| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
6. ඡට්‌ඨවග්‌ගො
6. Chaṭṭhavaggo
(56) 4. ආරුප්‌පකථා
(56) 4. Āruppakathā
455. ආකාසානඤ්‌චායතනං අසඞ්‌ඛතන්‌ති? ආමන්‌තා. නිබ්‌බානං තාණං ලෙණං සරණං පරායනං අච්‌චුතං අමතන්‌ති? න හෙවං වත්‌තබ්‌බෙ…පෙ.… ආකාසානඤ්‌චායතනං අසඞ්‌ඛතං, නිබ්‌බානං අසඞ්‌ඛතන්‌ති? ආමන්‌තා. ද්‌වෙ අසඞ්‌ඛතානීති? න හෙවං වත්‌තබ්‌බෙ…පෙ.… ද්‌වෙ අසඞ්‌ඛතානීති? ආමන්‌තා. ද්‌වෙ තාණානි…පෙ.… අන්‌තරිකා වාති? න හෙවං වත්‌තබ්‌බෙ…පෙ.….
455. Ākāsānañcāyatanaṃ asaṅkhatanti? Āmantā. Nibbānaṃ tāṇaṃ leṇaṃ saraṇaṃ parāyanaṃ accutaṃ amatanti? Na hevaṃ vattabbe…pe… ākāsānañcāyatanaṃ asaṅkhataṃ, nibbānaṃ asaṅkhatanti? Āmantā. Dve asaṅkhatānīti? Na hevaṃ vattabbe…pe… dve asaṅkhatānīti? Āmantā. Dve tāṇāni…pe… antarikā vāti? Na hevaṃ vattabbe…pe….
ආකාසානඤ්‌චායතනං අසඞ්‌ඛතන්‌ති? ආමන්‌තා. ආකාසානඤ්‌චායතනං භවො ගති සත්‌තාවාසො සංසාරො යොනි විඤ්‌ඤාණට්‌ඨිති අත්‌තභාවපටිලාභොති? ආමන්‌තා. අසඞ්‌ඛතං භවො ගති සත්‌තාවාසො සංසාරො යොනි විඤ්‌ඤාණට්‌ඨිති අත්‌තභාවපටිලාභොති? න හෙවං වත්‌තබ්‌බෙ…පෙ.….
Ākāsānañcāyatanaṃ asaṅkhatanti? Āmantā. Ākāsānañcāyatanaṃ bhavo gati sattāvāso saṃsāro yoni viññāṇaṭṭhiti attabhāvapaṭilābhoti? Āmantā. Asaṅkhataṃ bhavo gati sattāvāso saṃsāro yoni viññāṇaṭṭhiti attabhāvapaṭilābhoti? Na hevaṃ vattabbe…pe….
අත්‌ථි ආකාසානඤ්‌චායතනූපගං කම්‌මන්‌ති? ආමන්‌තා. අත්‌ථි අසඞ්‌ඛතූපගං කම්‌මන්‌ති? න හෙවං වත්‌තබ්‌බෙ…පෙ.… අත්‌ථි ආකාසානඤ්‌චායතනූපගා සත්‌තාති? ආමන්‌තා. අත්‌ථි අසඞ්‌ඛතූපගා සත්‌තාති? න හෙවං වත්‌තබ්‌බෙ…පෙ.….
Atthi ākāsānañcāyatanūpagaṃ kammanti? Āmantā. Atthi asaṅkhatūpagaṃ kammanti? Na hevaṃ vattabbe…pe… atthi ākāsānañcāyatanūpagā sattāti? Āmantā. Atthi asaṅkhatūpagā sattāti? Na hevaṃ vattabbe…pe….
ආකාසානඤ්‌චායතනෙ සත්‌තා ජායන්‌ති ජීයන්‌ති මීයන්‌ති චවන්‌ති උපපජ්‌ජන්‌තීති? ආමන්‌තා. අසඞ්‌ඛතෙ සත්‌තා ජායන්‌ති ජීයන්‌ති මීයන්‌ති චවන්‌ති උපපජ්‌ජන්‌තීති? න හෙවං වත්‌තබ්‌බෙ…පෙ.… ආකාසානඤ්‌චායතනෙ අත්‌ථි වෙදනා සඤ්‌ඤා සඞ්‌ඛාරා විඤ්‌ඤාණන්‌ති? ආමන්‌තා. අසඞ්‌ඛතෙ අත්‌ථි වෙදනා සඤ්‌ඤා සඞ්‌ඛාරා විඤ්‌ඤාණන්‌ති? න හෙවං වත්‌තබ්‌බෙ…පෙ.… ආකාසානඤ්‌චායතනං චතුවොකාරභවොති? ආමන්‌තා. අසඞ්‌ඛතං චතුවොකාරභවොති? න හෙවං වත්‌තබ්‌බෙ…පෙ.….
Ākāsānañcāyatane sattā jāyanti jīyanti mīyanti cavanti upapajjantīti? Āmantā. Asaṅkhate sattā jāyanti jīyanti mīyanti cavanti upapajjantīti? Na hevaṃ vattabbe…pe… ākāsānañcāyatane atthi vedanā saññā saṅkhārā viññāṇanti? Āmantā. Asaṅkhate atthi vedanā saññā saṅkhārā viññāṇanti? Na hevaṃ vattabbe…pe… ākāsānañcāyatanaṃ catuvokārabhavoti? Āmantā. Asaṅkhataṃ catuvokārabhavoti? Na hevaṃ vattabbe…pe….
456. න වත්‌තබ්‌බං – ‘‘චත්‌තාරො ආරුප්‌පා අසඞ්‌ඛතා’’ති? ආමන්‌තා. නනු චත්‌තාරො ආරුප්‌පා අනෙජා වුත්‌තා භගවතාති? ආමන්‌තා. හඤ්‌චි චත්‌තාරො ආරුප්‌පා අනෙජා වුත්‌තා භගවතා, තෙන වත රෙ වත්‌තබ්‌බෙ ‘‘චත්‌තාරො ආරුප්‌පා අසඞ්‌ඛතා’’ති.
456. Na vattabbaṃ – ‘‘cattāro āruppā asaṅkhatā’’ti? Āmantā. Nanu cattāro āruppā anejā vuttā bhagavatāti? Āmantā. Hañci cattāro āruppā anejā vuttā bhagavatā, tena vata re vattabbe ‘‘cattāro āruppā asaṅkhatā’’ti.
ආරුප්‌පකථා නිට්‌ඨිතා.
Āruppakathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 4. ආරුප්‌පකථාවණ්‌ණනා • 4. Āruppakathāvaṇṇanā
