| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
অসাধারণাদিৰণ্ণনা
Asādhāraṇādivaṇṇanā
৩৩৮. পুরিম পঞ্হন্তি ‘‘কতি ছেদনকানী’’তিআদিপঞ্হানং পুরে ৰুত্তং পঞ্হং। তত্থাতি ‘‘ৰীসং দ্ৰে সতানী’’তিআদিপাঠে। ‘‘দ্ৰেঅনিযতেহী’’তি পদস্স অসমাহারদিগুৰাক্যং দস্সেন্তো আহ ‘‘দ্ৰীহি অনিযতেহী’’তি। ‘‘সদ্ধি’’ন্তি ইমিনা সহাদিযোগে করণৰচনন্তি দস্সেতি।
338.Purima pañhanti ‘‘kati chedanakānī’’tiādipañhānaṃ pure vuttaṃ pañhaṃ. Tatthāti ‘‘vīsaṃ dve satānī’’tiādipāṭhe. ‘‘Dveaniyatehī’’ti padassa asamāhāradiguvākyaṃ dassento āha ‘‘dvīhi aniyatehī’’ti. ‘‘Saddhi’’nti iminā sahādiyoge karaṇavacananti dasseti.
গাথাযং ‘‘ধোৰনঞ্চ সিক্খাপদ’’ন্তিআদিনা যোজনা কাতব্বা। দ্ৰে লোমাতি দ্ৰে এল়কলোমসিক্খাপদানি।
Gāthāyaṃ ‘‘dhovanañca sikkhāpada’’ntiādinā yojanā kātabbā. Dve lomāti dve eḷakalomasikkhāpadāni.
‘‘সকলো’’তিআদিকায অড্ঢতেয্যগাথায যোজনা সুৰিঞ্ঞেয্যাৰ।
‘‘Sakalo’’tiādikāya aḍḍhateyyagāthāya yojanā suviññeyyāva.
সঙ্ঘম্হা দস নিস্সরেতি এত্থ ‘‘সঙ্ঘম্হা নিস্সারীযতী’’তি (পাচি॰ ৬৮০, ৭৩০) এৰং ৰুত্তা দসাতি যোজনানযং দস্সেন্তো আহ ‘‘সঙ্ঘম্হা নিস্সারীযতী’’তিআদি। তত্থাতি ভিক্খুনিৰিভঙ্গে। তথাতি যথা খুদ্দকা, তথাতি অত্থো। ইতীতি এৰং।
Saṅghamhādasa nissareti ettha ‘‘saṅghamhā nissārīyatī’’ti (pāci. 680, 730) evaṃ vuttā dasāti yojanānayaṃ dassento āha ‘‘saṅghamhā nissārīyatī’’tiādi. Tatthāti bhikkhunivibhaṅge. Tathāti yathā khuddakā, tathāti attho. Itīti evaṃ.
তেসন্তি পারাজিকানং। কণ্হসপ্পাদযো দুরাসদা ৰিয দুরাসদা হোন্তীতি যোজনা। ‘‘দুরূপগমনাতি ইমিনা সদধাতুযা গত্যত্থং দস্সেতি। দুরাসজ্জনাতি দুক্খেন আসজ্জিতব্বা, আসজ্জিতুং ন সুকরাতি অত্থো। সমূপমাতি সমউপমা। সমূপমাকারং দস্সেন্তো আহ ‘‘যথা’’তিআদি।
Tesanti pārājikānaṃ. Kaṇhasappādayo durāsadā viya durāsadā hontīti yojanā. ‘‘Durūpagamanāti iminā sadadhātuyā gatyatthaṃ dasseti. Durāsajjanāti dukkhena āsajjitabbā, āsajjituṃ na sukarāti attho. Samūpamāti samaupamā. Samūpamākāraṃ dassento āha ‘‘yathā’’tiādi.
সাধারণন্তি অট্ঠহি পারাজিকেহি সাধারণং। একেকস্স পারাজিকস্সাতি সম্বন্ধো। অৰিরূল়্হী ভৰন্তি তেতি এত্থ উপমানোপমেয্যানং পাকটভাৰং কত্ৰা যোজনানযং দস্সেন্তো আহ ‘‘যথা এতে’’তিআদি। অৰিরূল়্হিধম্মাতি অৰিরূল়্হীসভাৰা। পকতিসীলভাৰেনাতি পকতিযা সীলৰন্তভাৰেন, ‘‘পকতিসীলাভাৰেনা’’তিপি পাঠো, পকতিসীলস্স অভাৰেন, অভাৰহেতূতি অত্থো। এত্তাৰতাতি এত্তকেন ‘‘অট্ঠেৰ পারাজিকা’’তিআদিৰচনমত্তেন, দস্সিতং হোতীতি সম্বন্ধো। ৰিভত্তিযোতি পারাজিকাদিৰসেন ৰিভজিতব্বাতি ৰিভত্তিযোতি। তত্থাতি ‘‘তেৰীসতি সঙ্ঘাদিসেসা’’তিআদিপাঠে । সব্বসঙ্গাহিকৰচনন্তি সব্বেসং তিণ্ণং সমথানং, সব্বাসং ৰা আপত্তীনং সমথানং সঙ্গাহিকৰচনং। ‘‘দ্ৰীহি সমথেহী’’তি সম্মুখাৰিনযেন চ পটিঞ্ঞাতকরণেন চাতি দ্ৰীহি সমথেহি।
Sādhāraṇanti aṭṭhahi pārājikehi sādhāraṇaṃ. Ekekassa pārājikassāti sambandho. Avirūḷhī bhavanti teti ettha upamānopameyyānaṃ pākaṭabhāvaṃ katvā yojanānayaṃ dassento āha ‘‘yathā ete’’tiādi. Avirūḷhidhammāti avirūḷhīsabhāvā. Pakatisīlabhāvenāti pakatiyā sīlavantabhāvena, ‘‘pakatisīlābhāvenā’’tipi pāṭho, pakatisīlassa abhāvena, abhāvahetūti attho. Ettāvatāti ettakena ‘‘aṭṭheva pārājikā’’tiādivacanamattena, dassitaṃ hotīti sambandho. Vibhattiyoti pārājikādivasena vibhajitabbāti vibhattiyoti. Tatthāti ‘‘tevīsati saṅghādisesā’’tiādipāṭhe . Sabbasaṅgāhikavacananti sabbesaṃ tiṇṇaṃ samathānaṃ, sabbāsaṃ vā āpattīnaṃ samathānaṃ saṅgāhikavacanaṃ. ‘‘Dvīhi samathehī’’ti sammukhāvinayena ca paṭiññātakaraṇena cāti dvīhi samathehi.
এতন্তি ‘‘দ্ৰে উপোসথা দ্ৰে পৰারণা’’তি ৰচনং। ৰিভজনানীতি ৰিভজিতব্বানং ৰিভজনকিরিযায অৰিনাভাৰতো ভাৰৰসেন ৰুত্তং, তস্মা ৰিভজিতব্বাতি ৰিভত্তিযোতি ৰচনত্থো কাতব্বো। অপরাপি ইমা ৰিভত্তিযো হোন্তীতি যোজনা। হেট্ঠা ৰুত্তস্স ‘‘ৰিভত্তিমত্তদস্সনেনেৰ চেতং ৰুত্তং, ন সমথেহি ৰূপসমনৰসেনা’’তি ৰচনস্স অত্থনযতো অঞ্ঞং অত্থনযং দস্সেন্তো আহ ‘‘অথৰা’’তিআদি, ‘‘ইমাপি ৰিভত্তিযো’’তি পদং ‘‘নিস্সাযা’’তি পদে অৰুত্তকম্মং । নিস্সায আপজ্জন্তীতি সম্বন্ধো। তাতি আপত্তিযো। ৰুত্তপ্পকারেহেৰাতি তীহি সমথেহীতি ৰুত্তপকারেহেৰ। তংমূলিকানন্তি তে এৰ উপোসথাদযো মূলমেতাসন্তি তংমূলিকা, তাসং। ইমিনা কারিযূপচারেন ৰুত্তনযং দস্সেতি। তা ৰিভত্তিযোতি উপোসথাদিৰিভত্তিযো।
Etanti ‘‘dve uposathā dve pavāraṇā’’ti vacanaṃ. Vibhajanānīti vibhajitabbānaṃ vibhajanakiriyāya avinābhāvato bhāvavasena vuttaṃ, tasmā vibhajitabbāti vibhattiyoti vacanattho kātabbo. Aparāpi imā vibhattiyo hontīti yojanā. Heṭṭhā vuttassa ‘‘vibhattimattadassaneneva cetaṃ vuttaṃ, na samathehi vūpasamanavasenā’’ti vacanassa atthanayato aññaṃ atthanayaṃ dassento āha ‘‘athavā’’tiādi, ‘‘imāpi vibhattiyo’’ti padaṃ ‘‘nissāyā’’ti pade avuttakammaṃ . Nissāya āpajjantīti sambandho. Tāti āpattiyo. Vuttappakārehevāti tīhi samathehīti vuttapakāreheva. Taṃmūlikānanti te eva uposathādayo mūlametāsanti taṃmūlikā, tāsaṃ. Iminā kāriyūpacārena vuttanayaṃ dasseti. Tā vibhattiyoti uposathādivibhattiyo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / পরিৰারপাল়ি • Parivārapāḷi / ৪. অসাধারণাদি • 4. Asādhāraṇādi
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / অসাধারণাদিৰণ্ণনা • Asādhāraṇādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অসাধারণাদিৰণ্ণনা • Asādhāraṇādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / অসাধারণাদিৰণ্ণনা • Asādhāraṇādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সত্তনগরেসু পঞ্ঞত্তসিক্খাপদৰণ্ণনা • Sattanagaresu paññattasikkhāpadavaṇṇanā
