယာ, သော စ ရူပဘဝော ရူပဂတိ ရူပသတ္တာဝာသော ရူပသံသာရော ရူပယောနိ ရူပတ္တဘာဝပဋိလာဘောတိ? အာမန္တာ။ အတ္ထိ ရူပံ အရူပေသု, သော စ ရူပဘဝော ရူပဂတိ။ပေ.။ ရူပတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။ အတ္ထိ ရူပံ ရူပဓာတုယာ, သော စ ပဉ္စဝောကာရဘဝော ဂတိ။ပေ.။ အတ္တဘာဝပဋိလာဘောတိ? အာမန္တာ ။ အတ္ထိ ရူပံ အရူပေသု, သော စ ပဉ္စဝောကာရဘဝော ဂတိ။ပေ.။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။ အတ္ထိ ရူပံ အရူပေသု, သော စ အရူပဘဝော အရူပဂတိ အရူပသတ္တာဝာသော အရူပသံသာရော အရူပယောနိ အရူပတ္တဘာဝပဋိလာဘောတိ? အာမန္တာ။ အတ္ထိ ရူပံ ရူပဓာတုယာ 1, သော စ အရူပဘဝော အရူပဂတိ။ပေ.။ အရူပတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။ အတ္ထိ ရူပံ အရူပေသု, သော စ စတုဝောကာရဘဝော ဂတိ။ပေ.။ အတ္တဘာဝပဋိလာဘောတိ? အာမန္တာ။ အတ္ထိ ရူပံ ရူပဓာတုယာ 2, သော စ စတုဝောကာရဘဝော ဂတိ။ပေ.။ အတ္တဘာဝပဋိလာဘောတိ? န ဟေဝံ ဝတ္တဗ္ဗေ။ပေ.။။
525. Atthi rūpaṃ rūpadhātuyā, so ca rūpabhavo rūpagati rūpasattāvāso rūpasaṃsāro rūpayoni rūpattabhāvapaṭilābhoti? Āmantā. Atthi rūpaṃ arūpesu, so ca rūpabhavo rūpagati…pe… rūpattabhāvapaṭilābhoti? Na hevaṃ vattabbe…pe… atthi rūpaṃ rūpadhātuyā, so ca pañcavokārabhavo gati…pe… attabhāvapaṭilābhoti? Āmantā . Atthi rūpaṃ arūpesu, so ca pañcavokārabhavo gati…pe… attabhāvapaṭilābhoti? Na hevaṃ vattabbe…pe…. Atthi rūpaṃ arūpesu, so ca arūpabhavo arūpagati arūpasattāvāso arūpasaṃsāro arūpayoni arūpattabhāvapaṭilābhoti? Āmantā. Atthi rūpaṃ rūpadhātuyā 3, so ca arūpabhavo arūpagati…pe… arūpattabhāvapaṭilābhoti? Na hevaṃ vattabbe…pe… atthi rūpaṃ arūpesu, so ca catuvokārabhavo gati…pe… attabhāvapaṭilābhoti? Āmantā. Atthi rūpaṃ rūpadhātuyā 4, so ca catuvokārabhavo gati…pe… attabhāvapaṭilābhoti? Na hevaṃ vattabbe…pe….
ရူပာနံ နိသ္သရဏံ အရူပံ ဝုတ္တံ ဘဂဝတာ, အတ္ထိ ရူပံ အရူပေသူတိ? အာမန္တာ ။ ကာမာနံ နိသ္သရဏံ နေက္ခမ္မံ ဝုတ္တံ ဘဂဝတာ, အတ္ထိ နေက္ခမ္မေသု ကာမာ, အတ္ထိ အနာသဝေသု အာသဝာ, အတ္ထိ အပရိယာပန္နေသု ပရိယာပန္နာတိ? န ဟေဝံ ဝတ္တဗ္ဗေ။ပေ.။။
Rūpānaṃ nissaraṇaṃ arūpaṃ vuttaṃ bhagavatā, atthi rūpaṃ arūpesūti? Āmantā . Kāmānaṃ nissaraṇaṃ nekkhammaṃ vuttaṃ bhagavatā, atthi nekkhammesu kāmā, atthi anāsavesu āsavā, atthi apariyāpannesu pariyāpannāti? Na hevaṃ vattabbe…pe….
အရူပေ ရူပကထာ နိဋ္ဌိတာ။
Arūpe rūpakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၈. အရူပေ ရူပကထာဝဏ္ဏနာ • 8. Arūpe rūpakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၈. အရူပေရူပကထာဝဏ္ဏနာ • 8. Arūperūpakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၈. အရူပေရူပကထာဝဏ္ဏနာ • 8. Arūperūpakathāvaṇṇanā
