| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
৬. ছট্ঠৰগ্গো
6. Chaṭṭhavaggo
(৫৬) ৪. আরুপ্পকথা
(56) 4. Āruppakathā
৪৫৫. আকাসানঞ্চাযতনং অসঙ্খতন্তি? আমন্তা। নিব্বানং তাণং লেণং সরণং পরাযনং অচ্চুতং অমতন্তি? ন হেৰং ৰত্তব্বে…পে॰… আকাসানঞ্চাযতনং অসঙ্খতং, নিব্বানং অসঙ্খতন্তি? আমন্তা। দ্ৰে অসঙ্খতানীতি? ন হেৰং ৰত্তব্বে…পে॰… দ্ৰে অসঙ্খতানীতি? আমন্তা। দ্ৰে তাণানি…পে॰… অন্তরিকা ৰাতি? ন হেৰং ৰত্তব্বে…পে॰…।
455. Ākāsānañcāyatanaṃ asaṅkhatanti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… ākāsānañcāyatanaṃ asaṅkhataṃ, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
আকাসানঞ্চাযতনং অসঙ্খতন্তি? আমন্তা। আকাসানঞ্চাযতনং ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? আমন্তা। অসঙ্খতং ভৰো গতি সত্তাৰাসো সংসারো যোনি ৰিঞ্ঞাণট্ঠিতি অত্তভাৰপটিলাভোতি? ন হেৰং ৰত্তব্বে…পে॰…।
Ākāsānañcāyatanaṃ asaṅkhatanti? Āmantā. Ākāsānañcāyatanaṃ bhavo gati sattāvāso saṃsāro yoni viññāṇaṭṭhiti attabhāvapaṭilābhoti? Āmantā. Asaṅkhataṃ bhavo gati sattāvāso saṃsāro yoni viññāṇaṭṭhiti attabhāvapaṭilābhoti? Na hevaṃ vattabbe…pe….
অত্থি আকাসানঞ্চাযতনূপগং কম্মন্তি? আমন্তা। অত্থি অসঙ্খতূপগং কম্মন্তি? ন হেৰং ৰত্তব্বে…পে॰… অত্থি আকাসানঞ্চাযতনূপগা সত্তাতি? আমন্তা। অত্থি অসঙ্খতূপগা সত্তাতি? ন হেৰং ৰত্তব্বে…পে॰…।
Atthi ākāsānañcāyatanūpagaṃ kammanti? Āmantā. Atthi asaṅkhatūpagaṃ kammanti? Na hevaṃ vattabbe…pe… atthi ākāsānañcāyatanūpagā sattāti? Āmantā. Atthi asaṅkhatūpagā sattāti? Na hevaṃ vattabbe…pe….
আকাসানঞ্চাযতনে সত্তা জাযন্তি জীযন্তি মীযন্তি চৰন্তি উপপজ্জন্তীতি? আমন্তা। অসঙ্খতে সত্তা জাযন্তি জীযন্তি মীযন্তি চৰন্তি উপপজ্জন্তীতি? ন হেৰং ৰত্তব্বে…পে॰… আকাসানঞ্চাযতনে অত্থি ৰেদনা সঞ্ঞা সঙ্খারা ৰিঞ্ঞাণন্তি? আমন্তা। অসঙ্খতে অত্থি ৰেদনা সঞ্ঞা সঙ্খারা ৰিঞ্ঞাণন্তি? ন হেৰং ৰত্তব্বে…পে॰… আকাসানঞ্চাযতনং চতুৰোকারভৰোতি? আমন্তা। অসঙ্খতং চতুৰোকারভৰোতি? ন হেৰং ৰত্তব্বে…পে॰…।
Ākāsānañcāyatane sattā jāyanti jīyanti mīyanti cavanti upapajjantīti? Āmantā. Asaṅkhate sattā jāyanti jīyanti mīyanti cavanti upapajjantīti? Na hevaṃ vattabbe…pe… ākāsānañcāyatane atthi vedanā saññā saṅkhārā viññāṇanti? Āmantā. Asaṅkhate atthi vedanā saññā saṅkhārā viññāṇanti? Na hevaṃ vattabbe…pe… ākāsānañcāyatanaṃ catuvokārabhavoti? Āmantā. Asaṅkhataṃ catuvokārabhavoti? Na hevaṃ vattabbe…pe….
৪৫৬. ন ৰত্তব্বং – ‘‘চত্তারো আরুপ্পা অসঙ্খতা’’তি? আমন্তা। ননু চত্তারো আরুপ্পা অনেজা ৰুত্তা ভগৰতাতি? আমন্তা। হঞ্চি চত্তারো আরুপ্পা অনেজা ৰুত্তা ভগৰতা, তেন ৰত রে ৰত্তব্বে ‘‘চত্তারো আরুপ্পা অসঙ্খতা’’তি।
456. Na vattabbaṃ – ‘‘cattāro āruppā asaṅkhatā’’ti? Āmantā. Nanu cattāro āruppā anejā vuttā bhagavatāti? Āmantā. Hañci cattāro āruppā anejā vuttā bhagavatā, tena vata re vattabbe ‘‘cattāro āruppā asaṅkhatā’’ti.
আরুপ্পকথা নিট্ঠিতা।
Āruppakathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৪. আরুপ্পকথাৰণ্ণনা • 4. Āruppakathāvaṇṇanā
